Ya Mani pa Sropon Me Insemwomwo Paye?
SONIA el isusla fwin an Spain. Ke el tulik srisrik, el wi nine kiyel nu ke meeting nukewa lun Met Lo lun Jeova. Tusruktu ke pal se el matula, el som nu London, England, a tia pat el orekma ke ofus lun finance.
Sonia el lungse na paye orekma lal inge. El eis mani yok ke orekma lal inge a el karungin mani yok lun met puspus su el kasrelos ka. Orekma inge arlana mwo, a el arlana insemwomwo in oru ma inge. Sonia el orekma ke lusen ao 18 ke kais sie len, a ke kutu fong el motul na ke lusen ao luo ku tolu. El orekmakin moul lal nufon nu ke orekma lal inge. Tusruktu oasr sie pal, ma se sikyak a ekulla ma nukewa ke moul lal. Sonia el sun mas inge stroke, saap ke sripen el kafofo pal nukewa a wanginla mongla lal. Ke pal se inge el yea 30 na.
Tafu manol Sonia matoltolla el tia ku in mukuikui, a taktu elos tia etu na paye fwin el ku in sifwilpa kaskas. Nine kiyel el sa in som nu yurol nu in an England in karungunul. Ke pal se Sonia el sifwil ku in fwasr, nine kiyel fwak nu sel, “Nga fwa wi meeting lun congregation, a kom enenu in wi yu meyen nga tia ku in som liki kom.” Sonia el insese in welul. Mea sikyak tokin ma inge?
“Ma nukewa nga long nga nunku mu arlana paye.” Sonia el fwak. “Nga engun a insese ke sie lutlut Baibel orek nu sik sin sie selos su paingyu ke pal se meet nga wi ke Kingdom Hall. Met kawuk luk meeta elos tila muteta nu yuruk, tusruktu met kawuk sasu nukewa luk elos kulang a nunku keik.”
Kais kutu srisrik, Sonia el sifwilpa ku in kaskas mwo, a el kapkapek ke etauk lal ke Baibel. Ke lusen sie pal su srik liki yea se, el baptaisla. Pus sin met kawuk lal elos wi sulkakin peng mwo pal nukewa oana pioneer, a el liye la elos arlana insemwomwo ke moul lalos. “Nga lungse in pulakin insemwomwo ke moul luk oana elos,” Sonia el fwak. “Nga lungse in sang nu sin Jeova God ma mwo emeet ke moul luk!” Ke pal inge Sonia el kulansap oana sie pioneer.
Mea Sonia el lotela ke ma sikyak ke moul lal? “Fwinne nga eis mani pukanten ke orekma luk, me fosrnga a nunkela yok ke orekma luk oreyu in arlana fosrnga a asor. Nga mutawauk in akilen la ma yok sripe ke moul pa fototo mwomwo luk nu sin Jeova God. Inge nga insemwomwo na paye.”
Met sap Poul el simusla: “Tu lungse mani okan kain koluk nu kemwa, a kutu, ke elos suk ma inge, elos tafongla liki lalalfongi, a sifwana fwaksilosi ke me asor puspus.” (1 Timote 6:10) Fwal nu ke ma sikyak ke moul lal, Sonia el ku in fwak la fus se inge el paye.