U Lun Met Kulansap Oaru a Governing Body Lal
“Su sie met tutafpo oaru a lalmetmet, su leum lal fwa akfulatyel fwin met in loom sel, in sang ma nelos nu selos in pal fwal?”—LUK 12:42.
1, 2. Kusensiyuk yok sripe fuka Jisus el siyuk ke pal se el akkalemye ke me akul ke len safla?
KE PAL se Jisus el akkalemye ke me akul ke len safla, el siyuk kusensiyuk inge: “Su sie met tutafpo oaru a lalmetmet, su leum lal fwa akfulatyel fwin met in loom sel, in sang ma nelos nu selos in pal fwal?” Jisus el fwak pa la met kulansap oaru inge fwa eis me insemwomwo yok ke el srusrngiyuki fwin ma nukewa lun Leum.—Mattu 24:45-47.
2 Ke malem puspus meet liki pal se inge, Jisus el siyuk kusensiyuk oapana inge. (Ridi Luk 12:42-44.) El pangon met kulansap se oana “met tutafpo” a el sramsramkin ke “met in loom sel” oana u lun “met kulansap lal.” Sie met tutafpo pa leum ku met kol lun met kulansap nukewa ke sie loom. Aok, sie met tutafpo el met kulansap pa. Su met kulansap inge ku met tutafpo inge, a fuka el sang “mongo ke pal fwal”? Arlana yok sripe nu sesr nukewa in etu a akilen ke u se su orekmakinyuk in kitela kain in me rid nukewa su oasr me lutlut mwomwo ka in akkeye fototo lasr nu sin God.
3. (a) Fuka met sramsram lun alu puspus su fwak mu elos met Kristian elos srike in akuteye kas lun Jisus ke “met kulansap”? (b) Su “met tutafpo,” ku “met kulansap”? A su “met in loomu”?
3 Met sramsram lun alu puspus elos nunku ke kas lun Jisus oana ke kalmekinyuk nu sin met puspus su oasr mwal ku kunokon yok lalos ke alu puspus su fwak mu elos met Kristian. Tusruktu, Jisus, su akkalemyeyuk oana “leum” ke me pupulyuk inge, el tia fwak la oasr met kulansap puspus su oasr ke kais sie alu su fwak mu elos met Kristian. A, el akkalemye kalem la e fwa oasr sie “met tutafpo,” ku “met kulansap,” su el srusrngiye fwin ma nukewa lal. In oana ke magasin se inge el akkalemye pal nukewa, la met tutafpo inge elos aoliyen “u srisrik” lun met tuma lutlut akmusrala oana sie u. Ke kutu pa fus su oasr ke sapta se inge ke Gospel lal Luk, Jisus el akkalemye ke u lun met puspus inge. (Luk 12:32) U lun “met kulansap,” ku “met in loom sel,” el lumeyuk pa nu sin u sepana inge tusruktu el akkalemye ke kunokon lalos oana met se met se. Kusensiyuk yok sripe inge sikyak, Ya kais sie met su wi ke u lun met kulansap inge oasr pa kunokon lalos in akola me mongo ke pal fwal? Me top nu ka fwa arlana kalem kut fwin tuni akmwoye la mea ma Simusla el akkalemye ka.
Met Kulansap lun Jeova in Pal Meeta
4. Mea Jeova el fwak ke mutanfwal lun met Israel? A mea se ma arlana kalem ke mutanfwal se inge?
4 Jeova el kaskas nu sin met Israel in pal meeta, oana sie u lun met kulansap. “‘Komwos met lo luk,’ Jeova el fwak, ‘a met kulansap [oana met sefwanna] luk, su Nga sulela.’” (Isaia 43:10) Met nukewa ke mutanfwal se inge elos wi ke u lun met kulansap inge. Tusruktu, arlana yok sripe kut in kalem ka la met tol puspus mukena a met Livai su tia met tol pa oasr kunokon in luti met nukewa ke mutanfwal se inge.—2 Kronikel 35:3; Malakai 2:7.
5. Mea Jisus el fwak ke ma ekla lulap su fwa sikyak?
5 Ya mutanfwal se inge pa Jisus el sramsramkin? Mo. Kut etu la tia ouinge meyen Jisus el fwak nu sin met Ju in len lal: “Togusrai lun God fwa etukla liki komwos, a fwa etukyung nu sin sie mutanfwal su fwa isus fwako ka.” (Mattu 21:43) Kalem la, oasr ma ekla ke mutanfwal se inge su fwa sikyak. Jeova el orekmakin sie mutanfwal sasu. Tusruktu, fwin ke akwuk lun God ke masap lal nu sin metu, orekma lun met kulansap ke me pupulyuk lun Jisus el oana sie pa nu ke met Israel su “met kulansap” lun God in pal meeta.
