Akkalemye Oaru nu sin Kraist a nu sin Met Kulansap Oaru Lal
“Leum lal . . . fwa srusrngilye fwin ma nu kemwa lal.”—MATTU 24:45-47, NW.
1, 2. (a) In fwal nu ke ma Simusla, su Leum ku met kol lasr? (b) Mea akkalemye la Kraist el kol congregation lun met Kristian?
“NIKMET pangon komwos ‘met leum’—tu sie met leum lomwos, Kraist!” (Mattu 23:10) Ke kas inge, Jisus el akkalemye nu sin met tuma lutlut lal la wangin kutena met fwin fwalu fwa leum lalos. Leum ku met kol sefwanna lalos el oasr in kosrao—pa Jisus Kraist sifwana. Jisus el srusrngiyuki sin God nu ke kunokon inge oana met Kol. Jeova “el akmoulyelak liki mise . . . esalang lan sifwen ma nu kemwa nu ke congregation, su manol.”—Efesus 1:20-23.
2 Ke sripen Kraist pa “sifwen ma nukewa” ke akwuk nu ke congregation lun met Kristian, paenang el orekmakin ku lal fwin ma nukewa su orek inmasrlon congregation. El liye ma nukewa su sikyak ke congregation. El insemwomwo na paye in liye fwin kais sie u lun met Kristian, ku congregation, el moulkin akwuk mwo lun met Kristian a oasr fototo mwomwo nu sin God. Ma inge arlanu kalem ke fwakyuk su el sang nu sin met sap Jon ke saflaiyen century se meet C.E. Nu ke congregation itkosr, Jisus el akkalemye ke pal limekosr la el etu orekma lalos, oiya mwomwo lalos, a me munas lalos, a el sang kas in kai a kas in akkeye su fwal nu selos. (Fwakyuk 2:2, 9, 13, 19; 3:1, 8, 15) Kut ku in lulalfongi na paye la Kraist el etu pa ke oiyen ngun lun kutupa congregation su oasr in an Asia Minor, an Palestine, an Syria, an Babulon, an Greece, an Italy, a yen nukewa. (Orekma 1:8) Na fuka ke pal inge?
Sie Met Kulansap Oaru
3. Efu fwal in pupulyukkinyuk Kraist nu ke sie sifwe ku met kol a congregation lal nu ke sie mano?
3 Tokin sifwil moulyuk lal a tia pat meet liki el somwak nu yurin Papa tumal in kosrao, Jisus el fwak nu sin met tuma lutlut lal: “Ku e nu kemwa etuku nu sik in kosrao a fwin fwalu.” A el fwak pa: “Liye! Nga wi komwos pal e nu kemwa, nu ke saflaiyen akwuk lun ma puspus.” (Mattu 28:18-20, NW) El fwa welulos pal nukewa oana sifwe ku met Kol lalos su kololos. Ke leta puspus nu sin met Kristian in an Efesus a an Kolosse, met sap Poul el pupulyukkin congregation lun met Kristian nu ke sie “mano,” su Kraist pa Sifwe. (Efesus 1:22, 23; Kolosse 1:18) Buk se inge The Cambridge Bible for Schools and Colleges (Sie Buk su sang me akuteye ke Baibel nu ke Loom Lutlut a College puspus) el akkalemye la me pupulyuk inge “akkalemye la arlanu yok sripe in wi Sifwe ku Leum, oayepa yok sripe pa in akos ma lungse lun Leum ku met kol a in orekmakinyuk nu sin met nukewa lal. Elos pa kofwen me orekma Lal.” U fuka Kraist el orekmakin oana kofwen me orekma lal mutamwauk ke pal se el eis ku ke kunokon lal oana Togusra su itukyang nu sel in yea 1914?—Daniel 7:13, 14.
4. In oana ke ma akkalemyeyuk ke kas palu lal Malakai, mea Jeova a Jisus Kraist elos koneak ke elos tuku nu ke temple in ngun in oru nununku?
