Lela Kas lun Jisus in Sang Kasru nu ke Oiya Lom
“Tu el su God el supamu el fwak kas lun God.”—JON 3:34.
1, 2. Nu ke mea kas lun Jisus ke Me Sramsram Fwin Eolu ku in pupulyukkinyuk nu ka? A efu ku kut ku in fwak mu el fwal nu ke “kas lun God”?
DIAMOND se su eteyuk mu yok emeet ke pal inge pa pangpang Star lun an Africa su carat ka oasr ke 530. Ma se inge el yok sripe na paye, sie me kasrup saok! Tusruktu, yok sripe liki ma inge pa kas lun Jisus su oana ma saok a me kasrup su oasr ke Me Sramsram lal Fwin Eolu. Tia sie me lut, meyen kas lun Kraist el tuku sin Jeova! Jisus el fwak kel sifwana: “Tu el su God el supamu el fwak kas lun God.”—Jon 3:34-36.
2 Fwinne Me Sramsram lal Fwin Eolu el fototo a ku in aksafyeyukla ke kitin pal na srisrik su srik liki minit 30, tusruktu oasr pal 21 orekmakinyuk fus puspus inge ke buk oalkosr ke Buk Matou ku Ma Simusla ke Kas Hibru. Ke ma inge me sramsram inge el fwal nu ke “kas lun God.” Lela kut in liye ingena la fuka kut ku in orekmakin kutu kas inge su arlana yok sripe su oasr ke me sramsram mwomwo lun Mwen kulo nutin God.
“Meet Kom In Iumwela Nu Sin Met Lim”
3. Tokin el sang kas in sensen nu sin met tuma lutlut lal ke fwako koluk puspus in sruokye mulat, kas in kai fuka Jisus el fwak nu selos?
3 Oana met Kristian, kut insemwomwo a lungse in orek misla nu sin metu meyen oasr yurosr ngun mutal lun God, a fwako mwomwo lun ma inge pa engan a misla. (Galetia 5:22, 23) Jisus el tia lungse met tuma lutlut lal in wanginla misla a insemwomwo lalos, ke sripe se inge el akkalemye kas in sensen nu selos ke fwako koluk puspus lun orekma in sruokye mulat a kasrkusrak su ku in kol nu ke mise. (Ridi Mattu 5:21, 22.) Tok el fwak: “Ke ma inge kom fwin kisekin me kise lom fwin loangu, a ingo esamak tu oasr ma sito lom nu sin met lim, filiye me kise lom we mutun loangu, a som inkanek lom; meet kom in iumwela nu sin met lim, na tuku a kisekin me kise lom.”—Mattu 5:23, 24.
4, 5. (a) Mea se inge “me sang” su akkalemyeyuk ke kas lun Jisus in Mattu 5:23, 24? (b) Efu ku yok sripe in orek misla nu sin sie met lili su kut aktukulkulye?
4 “Me sang” su Jisus el fwak ke fus inge el kalmekin nu ke kutena me kise su kisekinyuk nu in temple in an Jerusalem. Ke sie me pupulyuk, kosro puspus su orekmakinyuk oana me kise arlana yok sripe meyen sapkinyuk ke akwuk in alu su orek nu sin Jeova sin met kulansap nukewa lal. Tusruktu, Jisus el akkalemye yok ke ma se su ma arlana yok sripe, la sie met el enenu in orek misla meet nu sin met lel su el aktoasrye meet liki el kisekin sie me sang nu sin God.
5 Orekma se inge “iumwela nu sin met lim” el kalmekin ‘in orek misla nu sin met lili wiyom.’ Ke ma inge, me lutlut fuka kut ku in lotela ke kas lun Jisus inge? Arlana kalem la ma kut oru nu sin met puspus el ku in sang kasru ku el ku in akkolukye fototo lasr nu sin Jeova. (1 Jon 4:20) Paye la, me kise nukewa nu sin God in pal meeta el wangin sripe fwin met se su kisekin ma inge el tia akkalemye oiya mwo a fwal nu sin met lili wiyel a nu sin met puspus.—Ridi Maika 6:6-8.
