Fuka Me Sramsram lun Jisus el Sang Kasru nu sin Metu in Insemwomwo
“[Jisus] el fwasryuk nu fwin eolu; a . . . met tumal lutlut elos tuku nu yurol; a el . . . luti nu selos.”—MATTU 5:1, 2.
1, 2. (a) Mea ma puspus su sikyak a orek ke pal se Jisus el akkalemye Me Sramsram lal Fwin Eolu? (b) Fuka Jisus el mutamwauk ke me sramsram lal?
IN YEA 31 C.E., Jisus el tui kitin pal ke orekma in luti lal in an Galili, meyen el som nu Jerusalem in akfulatye Kofwen Alukela. (Jon 5:1) Ke pal se el folokla nu Galili, el pre fong fon se in siyuk ke kasru lun God ke el sulela met sap 12. Ke len toka, oasr sie u lulap su tukeni nu sie ke pal se Jisus el akkeyela kain in mas lun met puspus. Met tuma lutlut puspus lal a met saye puspus oasr we, ke el muta fwin eolu el mutamwauk in luti nu selos.—Mattu 4:23–5:2; Luk 6:12-19.
2 Ke Jisus el mutamwauk ke me sramsram lal su eteyuk oana Me Sramsram Fwin Eolu, el akkalemye la me insemwomwo el tuku ke oiyen fototo mwomwo nu sin God. (Ridi Mattu 5:1-12.) Kalmeyen insemwomwo pa ‘in pulakin me insemwomwo a me engan yok su pulakinyuk sin sie met.’ Oasr kain in me insemwomwo yuh su Jisus el akuteye ke el akkalemye yok ke sripe puspus su paenang met Kristian elos insemwomwo, a ma inge el yok sripe ke pal inge in oana ke 2,000 yea somla. Inge lela kut in lutlutkin kais sie sropon me insemwomwo inge.
“Elos su Nunku Pal Nukewa ke Ma Enenu in Akkeye Fototo Lalos nu sin God”
3. Mea kalmen in nunku ke ma enenu in akkeye fototo lasr nu sin God?
3 “Insemwomwo elos su nunku pal nukewa ke ma enenu in akkeye fototo lalos nu sin God, tu togusrai in kosrao ma lalos.” (Mattu 5:3, NW) “Elos su nunku pal nukewa ke ma enenu in akkeye fototo lalos nu sin God” elos etu a akilen la elos enenu me kasru a pakoten lun God.
4, 5. (a) Efu ku nu selos su nunku yok ke me enenu in akkeye fototo lalos nu sin God elos insemwomwo? (b) Fuka kut ku in akfwalye ma enenu lasr in fototo nu sin God?
4 Nu selos su nunku yok ke ma enenu lalos in akkeye fototo lalos nu sin God elos insemwomwo, “meyen togusrai in kosrao ma lalos.” Met tuma lutlut puspus lun Jisus in pal meeta elos lulalfongi la el pa Messaia a ke sripe se inge oasr pal mwomwo nu selos in welul ke togusrai lun God in kosrao. (Luk 22:28-30) Fwin oasr fwinsrak lasr in welul Kraist nu in kosrao ku kut fwinsrakkin in moul ma patpat ke sie paredais fwin fwalu ye kolyuk lun Togusrai lun God, kut ku in insemwomwo fwin kut nunku na paye ke ma enenu lasr in akkeye fototo lasr nu sin God.
5 Tia met nukewa elos lungse in nunku yok ke ma enenu lalos in akkeye fototo lalos nu sin God, meyen oasr met puspus su wangin lulalfongi lalos a tia aksaokye ma mutal puspus. (2 Tessalonika 3:1, 2; Hibru 12:16) Inkanek mwo in akkeye ma enenu nu ke fototo lasr nu sin God pa in alken in oru lutlut ke Baibel, moniyuk in wi ke orekma in sulkakin peng mwo a in oru met tuma lutlut, a in wi pal nukewa ke meeting nukewa lun congregation.—Mattu 28:19, 20; Hibru 10:23-25.