4 Kas palu lal Malakai el palye la Jeova, su “Leum paye,” a “met roso lun mwuleang” welul, el pa Mwen natul su tufwana ekla togusra, Jisus Kraist, elos tuku in oru nununku nu ke “temple” Lal, ku me pupulyuk nu ke loom in alu. Kalem la mutamweyen “pal pakiyuki” in orek ‘nununku ke loom sin God’ sikyak in yea 1918.a (Malakai 3:1; 1 Piter 4:17) Elos su fwak mu elos aoliyen God a alu paye lal fwin fwalu elos tuniyuk ku nununkeyuk na paye. Alu puspus lun Kristendom, su ke lusen century puspus elos luti me luti puspus su akkolukye God a elos wi ke orekma in akmas ke inkanek yok ke pal in Meun Lulap I, elos pulesreyuk. Met lula oaru nukewa sin met Kristian akmusrala elos tuniyuk, akmwoyeyuk oana ke inkanek lun e, a akinsemwomwoyeyuk, a elos ekla “met su kisekin me kise in sumwosmwos” nu sin Jeova.—Malakai 3:3.
5. In fwal nu ke kas palu lal Jisus ke “oasr tari” lal, su akpayeye la elos pa “met kulansap” oaru?
5 In fwal nu ke kas palu lal Malakai, akul nukewa su Jisus el fwak nu sin met tuma lutlut lal tu elos in akilen ke pal in “oasr tari lal a saflaiyen akwuk lun ma puspus” wekunang pa me akul lun u lun “met kulansap.” Jisus el fwak: “Na su sie met kulansap oaru a lalmetmet su leum lal fililye fwin met in loom sel, in kitalos in pal fwal? Insemwomwo met kulansap se, su leum lal, ke el tuku, fwa konoielak in oru oinge. Payenu Nga fwak nu sumwos, tu El fwa srusrngilye fwin ma nu kemwa lal.” (Mattu 24:3, 45-47) “Ke pal in tuku” in tuni ku in nununku “met kulansap” in yea 1918, Kraist el koneak sie u lun met lula sin met akmusrala lun met tuma lutlut oaru lal su mutamwauk in yea 1879 elos orekmakin magasin inge a kutupa me rid su tuku ke Baibel in akola “me mongo ke pal fwal.” El akilen elos oana u lun met lal, ku “met kulansap” lal, a in yea 1919 itukyang nu selos orekma in kol a karungin ma nukewa lal fwin fwalu.
Orekma in Karungin Ma Nukewa lun Kraist fwin Fwalu
6, 7. (a) Mea kutupa kas su Jisus el orekmakin ke sramsramkinyen “met kulansap” oaru lal? (b) Mea kalmen kas lal Jisus inge “met tutafpo”?
6 Ke kutu malem meet liki Jisus el palye kas palu lal ke me akul ke oasr tari lal, wekunang kas palu ke oasr lun sie “met kulansap” su aolyel in oana met tutafpo lal fwin fwalu, el orekmakin pa kas puspus saye ke el sramsramkin “met kulansap” inge su akkalemye ke kunokon puspus lun met kulansap sa. Jisus el fwak: “Na su sie met tutafpo oaru a lalmetmet, su leum lal fwa srusrngilye fwin met in loom sel, in sang ma nelos nu selos in pal fwal? Paye nga fwak nu sumwos, El fwa srusrngilye fwin ma lal nu kemwa.”—Luk 12:42, 44, NW.
7 Ke fus inge met kulansap el pangonyuk oana sie met tutafpo, su kas inge tuku ke kas Grik se su oasr kalmeya ka oana “met kol ke sie sou ku ke sie loom ku sie an lulap.” U lun met tutafpo el tia sie u lun met lalmetmet mukena su akuteye ke me lutlut mwomwo lun Baibel. Sayen orekma lalos in akola me mongo in ngun “ke pal fwal,” “met tutafpo oaru” elos fwa srusrngiyuki in kol fwin met kulansap nukewa lun Kraist a sapkinyuk in karungin congregation nukewa lun Kraist a ke orekma nukewa fwin fwalu, aok fwin “ma nukewa lal.” Mea ma nukewa lun Kraist?
8, 9. Mea “ma puspus” inge su met kulansap elos srusrngiyuki in karungin?
