“Inge Pal Mwo”
“Liye! Inge pal mwo. Liye! Inge len in molela.”—2 KORINT 6:2.
1. Efu ku kut enenu in akilen la mea ma yok sripe emeet kut enenu in oru ke kutena pal?
“OASR pal ke ma nu kemwa, a oasr pal lun nunak nu kemwa ye kosrao.” (Ekklisiastis 3:1) Solomon el simla ke ma yok sripe in akilen pal fwal in oru kutena ma yok sripe, oana orekma ke imae, fwufwasryesr, in orek business, ku in sramsram nu sin met puspus. Tusruktu, kut enenu in akilen pa la mea orekma yok sripe emeet kut enenu in oru ke kutena pal. Ke kas saye, kut enenu in etu a kalem ke ma yok sripe ke moul lasr.
2. Kut etu fuka la ke pal se Jisus el sulkakin peng mwo, el etu na paye ke kain in pal su el moul ka?
2 Ke pal se Jisus el oasr fwin fwalu, el etu a akilen ke pulanpal se su el muta ka a ke ma el enenu in oru. Ke sripen arlana kalem ke nunak lal ke ma yok sripe ke moul lal, paenang el etu la pa inge pal se su kas palu puspus ke Messaia e fwa akpayeyuk. (1 Piter 1:11; Fwakyuk 19:10) Oasr orekma su el enenu in oru in lela met puspus in etu la el pa Messaia su God el mwulela ka. El enenu in sang ma lo ke ma paye lun Togusrai a in esani met puspus su e fwa welul oana met usru yurol ke Togusrai. A el enenu in oakiye pelung nu ke congregation lun met Kristian, su fwa akpayeye orekma in sulkakin peng mwo a in oru met tuma lutlut nu in an loeslanu fwalu.—Mark 1:15.
3. Etauk lal Jisus ke pal su el muta ka el sang kasru fuka nu ke orekma lal?
3 Etauk lal inge ke palu sang me akkeye yok nu sel Jisus in moniyuk ke orekma lal in akpayeye ma lungse lun Papa tumal. El fwak nu sin met tuma lutlut puspus lal: “Paye kosrani yok, a pu met orekma. Ke ma inge komwos pre nu sin Leum lun kosrani, tu lan supala met orekma nu in kosrani lal.” (Luk 10:2; Malakai 4:5, 6) Jisus el sulela meet met 12 a tokin kutu pal el sulela pa met 70 inmasrlon met tuma lutlut puspus lal. El sang kas in kasru nu selos, a supwelosla in sulkakin kas mwomwo inge: “Togusrai in kosrao apkurun me.” Kut ku in rid pa ke orekma lal Jisus: “Ke [el] sap tari nu sin met tuma lutlut siengoul luo, el som ingo me in luti a fwakak in siti selos.”—Mattu 10:5-7; 11:1; Luk 10:1.
4. Ke inkanek puspus fuka Poul el etawel Jisus Kraist?
4 Jisus el sie me srikasrak arlana sumwos nu sin met tuma lutlut nukewa lal ke moniyuk a lungse yok lal nu sin God. Pa inge ma met sap Poul el akkalemye ke pal se el kaifwe met lili wiyelos: “Komwos in met etawi yu, oana nga ouyepa met etawi Kraist.” (1 Korint 11:1) Ke inkanek puspus fuka Poul el etawel Kraist? Ma se meet el oru ke ku lal kewa in sulkakin peng mwo lun togusrai. Ke leta puspus su Poul el simusla nu sin congregation puspus, kut ku in liye ka la el orekmakin kas inge oana “ke alken, a tia alsrangesr,” “orekma nu sin Jeova,” “komwos in orekma nu sin Leum pal e nukewa,” a “kutena ma komwos oru, komwos in oru ke insiomwos, oana nu sin Jeova.” (Rom 12:11; 1 Korint 15:58; Kolosse 3:23) Poul el tia mwulkunla ke pal se Leum Jisus Kraist el sikme nu sel ke inkanek soko nu Damaskus a ke kas lun Jisus su met tuma lutlut Ananaias el akkalemye nu sel: “El sie alu sulosolla nu sik, in wisla ek nu ye mutun met pegan a togusra, a tulik natul Israel.”—Orekma 9:15; Rom 1:1, 5; Galetia 1:16.
