Kas lun Jeova el Moul

Kas Fulat su Tuku ke Buk lun Fwakyuk—II

MEA e fwa sikyak nu sin met nukewa su alu nu sin Jeova a nu selos su tia alu nu sel? Mea fwa sikyak nu sel Setan a nu sin dimon nukewa lal ke pal fwasru? Me insemwomwo fuka met nukewa su akos God elos fwa eis ke lusen Sie Tausan Yea Kolyuk lun Kraist? Me top nu ke kusensiyuk yok sripe inge el akkalemyeyuk in Fwakyuk 13:1–22:21.a Oasr ke sapta nukewa inge me aruruma ak 9 nu ke ak 16 su Jon el liye apkuran nu ke saflaiyen century se meet C.E.

Jon el fwak: “Insemwomwo el su rid, a elos su long kas lun palye inge, a liaung ma simla tari lu.” (Fwakyuk 1:3; 22:7) Kafweang lasr in rid a orekmakin ma kut lotela tari ke buk inge Fwakyuk ku in sang kasru yok nu sesr in paye nu sin God, akkeye lulalfongi lasr nu sin God a nu sin Mwen natul, Jisus Kraist, a ase nu sesr fwinsrak mwomwo ke pal fwasru.b​—Hibru 4:12.

LIPUFAN ELOS OKOILA ALU ITKOSR KE MULAT LUN GOD

(Fwakyuk 13:1–16:21)

Fwakyuk 11:18 el akkalemye: “A mutanfwal mulat, a mulat lom [lun God] tuku, a pal in . . . kunauselosla su kunausla fwalu.” In akkalemye sripe paenang mulat lun God el tuku, me aruruma ak itkosr el akkalemye ke orekma lun “kosro lemnak soko . . . oasr sengoul ko a itkosr sifwel ka.”​—Fwakyuk 13:1.

Ke aruruma ak yuh, Jon el liye “Lam el tu fwin Eol Saion” a oasr “siefok angngaul akosr tausen yurol.” Elos inge “moliyukla liki metu.” (Fwakyuk 14:1, 4) Tokin ma inge oasr me fwakak akkalemyeyuk sin lipufan. Ke aruruma toko, Jon el liye “lipufan itkosr su oasr yurolos me lokwalok itkosr.” Kalem la, Jeova pa sapkin ma inge nu sin lipufan puspus inge in okoila liki “alu itkosr mulat lun God” nu ke kain in akwuk puspus ke fwal lun Setan. Ke alu puspus oasr me fwakak puspus a kas in sensen puspus ke nununku lun God su fwa orek. (Fwakyuk 15:1; 16:1) Aruruma luo inge akkalemye ke kutu pa nununku lun Togusrai su oasr pa ke orekma in ugya me ugug ak itkosr a ke me keok ak tolu.​—Fwakyuk 11:14, 15.

Kusensiyuk Puspus Ke Ma Simusla Eis Top Ka:

13:8​—Mea se inge “buk in moul lun Lam”? Ma inge el me pupulyuk nu ke buk su oasr inen met nukewa su fwa welul Jisus Kraist in kol in Togusrai in kosrao. Oasr pa ka inen met Kristian akmusrala su srakna oasr fwin fwalu, su oasr fwinsrak in eis moul nu in kosrao.

13:11-13​—Fuka kosro lemnak soko su oasr ko lukwe ka el orekma oana soko dragon a el oru tu e in tuku in kosrao me? Kosro lemnak soko su oasr ko lukwe ka el lumeyuk nu ke kolyuk lun an Britain a an Merika, su kaskas oana dragon ke el akkalemye la el orekmakin kas in aksangeng, in patok an puspus, a orekmakin me akmas a kain in orekma sulallel puspus in patok metu in insese nu ke inkanek in kolyuk lal. Kalmeyen pulo kas inge ‘oru tu e in tuku in kosrao me’ pa ke el oru orekma oana orekma lun met palu paye ke el fwak mu el kutongye tari ma koluk puspus su oana ke meun lulap luo su sikyak fwin fwalu ke century ak 20 a ke el fwak pa mu el kutangla tari liki akwuk lun Communist.