“Insemwomwo” Elos Su Asor
6. Su “elos su asor,” a efu ku elos “insemwomwo”?
6 “Insemwomwo elos su asor tu elos fwa parak.” (Mattu 5:4) “Elos su asor” elos oana sie nu sin met su “nunku yok ke ma enenu lalos in fototo nu sin God.” Elos asor tia ke sripen elos torkaskas ke ma sikyak nu ke moul lalos. Elos asor yok ke sripen oiya lun sesumwos su oasr yurolos sifwana a ke ma upa puspus su sikyak ke sripen oiyen sesumwos lun metu. Efu ku met asor puspus inge elos “insemwomwo”? Meyen elos akkalemye lulalfongi nu sin God a nu sin Kraist a elos eis me akkeye yok ke sripen oasr fototo mwomwo lalos nu sin Jeova.—Jon 3:36.
7. Mea pulakin lasr a nunak lasr nu ke fwal lun Setan?
7 Ya kais sie sesr sasao a asor yok ke sripen orekma sesumwos su pengpeng a sikyak pal nukewa ke fwal lun Setan? Mea pulakin paye lasr nu ke ma puspus su akwuk lun fwal se inge el akkalemye nu sesr? Met sap Jon el simusla: “Tu ma nu kemwa su on in fwalu, lung lun ikwe, a lung lun muta a mwolanu lusrongten lun moul—tia ma sin Papa me.” (1 Jon 2:16) Mea kut enenu in oru kut fwin pulakin la orekma in kulansap lasr nu sin Jeova el akmunasyeyukla ke “ngun lun fwalu,” su lumeyuk nu ke ku su oasr ke nunak a oiya lun met su tia kulansap nu sin God? Ke ma inge lela kut in sekalani in pre lutlutkin kas lun God, a suk ke me kasru lun met elder nukewa. Kut fwin kafweang in fototo nu sin Jeova, el fwa “akpwarye” kut sifwana, ke kutena kain in ma upa su oru kut in asor yok.—1 Korint 2:12; Sam 119:52; Jemes 5:14, 15.
“Met fwokpap” Elos Insemwomwo Na Paye!
8, 9. Mea kalmen in fwokpap, a efu ku met su fwokpap elos insemwomwo?
8 “Insemwomwo elos su fwokpap, tu fwalu fwa ma lalos.” (Mattu 5:5) “Fwokpap,” ku “fulpap,” el tia kalmekin nu ke oiya lun munas ku me na lumala se mu sie met el fwokpap. (1 Timote 6:11) Kut fwin fwokpap, kut fwa akkalemye fulpap ke kut oru ma lungse lun God a eis kas in kasru a akos kolyuk lal. Kut enenu pa in akkalemye fwokpap ke kut asrouki, sramsram, a wi met lili wiyesr a nu sin met puspus saye. Kain in fwokpap inge el fwal nu ke kas in kaifwe lal Poul.—Ridi Rom 12:17-19.
9 Efu ku met nukewa su fwokpap elos insemwomwo? Meyen ‘elos fwa usrui fwalu,’ oana Jisus su fwokpap el fwak. El pa met se emeet su Usrui fwalu. (Sam 2:8; Mattu 11:29; Hibru 2:8, 9) Oayepa, met fwokpap puspus su “met usru yurin Kraist” elos e fwa usrui pa fwalu meyen elos fwa welul kol met fwokpap nukewa. (Rom 8:16, 17) Ye kolyuk lun Togusrai lun Jisus fwin fwalu, fwa oasr met fwokpap puspus su fwa engankin moul ma patpat.—Sam 37:10, 11.
10. Kut fwin tia fwokpap, fuka ma inge ku in akkolukye kunokon lasr ke congregation a ke fototo lasr nu sin met puspus?
10 In oana Jisus, kut enenu pa in fwokpap. Tusruktu mea e fwa sikyak kut fwin eteyuk sin met puspus mu kut mongsa a lungse in akukuin? Kain in oiya lun mongsa inge su lungse in akukuin ku in oru metu elos in srungela in asrouki a sramsram nu sesr. Kut fwin met lili mokul su lungse in eis kunokon ke congregation, kain in oiya inge oru kut in tia fwal nu ka. (1 Timote 3:1, 3) Poul el fwak nu sel Taitus in kafweang in akesmakinye met Kristian in an Krit elos in “tia met akukuin, in okak, in fwakak fwokpap nukewa nu sin met nukewa.” (Taitus 3:1, 2) Kain in oiya lun fwokpap inge el sie me akkeye yok nu sin met puspus!