“Inge Pal Mwo”
5. Mea akkeyel Poul in akpayeye orekma in luti lal ke inkanek moniyuk?
5 Ke pal se kut ridi buk lun Orekma, kut liye kalem ke pulaik a oiyen moniyuk su Poul el akkalemye in akpayeye orekma in luti lal. (Orekma 13:9, 10; 17:16, 17; 18:5) Poul el etu a akilen ke yok sripaiyen pulanpal se su el moul ka. El fwak: “Liye! Inge pal mwo. Liye! Inge len in molela.” (2 Korint 6:2) In pal meeta, in yea 537 B.C.E., pa inge pal mwo nu sin met Israel su sruo fwin an Babulon elos in folokla nu ke an selos sifwana. (Isaia 49:8, 9) Tusruktu mea Poul el lungse in akkalemye ke fus se inge? Fus puspus saye ke sapta se inge ku in kasre kut in liye a etu la mea oasr ke nunak lal.
6, 7. Kunokon mwomwo fuka itukyang nu sin met Kristian akmusrala nukewa ke pal inge, a su wi orekma yurin met akmusrala nukewa?
6 Ke leta lal, in sapta limekosr, Poul el sramsramkin ke kunokon na mwomwo itukyang nu sel a nu sin met Kristian akmusrala nukewa wiyel. (Ridi 2 Korint 5:18-20.) El akuteye la God el panglolos nu ke sie akwuk, pa in akpayeye “orekma in iumwe,” in kaifwe metu elos “in iumwela nu sin God.” Kalmen ma inge pa in sifwilpa akmwoye oiyen kawuk lalos nu sin God, ku in orek misla nu sel.
7 Mutawauk ke pal se orekma in lain in imae Eden orek, met nukewa elos sriyukla liki Jeova. (Rom 3:10, 23) Ke sripen metu sriyukla liki God, ma inge oralos in wangin etauk lalos kel a ke akwuk mwolana lal, su paenang kolyuk nu ke me keok a mise. Poul el simusla: “Kut etu tu ma orekla nukewa sao a tukeni ngalnu nu ke pal se inge.” (Rom 8:22) Tusruktu God el orala inkanek puspus in “kaifwe” metu in foloko nu yurol, ku in orek iumwe nu sel. Pa inge orekma mwomwo su itukyang nu sel Poul a nu sin met Kristian akmusrala wiyel nukewa in pal san. “Pal mwo” inge el “len in molela” nu selos nukewa su filiye lulalfongi lalos nu sel Jisus. Met Kristian akmusrala nukewa a un “sip ngie” su welulos, elos orekma yurolos a kafweang in suli met puspus in eis ma lane puspus ke “pal mwo” inge.—Jon 10:16.
8. Mea oru kas in kaifwe in orek iumwe nu sin God in arlana mwo?
8 Kas in kaifwe inge nu sin metu elos in iumwe nu sin God el arlana mwo meyen metu pa oasr meta lalos paenang fototo lalos nu sin God musalla ke sripen orekma in lain in imae Eden. Ne ouinge, God el orala inkanek in sifwilpa akmwoye ma musalla inge. (1 Jon 4:10, 19) Mea el oru? Poul el sang topuk nu ka: “God ke inkanek lun Kraist el iumwela fwalu nu sel sifwana, tia oekla nu selos ma koluk lalos, a el ase nu sesr kas in iumwe.”—2 Korint 5:19, New World Translation; Isaia 55:6.
9. Mea Poul el oru in akkalemye kulo lal nu ke pakoten lun God?
9 Ke pal se Jeova el orala akwuk ke me kise lun lango, el orala inkanek nu selos su lulalfongi nu sel in eis nunak munas ke ma koluk lalos a in sifwilpa akmwoye fototo lalos ku in akfwalye moul lalos nu sel. Sayen ma inge, el supwela met tutafpo lal in kaifwe met yen nukewa in orek misla nu sel ke srakna oasr pal mwo nu selos in oru. (Ridi 1 Timote 2:3-6.) Poul, ke sripen el akilen ma lungse lun God, a el etu pulanpal su el moul ka, paenang el tia tui in oremakunul sifwana nu ke “orekma in iumwe.” Ma lungse lun Jeova el tia na ekyek. Jeova el srakna lungse in akkalemye nu sin met nukewa me kaifwe lal elos in orek iumwe nu sel ke pal inge. Kas lal Poul “inge pal mwo” a “inge len in molela” srakna fwal ke pal inge. Paye la Jeova el sie God su pakoten yok!—Exodus 34:6, 7.
