“Moniyuk In Ngunumwos”
“Ke alken, a tia alsrangesr. Moniyuk in ngunumwos. Orekma nu sin Leum.”—ROM 12:11.
1. Efu ku met Israel elos kisekin kosro a kutupa me kise?
JEOVA el aksaokye kafweang yok lun met kulansap nukewa lal in akkalemye lungse lalos nu sel a ke elos akos ma lungse lal. In pal meeta, el insemwomwo in eis kain in me kise puspus, fwin ma inge pa kosro ku kutupa me kise. Ma inge orek sin met Israel fwal nu ke akwuk lun Masap su God el sang nu sel Moses, meyen elos suk in eis nunak munas nu ke ma koluk lalos in akkalemye kulo lalos nu sin God. Ke congregation lun met Kristian, Jeova el tia siyuk sesr in kisekin me kise, oana ke kosro ku kutena me kise. Tusruktu, in sapta 12 ke leta lal nu sin met Kristian in an Rom, met sap Poul el akkalemye la kut srakna enenu in kisekin me kise. Lela kut in liye la fuka kut ku in oru ma inge.
Sie Me Kise Moul
2. Oana met Kristian, kain in moul fuka kut moulkin, a mea eneneyuk nu ka?
2 Ridi Rom 12:1, 2. Ke mutaweyen leta lal, Poul el akkalemye kalem la met Kristian akmusrala, fwinne elos met Ju ku tia, elos fwakyuk oana met sumwosmwos ye mutun God ke inkanek lun lulalfongi a tia ke orekma lalos. (Rom 1:16; 3:20-24) In sapta 12, Poul el akuteye la met Kristian elos enenu in akkalemye kulo wi kas in kaksak lalos ke elos kisekin ma puspus ke moul lalos. In akpayeye ma inge, kut enenu in oru sulela mwomwo lasr. Ke sripen kut usrui oiyen sesumwos, paenang kut oasr ye “masap lun ma koluk a mise.” (Rom 8:2) Ke ma inge, kut enenu in ekla ku aksasuyeyuk, “in ekla sasu insiesr.” (Efesus 4:23) Kain in ekla inge ku in akpayeye mukena ke kasru lun God a lun ngun mutal lal. Kut enenu pa in kafweang yok orekmakin ‘ku lun nunak lasr in oru sulela mwo.’ Kalmen ma inge pa kut enenu in oru ke ku lasr kewa in tia “oana luman met fwal se inge,” ke oiyen moul fokfok, me akengan koluk, a ke nunak tia mwo.—Efesus 2:1-3.
3. Efu ku kut wi oru orekma nukewa lun met Kristian?
3 Poul el kaifwe kut in orekmakin pa ‘ku lun nunak in oru sulela mwomwo’ in akpayeye nu sesr sifwana la “mea lungse lun God, su mwo a me akinsemwomwo a sumwoslanu.” Efu ku kut ridi Baibel len nukewa, nunku yok ke ma kut rid, pre, wi ke meeting nukewa, a ke orekma in sulkakin peng mwo lun Togusrai? Ya kut oru ma inge ke sripen met elder ke congregation elos kaifwe kut in oru ma inge? Paye la, kut aksaokye kas in kasru lun met elder nukewa. Tusruktu kut wi ke orekma nukewa lun met Kristian meyen ngun mutal lun God el akkeye kut in akkalemye lungse paye lasr nu sin Jeova. Sayen ma inge, kut lulalfongi na paye la in akpayeye orekma nukewa inge pa ma lungse lun God nu sesr. (Zekaraia 4:6; Efesus 5:10) Kafweang lasr in moulkin moul mwomwo oana met Kristian ku in oru kut in insemwomwo yok, a God el insemwomwo nu sesr.
Kain in Me Sang Puspus
4, 5. Ke inkanek fuka met Kristian elder elos orekmakin me sang su oasr yurolos?