Met Kulansap Oaru el Sikyak
6. Mutanfwal sasu fuka orekla ke len in Pentecost 33 C.E., a su wi ka?
6 Mutanfwal sasu se inge, “Israel lun God,” el orekla sin Israel lun God su kalmekin la elos tia tuku ke mutanfwal lun met Israel na paye. (Galetia 6:16; Rom 2:28, 29; 9:6) Mutanfwal sasu se inge orekla ke pal se God el sang ngun mutal lal nu sin met puspus in len in Pentecost 33 C.E. Tokin ma inge, met Kristian akmusrala nukewa elos wi ke mutanfwal se inge su orekma oana sie u lun met kulansap su Leum, Jisus Kraist el srusrngiye. Kais sie met ke mutanfwal se inge sapkinyuk elos in sulkakin peng mwo a in oru met tuma lutlut. (Mattu 28:19, 20) Tusruktu ya met nukewa ke u se inge elos wi in akola me mongo ke pal fwal? Lela kut in liye ke me top lun ma Simusla nu ke kusensiyuk inge.
7. Ke mutamwauk, mea orekma yok lun met sap nukewa? A kunokon saye fuka elos eis tok?
7 Ke pal se Jisus el sulela met sap 12 lal, orekma yok lalos pa in som a sulkakin peng mwo nu sin met puspus. (Ridi Mark 3:13-15.) Kunokon lalos inge el arlana fwal nu ke kalmeyen kas Grik inge apostolos, su tuku ke kas se inge “supweyukla.” Tusruktu, ke pal se congregation lun met Kristian oakiyuki, kunokon lun met sap ekla nu ke “orekma lun met liaung.”—Orekma 1:20-26, NW.
8, 9. (a) Mea met sap 12 elos nunku yok ka? (b) Su pa met Kristian saye eis kunokon mwomwo puspus, su governing body elos insese ka?
8 Mea met sap 12 elos nunku yok ka? Me top nu ka el ku in koneakyuk ke ma puspus su sikyak tokin len in Pentecost. Ke pal se oasr akukuin lulap sikyak ke orekma in kitela me mongo nu sin met katinmas len nukewa, met sap 12 elos oreni met tuma lutlut nukewa a fwak: “Tia mwo tu kut in likiye kas lun God, a orekma nu ke tebue.” (Ridi Orekma 6:1-6.) Met sap elos srusrngiye kutu pa met lili mokul su fukoko ke lulalfongi in oru “orekma se inge” su eneneyuk. Ke ma inge met sap elos ku in orekmakin pal lalos in “fwakak kas.” Jeova el akinsemwomwoye akwuk se inge, a “kas lun God, yokyokelik, a pisen met tuma lutlut arulanu puselik in Jerusalem.” (Orekma 6:7) Kalem la kunokon yok in akola me mongo su kalmekin nu ke kas in akkeye su tuku ke kas lun God el ma nu sin met sap puspus.—Orekma 2:42.
9 Tokin kutu pal, oasr kunokon yok sripe su etukyang pa nu sin met Kristian puspus saye. Poul a Barnabas, ye kolyuk lun ngun mutal, supweyukla sin congregation lun an Antiok nu yen puspus oana missionary. Elos eteyuk pa oana met sap, fwinne elos tia sie sin met sap 12. (Orekma 13:1-3; 14:14; Galetia 1:19) Governing body su oasr in an Jerusalem elos akilen pa la elos srusrngiyuki tari. (Galetia 2:7-10) Tia pat tokin Poul el srusrngiyuki tari oana sie met sap, el wi pa in kitalik me mongo ku kas in akkeye. El simusla leta se meet lal ke kasru lun ngun mutal lun God.
10. In century se meet, ya met Kristian akmusrala nukewa elos wi in akola kas in akkeye nu ke lulalfongi? Akuteye.
10 Tusruktu, ya met Kristian akmusrala nukewa elos kol a liaung orekma in sulkakin peng mwo a in akola me mongo lun ngun? Mo. Met sap Poul el akkalemye nu sesr: “Ya elos nukewa met sap? Ya nukewa met palu? Ya nukewa met luti? Ya nukewa met orek me lut?” (1 Korint 12:29) Aok met Kristian akmusrala nukewa in pal meeta elos wi ke sulkakin peng mwo, tusruktu met oalkosr na pa orekmakinyuk in simusla buk 27 ke buk fwusr ku ma Simusla ke kas Grik.