8 Oasr kunokon puspus lun met kulansap wekunang in liaung ma puspus su orekmakinyuk sin met kulansap lun Kraist in akpayeye orekma lalos oana met Kristian, oana world headquarters a branch ofus nukewa lun Met Lo lun Jeova, elos karungin pa an in alu nukewa lalos—Kingdom Hall a Assembly Hall puspus—fwin fwalu nufon. Yok sripe liki ma inge, met kulansap elos liaung pa akwuk nukewa su sang me akkeye nu ke lulalfongi ke lutlut lun Baibel ke meeting nukewa su orek ke kais sie week a assembly a toeni lulap nukewa su orek ke pal tolu ke kais sie yea. Ke toeni nukewa inge, me lutlut nu ke akpayeyen kas palu puspus in Baibel akoeyukla a akuteyuki, a oasr pa kas in kasru ke pal fwal nu ke inkanek mwo la fuka in orekmakin akwuk mwomwo lun Baibel nu ke moul in len nukewa el akkalemyeyuk.
9 Sie pa kunokon lun met tutafpo pa in kol a liaung orekma su arlanu yok sripe in sulkakin “peng mwo lun togusrai” a orekma in oru “met in mutanfwal nukewa tu elos in met tuma lutlut.” Ke orekma inge enenu pa in lutiyuk metu in oru ma nukewa su Kraist, Sifwen congregation, el sapkin in orek in pal safla inge. (Mattu 24:14; 28:19, 20; Fwakyuk 12:17) Orekma in sulkakin a luti el orala “sie u lulap” lun met asrouki mwomwo a oaru lun met akmusrala lula. “Ma saok lun mutanfwal nu kemwa” inge elos wi na paye ke “ma puspus” su saoklana lun Kraist su karunginyuk sin met kulansap oaru.—Fwakyuk 7:9; Haggeai 2:7.
Governing Body su Aoliyen U lun Met Kulansap
10. U fuka srusrngiyuki in orala sulela puspus in century se meet, a mea ma inge oru nu ke congregation puspus?
10 Paye la kunokon yoklanu lun met kulansap oaru pa elos enenu in oru sulela puspus. Ke congregation lun met Kristian in pal meeta, met sap puspus a met elder puspus in an Jerusalem elos aoliyen u lun met kulansap, a elos oru sulela puspus in sang kasru congregation nufon lun met Kristian. (Orekma 15:1, 2) Sulela nukewa lun governing body inge in century se meet akkalemyeyuk nu ke congregation puspus ke inkanek lun leta puspus a sin met liaung puspus su fwufwasryesr oana circuit a district overseer. Met Kristian in pal meeta elos engan in eis kas in kolyuk kalem inge, a akesrui lalos su orek ke inse mulala lalos nu sin governing body el sang kasru in oasr misla a inse sefwanna.—Orekma 15:22-31; 16:4, 5; Filippai 2:2.
11. Kraist el orekmakin su ke pal inge in kol congregation lal, a nunak fuka kut enenu in akkalemye nu ke u lun met Kristian akmusrala inge?
11 Oana ke mutamweyen pal lun met Kristian, oasr sie u srisrik lun met liaung puspus su akmusrala in ngun su wi Governing Body lun met kulansap nukewa lun Kraist fwin fwalu ke pal inge. Ke inkanek lun “lepaul leyut” su pupulyukkinyuk nu ke ku lal, Kraist, su Sifwen congregation, el kol met oaru puspus inge ke elos liaung orekma lun Togusrai. (Fwakyuk 1:16, 20) Ke me sramsram ke moul lal, Albert Schroeder, sie met su wi ke u lun Governing Body ke lusen pal loeloes su tufwana aksafyela moul lal fwin fwalu, el simusla: “Governing Body elos oru meeting lalos ke Wednesday nukewa, ikasla meeting ke pre a siyuk ke kasru lun ngun lun Jeova. Oasr kafweang yok orek in liye la ma nukewa su sramsramkinyuk a sulela nukewa su orek el fwal nu ke Baibel su Kas lun God.”b Kut ku in lulalfongi sin met Kristian akmusrala oaru nukewa inge. In akkalemye oiya mwo a akosten lasr nu sin Governing Body, kut enenu in porongo masap su Poul el simusla: “Komwos in akos met kol lomwos, a akpusiselye komwos nu selos, tu elos sano nu ke [liaung pal nukewa, NW] ngunumwos.”—Hibru 13:17.
