Oiya Fuka Kut Enenu in Akkalemye nu sin Met Puspus?

“A oana komwos lungsumwos tu met in oru nu sumwos, komwos ouyepa oru oinge nu selos.”​—LUK 6:31.

1, 2. (a) Mea se inge Me Sramsram Fwin Eolu? (b) Mea kut fwa lutlutkin ke me lutlut se inge a ke me lutlut toko?

JISUS KRAIST el sie Met Luti Lulap na paye. Ke pal se met lokwalok puspus lal elos supwela met meun in sruokilye, met meun elos folokla tusruktu Jisus el tia welulos paenang elos fwak: “Wanginu met kaskas oana met se inge omeet me.” (Jon 7:32, 45, 46) Sie me sramsram mwomwo lun Jisus pa Me Sramsram Fwin Eolu. Ma inge simla in sapta ak 5 nu ke 7 ke Gospel lun Mattu, a oasr pa ma simla ka in Luk 6:20-49.a

² Saap kas ke me sramsram inge arulana eteyuk yok pa ke akwuk in akkalemye oiya ku ella mwomwo nu sin met puspus su pangpang pwe Golden Rule. Kas inge el akkalemyeyuk nu ke oiya su kut lungse in akkalemye nu sin met puspus. “A oana komwos lungsumwos tu met in oru nu sumwos, komwos ouyepa oru oinge nu selos,” Jisus el fwak. (Luk 6:31) Aok el oru ma mwo puspus nu sin metu! El akkeyela met mas a el akmoulyeyak pa met mise. Tusruktu, met puspus elos akinsemwomwoyeyuk yok ke pal se elos eis a porongo peng mwo lun togusrai su akkalemyeyuk nu selos. (Ridi Luk 7:20-22.) Kut oana Met Lo lun Jeova, kut insemwomwo in wi ke orekma in sulkakin peng mwo lun Togusrai su orek pa ke pal inge. (Mattu 24:14; 28:19, 20) Ke me lutlut inge a ke me lutlut toko, kut fwa lutlutkin kas lun Jisus ke orekma se inge a ke kutupa me lutlut mwomwo ke Me Sramsram lal Fwin Eolu su sramsramkin ke oiya su kut enenu in oru ku akkalemye nu sin met puspus.

Akkalemye Fwokpap

3. Fuka kom ku in akuteye kalmen fwokpap?

³ Jisus el fwak: “Insemwomwo elos su fwokpap, tu fwalu fwa ma lalos.” (Mattu 5:5) In ma Simusla, fwokpap el tia orekmakinyuk oana sie inkanek munas ku sangengtot. Ma inge el sie oiya mwomwo su akkalemyeyuk ke inkanek kulang su paenang kut in akos masap lun God. Kain in oiya mwo inge el akkalemyeyuk ke ella su kut akkalemye nu sin met atulani lasr. Ke sie me pupulyuk, kut “tia sang ma koluk nu ke ma koluk nu sin kutena met.”​—Rom 12:17-19.

4. Efu ku met fwokpap elos insemwomwo?

⁴ Met fwokpap elos pulakin insemwomwo paye meyen “elos fwa usrui fwalu.” Jisus su “fwokpap a inse pusisel,” el pa “met usru lun ma nukewa” a ke ma inge el pa ma se meet su Usrui fwalu. (Mattu 11:29; Hibru 1:2; Sam 2:8) Kas lun God el akkalemye tari ke kas palu la “mwen nutin met” su fwa oru kolyuk lal oana Messaia a oasr pa met kol puspus su fwa welul in kol ke Togusrai su oasr in kosrao. (Daniel 7:13, 14, 21, 22, 27) Met akmusrala nukewa inge elos met fwokpap su piselos oasr ke 144,000 elos su “met usru yurin Kraist,” elos fwa usrui pa fwalu oana Jisus. (Rom 8:16, 17; Fwakyuk 14:1) Met fwokpap puspus pwe saye elos fwa eis me insemwomwo yok ke moul ma patpat fwin fwalu ye kolyuk lun Togusrai.​—Sam 37:11.

