Elos Kafweang in “Fwasr Tokin Lam”
“Elos inge elos su fwasr tokin Lam yen nukewa el fwasr nu we.”—FWAKYUK 14:4.
1. Mea met tuma lutlut paye lun Jisus elos nunku ke orekma lalos in fwasr tukol?
APKURAN in yea luo tufwa ke orekma in luti lal, Jisus el “luti in imwen lolngok in Keperneum.” Ke elos long la kas lal upalana, “met puspus sin met tumal lutlut elos folokla a tia sifwil oelul fwufwasryesr.” Ke pal se Jisus el siyuk sin met sap 12 lal fwin elos lungse pa in som, Saimon Piter el topuk: “Leum, kut fwa som nu yurin su? Kas lun moul ma patpat oasr yurum; a kut lulalfongi a etu tu kom Sie su Mutal lun God.” (Jon 6:48, 59, 60, 66-69) Met tuma lutlut paye lun Jisus elos tia tui in fwasr tukol. Tokin elos akmusrala ke ngun mutal, elos tafwela in akpusiselyelos nu ke kolyuk lun Jisus.—Orekma 16:7-10.
2. (a) Su “met kulansap oaru a lalmetmet,” ku “met tutafpo oaru”? (b) Fuka met kulansap elos oakiye sie ma simusla mwomwo in “fwasr tokin Lam”?
2 Mea kut ku in fwak nu sin met Kristian akmusrala ke pal inge? Ke kas palu lal ke ‘me akul ke oasr tari [lal], a ke saflaiyen akwuk puspus fwin fwalu,’ Jisus el sramsramkin nu ke u lun met akmusrala nukewa lal fwin fwalu oana “met kulansap oaru a lalmetmet,” ku “met tutafpo oaru.” (Mattu 24:3, 45; Luk 12:42) Oana sie u, met kulansap inge elos oakiye sie ma simusla mwomwo in “fwasr tokin Lam yen nukewa el fwasr nu we.” (Ridi Fwakyuk 14:4, 5.) Met nukewa su wi ka elos nasnas ye mutun God meyen elos tia akfokfokyelos sifwana nu ke lulalfongi a orekma lun “Babulon Lulap,” u lun alu kikiap nukewa. (Fwakyuk 17:5) Wangin me luti kikiap “in oalulos,” a elos sruokye na in “wangin meta” lalos ke fwal lun Setan. (Jon 15:19) Ke pal fwasru, met lula sin met akmusrala fwin fwalu “fwa fwasr tokin” Lam in kosrao.—Jon 13:36.
3. Efu ku arlana yok sripe nu sesr in lulalfongi met kulansap inge?
3 Jisus el srusrngiye met kulansap oaru a lalmetmet ke “met in loom sel,” nu sin met se met se su wi ke met kulansap inge, “in kitelos in pal fwal.” El srusrngiye pa met kulansap inge nu ke “ma nukewa lal.” (Mattu 24:45-47) Wekunang nu ke “ma nukewa” inge pa ke “u lulap” lun “sip ngie” su piselos yokyokelik na paye. (Fwakyuk 7:9; Jon 10:16) Aok, met nukewa su wi ke u lun met akmusrala a ke u lun “sip ngie” elos lulalfongi na paye met nukewa su srusrngiyuki in kololos. Oasr sripe puspus su paenang met kulansap inge fwal kut in lulalfongi. Sripe yok luo emeetu pa: (1) Jeova el lulalfongi met kulansap inge. (2) Jisus el oayepa lulalfongi met kulansap inge. Lela kut in tuni me akpayeye lun Jeova a Jisus Kraist la elos lulalfongi yok ke met kulansap oaru a lalmetmet.
Jeova El Lulalfongi Met Kulansap Inge
4. Efu ku kut ku in lulalfongi ke me lutlut nukewa a kas in kasru nukewa su met kulansap oaru a lalmetmet elos ase nu sesr?