4 Ridi Rom 12:6-8, 11. Poul el akuteye la “oasr yurosr me sang sie liki sie sin sie fwal nu ke kulang su ase nu sesr.” Kutu ke me sang su Poul el akkalemye pa ke met Kristian elder nukewa su oru orekma in sang me akkeye, in liaung, a elos kaifwe in oru kolyuk lalos ke “alken.”
5 Poul el fwak la kain in oiya inge lun alken enenu in arlana kalem ke inkanek su met liaung elos oru orekma lalos oana met luti a in akpayeye ‘orekma in luti’ lalos. Fus puspus saye ke sapta se inge el akkalemye la kas inge ‘orekma in luti’ su Poul el sramsramkin ka inge el orek nu sin congregation, ku “mano sefwanna.” (Rom 12:4, 5) Orekma inge el oana sie nu ke ma se su akkalemyeyuk in Orekma 6:4, su met sap se inge el fwak: “A kut fwa okak in pre pal e nu kemwa, a in fwakak kas.” Mea weang nu ke kain in orekma in luti inge? Met Kristian elder elos orekmakin me sang su oasr yurolos in akkeye met nukewa ke congregation. Elos akkalemye la elos ‘eiselosyang nu ke orekma inge’ ke elos alken in sang kas in kasru nu sin congregation su tuku ke Kas lun God. A ke kafweang lalos in oru lutlut lalos sifwana wi pre, research, in luti, a in muteta nu yurin met lili in sang me akkeye. Met liaung elos orekmakin me sang su oasr yurolos ke inkanek mwomwo a in karungin met lili nukewa oana sip “ke engun.”—Rom 12:7, 8; 1 Piter 5:1-3.
6. Kut ku in orekmakin fuka kas in kasru su oasr in Rom 12:11, su orekmakinyuk oana sifwe ke me lutlut se inge?
6 Poul el fwak pa: “Ke alken, a tia alsrangesr. Moniyuk in ngunumwos. Orekma nu sin Leum [Jeova].” Kut fwin pulakin la kut alsrangesrla ke orekma lasr in luti peng mwo, kut enenu in akmwoye orekma lasr in lutlut a in sekalani in pre siyuk ke ngun mutal lun Jeova, su ku in kasre kut in sisla oiyen alsrangesr, a in aksasuye moniyuk lasr. (Luk 11:9, 13; Fwakyuk 2:4; 3:14, 15, 19) Ngun mutal el akkeye met Kristian in pal meeta in kaskaskin “orekma sakuruk lun God.” (Orekma 2:4, 11) Oayepa, ngun mutal el ku in akkeye kut in “moniyuk in ngunasr” ke orekma lasr in sulkakin peng mwo.
Inse Pusisel a Fwokpap
7. Efu ku kut enenu in kulansap nu sin God ke inse pusisel a fwokpap?
7 Ridi Rom 12:3, 16. Me sang puspus su oasr yurosr el tuku nu sesr ke sripen “kulang” lun Jeova. Poul el akkalemye pa kas inge: “Ku lasr ma sin God me.” (2 Korint 3:5) Ke ma inge, kut enenu in tia akfulatye kut sifwana. Kut enenu in inse pusisel in akilen la ke kutena fwako mwomwo su kut eis ke orekma in luti lasr el sikyak ke sripen me insemwomwo lun God ka, a tia ke ku lasr sifwana. (1 Korint 3:6, 7) In fwal nu ke ma inge, Poul el akkalemye: “Tu nga fwak . . . nu sin met nu kemwa in masrlomwos, tu lan tia nunku ke el sifwana fulat liki ma fwal lan nunku.” Oasr ma eneneyuk in oasr sunak lasr nu sesr sifwana a in insemwomwo a engun ke orekma in kulansap lasr nu sin Jeova. Tusruktu, kut fwin akkalemye inse fwokpap, ku ke sripen kut etu la oasr ma puspus su kut tia ku in oru, ma inge fwa kasre kut in tia sa akkalemye nunak lasr sifwana. A, kut lungse in “nunak fwal nu ke etauk.”