16:17​—Mea se inge “yen engyengu” su lipufan el okoila alu akitkosr ka? “Yen engyengu” el lumeyuk nu ke nunak koluk oana nunak lun Setan, su kalmekin nu ke oiya ku “ngun se su orekma inge in mwen nutin seakos.” Met nukewa su oasr ke akwuk koluk lal Setan elos orekmakin ku momongkin eng se inge su oasr poison ka.​—Efesus 2:2.

Me Lutlut Nu Sesr:

13:1-4, 18. “Kosro lemnak soko” su lumeyuk nu ke guferment nukewa lun metu el “sikyak mwea me,” a mwea se inge el lumeyuk nu ke u lun met nukewa su oasr fos lulap ka. (Fwakyuk 17:12, 13; Daniel 7:2-8, 17) Kosro lemnak soko inge el orekla a akkeyeyuk sin Setan, oasr numbu se inge 666 yurol, su lumeyuk nu ke oiya su arlana sesumwos. In eis kalem ka la mea se inge kosro lemnak soko el ku in kasre kut in tia fwasr tokin ma inge ku kaksakin a orek alu nu sel oana met puspus elos oru.​—Jon 12:31; 15:19.

13:16, 17. Ke sripen ma upa puspus su kut ku in sun ke kut oru orekma lasr ke len nukewa oana ke orekma in ‘moli ku kukakin’ ma puspus, kut tia enenu in akupaye kut sifwana ke kut lela kosro lemnak soko inge in kufusla moul lasr nu ke akwuk lal. Kut fwin lela kosro lemnak soko inge in kufusla orekma lasr ku akkolukye nunak lasr, oiya se inge el ku in pupulyukkin la kut ‘eis me akul fwin lepo leyut ku ke mutunsrosr.’

14:6, 7. Orekma lun lipufan in sulkakin peng mwo el luti kut la kut enenu pa in salka in fwakak peng mwo ke Togusrai lun God su oakiyuki tari. Kut enenu in kasre tulik lutlut lasr ke Baibel in akkeye sangeng mwomwo lalos nu sin God a elos in sang mwolanu nu sin Jeova.

14:14-20. Ke pal se ‘kosrani lun fwalu,’ su lumeyuk nu ke kosrani lun met nukewa su e fwa moliyukla, el aksafyeyukla, a pa inge pal se su lipufan elos fwa sisla nu ‘nien futfut wain lulap in mulat lun God’ “fain lun fwalu.” Fain se inge pa akwuk koluk lal Setan in kol metu su oasr kain in fwako koluk nukewa ka, a ma inge e fwa kunausyukla a wanginla ma patpat. Kut enenu in tu ku in tia akkolukyeyuk ke fain koluk lun fwal se inge.

16:13-16. Kas fokfok lun ‘ngun fokfok’ lumeyuk nu ke orekma kutasrik lun dimon puspus in akpayeye la togusra nukewa lun fwalu elos tia eis me kasru a elos tia porongo ke pal se alu itkosr ke mulat lun God ukuiyukla. A togusra nukewa inge elos kiapeyukla in lain Jeova.​—Mattu 24:42, 44.

16:21. Ke saflaiyen akwuk lun fwal se inge el apkuran, orekma in akkalemye nununku lun Jeova nu ke akwuk koluk nukewa lal Setan el ku in orekmakinyuk oana kas in nununku upa lun God, su pupulyukkinyuk nu ke af upa lulap su oasr ice lulap ka a arlana toasr. Ne ouinge, met puspus fwa tia fuleak a elos fwa tafwela na in aklusrongtenye God.