4 Nunku ke me kasru yok su oru met kulansap oaru a lalmetmet elos ku in akola a ase nu sesr me rid puspus su tuku ke Baibel su kut enenu ke pal fwal. Jeova el fwak: “Nga fwa aketeye nu sum a luti nu sum inkanek kom fwa fwasr we, Nga fwa papu nu sum ke mutuk su on fwom.” (Sam 32:8) Aok, Jeova el sang kasru nu sin met kulansap inge. Ke ma inge kut ku in lulalfongi na paye ke etauk mwomwo, liyaten a kalem mwomwo, a ke kas in kasru su tuku ke ma Simusla su kut eis sin met kulansap inge.
5. Mea akkalemye la ku lun God el akkeye u lun met kulansap?
5 Jeova el akinsemwomwoye pa u lun met kulansap inge ke el sang nu selos ngun mutal lal. Fwinne ngun mutal lun Jeova el tia ku in liyeyuk, tusruktu fwako lun ma inge nukewa kalem yurulos su oasr ma inge yuru. Nunku ke ma met kulansap oaru a lalmetmet elos akpayeye ke orekma in sang ma lo nu fwin fwalu nufon ke Jeova God, ke Mwen natul, a ke Togusrai. Met kulansap nukewa lun Jeova elos moniyuk in sulkakin peng mwo lun Togusrai nu ke an 230 kutu a ke tuka puspus pa. Ya ma inge el tia sang me akpayeye la ku lun God el akkeye u lun met kulansap inge? (Ridi Orekma 1:8.) Met kulansap oaru a lalmetmet elos enenu in oru sulela yok sripe puspus tu elos in ku in akola a sang kas in akkeye su oasr ke me lutlut nukewa su tuku ke Baibel nu sin met kulansap nukewa lun Jeova fwin fwalu nufon. Ke elos akpayeye a orekmakin sulela lalos inge, met kulansap inge elos akkalemye lungse, fwokpap, a kutu pa fwako lun ngun mutal.—Galetia 5:22, 23.
6, 7. Fuka lupan lulalfongi lun Jeova nu sin met kulansap oaru?
6 In kasre kut in eis kalem mwo ke lulalfongi yok lun Jeova nu sin met kulansap oaru a lalmetmet, kut enenu in nunku akmwoye ke ma el mwulela ka nu selos. Met sap Poul el simusla: “Tu ukuk fwa kas, a met mise elos fwa moulyuk in tia punoela, a kut nu kemwa fwa ekla. Tu ma punoela inge fwa nukomang ma tia punoela, a ma mise inge fwa nukomang ma tia ku in mise.” (1 Korint 15:52, 53) Met tuma lutlut akmusrala nukewa lun Kraist, su arlana oaru ke kulansap lalos nu sin God a mise ke mano lalos in ikwe, elos fwa akmoulyeyukyak in mano lun ngun yurolos a ku in eis moul ma patpat. God el fwa sang nu selos moul ma patpat, wangin saflaiye a tia ku in sifwil pa mise. Sayen ma inge, God el fwa sang nu selos kain in mano su tia ku in kulamwi a tia enenu me mongo a me nim. Fwakyuk 4:4 el akkalemye ke met nukewa su akmoulyeyukyak inge la elos muta fwin tron puspus a tefuro orek ke gold fwin sifwelos. Oasr orekma mwomwo lun togusra su fwa itukyang nu sin met Kristian akmusrala nukewa inge. Sayen ma inge srakna oasr me akpayeye puspus nu ke lulalfongi yok lun God nu selos.
7 “Tu pal in mari lun Lam tuku, a mutan kiel sifwana akola. A etukyung nu sel tu lan nukomang linen srik eou, saromrom a nasnas, tu linen srik eou sumwosmwos lun met mwo,” Fwakyuk 19:7, 8 el akkalemye. Jeova el sulela met Kristian akmusrala elos in oana mutan se su fwa payukyak nu sin Mwen natul. Elos fwa eis me sang puspus su arlana mwo, oana mano su tia ku in kulamwi, moul ma patpat, mwolanu yok lun togusra, a “mari nu sin Lam!” Ma inge nukewa pa me akpayeye fukoko nu ke lulalfongi yok lun God nu sin met akmusrala nukewa, su “fwasr tokin Lam yen nu kemwa el fwasr nu we.”