Met Kulansap Oaru ke Pal Inge
11. Nu ke “ma nukewa” fuka met kulansap oaru elos srusrngiyuki ka?
11 Kas lun Jisus su simusyukla in Mattu 24:45 el akkalemye kalem la oasr u lun met kulansap oaru a lalmetmet ke saflaiyen len safla. Fwakyuk 12:17 el akkalemye met nukewa inge oana ‘met lula’ ke futen mutan. In oana sie u, met lula inge srusrngiyuki nu ke ma nukewa lun Kraist fwin fwalu. “Ma nukewa” inge su met tutafpo elos enenu in karungin pa ma lun Leum fwin fwalu, wekunang met nukewa su oasr ye kolyuk lun Togusrai a loom a ofus nukewa, niyen orek me rid nukewa su orekmakinyuk in sang kasru orekma in sulkakin peng mwo.
12, 13. Sie met Kristian el etu fuka la el suliyuk in som nu in kosrao?
12 Sie met Kristian el etu fuka la oasr fwinsrak lal in som nu in kosrao a la el wi ke u lun met lula sin Israel lun God? Kut ku in liye me top nu ke kusensiyuk inge ke kas lal Poul nu sin met puspus su oana el su oasr fwinsrak in moul lalos nu in kosrao: “Tu elos nu kemwa su kolyuk ke ngun lun God, elos inge ma nutin God. Tu komwos tia sifwil eis ngun lun sruo nu ke fosrnga, a komwos eis ngun lun ma nutla, su kut ku in pangon ka: ‘Abba, Papa!’ Ngun el sifwana orekma lo nu ke ngunasr, tu kut ma nutin God. A kut fwin ma natul, na kut met usru: met usru lun God, a met usru yurin Kraist, kut fwin keok yurol, tu kut fwa ouyepa mwolana yurol.”—Rom 8:14-17.
13 Kalme pa, met nukewa inge elos akmusrala ke ngun mutal lun God a elos eis sie “pang” ku “me solsol” nu in kosrao. (Hibru 3:1) Me solsol inge el ma sin God. A elos tia alolo a sangeng in eis me solsol inge in ekla tulik nutin God. (Ridi 1 Jon 2:20, 21.) Elos tia sulela fwinsrak inge nu selos sifwana, a Jeova el sang ngun mutal lal nu selos.—2 Korint 1:21, 22; 1 Piter 1:3, 4.
Nunak Mwomwo Ka
14. Nunak fuka met akmusrala elos akkalemye nu ke pang lalos?
14 Mea met akmusrala nukewa inge elos nunku kelos sifwana ke elos sano in eis me insemwomwo lalos in kosrao? Elos akilen la fwinne elos eis sie me solsol mwomwo, elos nunku ka oana me solsol se na paenang elos tia akfulatyelos liki kutena met. Elos enenu in sruokye oaru paye nu ke mise elos in eis me insemwomwo lalos. Elos inse pusisel, a elos akkalemye kas lal Poul inge: “Met lili, nga tia nunku tu nga sifwana eis tari; a ma siefwanna nga oru: Nga mulkunla mao ma on tukuk, a saplakot nu ke mao ma on meet, Nga akmwot nu ke nien sun me sang lun pang fulat lun God in Kraist Jisus.” (Filippai 3:13, 14) Met lula sin met akmusrala elos enenu in kafweang yok in ‘fwafwasryesr fwal nu ke pang, su pangon komwos tari ka, ke pusisel nu kemwa,’ a oru ouinge “ke sangeng a rarrar.”—Efesus 4:1, 2; Filippai 2:12; 1 Tessalonika 2:12.
15. Mea nunak lun met Kristian nu sin met lili nukewa su eis bred a wain ke pal in Memorial? A nunak fuka met Kristian akmusrala elos fwa akkalemye?
15 Ke oiya saye, mea sie met Kristian el fwa nunku ke sie met su fwak mu el pulakin mu el sie sin met akmusrala a mutamwauk in eis bread a wain ke pal in Memorial? Kut fwa tia nununku sie met su eis bred a wain. Ma se inge el ma na lal sifwana a nu sin Jeova. (Rom 14:12) Tusruktu, met Kristian nukewa su eis kunokon mwomwo inge in oana sie sin met akmusrala elos tia enenu in akfulatyelos inmasrlon met lili wiyelos. Elos tia lulalfongi mu ke sripen elos met akmusrala paenang yok etauk a lalmetmet lalos liki etauk lun met lili su wi ke “u lulap.” (Fwakyuk 7:9) Elos tia pa lulalfongi mu yok ngun mutal su oasr yurolos liki ngun mutal su oasr yurin met lili su wi ke u lun “sip ngie.” (Jon 10:16) Elos tia siyuk sin kutena met lili in oru ma mwomwo nu selos; ku elos fwak mu ke sripen elos eis bred a nim wain paenang elos fulat liki met elder su srusrngiyuki ke congregation.