Akkalemye Sunak Fwal nu sin Met Kulansap Oaru
12, 13. Mea sripe puspus su oasr in ma Simusla in sang akkalemye sunak nu sin u lun met kulansap?
12 Sripe se su arlanu yok sripe ka in akkalemye sunak fwal nu ke u lun met kulansap oaru pa in oru ou inge, kut akkalemye sunak nu sin Leum, Jisus Kraist. Poul el simusla ke met akmusrala puspus: “El su pangonyuk ke el met sukosok, el met kos lun Kraist. Moliyukla komwos tari ke sie me mol.” (1 Korint 7:22, 23; Efesus 6:6) Ke ma inge, fwin kut oaru in akpusiselye kut nu ke kolyuk lun met kulansap oaru a nu sin Governing Body lun ma inge, kut akpusiselye kut nu sin Kraist, su Leum lun met kulansap. Orekma lasr in akkalemye sunak fwal nu sin u se su Kraist el orekmakin in karungin ma lal nukewa fwin fwalu el sie inkanek su kut “fwakak tu Jisus Kraist el Leum, nu ke mwolanu lun God Papa.”—Filippai 2:11.
13 Sie pa sripe su tuku ke ma Simusla in akkalemye sunak nu sin met kulansap oaru pa met Kristian akmusrala fwin fwalu elos akkalemyeyuk in Baibel oana sie “temple” su “ngun mutal” lun Jeova el muta ka. Ke ma inge, elos “mutal.” (1 Korint 3:16, 17; Efesus 2:19-22) Nu sin u se inge su akkalemyeyuk oana temple mutal, Jisus el sapkin in liaung ma nukewa lal fwin fwalu, su kalme pa u inge lun met kulansap mukena pa oasr kunokon la in orala sulela puspus in sang kasru congregation lun met Kristian a oru kolyuk lalos ka. Ke sripe se inge, met nukewa ke congregation elos nunku ke ma inge oana kunokon mutal lalos in akos a sruokye ku in sang kasru nu ke me kolyuk su tuku sin met kulansap oaru a sin Governing Body lun u se inge. Aok, “sip ngie” elos oekla ma inge oana sie kunokon na mwomwo in sang kasru met kulansap oaru in karungin ma nukewa lun Leum.—Jon 10:16.
Oaru in Sang Kasru nu sin U lun Met Kulansap Akmusrala
14. Oana ke ma Isaia el palye, fuka sip ngie elos akos kolyuk lun met kulansap akmusrala a kulansap oana “met orekma su wangin mol”?
14 Oiyen pusisel lun sip ngie in akpusiselyelos nu sin met akmusrala su wi ke Israel lun God el palyeyuk ke kas palu lal Isaia: “Ou inge Jeova el fwak: ‘Orekma lun Ijipt [su wangin mol lalos, NW], a me mol [met kuka puspus, NW] lun Itiopia, a met Seba, met loeska, fwa tuku nu sum, a elos fwa ma lom. Elos fwa fwasr tukum; ke kapinkaslap elos fwa tuku, a elos fwa epas nu sum. Elos fwa kaifwe nu sum, a fwak, “Paye God el muta in kom, a wangin siepa; wangin God saye.”’” (Isaia 45:14) Ke kas in pupulyuk, sip ngie elos fwasr tokin u lun met kulansap akmusrala a lun Governing Body lun ma inge, a akos kolyuk lalos. Oana “met orekma su wangin mol,” sip ngie elos lungse na paye in orekmakin ku lalos a ma saok lalos in sang kasru nu ke orekma in luti fwin fwalu nufon su Kraist el srusrngiye nu sin met kulansap akmusrala lal fwin fwalu.—Orekma 1:8; Fwakyuk 12:17.
