Kunokon lun Ngun Mutal in Akpayeye Akwuk lun Jeova

“Kas luk su fwala liki oalik . . . fwa kapkapek in ma Nga supala ka.”—ISAIA 55:11.

1. Sang me pupulyuk ke ma tia oana sie inmasrlon sie plan a sie akwuk.

SRIKE nunku ke mokul luo su akola in kasrusr nu ke an loeloes orekmakin sitosa okwelos. Sie selos el simusla akwuk nukewa lal, ke inkanek su el orekmakin in sun an se ma el lungse in sun. Mokul se saye el etu na paye ke an se su el lungse in sun a el etu pa ke inkanek saye puspus su el ku in orekmakin. El akola in akfwalye ku ekulla inkanek su el fwa orekmakin fwin oasr ma eneneyuk in oru ma inge. Ke kutu oiya, me lemlem lun met luo inge pupulyukkin ma tia oana sie ke plan a akwuk. Sie plan ku me lemlem el ku in pupulyukkin nu ke orekma in oru kais sie oiya su simusla tari, tusruktu sie akwuk el ku in orek ke inkanek puspus a tia sie oiya mukena in akpayeye ma inge.

2, 3. (a) Mea weang nu ke akwuk lun Jeova? A fuka el orala akwuk tokin Adam a If elos orala ma koluk? (b) Efu ku kut enenu in etu a kalem na paye ke inkanek in akpayeye akwuk lun Jeova?

² Ke orekma lun God in akpayeye ma lungse lal, oasr akwuk lun Jeova ka, a tia plan mukena. (Efesus 3:11) Ma el lungse in akpayeye nu sin met a ke fwalu ke mutawauk me in weang pa nu ke akwuk lal inge, aok el lungse fwalu in ekulla nu ke sie paredais tu met sumwosmwos ku in muta ka oasr misla a insemwomwo ma patpat. (Genesis 1:28) Ke pal se Adam a If elos orala ma koluk, Jeova el sa in orala inkanek mwomwo in akpayeye akwuk lal. (Ridi Genesis 3:15.) Jeova el akkalemye la u lal in kosrao su pupulyukkinyuk oana mutan kiyel el oswela sie “fute,” ku Mwen se, a fute se inge fwa kunausella Setan, meyen el pa sripen ma koluk inge. A fute se inge el fwa akwanginyela ma koluk su met lain se inge el orala.—Hibru 2:14; 1 Jon 3:8.

³ Wangin kutena ku fwin fwalu a in kosrao ku in tulokinye ma God el fwak tari la el fwa oru. (Isaia 46:9-11) Efu ku kut ku in fwak ma inge? Meyen Jeova el orekmakin ngun mutal lal in akpayeye akwuk lal. Ku inge su tia ku in lainyuk el akpayeye la akwuk lun God ‘fwa kapkapek a kutangla.’ (Isaia 55:10, 11) Kut enenu in eis kalem ka a akfwalye moul lasr nu ke inkanek su God el akpayeye akwuk lal. Moul insemwomwo lasr ke pal fwasru el fwal nu ke akpayeyen akwuk inge. Sayen ma inge, me akkeye yok nu ke lulalfongi lasr in liye inkanek mwomwo su Jeova el orekmakin ngun mutal lal. Ke ma inge, lela kut in lutlutkin kunokon lun ku lun God, in pal meeta, ke pal inge, a ke pal fwasru, in akpayeye akwuk lun Jeova.

Kunokon lun Ngun Mutal in Pal Meeta

4. Jeova el akkalemye fuka akwuk lal kais kutu srisrik?

⁴ In pal meeta, Jeova el akkalemye akwuk lal kais kutu srisrik. Ma se meet, me akul ke Fute su el mwulela el sie ma “lukma.” (1 Korint 2:7) Tokin yea 2,000 Jeova el sifwil akkalemye ke akwuk lal ke fute. (Ridi Genesis 12:7; 22:15-18.) Jeova el akkalemye nu sel Ebream sie mwulela su fwa akpayeye ke inkanek yok. Kas inge “in fute lom” el kalmekin la Fute se e fwa ekla oana sie met, sie tulik natul Ebream. Kut ku in lulalfongi la Setan el loang akmwoye ka ke pal se ipen akwuk se inge akkalemyeyuk. Wangin alolo ka la met lokwalok se inge el lungse na paye in akkolukye ku kunausla sruf lal Ebream a in tulokinye akwuk lun God. Tusruktu, ma inge tia ku in orek, meyen ngun lun God su tia ku in liyeyuk el sang kasru in akpayeye akwuk mwomwo inge. Ke inkanek puspus fuka?