Elos Musrinsral ke “Ma Sumwosmwos”
11-13. (a) Mea kalmen in musrinsral a malukin ma sumwosmwos? (b) Fuka met nukewa su musrinsral a malukin ma sumwosmwos elos fwa “kup”?
11 “Insemwomwo elos su musrinsral a malukin ma sumwosmwos, tu elos fwa kup.” (Mattu 5:6) Ke “ma sumwosmwos” su oasr ke nunak lun Jisus pa in oru oiya mwomwo a in oru ma sumwos ke kut akfwalye moul lasr nu ke ma lungse a masap lun God. Met sim lun sam el fwak mu el “musalla ke asro” nu ke nununku sumwosmwos lun God. (Sam 119:20) Ya kut aksaokye na paye ma sumwosmwos paenang kut musrinsral a malukin ma inge?
12 Jisus el fwak la nu selos su musrinsral a malukin ma sumwosmwos elos insemwomwo meyen elos fwa “kup.” Oiya se inge el akpayeyuk tokin Pentecost 33 C.E. ke pal se ngun mutal lun Jeova el mutamwauk in akkalemye nu sin fwalu me akpayeye mwomwo “ke sumwosmwos.” (Jon 16:8) Ke inkanek lun ngun mutal, God el akkeye met puspus in simusla buk puspus in Baibel, su arlana yok sripe “in aksumwosye a in akuteye ma sumwosmwos” nu sin metu. (2 Timote 3:16) Ngun mutal lun God el kasre kut in “nukomang met sasu, su fwal nu sin God orekla tari in sumwosmwos.” (Efesus 4:24) Aok, kut insemwomwo in etu la nu selos nukewa su auliyuk a suk in eis nunak munas ke ma koluk lalos ke sripen me kise lun lango lun Jisus elos ku in engankin sie oiya lun sumwosmwos nu sin God.—Ridi Rom 3:23, 24.
13 Ke pal se kut eis moul ma patpat su oasr oiya lun sumwosmwos ka, sral a malu ke ma sumwosmwos su kut pulakin ke pal inge e fwa wanginla meyen kut e fwa kup. Tusruktu ke pal inge su kut srakna sano in akpayeyuk ma inge, lela kut in tu ku in moulkin moul fwal nu ke akwuk sumwosmwos lun Jeova. Jisus el fwak: “A komwos suk meet togusrai lal, a ma sumwosmwos lal.” (Mattu 6:33) Kut fwin oru ma inge kalme pa kut oru kain in orekma puspus nu ke alu lasr nu sin God a ma inge oru kut in insemwomwo.—1 Korint 15:58.
Efu ku ‘Met Pakoten’ Elos Insemwomwo?
14, 15. Fuka kut ku in akkalemye pakoten nu sin met, a efu ku ‘met pakoten’ elos insemwomwo?
14 “Insemwomwo elos su pakomuta, tu elos fwa eis pakomuta.” (Mattu 5:7) Met nukewa su ‘pakoten’ elos pakomuta met puspus. Jisus el akkeyela mas lun met puspus ke inkanek lun mwenmwen meyen el pakomutalos. (Mattu 14:14) Pakoten el akkalemyeyuk pa ke pal se metu elos sang nunak munas nu ke ma koluk upa lun met puspus su orek nu selos, oana Jeova el pakomuta met puspus su auliyuk paenang el nunak munas ke ma koluk lalos. (Exodus 34:6, 7; Sam 103:10) Kut ku in akkalemye pakoten ke inkanek inge a ke kas a orekma mwomwo lasr su sang kasru nu sin met puspus su oasr ma enenu yok lalos. Sie inkanek mwo in akkalemye pakoten nu sin met puspus pa in fwakak nu selos ma paye su oasr in Baibel. In oana ke ma Jisus el oru, ke sripen el pakomuta sin sie u lulap lun met, paenang el “mutamwauk in luti ma puspus nu selos.”—Mark 6:34.