5. Kut fwin etawi oiyen fwokpap lun Kraist mea ma inge ku in oru nu sesr?

⁵ Fwin tia mwo oiyesr, met puspus elos srunga in asrouki nu sesr a elos fwa fwasr liki kut. Tusruktu, kut fwin akkalemye oiyen fwokpap oana Kraist fwa oru kut in mwo a sang me akkeye nu sin met lili nukewa ke congregation. Oiyen fwokpap el sie sin fwako lun ngun mutal su kut ku in akkalemye ke kut ‘moul a fwufwasryesr ke ngun.’ (Ridi Galetia 5:22-25.) Aok kut lungse in oana sie met su fwokpap su kolyuk sin ngun mutal lun Jeova!

Insemwomwo Yok Elos su Pakomuta!

6. Kain in oiya mwomwo fuka oasr yurin met pakomuta?

⁶ Ke me Sramsram lal Fwin Eolu, Jisus el fwak pa: “Insemwomwo elos su pakomuta, tu elos fwa eis pakomuta.” (Mattu 5:7) Oasr yurin “met pakomuta” kulang a pakomuta yok a elos akkalemye nunak mwomwo a kulang nu sin met enenu puspus. Jisus el akkeyela met puspus ke inkanek lun mwenmwen meyen el “pakomutalos.” (Mattu 14:14; 20:34) Oiyen pakomuta a kulang akkeye kut in akkalemye pakoten nu sin met puspus.​—Jemes 2:13.

7. Pulakinyen pakomuta yok el moklel Jisus in oru mea?

⁷ Ke sie pal oasr sie un met elos osun nu sin Jisus ke pal se el som in eis mongla lal kitin pal ke sie an, “el pakomutalos, tu elos oana sip su wangin met sropu lalos.” Ke ma inge, “el mutamwauk in luti ma puspus nu selos.” (Mark 6:34) Kut pulakin insemwomwo yok ke kut wi pa akkalemye peng mwo lun Togusrai nu sin met puspus a fwakak nu selos ke pakomuta yok lun God!

8. Efu ku met pakoten elos insemwomwo?

⁸ Met nukewa su pakoten elos insemwomwo meyen “pakoten akkalemyeyuk” pa nu selos. Kut fwin pakomuta met, elos akkalemye pa pakomuta nu sesr. (Luk 6:38) Sayen ma inge, Jisus el fwak: “Tu komwos fwin nunak munas nu sin met ke ma koluk lalos, Papa tumomwos su in kosrao el fwa ouyepa nunak munas nu sumwos.” (Mattu 6:14) Met pakoten mukena fwa eis nunak munas ke ma koluk a me insemwomwo lun God su oralos in engan a insemwomwo.

Efu Ku Insemwomwo Elos su “Akiumwe Met”

9. Oiya fuka kut fwa akkalemye kut fwin kain in met su lungse in orek misla?

⁹ Jisus el akkalemye siepa sripe mwo in pulakin insemwomwo, el fwak: “Insemwomwo elos su akiumwe metu, tu pangpang elos ‘tulik nutin God.’” (Mattu 5:9) Kas Grik ke fus se inge su lungasyukla oana “akiumwe metu” el kalmekin nu ke “sie met su lungse in orek misla.” Kut fwin lungse in orek misla, kut fwa tia lela ku wi ke kutena orekma, oana ke inkanek in orek lesrik, su ku in ‘srela met kawuk kulo.’ (Soakas 16:28) Ke kas a orekma, kut fwa orek misla nu sin met puspus saye a luun congregation lun met Kristian. (Hibru 12:14) Yokna kut fwa oru ke ku lasr kewa in oasr misla nu sin Jeova God.​—Ridi 1 Piter 3:10-12.