5, 6. Jeova el orekmakin fuka ngun mutal lal in loangela met puspus ke sruf se nu ke pal Fute se el tuku?

⁵ Jeova el orekmakin ku lal in loangela met puspus ke sruf se inge nu ke pal se Fute se inge sikyak. Jeova el fwak nu sel Ebream: “Nga me loeyuk lom.” (Genesis 15:1) Mwulela se inge el yok sripe na paye a tia kas su srikla kalme. Ke sie me pupulyuk, lela kut in nunku akmwoye ke ma sikyak in yea 1919 B.C.E. ke pal se Ebream a Serah elos muta fwin an Gerar ke kitin pal. Ebimelek, togusra lun an Gerar, ke sripen el tia etu la Serah el mutan kiyel Ebream, el eisel Serah meyen el lungsel in oana mutan kiyel. Ya Setan el orala inkanek tu ma inge sikyak ke nunikin lalos, in tulokinyel Serah in oswela fute lal Ebream? Baibel el tia akkalemye. Ma Baibel el akkalemye la Jeova el sramsram nu sin mokul se inge. Ke sie mwemwe, el fwak nu sel Ebimelek in tia kalul Serah.—Genesis 20:1-18.

⁶ Sayen ma inge oasr pa pal saye su Jeova el loangelosla. Jeova el molella Ebream a sou lal ke pal puspus. (Genesis 12:14-20; 14:13-20; 26:26-29) Ke ma inge, met sim lun sam el ku in simusla kel Ebream a ke tulik puspus natul: “[Jeova] El tia fulela kutena met in akkolukyelos, aok, el kai togusra kalos, a fwak: ‘Nik komwos kalye met akmusrala luk, a tia oru ma koluk nu sin met palu luk.’”—Sam 105:14, 15.

7. Ke inkanek puspus fuka Jeova el sang me karungin a molela mutunfwal Israel?

⁷ Ke inkanek lun ngun lal, Jeova el molela met Israel, meyen Fute el tuku ke mutunfwal se inge. Ke inkanek lun ngun mutal lal, Jeova el sang Masap nu sin met Israel, a sang me karungin nu ke akwuk lun alu paye, a kasru met Ju in tia akfokfokyelos ke mano, ke oiyen nasnas lalos, a in tia akkolukye fototo lalos nu sin Jeova. (Exodus 31:18; 2 Korint 3:3) Ke pal lun met nununku, ngun lun Jeova el akkeye met puspus in molela met Israel liki met lokwalok lalos. (Met Nununku 3:9, 10) Ke lusen century puspus nu ke pal se su Jisus el isusla, kalem la God el orekmakin pa ngun mutal lal in molela Jerusalem, an Betleem, a tempel, a an nukewa inge yok sripe nu ke akpayeyen kas palu puspus kel Jisus.

8. Mea akkalemye la ngun mutal el orekmakinyuk in sang kasru nu ke moul a orekma in luti lun Mwen nutin God?

⁸ Ngun mutal el sang kasru nu ke moul a orekma in luti lun Jisus. Ngun mutal orekma ke insiel Mary, paenang el akpayeye, ma se su soenna orek ke kutena pal. Ma inge oru sie mutan in putete a oswela sie Mwen su sumwosmwos, a wangin yurin tulik se inge me selnga lun mise. (Luk 1:26-31, 34, 35) Tok ngun mutal el molella Jisus ke el srakna tulik srisrik liki mise. (Mattu 2:7, 8, 12, 13) Ke pal se Jisus el sun yea 30 matwe, God el akmosraella ke ngun mutal, a srusrngilye a sapkinul in sulkakin a el pa met usru ke tron lal Devid. (Luk 1:32, 33; 4:16-21) Ngun mutal el akkeyel Jisus in orala mwenmwen puspus, a el akkeye met mas, kite met puspus a akmoulyeak met mise puspus. Kain in orekma sakuruk nukewa inge pa me srikasrak nu ke me insemwomwo puspus su kut tupan ye kolyuk lun Jisus oana sie togusra.