16-18. (a) Ya met akmusrala nukewa elos wi ke orekma in akkalemye etauk sasu ke Baibel? Akuteye. (b) Efu ku Governing Body elos tia enenu in siyuk sin met puspus su eis kang bred a wain meet liki elos oru sulela lalos?
16 Ya met akmusrala nukewa inge su oasr fwin fwalu nufon elos oru orekma in akkalemye etauk sasu ke Baibel? Mo. Oana sie u oasr kunokon lun un met kulansap in akola me mongo ku me lutlut mwomwo in sang akkeye met in loom nukewa, tusruktu tia met nukewa ke un met kulansap inge oana sie kunokon lalos ku orekma lalos. (Ridi 1 Korint 12:14-18.) In oana ke ma akkalemyeyuk tari, in century se meet, met akmusrala nukewa elos enenu in wi ke orekma in luti peng mwo. Tusruktu met na ekasr inmasrlolos orekmakinyuk in simusla buk puspus lun Baibel a in liaung congregation lun met Kristian.
17 Ke sie me pupulyuk: Oasr pal Baibel el akkalemye ke “congregation” su oru kunokon la in aksumwosye ma upa puspus. (Mattu 18:17) Tusruktu, tia met nukewa ke congregation pa oru kunokon inge, a met elder mukena pa oru ma inge oana met tutafpo lun congregation. Met elder elos tia siyuk sin met nukewa ke congregation la mea nunak lalos ka meet liki elos orala sulela lalos. In fwal nu ke akwuk lun u, elos akpayeye kunokon su pakiyuki nu selos; elos orekma in sang kasru congregation nufon.
18 Ke inkanek ouinge, ke pal inge kutu sin met akmusrala oasr kunokon lalos in oana met tutafpo lun un met kulansap inge. Elos oasr ke u se pangpang Governing Body lun Met Lo lun Jeova. Met akmusrala inge elos liaung orekma in sulkakin peng mwo lun Togusrai a in akola me lutlut mwomwo nukewa in akkeye met lili nukewa. In oana ke ma sikyak in century se meet, Governing Body elos tia siyuk sin met nukewa ke u lun met kulansap meet liki elos orala sulela lalos. (Ridi Orekma 16:4, 5.) Tusruktu, met Kristian akmusrala nukewa elos wi ke orekma saoklana su orek ke pal inge. Oana sie u, “met kulansap oaru a lalmetmet” elos pupulyukkinyuk oana mano sefwanna, tusruktu oana met se met se, oasr kain in kunokon lalos su tia oana sie.—1 Korint 12:19-26.
19, 20. Nunak mwomwo fuka oasr yurin u lulap nu sin “met kulansap oaru a lalmetmet” a nu ke Governing Body lal?
19 Mea akwuk mwomwo su akuteyuki lung el ku in oru nu sin u lulap su yokyokelik pal nukewa su oasr fwinsrak in moul ma patpat fwin fwalu? U lulap su ma lun Togusra pa, elos insemwomwo in akesrui ke akwuk nukewa lun Governing Body, su aoliyen “met kulansap oaru a lalmetmet.” Met nukewa su wi ke u lulap elos aksaokye me rid nukewa su tuku ke Baibel su orekla ye kolyuk lun Governing Body. A ke pal sepana inge, fwinne elos sunakin u lun met akmusrala, met nukewa su wi ke u lulap elos arlana taran in tia akfulatye kutena met su fwak mu elos sie sin met kulansap su akmusrala. Wangin kutena met Kristian su akmusrala ke ngun mutal lun God lungse in akfulatyeyuk ke kutena oiya.—Orekma 10:25, 26; 14:14, 15.
20 Kut fwin wi ke un “met in loomu,” ke un met lula sin met akmusrala, ku kut sie sin u lulap, lela kut in akkalemye la kut lungse in akos a sang kasru yok nu sin met tutafpo oaru a nu sin Governing Body lal. Lela kais sie sesr in ‘kafweang in sano’ a in akpayeye la kut oaru nu ke safla.—Mattu 24:13, 42.
Ya Kom Esam?
• Su “met kulansap oaru a lalmetmet”? A su met in loom nukewa?
• Sie met el etu fuka la el sie sin met akmusrala?
• Su oasr kunokon in akkalemye etauk sasu ke Baibel?
• Nunak fuka enenu in akkalemyeyuk sin sie met akmusrala kel sifwana?
[Picture on page 31]
Ke pal inge Governing Body el met tutafpo lun met kulansap oaru a lalmetmet. Oasr pa akwuk ouinge in century se meet