Jisus El Lulalfongi Met Kulansap
8. Fuka mwuleang ke Togusrai su Jisus el orala el akkalemye la oasr lulalfongi lal nu sin met kulansap akmusrala lal?
8 Mea me akpayeye la Jisus el lulalfongi na paye met kulansap akmusrala nukewa lal? Ke fong se meet liki el mise, Jisus el orala sie mwulela nu sin met sap oaru 11 lal. El fwak nu selos: “A komwos elos su wi Yu in mel luk, a nga pakiye nu sumwos sie togusrai, oana Papa tumuk el pakiye nu sik, tu komwos fwa mongo a nim ke tebu luk in togusrai luk, a komwos fwa muta fwin tron a nununku sruf siengoul luo lun Israel.” (Luk 22:28-30) Mwuleang se su Jisus el oru nu sin met sap 11 el orekmakinyuk pa nu sin 144,000 met Kristian akmusrala nukewa. (Luk 12:32; Fwakyuk 5:9, 10; 14:1) Ya Jisus el ku in orala nu selos sie mwuleang su elos ku in welul in kol ke Togusrai lal fwin el tia lulalfongi elos?
9. Mea weang nu ke “ma nukewa [lun Kraist]”?
9 Sayen ma inge, Jisus Kraist el srusrngiye met kulansap oaru a lalmetmet “fwin ma nukewa lal,” su kalmekin nu ke ma nukewa a orekma nukewa lun Togusrai fwin fwalu. (Mattu 24:47) Kutu sin ma inge pa loom puspus su orekmakinyuk oana ofus lulap lun Met Lo lun Jeova, branch ofus fwin an puspus, Assembly Hall a Kingdon Hall puspus, a orekma in sulkakin peng mwo lun Togusrai a in oru met tuma lutlut. Ya sie met el fwa srusrngiye siepa met su el tia lulalfongi mu el ku in karungin a orekmakin mwo ma saok puspus lal?
10. Mea akkalemye la Jisus el wi met kulansap akmusrala lal?
10 In Nisan 16, yea 33 C.E., Jisus su akmoulyeyukyak tari el sikme nu sin met tuma lutlut puspus lal a el mwulela nu selos kas inge: “Liye! Nga wi komwos pal e nu kemwa, nu ke saflaiyen akwuk puspus lun fwalu.” (Mattu 28:20, NW) Ya Jisus el akpayeye mwulela lal inge? Aok, meyen ke lusen yea 15 somla, pisen congregation lun Met Lo lun Jeova fwin fwalu nufon yokyokelik mutamwauk ke 70,000 nu ke 100,000, su kapkapek inge oasr ke percent 40. A met tuma lutlut sasu ekasr weang congregation? Apkuran nu ke 4.5 million met tuma lutlut sasu su eis tari baptais lalos ke lusen yea 15 somla, su kalme pa oasr met 800 ke kais sie len elos baptaisla. Yokyokelik nu ke pisen met tuma lutlut a congregation el me akpayeye la Kraist el wi met kulansap akmusrala nukewa lal ke meeting lalos ke congregation a el kasrelos ke orekma in oru met tuma lutlut.
Met Kulansap Elos Oaru a Lalmetmet
11, 12. Ke inkanek fuka met kulansap elos akkalemye la elos oaru a lalmetmet?
11 Fwin Jeova God a Jisus Kraist elos lulalfongi na paye ke met kulansap oaru a lalmetmet, ya kut tia akkalemye lulalfongi lasr nu selos? Aok, met kulansap elos akkalemye la elos oaru in akpayeye orekma su srusrngiyuki nu selos. Ke sie me pupulyuk, me rid se inge Watchtower el orekla tari ke lusen yea 130 kutu. Meeting nukewa, assembly a tukeni lulap nukewa lun Met Lo lun Jeova el sang me akkeye nu ke lulalfongi lasr pal nukewa.