9, 10. (a) Ke inkanek fuka ngun mutal el arlana kalem yurin met tuma lutlut lun Jisus in century se meet? (b) Kain in oiya fuka ke akwuk lun Jeova akkalemyeyuk in century se meet?

⁹ Mutawauk in Pentecost 33 C.E., Jeova el orekmakin ngun mutal lal in akmusra met puspus saye su wi ke fute lal Ebream, su pus selos tia wi ke sruf lal Ebream. (Rom 8:15-17; Galetia 3:29) Arlana kalem la ngun mutal oasr yurin met tuma lutlut lun Jisus in century se meet, oru elos in sulkakin peng mwo ke moniyuk a akkeyelos in orala mwenmwen puspus. (Orekma 1:8; 2:1-4; 1 Korint 12:7-11) Ke sripen elos eis me sang in orala mwenmwen puspus, ma inge el akkalemye ke oiya sasu su Jeova el akpayeye akwuk lal. Jeova el tila orekmakin akwuk ke alu ke lusen century puspus su orek pal nukewa ke temple in Jerusalem. El insemwomwo nu ke congregation lun met Kristian su tufwana oakiyuki, a el tila engun nu sin mutunfwal Israel. Mutawauk in pal se, Jeova el orekmakin congregation lun met akmusrala inge in akpayeye akwuk lal.

¹⁰ Orekma in sang molela, in akkeye, a in akmusrala, pa kutu inkanek su Jeova el orekmakin ngun mutal lal in pal meeta in akpayeye akwuk lal fwa eis kutangla a akpayeyuk. Na mea ke pal lasr? Jeova el orekmakin fuka ngun mutal lal in sang kasru nu ke akwuk lal? Kut enenu in etu me top nu ka, meyen kut lungse in orekma fwal nu ke kolyuk lun ngun mutal. Ke ma inge, lela kut in lutlutkin inkanek akosr su Jeova el orekmakin ngun mutal lal ke pal inge.

Kunokon lun Ngun Mutal ke Pal Inge

11. Mea akkalemye la ngun mutal lun God el sie ku su ku in sang kasru nu ke oiyen nasnas inmasrlon met kulansap lun God? A kom akkalemye fuka la kom akos a akesrui ke ngun lun God?

¹¹ Ma se meet, ngun mutal lun God el sang kasru nu sin met kulansap nukewa lun God in nasnas ke oiya nukewa. Met nukewa su lungse in sang kasru nu ke akwuk lun God enenu in nasnas ke moul lalos. (Ridi 1 Korint 6:9-11.) Kutu met su ekla met Kristian paye in pal meeta elos oru ma koluk oana orekma lun kosro, a mokul nu sin mokul. Kain in kena koluk inge su oswela ma koluk puspus ku in oan na paye ke nunak a insielos. (Jemes 1:14, 15) Ne ouinge, met nukewa inge elos “aknasnasyeyuk tari,” a ma inge akkalemye la elos ekulla moul lalos ke inkanek yok su eneneyuk in akinsemwomwoye God. Mea ku in kasru met su lungse God in lain kena koluk lal? Ma se su ku in kasru sie met pa “ngun lun God lasr,” oana 1 Korint 6:11 el akkalemye. Kom fwin kafweang in nasnas ke oiya, kom akkalemye la kom lela ngun lun God in kasru moul lom ke inkanek yok.

12. (a) In fwal nu ke aruruma lal Ezikiel, fuka Jeova el kol u lal? (b) Kom ku in akkalemye fuka la kom orekma fwal nu ke ngun?

¹² Ma se akluo, Jeova el orekmakin ngun lal in kol u lal in fwasr fwal nu ke ma el lungse. Ke aruruma lal Ezikiel, u lun Jeova in kosrao el akkalemyeyuk oana sie sariot su kasrusr pal nukewa in akpayeye akwuk lun Jeova. Mea mokle sariot in som nu ke sie an? Topuk nu ka pa ngun mutal. (Ezikiel 1:20, 21) Lela kut in esam la u lun Jeova orekla ke ip luo, sie ip ka oasr in kosrao a sie oasr fwin fwalu. Fwin ngun mutal el kol ipen u lun God in kosrao, ma inge el kol pa u lun God fwin fwalu. Kut fwin akos masap nukewa a oaru nu ke akwuk nukewa su kut eis sin u lun God fwin fwalu, kom akkalemye la kom wi pal nukewa ke sariot lun Jeova yen nukewa el som nu we a kom orekma fwal nu ke ngun mutal.—Hibru 13:17.