10. Efu ku “met su lungse in orek misla” elos insemwomwo?

¹⁰ Jisus el fwak la “met su lungse in orek misla” elos insemwomwo, “tu pangpang elos ‘tulik nutin God.’” Ke sripen met Kristian akmusrala nukewa elos akkalemye lulalfongi nu sin Jisus oana Messaia, paenang elos “fwal in ekla mwen nutin God.” (Jon 1:12; 1 Piter 2:24) Fuka nu ke “sip ngie” lun Jisus su lungse pa in orek misla? Jisus el fwa ekla “Papa Ma Patpat” nu selos ke lusen Tausen Sie Yea Kolyuk lal wi met usru puspus in kosrao. (Jon 10:14, 16; Isaia 9:6; Fwakyuk 20:6) Ke saflaiyen Me Kolyuk lal ke Lusen Sie Tausen Yea, met nukewa su lungse in orek misla elos fwa ekla tulik nutin God fwin fwalu.​—1 Korint 15:27, 28.

11. Oiya fuka kut fwa akkalemye nu sin met puspus kut fwin eis me kolyuk lun “lalmetmet lung me”?

¹¹ Tu kut in engankin fototo mwomwo lasr nu sin Jeova, su “God lun misla,” kut enenu in etawi oiya mwomwo puspus lal, wekunang oiya mwo su lungse in orek misla. (Filippai 4:9) Kut fwin lela nu sesr sifwana in eis me kolyuk lun “lalmetmet lung me,” kut fwa akkalemye oiya mwomwo nu sin met puspus ke inkanek lun misla. (Jemes 3:17) Aok, kut insemwomwo in orek misla nu sin met puspus.

“Lela Kalem Lom in Tolak”

12. (a) Mea Jisus el fwak ke kalem lun ma paye? (b) Fuka kut ku in lela kalem lasr in tolak?

¹² Kut oru ma mwo emeet nu sin met nukewa kut fwin kasrelos in eis kalem lun ma paye su tuku sin God. (Sam 43:3) Jisus el fwak nu sin met tuma lutlut lal la elos “kalem lun fwalu” a el akkeyelos in lela kalem lalos in tolak tu metu elos fwa ku in liye ke “orekma mwo” lalos, ku orekma mwo nu sin met puspus. Jisus el sramsramkin orekma lun met tuma lutlut lal ke elos sulkakin peng mwo “nu sin met puspus.”(Ridi Mattu 5:14-16.) Misenge, kut lela kalem lasr in tolak ke kut oru ma mwomwo nu sin met tulan lasr a ke kut wi ke orekma in sulkakin peng mwo “nu sin met nukewa fwalu,” ku “nu sin met lun mutanfwal nukewa.” (Mattu 26:13; Mark 13:10) Sie kunokon na mwomwo pa inge in wi ke orekma mwolana inge!

13. Metu elos sa liye ma mwo fuka kesr?

¹³ “Sie siti su on fwin eolu, koflanu mwukunla,” Jisus el fwak. Kutena siti su on fwin eolu ku in sa in liyeyuk. Ke inkanek oana sie, metu elos sa akilen kut ke orekma mwo lasr oana met sulkakin peng mwo lun Togusrai, a metu elos liye pa ke orekma mwomwo lasr a ke oiya mwomwo lasr oana ke ella mwo a oiyen nasnas.​—Taitus 2:1-14.

14. (a) Fuka sie lam in century se meet el orekla? (b) Mea kalme in tia mwukunla kalem lun ma paye ye “sie tup” ku sie foto in srikasrak ke kas in pupulyuk?

¹⁴ Jisus el sramsramkin orekma in akosak lamu a filiye ma inge, tia ye foto, a fwin sekunlamu tu in kofleak an nukewa in loomu. Sie kain in lam in century se meet su metu orekmakin pa kain in lam su orek ke fok su oasr wick ka in oru oil ka in som nu lung (orekmakinyuk oil ke olive pal nukewa) in oru e ke lamu in kalem pal nukewa. Lamu filiyuki fwin sekunlamu su pal nukewa orekla ke sak ku mwusra, in oru kalem ‘in tolak an nukewa in loomu.’ Metu tia akosak lamu a filiye ye “tupu” su orekmakinyuk oana me srikasrak​—nu ke sie tup su lupa el oasr ke quart oalkosr. Jisus el tia lungse met tuma lutlut nukewa lal elos in mwukunla kalem lalos ye sie tup ku foto in srikasrak ke inkanek in pupulyuk. Ke ma inge kut ku in lela kalem lasr in tolak, a tia lela kutena me lain ku me kalyai in oru kut in mwukunla ma paye lun ma Simusla ke kut tia akkalemye ma inge nu sin met puspus.