12 Met kulansap elos oaru ke sripen elos tia akkalemye oiya lun fulang a insefulat. Elos tia oru ma lungse lalos sifwana a tia patla in akos masap lun Jeova. Ke sie me pupulyuk, in oana ke met kol lun alu kikiap puspus elos insese ka a tia orek me aksumwos nu ke kain in oiya lun rapku, a oiya koluk puspus lun metu. Tusruktu met kulansap oaru a lalmetmet elos sang kas in sensen nu ke kain in me sruf puspus su oasr ke fwal lun Setan. U lun met kulansap elos akpayeye la elos sang kas in sensen mwomwo ke pal fwal meyen Jeova God a Jisus Kraist elos akinsemwomwoye ma inge. Ke sripen ma sikyak in pal inge arlana fwal kut in akkalemye lulalfongi yok lasr nu sin met kulansap inge. Tusruktu, fuka kut ku in akkalemye la kut lulalfongi met kulansap oaru a lalmetmet?
Elos ‘Wi Met Akmusrala Som’ ke Elos Fwasr Tokin Lam
13. In fwal nu ke kas palu lal Zekaraia, fuka kut ku in akkalemye lulalfongi nu sin met kulansap oaru a lalmetmet?
13 Buk lal Zekaraia el sramsramkin ke “met sengoul” su tuku nu yurin “sie met Ju” a fwak: “Kut fwa wi komwos som.” (Ridi Zekaraia 8:23, NW.) Ke sripen “sie met Ju” el akkalemyeyuk pa ke kas inge ‘komwos metu,’ paenang el lumeyuk nu ke sie u lun metu. Ke pal lasr inge, el petsaela met lula nukewa sin met Kristian akmusrala, su wi pa ke u lun “Israel lun God.” (Galetia 6:16) “Met sengoul liki kas nukewa lun mutanfwalu” el lumeyuk nu sin u lulap lun sip ngie. In oana ke met Kristian akmusrala elos fwasr tokin Jisus a etawel ke inkanek nukewa, u lulap elos ‘wi pa,’ fwasr tokin met kulansap oaru a lalmetmet. Met nukewa su wi ke u lulap elos tia enenu in mwekin in akkalemyelos sifwana la elos wi met Kristian akmusrala su “met ipeis in pang in kosrao me.” (Hibru 3:1) Jisus el tia mwekin in pangon met akmusrala nukewa in “ma lel.”—Hibru 2:11.
14. Fuka kut ku in sang kasru nu sin brother nukewa wiyen Kraist?
14 Jisus Kraist el fwak la kut fwin sang kasru nu sin met lel, kut oru ma inge nu sel pa. (Ridi Mattu 25:40.) Ke ma inge, fuka met nukewa su oasr fwinsrak in moul ma patpat fwin fwalu elos ku in sang kasru nu sin met Kristian akmusrala su ma wiyen Kraist? Inkanek yok se meet in kasrelos pa ke orekma in sulkakin peng mwo lun Togusrai. (Mattu 24:14; Jon 14:12) Ke lusen yea puspus somla pisen met Kristian akmusrala el supuseni, tusruktu pisen met su wi ke u lun sip ngie el yokyokelik. Ke pal se met nukewa su oasr fwinsrak in moul ma patpat fwin fwalu elos wi ke orekma in sulkakin peng mwo, yokna fwin elos ku in oru pal nukewa, elos sang kasru nu sin met akmusrala nukewa in akpayeye orekma lalos in oru met tuma lutlut. (Mattu 28:19, 20) Sie pa inkaneku pa ke kut orekmakin pal mwomwo lasr in sang mani, ma saok lasr in sang kasru orekma in sulkakin peng mwo.
15. Oiya fuka met Kristian nukewa elos akkalemye nu ke kas in kasru nukewa ke pal fwal a ke akwuk nukewa ke u lasr su orek sin met kulansap?
15 Nu sin kais sie sesr oana met Kristian, mea nunak lasr nu ke kas in kasru su oasr ke me rid nukewa ma tuku ke Baibel su met kulansap oaru elos orala a ke tukeni nukewa lasr oana met Kristian? Ya kom insemwomwo in lutlutkin me rid nukewa inge a wi ke tukeni nukewa lasr a orekmakin ke moul lasr ma kut lotela? Oiya fuka kut akkalemye nu ke sulela nukewa a akwuk nukewa ke u lasr su orek sin met kulansap inge? Kut fwin inse mulala a engankin in akos masap nukewa su akkalemyeyuk nu sesr, kut akkalemye lulalfongi lasr nu ke akwuk nukewa lun Jeova.—Jemes 3:17.