13, 14. (a) Su wi ke “fwil se inge” su Jisus el akkalemye? (b) Sang me pupulyuk la God el orekmakin ngun mutal lal in akkalemye ma paye lun Baibel. (Srike liye pok se inge “Ya Kom Akfwalye Etauk lom ke Ma Paye su Yokyokelik?”)

¹³ Ma se aktolu, Jeova el orekmakin ngun mutal in kasre kut in etu a kalem ke ma paye su oasr in Baibel. (Soakas 4:18) “Met kulansap oaru a lalmetmet” elos orekmakin magasin se inge ke lusen pal loeloes in akkalemye ma paye lun Baibel. (Mattu 24:45) Ke sie me pupulyuk, lela kut in nunku ke etauk lasr ke met nukewa su wi ke “fwil se inge” su Jisus el fwak. (Ridi Mattu 24:32-34.) Nu ke fwil fuka Jisus el sramsramkin? Me lutlut se inge “Mea Kalmen Oasr Tari Lun Kraist Nu Sum?” el akuteye la Jisus el sramsramkin met tuma lutlut lal su akmusrala ke ngun mutal, a tia nu sin met koluk.a Met tuma lutlut akmusrala nukewa lun Jisus, in century se meet a ke pal se inge, elos pa fwil lun met su fwa liye me akul a elos kalem pa ke kalmen me akul nukewa, a elos kalem la Jisus el “apkuran, aok nu ke mutunoaoa.”

¹⁴ Mea kalmen me akuteye inge nu sesr? Fwinne kut tia ku in etu lusen pal ke “fwil se inge,” tusruktu kut enenu in esam pal nukewa ke ma puspus ke kas inge “fwil”: Kas se inge el kalmekin nu sin met puspus su oasr ke matwe nukewa a moul ke sie lusen pal; pal se inge el tia arlana loes; a oasr saflaiyen lusen pal se inge. (Exodus 1:6) Ke ma inge, fuka kut ku in eis kalem ke kas lun Jisus ke “fwil se inge”? Kalem la el lungse in akkalemye la met akmusrala su moul tari in pal se ke me akul mutawauk in liyeyuk in 1914 a kutu selos fwa liye mutaweyen ongoiye lulap. Oasr mutaweyen fwil se inge, a oasr pa saflaiye. Me akpayeyen me akul nukewa akkalemye kalem la ongoiye lulap arlana apkuran. Kafweang lom in moniyuk pal nukewa, a in sano pal nukewa, kom akkalemye la kom etu a orekmakin me aksumwos nu ke etauk lasr ke ma paye lun Baibel, a kom akos kolyuk lun ngun mutal.—Mark 13:37.

15. Mea akkalemye la ngun mutal pa akkeye kut in sulkakin peng mwo?

¹⁵ Ma se akakosr, ngun mutal el akkeye kut in sulkakin peng mwo. (Orekma 1:8) Ya oasr ma saye su ku in akuteye la fuka peng mwo sulkakinyukelik fwin fwalu nufon? Nunku ke ma inge. Saap kom sie sin met puspus su arlana mwekin ku tufwal, a ke sripe inge, oasr pal kom fwak kas inge, ‘Nga tia ku in wi oru orekma in luti sie loom nu ke sie loom!’ Tusruktu, ke pal inge kom sie met fwakak peng mwo su arlana moniyuk in wi ke orekma in luti.b Oasr Met Lo lun Jeova su oaru elos kafweang in sulkakin peng mwo fwinne oasr me kalyai ku me lain upa. Ngun mutal lun God mukena ku in akkeye kut in kutangla ke ma upa puspus a in oru ma puspus su tia ku in orek ke ku lasr sifwana. (Maika 3:8; Mattu 17:20) Kom akkalemye la kom akos a akesrui nu ke ngun lun God fwin kom wi pal nukewa ke orekma in luti peng mwo.