Nik Kom ‘Mwulkunla Akwuk Paye Ka’
10. Mea kalmen “len in molela” nu sin met Kristian akmusrala, in pal meeta a ke pal inge?
10 U se meet sin met su eis ma lane ke pal mwomwo inge in iumweyukla nu se pa elos su “muta in Kraist.” (2 Korint 5:17, 18) Nu selos, “len in molela” mutawauk in sikyak in Pentecost 33 C.E. Mutawauk in pal san fwasru, met inge elos eis kunokon mwomwo in sulkakin “kas in iumwe.” Ke pal inge, met lula sin met Kristian akmusrala elos akpayeye “orekma in iumwe.” Elos etu a akilen la lipufon akosr su met sap Jon el liye ke sie aruruma “elos srukye eng akosr lun fwalu, tu in wangin eng fwa tu fwin fwalu.” Ke ma inge, oiya inge el srakna “len in molela” a “pal mwo.” (Fwakyuk 7:1-3) Ke sripe se inge, mutawauk in century ak 20, met lula sin met akmusrala elos moniyuk in orekmakinelos sifwana in akpayeye kunokon lalos in oru “orekma in iumwe” nu ke an loesilanu fwalu.
11, 12. Ke mutaweyen century ak 20, met Kristian akmusrala elos akkalemye fuka la elos etu ke pulanpalu? (Liye petsa in sra 11.)
11 Ke sie me pupulyuk, oana ke ma akkalemyeyuk ke buk se inge Met Lo lun Jeova—Met Fwakak Togusrai lun God, ke kas English, ke mutaweyen century ak 20, mokul se inge su pangpang “C. T. Russell a met nukewa su welul elos lulalfongi na paye la elos moul tari ke pal in kosrani a met nukewa elos enenu in long ma paye su ku in aksukosokyelos.” Mea elos oru ka? Ke sripen elos etu la elos oasr tari ke pal in kosrani, sie “pal mwo,” met lili inge elos tia nunku mu elos enenu na in suli met puspus in tuku ke akwuk lun alu. Met kol ke alu puspus su fwak mu elos met Kristian elos oru oiya inge ke lusen pal loeloes. Tusruktu, met Kristian akmusrala inge elos mutawauk in suk ke inkanek puspus saye in sulkakin peng mwo. Sayen ma inge, elos orekmakin mwo akwuk mwomwo ke technology in sang kasru nu ke kapkapek lun orekma lalos.
12 Elos kafweang in sulkakin peng mwo lun Togusrai, ke ma inge u srisrik se inge lun met fwakak su arlana moniyuk elos orekmakin tracts, kain in buk srisrik puspus, magasin, a buk puspus. Elos simusla pa me lutlut mwomwo puspus su fwa akkalemyeyuk ke tausan puspus lun newspaper. Elos orala pa broadcast ke akwuk mwomwo lun ma Simusla ke inkanek lun radio in an selos inge a in an puspus. Elos orala a orekmakin petsa mukuikui su oasr pusra, fwinne in pal san u puspus su orala movie elos soenna orala petsa su pusra wi pa ka. Mea fwako mwomwo lun moniyuk lalos inge? Ke pal inge, oasr million itkosr kutu sin met su eis a lulalfongi ke peng mwo a wi ke orekma in sulkakin kas mwomwo inge: “Iumwela nu sin God.” Aok, met kulansap inge lun Jeova in pal san elos me srikasrak mwomwo ke moniyuk paye fwinne elos supus in pal san.
13. Kut enenu in nunku yok ke akwuk fuka lun God?
13 Kas lal Poul “inge pal mwo” el srakna fwal ke pal inge. Kut nukewa su pulakin tari kulang yok lun Jeova, kut insemwomwo yok meyen oasr pal mwomwo lasr in long a in eis kas mwomwo ke orekma in iumwela met. Kut enenu in nunku akmwoye pal nukewa ke kas lal Poul inge: “Kut ouyepa kaifwe nu sumwos, tu komwos in tia eis kulang lun God ke wangin sripe.” (2 Korint 6:1) Akwuk lun kulang yok lun God pa in ‘iumwela fwalu nu sel sifwana’ ke inkanek lun Kraist.—2 Korint 5:19.
14. Pal mwomwo fuka mutawauk in ikasla fwin an puspus?
14 Apkuran met nukewa, su Setan el akunye nunak lalos, elos srakna srelosla liki God a elos nukin akwuk lun kulang yok lun God. (2 Korint 4:3, 4; 1 Jon 5:19) Tusruktu, yokelik lun ma koluk fwin fwalu oru met puspus in long a eis peng mwo ke pal se akkalemyeyuk nu selos la ke sripen metu sriyukla liki God paenang oasr kain in ma koluk puspus a me keok su sun metu. A in an puspus su metu elos tia engan ke orekma in luti lasr, ke pal inge oasr met puspus in an inge elos long a eis peng mwo a akfwalye moul lalos tu elos in iumwela nu sin God. Ke ma inge, ya kut kalem ka la pa inge pal mwo nu sesr in orekmakin moul lasr ke inkanek moniyuk in sulkakin kas in kaifwe inge: “Iumwela nu sin God”?