15 Oasr sripe mwomwo lasr in insese ke kas lun Jisus inge: “Insemwomwo elos su pakomuta, tu elos fwa eis pakomuta.” Kut fwin pakomuta met, paye la elos fwa akkalemye pa pakoten nu sesr. Ke pal se God el fwa nununke kut, el ku in orala sulela lal in tia oru nununku upa nu sesr kut fwin akkalemye pakoten nu sin met puspus. (Jemes 2:13) Met nukewa su pakoten mukena fwa ku in eis nunak munas ke ma koluk lalos a eis moul ma patpat.—Mattu 6:15.
Efu ku Met Nukewa su “Nasnas Insielos” Elos Insemwomwo
16. Mea kalmen in “nasnas inse,” a fuka met puspus su oasr yurolos kain in oiya mwo inge elos “liye God”?
16 “Insemwomwo elos su nasnas insielos, tu elos fwa liye God.” (Mattu 5:8) Fwin ‘nasnas insiesr,’ oiyen nasnas inge el ku in liyeyuk kalem ke ma puspus su kut lungse na paye, kena lasr a ke nunak lasr. Kut fwa akkalemye “lungse liki inse paye.” (1 Timote 1:5) Kut fwin nasnas ke nunak a insiesr, kut fwa ku in “liye God.” Kalmeyen kas inge pa kut tia ku in liye Jeova ke inkanek paye, meyen “metu fwa tia liye [God] a moul.” (Exodus 33:20) Tusruktu, ke sripen el akkalemye pa oiya mwomwo lun God, paenang Jisus el ku in fwak: “El su nuna liye yu el nu liyel Papa.” (Jon 14:7-9) In oana met kulansap lun God fwin fwalu, kut ku in “liye God” ke kut liye orekma lal in kasre kut. (Job 42:5) Nu sin met Kristian akmusrala elos ku in liye God ke pal se elos akmoulyeyukyak nu in kosrao oana ngun a ke sripe inge elos ku in liye Papa tumalos in kosrao.—1 Jon 3:2.
17. Inse nasnas su oasr yurosr ku in kasre kut in akkalemye mea?
17 Ke sripen sie met su oasr inse nasnas el moulkin oiya nasnas a el kafweang yok in nasnas ye mutun Jeova, paenang el tia nunku a sramsramkin ma nukewa su fokfok ye mutun Jeova. (1 Kronikel 28:9; Isaia 52:11) Fwin oasr yurosr inse nasnas, ma kut fwak a oru el nasnas pa, a orekma in kulansap lasr nu sin Jeova el arlana paye a tia me luma mukena.
Met su Lungse in “Akiumwe Metu” Elos Ekla Tulik Nutin God
18, 19. Oiya fuka met su lungse in “akiumwela metu” ku lungse in orek misla elos akkalemye?
18 “Insemwomwo elos su akiumwe metu, tu pangpang elos ‘tulik nutin God.’” (Mattu 5:9) Met su lungse in “akiumwe metu” ku lungse in orek misla el eteyuk ke ma elos oru a ke ma elos tia oru. Oasr ke nunak lun Jisus kain in met su lungse in orek misla nu sin met, ke ma inge kut lungse in akpayeye la kut ouinge ke kut kafweang in orek misla a kut tia ‘sang ma koluk nu ke ma koluk nu sin kutena met.’ A, kut ‘fwasr tokin ma mwo pal e nukewa nu sin met nukewa.’—1 Tessalonika 5:15.
19 Kas Grik su lungasyukla nu ke kas inge “akiumwela metu” in Mattu 5:9 el kalmekin “met su lungse in orek misla” nu sin met puspus. Kut fwin lungse in eteyuk oana sie met su lungse in “akiumwela metu,” kut enenu in kafweang in orek misla nu sin met nukewa. Met su lungse in orek misla el tia oru kutena ma su ku in ‘srela met kawuk kulo.’ (Soakas 16:28) Oana sie ‘met su lungse in orek misla,’ kut suk pal mwomwo a inkanek mwo in “fwasr tokin misla nu sin met nukewa.”—Hibru 12:14.