Kunokon lun Ngun Mutal ke Pal Fwasru

16. Efu ku kut ku in lulalfongi la Jeova el fwa molela met kulansap nukewa lal ke pal in ongoiye lulap?

¹⁶ Ke pal fwasru, Jeova el fwa orekmakin ngun mutal lal ke inkanek puspus su arlana kalem in akpayeye akwuk lal. Lela kut in lutlutkin meet ke orekma lal in molela met kulansap lal, Oana ke ma kut kalweni tari, Jeova el orekmakin ku lal in pal meeta in loangela met puspus a met Israel oana sie mutunfwal. Ke ma inge, kut ku in lulalfongi la el e fwa orekmakin pa ngun mutal lal in molela met kulansap lal ke lusen ongoiye lulap su apkuran in sikyak, Kut tia enenu in motko ke inkanek su Jeova el fwa orekmakin in karungin a molikutla. A, kut ku in ngetla nu ke pal fwasru wi lulalfongi, meyen kut etu la met nukewa su lungse Jeova fwa tia mwukinyukla ye mutal a ngun mutal ku in kasrelos yen nukewa elos oasr we.—2 Kronikel 16:9; Sam 139:7-12.

17. Jeova el fwa orekmakin fuka ngun mutal lal ke fwal sasu?

¹⁷ Jeova el orekmakin fuka ngun mutal lal ke fwal sasu? Ngun lun Jeova fwa sang kasru nu ke buk in limlim sasu su fwa ikakla in pal san. (Fwakyuk 20:12) Ma fuka oasr ke buk limlim inge? Kalem la, masap puspus lun Jeova nu sesr ke lusen sie tausan yea. Ya kom ngetla nu ke pal fwasru in lutlutkin koanon buk in limlim inge? Aok kut lungse na paye in sano ke fwal sasu se inge. Kut tia ku in lumala ke nunak lasr ke oiya mwomwo nukewa su kut fwa insemwomwokin ke moul in pal se ke pal se Jeova el fwa orekmakin ngun mutal lal in akpayeye akwuk lal ke fwalu a nu sin met nukewa su fwa moul we.

18. Sulela fuka kom lungse in akpayeye?

¹⁸ Lela kut in tia mwulkunla la akwuk lun Jeova e fwa akpayeye ke inkanek nukewa, meyen el orekmakin ngun mutal lal. A pa inge ku su fokoko emeet in kosrao a fwin fwalu su el orekmakin in akpayeye akwuk lal. Akwuk inge ku in akinsemwomwoye kom. Ke ma inge, lela kom in pre a siyuk pal nukewa sin Jeova ke ngun mutal lal a kom in akfwalye moul lom fwal nu ke kolyuk lun ku inge. (Luk 11:13) Kom fwin oru ma inge, kom ku in fwinsrak in moul oana ke akwuk lun Jeova nu sin metu in moul, kalme pa in moul ke sie Paredais fwin fwalu.

[Footnote]

Ya Kom Esam?

• Ke inkanek puspus fuka Jeova el orekmakin ngun mutal lal in pal meeta in akpayeye akwuk lal kais kutu srisrik?

• Jeova el orekmakin fuka ngun mutal lal ke pal inge?

• Jeova el fwa orekmakin fuka ngun mutal lal ke pal fwasru in akpayeye akwuk lal?

[Petsac ke sra 10]

Ya Kom Akfwalye Etauk lom ke Ma Paye su Yokyokelik?

Jeova el tafwela in oru kalem ma paye lun Baibel nu sin met lal. Mea kutu me aksumwos nu ke me luti su akkalemeyuk ke Tauer in San?

▪ Me pupulyuk lun Jisus ke me pulol akkalemye ke me lutlut mwomwo fuka ke kapkapek ke orekma in kulansap nu sin God? (Mattu 13:33)—July 1, 2008, sra 25-26.

▪ Ngea pal in pang nu sin met Kristian su oasr fwinsrak in kosrao aksafyeyukla?—May 1, 2007 (Kas English), sra 30-31.

▪ Mea kalmen in alu nu sin Jeova “in ngun”? (Jon 4:24)—February 1, 2003, sra 10.

▪ Ke kas in pupulyuk piyaka inkalkal su u lulap elos kulansap ka? (Fwakyuk 7:15)—May 1, 2002 (Kas English), sra 30-31.

▪ Ngea srela lun sip a goat e fwa orek? (Mattu 25:31-33)—May 1, 1996, sra 10-20.