Kut Enenu in Akkalemye Inse Pusisel
6, 7. Efu ku inse pusisel el eneneyuk kut fwin kafweang yok in sifwil pa akmwoye misla yurin sie met lili su kut aktukulkulyeyuk?
6 Orekma in orek misla nu sin sie met lili su aktoasryeyuk el tia ma fusrasr se a el ku in srike inse pusisel lasr. Met pusisel elos tia orek akukuin nu sin met lili puspus wiyelos in akpayeye nu sel sifwana mu el pa sumwos. Kain in orekma inge el tia sang kasru a el akupaye na ma upa inmasrlolosr, su ku in oana ke ma sikyak inmasrlon met Kristian puspus in an Korint in pal meeta. Ke ma sikyak inge, Poul el akkalemye kas inge su ku in oru elos in nunku yok: “Na sitoe na sito yurumwos, tu komwos lain sie sin sie in masap. Efu ku komwos tia lela in komwos pa eis ma koluk? Efu ku komwos tia lela nu selos in kiape komwos?”—1 Korint 6:7, NW.
7 Jisus el tia fwak la kut enenu in som nu yurin met lili wiyesr in akkalemye nu sel la kut pa sumwos ku paye a el pa sito. Ma kut lungse in akpayeye u pa in sifwil akmwoye fototo mwomwo su oasr misla ka inmasrlosr. In orek misla, kut enenu in paye in akkalemye nunak a pulakin lasr. Kut enenu pa in akilen la kut akngalye pa pulakin a nunak lun met se inge. A fwin kut pa tafongla, paye la kut enenu in pusisel in siyuk ke nunak munas ke ma koluk lasr.
‘A Mutom Leyut Fwin Akkolukye Kom’
8. Kalweni ke kas fototo kas lun Jisus in Mattu 5:29, 30.
8 Ke Me Sramsram lal Fwin Eolu, Jisus el sang kas in kai mwomwo nu ke moul nasnas. El etu la laan manosr su koluk el ku in kufuskutla. Ke ma inge Jisus el fwak: “A mutom leyut fwin akkolukye kom, tipalla, a sisla liki kom. Tu mwo nu sum tu sie sin laan monum in tula, a tia monum nufon sisila nu in Gehenna. A lepoum leyut fwin akkolukye kom, pakela, a sisla liki kom. Tu mwo nu sum tu sie sin laan monum in tula, a tia monum nufon sisila nu in Gehenna.”—Mattu 5:29, 30, NW.
9. Fuka “mutasr” ku “paosr” ku in “aktukulkulye” kut?
9 “Muta” se su Jisus el sramsramkin el lumeyuk nu ke ku lasr in loang akmwoye nu ke ma se, a “lepoum” el kalmekin nu ke ma kut oru ke paosr. Kut fwin tia taran, paye la laan manosr ku in oru kut in “tukulkul” a oru pa kut in tila ‘fwufwasryesr wi God.’ (Genesis 5:22; 6:9) Ke ma inge, kut fwin srufweyuk in tia akos Jeova, kut enenu in oru me aksumwos nu ka, su ku in lumeyuk oana ke kas in pupulyuk, kut tipalla mutasr ku kut pakela paosr.
10, 11. Mea ku in kasre kut in fwasr liki orekma lun kosro?
10 Fuka kut ku in oru mutasr in tia ngetang nu ke ma fokfok nukewa? Job el fwak: “Nga oru sie mwuleang yurin mutuk; na fuka nga ku in ngetnget nu sin sie virgin?” (Job 31:1) Job el sie mokul su payuk tari a el oru sulela lal in tia kunausla masap lun God ke oiyen nasnas. Kut enenu pa in akkalemye kain in oiya mwomwo inge fwinne kut payuk tari ku soenna payuk. Tu kut in fwasr liki orekma lun kosro, kut enenu me kasru lun ngun mutal lun God, su kasre kut in akkeye oiya lun sifwana leumi nu selos su lungse God.—Galetia 5:22-25.