8. Fuka kut ku in fwasr liki in akkalemye la kut “lalmetmet in nunak [lasr] sifwana”?
8 Tia mwo kut fwin lungse in konkun ke orekma mwomwo lasr. Meyen “God mukena su akkapye” ma kut eokiye. (1 Korint 3:7) Poul el akkalemye la God el kitelik “lupan lulalfongi” nu sin kais sie met ke congregation. Kut tia enenu in nunku mu kut mwo liki met lili wiyesr, a kut enenu in akilen ke ma met lili puspus elos akpayeye fwal nu ke lupan lulalfongi su oasr yurolos. Poul el fwak pa: “Komwos in nunak sefwanna nu sin sie sin sie.” Ke sie pa leta lal, met sap se inge el akkalemye nu sesr la kut in “tia oru kutena ma ke akukuin ku ke konkun lusrongten, a ke inse pusisel lela kais sie in nunku tu met ngie elos mwo liki kom.” (Filippai 2:3) Oasr ma eneneyuk kut in akkalemye inse pusisel paye a kafweang yok in akilen la met lili wiyesr nukewa elos mwo liki kut ke inkanek puspus saye. Inse pusisel e fwa kasre kut in tia “lalmetmet in nunak [lasr] sifwana.” Paye la fwin oasr kunokon mwomwo lun kutu met lili ke congregation ma inge ku in oralos in eteyuk a pengpeng, tusruktu met nukewa elos fwa pulakin me insemwomwo yok ke elos oru “ma su pusisel,” orekma srisrik a nunkeyuk mu tia arlana yok sripe su tia akilenyuk sin metu.—1 Piter 5:5.
Inse Sefwanna lun Congregation
9. Efu ku met sap Poul el lumala met Kristian akmusrala nukewa nu ke laa puspus lun sie mano?
9 Ridi Rom 12:4, 5, 9, 10. Poul el pupulyukkin met Kristian akmusrala nu ke laan sie mano su inse sefwanna in kulansap ye kolyuk lun Kraist, su Sifwe ku Leum lalos. (Kolosse 1:18) El akesmakinye met Kristian akmusrala la oasr laa puspus lun sie mano su tia oana sie orekma lalos a elos fwinne “met puspus, elos mano sefwanna in Kraist.” Ke oiya sana, Poul el kaifwe met Kristian akmusrala fwin an Efesus: “A ke kut kaskas paye in lung, kut fwa kapak in ma nu kemwa in el, su sifwe, aok, Kraist. Ke su mano nu kemwa musa fwal a toeni nu sie, ke ma orala ke kupasr nu kemwa, fwal nu ke srikasrak mwo in orekma in kais sie ip, fwa yokelik mano nu ke musaiyuk lal sifwana in lung.”—Efesus 4:15, 16.
10. Ku fuka “sip ngie” elos enenu in akilen?
10 Fwinne “sip ngie” elos tia wi ke u lun met akmusrala su lumeyuk nu ke monin Kraist, elos ku in lotela me lutlut mwomwo ke me pupulyuk se inge. (Jon 10:16) Poul el akkalemye la Jeova el “likiye ma nukewa nu ye niyel [Kraist], a esalang lan sifwen ma nukewa nu ke congregation.” (Efesus 1:22) Ke pal inge, sip ngie elos oasr ke “ma nukewa” su Jeova el likiye ye kolyuk lun Mwen natul. Elos wi pa ke “ma nukewa” su Kraist el sang nu sin “met kulansap oaru a lalmetmet” lal. (Mattu 24:45-47) Ke ma inge, nu selos su oasr fwinsrak in moul ma patpat fwin fwalu elos enenu in akilen Kraist oana Leum lalos a elos in akpusiselyelos nu sin met kulansap oaru a lalmetmet a ke Governing Body lun u se inge, a nu sin met liaung nukewa ke congregation. (Hibru 13:7, 17) Oiya inge ku in akkeye inse sefwanna lun met Kristian nukewa ke congregation.