15. Fuka kas palu in Isaia 61:5, 6 el akpayeye ke oiyen futoto su oasr inmasrlon sip ngie a Israel in ngun?
15 Sip ngie elos insemwomwo a aksaokye in kulansap nu sin Jeova ye kolyuk lun u lun met kulansap a Governing Body. Elos akilen met akmusrala nukewa oana “Israel lun God.” (Galetia 6:16) Elos pupulyukkinyuk oana met “oaset” a “met sa” su wi Israel in ngun, elos insemwomwo in orekma oana “met imae” a “met liaung imae grep” ye kolyuk lun met akmusrala, su lumeyuk nu sin “met tol lun Jeova” a ‘met kulansap nu sin God.’ (Isaia 61:5, 6) Elos moniyuk in wi ke orekma in sulkakin peng mwo lun Togusrai a in oru met lun mutanfwal nukewa in met tuma lutlut. Elos sang me kasru ke inse kewa lalos nu sin u lun met kulansap in kasru met sasu puspus su oana sip.
16. Mea akkeye sip ngie in akkalemye oaru lalos in sang kasru nu sin met kulansap oaru a lalmetmet?
16 Sip ngie elos akilen la oasr ma lane yok elos eis ke kafweang yok lun met kulansap oaru in kitelos me mongo in ngun ke pal fwal. Elos akilen pa ke inse pusisel la fwin tia ke kasru lun met kulansap oaru a lalmetmet, arlanu srikla ku wangin etauk lalos ke ma paye lun Baibel su arlanu saok, oana ku lun Jeova in kol, orekma in akmutalye inel, ke Togusrai, ke kosrao sasu a fwalu sasu, ke soul ku ngun, ma sikyak nu sin met mise, a ma paye kel Jeova, Mwen natul, a ke ngun mutal. Ke sripen elos lungse in sang kulo yok a akkalemye oaru yok lalos, sip ngie elos engan in sang kasru nu sin “met lili” akmusrala nukewa lun Kraist fwin fwalu ke pal safla inge.—Mattu 25:40.
17. Mea Governing Body elos nunku mu eneneyuk in orek, a mea fwa akuteyuki ke me lutlut toku?
17 Ke sripen piselos suposeni, met akmusrala elos tia ku in oasr ke congregation nukewa in oru kolyuk a karunginyuk nu ke ma nukewa lun Kraist. Ke ma inge, Governing Body elos srusrngiye mokul puspus inmasrlon sip ngie in oru orekma in liaung branch ofus, district puspus, circuit puspus, a congregation puspus lun Met Lo lun Jeova. Ya oiya mwomwo lasr nu sin met seperd nukewa inge su oru orekma in kulansap lalos ye kolyuk lun Kraist oasr kasru yok nu ka ke oiyen oaru lasr nu sin Kraist a nu sin met kulansap oaru lal? Ma inge fwa akuteyuki ke me lutlut toku.
[Footnotes]
a Srike liye Tauer In San ke kas English, March 1, 2004, sra 13-18, a December 1, 1992, sra 13 ke me akuteye ke sifwe se inge.
b Akkalemyeyuk in March 1, 1988, issue lun magasin inge, ke sra 10-17.
Ke Inkanek lun Kalweni
• Su Leum ku met kol lasr, a mea akkalemye la el etu ke ma sikyak nukewa ke congregation nukewa?
• Ke orekma in nununku ku tuni ke “temple,” su koneyukyak mu orekma oana sie met kulansap oaru, a ma puspus fuka itukyang nu selos in karungin?
• Sripe puspus fuka oasr in ma Simusla in sang kasru ke inkanek oaru nu sin u lun met kulansap oaru?
[Pictures on page 9]
“Ma puspus” su karunginyuk sin “met tutafpo” pa ma saok puspus su oana loom ofus a niyen orek buk, akwuk ke ma lun ngun su akkeye lulalfongi, a orekma in sulkakin peng mwo
[Picture on page 11]
Met nukewa su wi ke u lun sip ngie elos sang kasru u lun met kulansap oaru ke inkanek in moniyuk lalos in sulkakin peng mwo