11 In kasre kut in fwasr liki orekma lun kosro, kut enenu in siyuk sesr sifwana kusensiyuk inge, ‘Ya nga lela mutuk in mokleak nunak luk in suk a ridi me rid fokfok, in liye petsa fokfok ke television, ku ke Internet?’ Lela kut in esam pa ke kas inge lal Jemes sie met tuma lutlut: “Tu met nu kemwa elos srifweyuk, ke kena lalos kolang insielos nu ke lungse koluk lalos a elos tafongla; na lungse koluk ke kapak, oswela orekma koluk, a ma koluk ke matula, oswela mise.” (Jemes 1:14, 15) Aok, fwin kutena met su mwulela tari moul lal nu sin God el ‘kafweang in ngetang’ nu sin sie mutan ku mokul su oasr nunak koluk lal nu se, el enenu in silaklak in aksumwosye oiya koluk lal inge, su ku in lumeyuk nu ke orekma in tipalla muta ku in pakela pao.—Ridi Mattu 5:27, 28.
12. Kas in kai fuka lal Poul ku in kasre kut in lain kena koluk lun ikwe?
12 Ke sripen orekmakinyen paosr ke inkanek tia sumwos el ku in oru kut in kunausla akwuk mwomwo lun Jeova ke moul nasnas, paenang kut enenu in tu na ku in sruokye moul nasnas lasr. Ke ma inge, kut enenu in orekmakin kas in kai lal Poul inge: “Komwos in uniye laamwos su on fwalu; kosro, fokfok, lung lun ikwe, lungse koluk, a rapku, su alu nu ke me srulela.” (Kolosse 3:5) Kas inge “in uniye” el akkalemye yok ke me aksumwos ke pal na sa su enenu in orek in lain kena koluk lun ikwe.
13, 14. Efu ku arlana yok sripe kut in fwasr liki nunak a orekma koluk a fokfok?
13 Fwin sie met el lungse in molela moul lal, el enenu in insese nu ka la sie laan manol su oana paol ku niyel enenu in pakpukla a sisila. Kas in pupulyuk inge “sisila” lun muta a pao el yok sripe nu sesr in kasre kut in tia nunku a oru kutena ma fokfok su ku in tula me insemwomwo lun Jeova liki kut. Orekma lasr in karungin nunak lasr, oiyesr, a ke orekma lasr nu sin God pa inkanek sefwanna su ku in kasre kut in kaengkunla me kunausten su lumeyuk nu ke Gehenna.
14 Ke sripen ma koluk a oiya sesumwos su kut usrui, paenang orekma in karungin moul nasnas el enenu in oasr kafweang yok nu ka. Met sap Poul el fwak: “A nga uni monuk, a akkosye, saap ke kutena ma, tokin nga fwakak mwosasu nu sin met ngia, nga fwa sifwana pilesreyuk.” (1 Korint 9:27) Ke ma inge, lela kut in akpayeye nu sesr in orekmakin kas in kasru lun Jisus ke moul nasnas, a in kutongkuti liki orekma tia mwo su akkalemye la kut tia aksaokye me kise lun lango lal.—Mattu 20:28; Hibru 6:4-6.
Kafweang “In Sang”
15, 16. (a) Me srikasrak fuka Jisus el akkalemye ke oiya su lungse in sang pal nukewa? (b) Mea kalmen kas lun Jisus in Luk 6:38?
15 Kas lun Jisus a me srikasrak mwomwo lal el akkeye oiya su akkalemye ke lungse a engan in sang. El akkalemye kulang yok ke pal se el tuku nu fwalu in akinsemwomwoye met nukewa su sesumwos. (Ridi 2 Korint 8:9.) Jisus el inse mulala in fuleak mwolanu lal in kosrao a el ekla sie met a sang moul lal nu sin met nukewa su sesumwos, su kutu selos fwa eis me kasrup in kosrao oana met usru ke Togusrai. (Rom 8:16, 17) A paye la Jisus el lungse in akkeye met nukewa in akkalemye kulang ke pal se el fwak:
16 “Sang, a a fwa etukot nu sumwos. Srikasrak mwo, tanye, oskoini nu sie, kakla, elos fwa sot nu in imwom. Tu ke me srikasrak se su komwos srikeye ka, a fwa srikeyuk nu sumwos.” (Luk 6:38) Ke kas su orekmakinyuk in pal meeta su lungasyukla nu ke pulo kas inge ‘elos fwa sot nu in imwom,’ el sramsramkin ke sie fasin ku orekma mwomwo lun kutu met kuka in pal meeta ke elos sang ma puspus nu sin met moul in nekla nuknuk lalos su elos losye infwulwe in orala aten sie pocket kel in sang nenek kain in ma puspus. Oiya mwomwo lasr su lungse a engan in sang ku in orala fwako mwomwo ka ke metu elos insemwomwo pa in ase nu sesr ma puspus, saap ke pal se su oasr ma enenu yok lasr.—Ekklisiastis 11:2.