15. Fuka “orekma mwo” lasr sang kasru nu sin kutu met?

¹⁵ Tokin el akkalemye ke sie lam su tolak kalem la Jisus el fwak nu sin met tuma lutlut lal: “Oinge komwos sang kalem lomwos in tolak ye mutun metu, tu elos fwa liye orekma mwo lomwos, a kaksakin Papa tumomwos su in kosrao.” Ke sripen “orekma mwo” lasr, paenang oasr kutu met su “sang kaksak” nu sin God ke elos ekla met kulansap lal. Ma inge el sie me akkeye yok nu sesr kut in “sikme in masrlolos oana kalem lun fwalu”!​—Filippai 2:15.

16. Oana “kalem lun fwalu” mea eneneyuk nu sesr in oru?

¹⁶ Kut oana “kalem lun fwalu” oasr me enenu yok nu sesr kut in wi pal nukewa ke orekma in sulkakin peng mwo lun Togusrai a in oru met tuma lutlut. Tusruktu oasr pa ma eneneyuk saye kut in oru. “Komwos in fwufwasryesr oana tulik nutin kalem,” met sap Poul el simusla, “tu fwokin kalem on in mwo nukewa a sumwosmwos a paye.” (Efesus 5:8, 9) Oiyesr a ella lasr enenu in oana sie me srikasrak mwomwo pal nukewa. Aok, kut enenu in orekmakin kas in kai lal met sap Piter: “A in fwal orekma lomwos in maslon met Pegan: tu, in ma elos kaskas lain komwos ka oana met orek ma koluk, tu ke orekma mwo lomwos su elos liye, elos kaksakin God in len el tuku nu yurin metu.” (1 Piter 2:12) Tusruktu mea kut enenu in oru fwin fototo lasr in masrlon sie met lili el tia mwo?

“Orek Misla Nu sin Met Lim”

17-19. (a) Mea se “me kise” su akkalemyeyuk in Mattu 5:23, 24? (b) Efu ku arulana yok sripe in akmwoye ma upa lun sie met nu sin sie met lel, a fuka Jisus el akkalemye ma inge?

¹⁷ Ke Me Sramsram lal Fwin Eolu, Jisus el sang kas in sensen nu sin met tuma lutlut elos in tia sruokye mulat lalos a tia akkolukye sie met lili. A, elos enenu in sa in orek iumwe ku misla nu sin sie met lili su aktukulkulyeyuk. (Ridi Mattu 5:21-25.) Loang akmwoye nu ke kas in kai lun Jisus. Kom fwin us me kise lom nu fwin loangu a kom esamak la oasr ma sito lom nu sin met lim, mea kom enenu in oru? Kom enenu in filiye me kise lom mutun loangu a som in orek misla nu sin met lim. Tokin ma inge, kom ku in foloku a kisekin me kise lom.

¹⁸ “Me kise” inge el me kise su sie met el ku in sang nu ke temple lun Jeova a ke pal puspus me kise inge el orek ke soko kosro. Me kise lun kosro el arulana yok sripe, meyen elos sapkinyuk sin God in kisekin me kise oinge ke elos oru orekma in alu lalos ye Masap lal Moses. Tusruktu kom fwin esam la oasr ma sito lom nu sin met lili wiyom, ma yok sripe emeet pa in aksumwosye meet ma koluk in masrlomwos liki na in kisekin me kise lom. “Filiye me kise lom ye mutun loangu, a som inkanek lom,” Jisus el fwak. “Ma se meet kom in orek misla nu sin met lim, a tokin ma inge, ke pal se kom folokla, kom kisekin me sang lom.” Ke ma inge arulana yok sripe in akmwoye fototo lun sie met nu sin met lel meet liki el kisekin me kise lal su sapkinyuk nu sel fwal nu ke Masap.