16. Efu ku met Kristian nukewa elos enenu in porongo met lili nukewa wiyen Kraist?
16 Jisus el fwak: “Sip nutik elos long pusrek, a nga etalos, a elos fwasr tukuk.” (Jon 10:27) Kas inge el paye nu sin met Kristian akmusrala. Na fuka nu selos nukewa su ‘welulos’? Elos enenu pa in porongel Jisus. Yok liki ma inge, elos enenu in porongo met nukewa wiyen Kraist. Aok, meyen kunokon mwomwo in akkeye a karungin met kulansap nukewa lun God itukyang nu sin met akmusrala nukewa. Na mea fwa weang nu ke orekma lasr in porongo pusran met lili nukewa wiyen Kraist?
17. Mea kut enenu in oru kut fwin porongo u lun met kulansap?
17 Governing Body elos oana met tutafpo lun met kulansap oaru a lalmetmet ke pal inge. A u se inge elos kol a orala kain in akwuk nukewa nu ke orekma in sulkakin peng mwo lun Togusrai fwin fwalu nufon. Met nukewa su wi ke u lun Governing Body oasr experience yok lalos ke orekma in kulansap, a elos met elder su akmusrala ke ngun. Elos ku in akkalemyeyuk oana “met kol” inmasrlosr. (Hibru 13:7) Ke elos kafweang in karungin met fwakak peng mwo nukewa lun Togusrai su piselos apkuran nu ke 7,000,000 su oasr ke 100,000 congregation, paye la met akmusrala nukewa su karungin inge oasr ‘orekma puspus lalos nu sin Leum pal nukewa.’ (1 Korint 15:58) Kut fwin porongo u lun met kulansap akmusrala nukewa, kut akkalemye la kut sang me kasru yok lasr nu sin Governing Body.
Met Nukewa Su Porongo Met Kulansap Elos Akinsemwomwoyeyuk
18, 19. (a) Met nukewa su porongo met kulansap oaru a lalmetmet elos akinsemwomwoyeyuk fuka? (b) Mea kut lungse na paye in oru?
18 Mutamwauk ke pal se elos srusrngiyuki, met kulansap oaru a lalmetmet elos “furokla met puspus nu ke sumwosmwos.” (Daniel 12:3) Aok elos sang kasru nu sin met puspus su oasr fwinsrak lalos in moulla ke pal se kunanela lun akwuk koluk nukewa lun fwal se inge. Sie me insemwomwo yok pa inge nu sin met nukewa su oasr oiyen fototo mwomwo a paye nu sin God!
19 Ke pal fwasru, ke pal se ‘siti mutal, Jerusalem Sasu [u lun met 144,000] el oatui yurin God me, ako tari oana mutan su akola in payukyak nu sin mokul tumal,’ na mea fwa sikyak nu selos nukewa su porongo pusran met kulansap sa? Baibel el akkalemye: “[God] El fwa ela sroninmutalos nu kemwa, a a fwa wangin pa mise; a elos fwa tia sifwil asor, ku tung, ku ngal. Tu ma meeta wanginla.” (Fwakyuk 21:2-4) Ke ma inge, lela kut nukewa in porongo Kraist a met akmusrala nukewa wiyel su arlana oaru a paye.
Mea Kom Lotela?
• Me akpayeye fuka la Jeova el lulalfongi met kulansap oaru a lalmetmet?
• Mea akkalemye la Jisus Kraist el lulalfongi na paye u lun met kulansap?
• Efu ku arlana fwal kut in akkalemye lulalfongi lasr nu sin met kulansap oaru?
• Kut akkalemye fuka la kut lulalfongi met kulansap nukewa?
[Picture on page 25]
Ya kom etu la su Jeova el sulela in oana mutan se su fwa payukyak nu sin Mwen natul?
[Pictures on page 26]
Jisus el itukyang nu sin met kulansap oaru a lalmetmet lal “ma lal nukewa”
[Picture on page 27]
Pal nukewa kut wi ke orekma in sang ma lo, kut sang kasru nu sin met kristian akmusrala nukewa