17. Jeova el akkalemye fuka me srikasrak mwo emeet in sang, a kain in orekma in sang fuka ku in oru kut in insemwomwo?
17 Jeova el lungse a akinsemwomwoye met nukewa su lungse na paye in sang. El sifwana akkalemye me srikasrak mwomwo, ke el sang Mwen sefwanna natul “tu met nukewa su lulalfongel fwa tia tula, a el fwa eis moul ma patpat.” (Jon 3:16) Poul el simusla: “El su taknelik pu fwa ouyepa kosrani pu; a el su taknelik pus fwa ouyepa kosrani pus. Kutena met, oana papu insiel, fwa sang ou inge, tia ke sromwos, ku srangesr, tu God el lungse el su insemwomwo in sang.” (2 Korint 9:6, 7) Kut ku in lulalfongi na paye la kut fwin orekmakin pal, ku a ma saok lasr in sang kasru alu paye la el ku in ase nu sesr me engan yok a me insemwomwo puspus.—Ridi Soakas 19:17; Luk 16:9.
“Nik Kom Ug Ugug Ye Mutom”
18. Ke oiya puspus fuka fwa “wangin me mol” lasr sin Papa tumasr in kosrao?
18 “Komwos liaung tu komwos in tia oru ma mwo lomwos ye mutun metu, tu elos in liye komwos, fwin ou inge wangin me mol lomwos sin Papa tumomwos, su in kosrao.” (Mattu 6:1) Kas lun Jisus inge ke “ma mwo,” el kalmekin nu ke oiya mwomwo su fwal nu ke ma lungse lun God. El tia fwak mu orekma mwomwo su fwal nu ke akwuk lun God el tia enenu in orek ye mutun met puspus, meyen el fwak nu sin met tuma lutlut lal elos in “lela kalem [lalos] in tolak ye mutun metu.” (Mattu 5:14-16) Tusruktu, “wangin me mol” lasr sin Papa tumasr in kosrao fwin kut oru ma puspus “tu elos in liye” orekma lasr. Meyen kut lungse met su liye kut elos in kaksakin kut, su oana ke actor puspus elos oru me lumala lalos ke sie theater. Fwin oasr yurosr kain in nunak ouinge, kut fwa tia ku in engankin fototo mwomwo nu sin God ku ke me insemwomwo su tuku ke kolyuk lun Togusrai ma patpat.
19, 20. (a) Mea kalmen kas lun Jisus ke el fwak in tia ‘ug me ugug’ ke pal in sang “me pakomuta”? (b) Ke inkanek fuka kut tia lela lepaosr lese in etu ma lepoasr leyut el oru?