¹⁹ Jisus el sramsramkin kain in me kise nukewa a kain in ma koluk puspus su orek nu sin met lili. Ke ma inge, kutena me kise fwa tia kisekinyuk fwin sie met el esamak la oasr ma sito lal nu sin met lel. Kosro moul soko fwa filiyuki on sisken “mutun loangu” lun me kise furur ke kalkal ke temple se su met tol oasr we. Tokin ma upa el aksumwosyeyukla, met su orala ma koluk el fwa folokla a kisekin me kise lal.

20. Efu ku kut enenu in sa aksumwosye ma upa nu sin sie met lili su oasr kas in lain nu sesr ke sripen kut aktoasryel?

²⁰ Ke liye lun God, fototo mwomwo lasr nu sin met lili wiyesr pa ma se ma yok sripe nu ke alu paye. Me kise lun kosro el wanginla sripe nu sin Jeova fwin met su kisekin ma inge el tia akkalemye oiya mwomwo nu sin met lili wiyel. (Maika 6:6-8) Ke ma inge, Jisus el kaifwe met tuma lutlut lal elos in “sa aksumwosye ma upa lalos nu sin met.” (Mattu 5:25, New World Translation) Poul el simusla oapana: “Komwos in mulat, a tia orek ma koluk; tia lela fwatu in tili fwin mulat lomwos, a komwos in tia sang an sin Devil.” (Efesus 4:26, 27) Kut fwin pulakin mu mwo kut in mulat, kut enenu in aksaye oru orekma lasr in aksumwosye ma upa sa tu kut in tia sruokye mulat lasr a in sang an sin Devil in akkolukye kut.​—Luk 17:3, 4.

Akkalemye Sunak nu sin Met Puspus Pal Nukewa

21, 22. (a) Fuka kut ku in orekmakin kas in kasru lun Jisus su kut tufwana akuteye? (b) Mea kut fwa lutlutkin ke me lutlut toko?

²¹ Ke kut kalweni kutu kas lun Jisus ke Me Sramsram lal Fwin Eolu el kasre kut in akkalemye oiya mwo nu sin met puspus wikin kulang a sunak. Fwinne kut nukewa sesumwos, kut ku in orekmakin kas in kai lun Jisus meyen el a Papa tumasr su oasr in kosrao elos tia tupan kut yok liki ma kut ku in oru. Kut ku in akkalemye la kut met fwokpap, pakoten, a met su lungse in orek misla, ke kasru lun pre, kafweang yok, a me insemwomwo lun Jeova God. Kut ku in akkalemye pa kalem lun ma paye su tolak mwolanu lun Jeova. Sayen ma inge, kut ku in orek misla nu sin met lili wiyesr fwin oasr ma eneneyuk in orek.

²² Ke orekma in alu lasr su Jeova el insemwomwo ka oasr pa ma eneneyuk kut in akkalemye ke oiya mwo a fwal nu sin met atulani lasr. (Mark 12:31) Ke me lutlut toko, kut fwa lutlutkin kutupa kas in lutlut ke Me Sramsram Fwin Eolu su fwa kasre kut in kafweang in oru ma mwo pal nukewa nu sin met puspus. Tusruktu, tokin kut nunku akmwoye ke me lutlut mwomwo ke me sramsram lun Jisus su wangin ma oana, kut ku in siyuk sesr sifwana, ‘Fuka oiya mwomwo su Nga akkalemye nu sin met puspus?’

[Footnote]

Kom E Topuk Fuka?

• Mea fwokpap el kalmekinyuk nu ka?

• Efu ku “met pakoten” elos insemwomwo?

• Fuka kut ku in lela kalem lasr in tolak?

• Efu ku kut enenu in sa ‘in orek misla nu sin met lili wiyesr’?

[Picture on page 8]

Orekma in sulkakin peng mwo lun Togusrai el sie inkanek yok sripe in lela kalem lasr in tolak

[Picture on page 10]

Oru ke ku lom kewa in orek misla nu sin met lim