20. Ke pal inge su “tulik nutin God,” a ke saflaiye su pa ku in ekla tulik nutin God?
20 Met su lungse in orek misla elos insemwomwo meyen “pangpang elos ‘tulik nutin God.’” Jeova el nutela met Kristian akmusrala su sruokye oaru lalos a ke ma inge elos “tulik nutin God.” Oasr tari fototo mwomwo lalos nu sin Jeova oana tulik natul meyen elos akkalemye lulalfongi lalos nu sin Kraist a elos alu nu sin “God lun lungse a misla” ke inse kewa lalos. (2 Korint 13:11; Jon 1:12) Mea nu sin “sip ngie” nukewa lun Jisus su lungse pa in orek misla nu sin metu? Ke lusen Kolyuk lal ke Sie Tausan Yea, Jisus Kraist el “Papa Ma Patpat” nu selos, tusruktu ke saflaiye el fwa akpusiselyel sifwana nu sin Jeova a sip ngie nukewa elos fwa ekla tulik nutin God.—Jon 10:16; Isaia 9:6; Rom 8:21; 1 Korint 15:27, 28.
21. Oiya fuka kut fwa akkalemye kut fwin “moul ke ngun”?
21 Kut fwin “moul ke ngun,” kut enenu in akkalemye kalem nu sin met nukewa la kut lungse in orek misla nu sin met nukewa. Kut fwa tia “akkeye alein nu sin sie sin sie” ku “purakak mulat . . . nu sin sie sin sie.” (Galetia 5:22-26; New International Version) A, kut kafweang in “misla yurin met nukewa.”—Rom 12:18.
Insemwomwo Fwinne Kalyaiyuk!
22-24. (a) Mea sripe mwomwo puspus nu ke me insemwomwo lun met nukewa su kalyaiyuk tari ke ma sumwosmwos? (b) Mea kut fwa lutlutkin ke me lutlut toko?
22 “Insemwomwo elos su kolyaiyuk ke ma sumwosmwos, tu togusrai in kosrao ma lalos.” (Mattu 5:10) Jisus el akkalemye pa kas inge: “Insemwomwo komwos ke met akangonye komwos, a kolyai komwos, a fwak kain koluk nu kemwa lain komwos in kikiap, Keik. Komwos engunak, a arulanu insemwomwo, tu yok ma lane lomwos in kosrao; tu ouinge elos kolyai met palu su muta meet liki komwos.”—Mattu 5:11, 12.
23 In oana met palu puspus lun God in pal meeta, met Kristian elos etu la met puspus elos fwa kaskaskou nu selos, oru me kalyai nu selos, a akkolukyelos ke kain in kaskas kikiap lainelos. Ma inge nukewa orek nu selos ke sripen “ma sumwosmwos” su elos oru. Tusruktu, ke kut oaru in muteng ke kain in me srufwe inge, kut insemwomwo meyen kut etu la kut akinsemwomwoye a akfulatye Jeova. (1 Piter 2:19-21) Me keok su kut pulakin el tia ku in akmunasyela insemwomwo lasr in kulansapu Jeova ke pal inge ku ke pal fwasru. Ma inge tia ku in akmunasyela me insemwomwo lasr in welul Kraist in kol lal ke Togusrai in kosrao. Ma upa nukewa inge tia pa akwanginyela me insemwomwo su tuku ke moul ma patpat su itukyang nu sin met nukewa su e fwa moul fwin fwalu ye kolyuk lun Togusrai lun God. Me insemwomwo nukewa inge el me akpayeye ke me insemwomwo, kulang a pakoten lun God.
24 Oasr ma puspus su kut ku in lotela ke Me Sramsram Fwin Eolu. Kain in me lutlut puspus fwa lutlutkinyuk ke me lutlut luo toko. Lela kut in liye ke inkanek mwo su kut ku in orekmakin ke moul lasr kas nukewa lun Jisus Kraist inge.
Kom E Topuk Fuka?
• Efu ku “elos su nunku yok ke ma enenu in akkeye fototo mwomwo lalos nu sin God” elos insemwomwo?
• Mea sripe paenang “met fwokpap” elos insemwomwo?
• Efu ku kutu met elos insemwomwo fwinne elos kalyaiyuk?
• Me insemwomwo fuka Jisus el akkalemye su arlana akkeye kom?
[Picture on page 11]
Me insemwomwo yuh su Jisus el akkalemye yok el yok sripe ke pal inge oana in pal meeta
[Picture on page 12]
Sie inkanek mwo in akkalemye pakoten pa in fwakak nu sin met puspus ma paye lun Baibel