19 Fwin oasr oiya sumwos lasr, kut fwa akos kas in kasru lun Jisus inge: “Ke ma inge ke kom oru me pakomuta lom, nik kom ug ugug ye mutom, oana met mwosounkas oru in imwen lolngok a inkaneku, tu met in kaksukunalos. Payenu Nga fwak nu sumwos, Elos eis tari me mol lalos.” (Mattu 6:2) Kas inge “me pakomuta” el me kasru lun met puspus nu sin met enenu nukewa. (Ridi Isaia 58:6, 7.) Jisus a met tuma lutlut lal elos oreni pa lupan mani lalos in sang kasru met sekasrup. (Jon 12:5-8; 13:29) Ke sripen orekma in sang ma puspus nu sin met enenu el tia sa orek tokin me ugug ugyuki, ke ma inge Jisus el orekmakin sie kas in pupulyuk ke pal se el fwak la kut tia “ugye ugug” ye mutasr ke pal se kut sang nu sin metu “me pakomuta.” Kut tia enenu in akkalemye nu sin met puspus orekma in sang inge, oana met Farisi elos oru. Jisus el pangnolos met mwosounkas, meyen elos lungse in akkalemye nu sin met nukewa orekma lalos in sang nu sin met enenu “in imwen lolngok a ke inkaneku.” Met mwosounkas nukewa inge elos “eis tari me mol lalos.” Kas in kaksak lun metu nu selos a ke an in muta sisken met rabbai puspus ke imwen lolngok pa me mol su elos ku in eis, meyen Jeova el tia sang kutena me mol nu selos. (Mattu 23:6) Tusruktu, oiya fuka met tuma lutlut nukewa lun Kraist enenu in akkalemye? Jisus el fwak nu selos, a nu sesr pa:
20 “A ke kom oru me pakomuta lom, nikmet lela poum lese in etu ma lepoum leyut oru, tu me pakomuta lom in lukma; a Papa tumom su liye in lukma fwa sot me mol nu sum.” (Mattu 6:3, 4) Paosr el tukeni orekma. Ke ma inge, kalmeyen kas inge la lepo lese in tia etu ma lepo leyut el oru el kalmekin la kut tia enenu in akkalemye nu sin met puspus orekma lasr in sang kasru met enenu, fwinne nu selos su fototo nu sesr, oana ke lepaosr lese el fototo nu ke lepaosr leyut.
21. Mea me mol puspus su tuku sin El “su liye in lukma”?
21 Kut fwin tia konkun ke orekma lasr in sang me kasru nu sin met enenu, “me pakomuta” lasr el orek in lukma. Ke ma inge Papa tumasr, “su liye in lukma,” fwa ase me mol nu sesr. Ke sripen el oasr in kosrao su metu tia ku in liye, paenang Papa tumasr in kosrao el oasr in “lukma” pal nukewa, su kalme pa metu tia ku in liyel pal nukewa. (Jon 1:18) Me mol su tuku sin El “su liye in lukma” el kalmekin nu ke me insemwomwo lun Jeova in kasre kut in oasr fototo mwomwo nu sel, el sang nunak munas ke ma koluk lasr, a ke el ase nu sesr moul ma patpat. (Soakas 3:32; Jon 17:3; Efesus 1:7) Kain in me mol inge el mwo liki kutena kas in kaksak lun metu!
Kas Nukewa su Arlana Yok Sripe Kut in Aksaokye
22, 23. Efu ku kut enenu in aksaokye kas nukewa lun Jisus?
22 Me Sramsram Fwin Eolu el nenela na paye ke me kasrup su tuku sin God oana ma saok a me kasrup su arlana mwo. Paye kas nukewa inge nenela ke kas na mwomwo su ku in ase nu sesr engan yok fwinne kut oasr ke fwal koluk inge. Aok, kut ku in insemwomwo kut fwin aksaokye kas nukewa lun Jisus a lela ma inge in aksumwosye ella lasr a oiyen moul lasr.
23 Met nukewa su “long” a “oru” ma Jisus el luti elos fwa akinsemwomwoyeyuk. (Ridi Mattu 7:24, 25.) Ke ma inge lela kut in akos na paye kas in kasru nukewa lun Jisus. Kutu pa kas lal su oasr ke Me Sramsram Fwin Eolu fwa lutlutkinyuk ke me lutlut aktolu.
Kom E Topuk Fuka?
• Efu ku yok sripe in orek misla nu sin sie met lili su kut aktoasryeyak?
• Mea kut enenu in oru tu ‘mutasr leyut’ in tia aktukulkulye kut?
• Oiya a nunak fuka kut enenu in akkalemye ke orekma in sang?
[Picture on page 15]
Arlana mwo in “orek misla” nu sin sie met lili su kut aktukulkulyeak!
[Pictures on page 16, 17]
Jeova el akinsemwomwoye met nukewa su insemwomwo in sang