11. Inse sefwanna lasr el fwal nu ke mea? A mea kutupa kas in kasru su Poul el akkalemye nu sesr?
11 Kain in inse sefwanna inge el orek ke sripen lungse, “su me kapur lun sumwosna” a inse sefwanna. (Kolosse 3:14) In Rom sapta 12, Poul el akkalemye yok ke oiya inge, ke el fwak la lungse lasr enenu in “tia kutasrik” a “ke lungse met lili” kut enenu in oasr “lungse nu sin sie sin sie.” Ma inge kasre kut in sunakin sie sin sie. Met sap el fwak: “Ke sunakin, komwos in akfulatye sie sin sie.” Aok, tia enenu in tafongla mu ke sripen kut akkalemye lungse nu sin sie met lili paenang kut tia aksumwosye ma koluk lal meyen kut pakomutal. Mo tia ouinge, kut enenu in karungin congregation ke ku lasr kewa in nasnas pal nukewa. Ke pal se Poul el sang kas in kai ke lungse, el fwak pa kas inge: “Komwos in kwase ma koluk a fulfuli nu ke ma mwo.”
Orekma Mwo in Akkalemye Kulang
12. Ke orekma in akkalemye kulang, mea kut ku in lotela ke met Kristian fwin an Macedonia in pal meeta?
12 Ridi Rom 12:13. Lungse lasr nu sin met lili wiyesr fwa mokle kut in “sang nu sin met mwo ma elos enenu” a fwal nu ke ku lasr in oru ma inge. Fwinne kut met sekasrup, kut ku in srakna sang nu sin met enenu ma oasr yurosr. Ke pal se Poul el simusla nu sin met Kristian in an Macedonia, el fwak kas inge: “Fuka in srike lulap nu selos ke keok, engun lulap lalos a sekasrup lulap lalos akyokyelik nu ke kasrup lun sang lulap lalos. Tu oana elos ku, nga met lo kalos, aok, a yok liki ku lalos, elos sang ke lungse lalos, a siyuk na nu sesr ke kaifwe lulap ke ma kulang inge a sie nu sin sie in orekma nu sin met mwo [in an Judea].” (2 Korint 8:2-4) Fwinne elos sekasrup, met Kristian in an Macedonia elos arlana kulang a lungse in kasru met enenu. Elos nunku ke orekma mwo inge oana kunokon na mwomwo in sang ma enenu lun met lili wiyelos fwin an Judea.
13. Mea kalmen in “fwasr tokin ma kulang”?
13 Kas inge “fwasr tokin ma kulang” el tuku ke sie kas Grik su kalmekin nu ke inse mulala in oru ma se. Leng lun Baibel se inge The New Jerusalem Bible el lungasla kas inge oana “suk ke pal mwomwo nukewa in akkalemye kulang.” Oiyen kulang el akkalemyeyuk kutu pal ke kut suli sie met in wi kut mongo, a fwin kut oru ma inge ke sripen lungse, ma inge arlana mwo in kaksakinyuk. Tusruktu kut fwin inse mulala in oru ma se inge, kut fwa koneak inkanek puspus in akkalemye oiyen kulang lasr. Oayepa fwin kut munasla ku wangin ku lasr in suli sie met in wi kut mongo, kut ku in suli sie met lili in nim coffee, tea, ku kutu pa me nim a oiya inge el sie pa inkanek in akkalemye kulang.
14. (a) Kas Grik su lungasyukla nu ke “oiyen kulang” el tuku ke kas fuka luo? (b) Ke orekma in luti, fuka kut ku in akkalemye nunak mwomwo lasr nu sin met sa puspus?