15. Mea kut lungse met yen nukewa elos in etu, a tia in sulkakin mukena kas su ku in oru elos in engun?
15 Kunokon lasr pa in tia fwak mukena nu sin met la fwin elos fwa forla nu sin God, el fwa kasrelos ke ma upa nukewa lalos a elos e fwa pulakin mwo. Oasr met puspus su lungse na in long ka ke pal se elos wi ke loom alu, a alu puspus elos lungse in akfwalye kena a nunak lun met puspus inge. (2 Timote 4:3, 4) Tia pa inge ma kut lungse in akpayeye ke orekma in luti lasr. Peng mwo su kut sulkakin nu sin metu pa Jeova, ke sripen lungse yok lal, el lungse in nunak munas nu ke ma koluk lun metu ke inkanek lun Kraist. Ke ma inge, met puspus elos ku in iumweyukla nu sin God. (Rom 5:10; 8:32) Tusruktu, “pal mwo” inge el apkurun na in safla.
“Moniyuk” ke Ku lun God
16. Mea kasrel Poul in akkalemye pulaik a moniyuk?
16 Ke ma inge, na fuka kut ku in akkeye a akkalemye pal nukewa moniyuk lasr nu ke alu paye? Kutu met lili elos mwekin a tia arla lungse in sramsram, a upa nu selos in akkalemye nunak a pulakin lalos. Tusruktu, mwo in esam la oiyen moniyuk el tia me akkalemyen pulakin ku engun mukena; ku ma inge orek fwal nu ke oiya mwomwo lun sie met. Poul el akuteye ke inkanek mwo in akkeye a sruokye oiyen moniyuk pal nukewa ke pal se el kaifwe met Kristian nukewa wiyel: “Moniyuk in ngunumwos.” (Rom 12:11) Ku lun Jeova el sang kasru yok nu ke pulaik a mongfusrasr lun met sap inge ke orekma in luti peng mwo. Mutawauk ke pal se Jisus el panglol nu ke pal se el filiyuki in prison a ke pal se el mise in an Rom, oasr ke lusen yea 30 kutu, Poul el moniyuk pal nukewa tia munasla. El ngetak nu sin God pal nukewa, a ke inkanek lun ku lal el sang ku nu sel Poul. “Nga ku in oru ma nu kemwa in el su akkeyeyu,” Poul el fwak. (Filippai 4:13) Kut ku in eis ma lane yok ke kut eis etauk ke me srikasrak lal!
17. Fuka kut ku in “moniyuk” ke ku lun God?
17 In Rom 12:11, met sap Poul el orekmakin sie kas Grik su kalmekin nu ke kas se inge “boil.” In oru kof in sie tup in boil pal nukewa, kut enenu in sang etong pal nukewa ka. Ke inkanek oapana inge, kut fwin lungse in “moniyuk” ke ku lun God, kut enenu ku lun God ke moul lasr pal nukewa. Inkanek kut in eis ku lun God pa in orekmakin akwuk nukewa lun Jeova God in akkeye kut ke lulalfongi lasr. Kalmen ma inge pa kut in akpayeye lutlut lasr oana sie sou a ke congregation, kut in oru pal nukewa lutlut lasr sifwana a tukeni lutlut lun sou, pre pal nukewa, a in wi ke tukeni nukewa yurin met Kristian wiyesr ke congregation. Kain in orekma mwomwo inge fwa kasre kut in “moniyuk” pal nukewa, oana ke e furur su oru kof ke tup in boil pal nukewa.—Ridi Orekma 4:20; 18:5.
18. Oana met Kristian su mwulela moul lalos nu sin God, nu ke akwuk fuka kut enenu in nunku akmwoye?
18 Sie met su mwulela moul lal nu sin God el sie su loang akmwoye ke akwuk mwomwo a tia sa in kufusyukla ku munasla in akpayeye akwuk mwo inge. In oana met Kristian su mwulela moul lal nu sin God, niyen sun lasr pa in oru ma nukewa su Jeova el lungse kut in oru, oana ke ma Jisus el oru. (Hibru 10:7) Ke pal inge, ma lungse lun Jeova pa in oasr met puspus su iumwela nu sel. Ke ma inge, lela kut in moniyuk pal nukewa, in etawi Jisus a Poul, in oru orekma saoklana inge su enenu in orek ke pal inge.
Ya Kom Esam?
• Mea se inge “orekma in iumwela” itukyang nu sel Poul a nu sin kutu sin met Kristian akmusrala?
• Fuka met Kristian akmusrala elos arlana orekmakin “pal mwo”?
• Fuka met Kristian su fwakak peng mwo elos “moniyuk” ke ku lun God?
[Petsac ke sra 8]
Poul el tia mwulkunla pal se Leum Jisus Kraist el sikme nu sel