14 Nunak a liye lasr ke moul el weang pa nu ke oiyen kulang lasr. Kas Grik se su lungasyukla oana “oiyen kulang” el tuku ke kas luo su kalmekin nu ke “lungse” a “met sa.” Mea nunak lasr nu sin met saye puspus, ku met sa? Met Kristian nukewa su kafweang in lutlut kas saye tu elos in sulkakin peng mwo nu sin met sa puspus su muta ke territory lun congregation lalos elos ku in oekyukla pa oana met su fwasr tokin kulang. Aok, pus inmasrlos wangin pal mwomwo lalos in lutlut ke sie pa kas sasu. Ne ouinge, kut nukewa ku in sang kasru nu sin met sa puspus ke kut orekmakin mwo buk srisrik se inge Peng Mwo nu sin Met in Mutanfwal Nukewa ke kas English, oasr peng mwo lun Baibel ka ke kas puspus. Ya oasr fwako mwomwo ke kom orekmakin buk srisrik se inge ke orekma in luti lom?
Engun Yurolos su Engan a Asor Yurolos su Asor
15. Fuka Jisus el akkalemye me srikasrak mwomwo oana ke kas in kasru su oasr in Rom 12:15?
15 Ridi Rom 12:15. Kas in kasru lal Poul ke fus se inge el kalmekin la kut enenu in akkalemye la kut pulakin pa ke insemwomwo a asor lun met saye. Kut enenu in etu a kalem ke pulakin lun sie met, fwin el pulakin engan ku asor. Kut fwin moniyuk in akkalemye oiya mwomwo ke moul lasr, kut ku in akkalemye la kut pula pa insemwomwo ku asor lun met puspus. Ke pal se met tuma lutlut 70 lun Kraist elos insemwomwo ke elos folokla ke orekma lalos in sulkakin peng mwo, a ke elos fwakak fwako mwomwo ke orekma lalos, Jisus el “engun ke ngun mutal.” (Luk 10:17-21) El wi pa engun a insemwomwo oana elos. Ke oiya saye, Jisus el ‘tung yurin met su tung’ ke pal se Lazarus met kawuk lal mise.—Jon 11:32-35.
16. Kut ku in akkalemye fuka la kut pula pa ke pulakin lun met lili wiyesr? A su enenu in akkalemye me srikasrak in oru oiya inge?
16 Kut lungse in etawi me srikasrak lun Jisus ke oiya mwomwo lal in engun yurin met engun a in asor yurin met asor. Ke pal se met lili wiyesr el engun, kut lungse pa in akkalemye la kut pula pa ouinge. Ke oiya sana, kut enenu pa in pulakin ke asor a ngal su met lili wiyesr elos pula. Ke pal puspus, kut ku in akkeye met lili wiyesr su pulakin keok ke sripen asor yok lalos kut fwin loang akmwoye ke elos akkalemye asor lalos. A ke kutu pal, ma kut liye a long kelos sun insiesr paenang pulakin lasr kelos arlana kalem ke kut tung pa. (1 Piter 1:22) Met elder elos enenu in orekmakin pa kas in kasru su Poul el simusla inge in akkalemye la elos engun yurin met engun a asor yurin met asor.
17. Mea kut lotela tari ke Rom sapta 12? A mea kut fwa lutlutkin yok ke me lutlut toko?
17 Fus puspus su kut lutlutkin ke Rom sapta 12 el ase nu sesr kas in kasru su kut ku in orekmakin ke moul lasr oana met Kristian a ke fototo lasr nu sin met lili wiyesr. Ke me lutlut toko, kut fwa lutlutkin yok fus lula nukewa ke sapta se inge, su fwa akkalemye la fuka nunak a oiya lasr nu sin met nukewa su tia wi ke congregation lasr, wekunang met nukewa su lain a lungse in oru me kalyai nu sesr.
Ke Inkanek lun Kalweni
• Kut akkalemye fuka la kut “moniyuk in ngunasr”?
• Efu ku kut enenu in kulansap nu sin God ke inse pusisel a fwokpap?
• Ke inkanek puspus fuka kut ku in akkalemye la kut pula pa ke pulakin lun met lili wiyesr?
[Pictures on page 10]
Efu ku kut wi ke orekma nukewa inge lun met Kristian?
[Picture on page 12]
Fuka kais sie sesr ku in sang kasru nu sin met puspus saye in lotela ke Togusrai lun God?