TOGUSRA EL ORU KOLYUK LAL

(Fwakyuk 17:1–22:21)

“Babulon Lulap,” su pa inge u lun alu kikiap nukewa, el sie ipin fwal koluk lun Setan a ma inge el sie me srungeyuk. Ke aruruma ak 11 el akkalemyel oana “mutan kosro” su moulkin moul fokfok, el “muta fwin kosro srusra soko.” El fwa kunausyukla ke inkanek nukewa lun “ko sengoul” ke kosro soko su wisel inge. (Fwakyuk 17:1, 3, 5, 16) In pupulyukkin mutan kosro se inge nu ke sie “siti lulap,” aruruma se toko fwa akkalemye ke kunanela lal a aruruma inge el fwa akkalemye ke sie masap nu sin met kulansap nukewa lun God elos in “illa lukel.” Kunausla lun siti lulap inge el oru met puspus in pulakin asor yok. Tusruktu, oasr engan lulap in kosrao, ke sripen “mari lun Lam.” (Fwakyuk 18:4, 9, 10, 15-19; 19:7) Ke aruruma ak 13, met su muta fwin “ors fwasrfwasr” el orek meun nu sin mutanfwal nukewa. El kunausla a akwanginyela akwuk koluk nukewa ke fwal lun Setan.​—Fwakyuk 19:11-16.

Mea fwa sikyak nu sin “serpent matou, su Devil a Setan”? Ngea el fwa “sisila nu in lulu in e”? Pa inge ma aruruma ak 14 el fwa akkalemye. (Fwakyuk 20:2, 10) Aruruma luo safla inge fwa akkalemye ke oiyen moul mwomwo ke lusen Sie Tausan Yea ke Kolyuk lun Kraist. In oana ke “fwakyuk” el aksafyeyukla, Jon el liye ke ‘sie infwal lun kof in moul surorla nu ke infwulwen inkanek srulap,’ a oasr sie me solsol mwomwo su akkalemyeyuk nu sin “met nukewa su malu.”​—Fwakyuk 1:1; 22:1, 2, 17.

Kusensiyuk Puspus Ke Ma Simusla Eis Top Ka:

17:16; 18:9, 10​—Efu ku ‘Togusra nukewa lun fwalu’ elos tung ke mutan kosro se su elos sifwana kunausyukla? Elos tung ke sripen elos rapku a nunku kelos mukena. Tokin kunanela lun Babulon Lulap, togusrai nukewa inge elos akilen la ma se inge el arlana yok sripe nu selos. Mutan kosro inge el oru orekma kutasrik lun togusra nukewa inge in oana ma mwo a sumwos. Babulon lulap el kasrelos pa in akkeye met fwusr puspus in wi som nu ke meun. Sayen ma inge, el oru pa metu elos in akpusiselyelos pal nukewa nu sin met kol nukewa inge.

19:12​—Efu ku wangin kutena met etu a Jisus mukena ke inel su tia akkalemyeyuk? E se inge el lumeyuk nu ke mwal lal a kunokon puspus lal, oana ke kain in mwal puspus su akkalemyeyuk in Isaia 9:6, su Jisus el insemwomwokin in orekmakin ke lusen len lun Leum. Wangin met etu e se inge a Jisus mukena ke sripen kunokon lal el wangin ma oana a el mukena ku in kalem ka la mea pulakin lun sie met su oru kain in kunokon ouinge. Tusruktu, oasr pa met puspus su wi ke u lun met akmusrala su oana mutan se su el fwa payukyak nu se, elos e fwa welul Jisus in oru kutu kunokon inge. Ke ma inge, in oana ke kas in pupulyuk, el ‘simusla nu fwelos e sasu lal inge.’​—Fwakyuk 3:12.

19:14​—Su fwa welul Jisus fwin ors puspus ke Armagedun? Oasr ‘un met meun in kosrao’ su fwa welul Jisus ke pal in meun lun God orek, elos inge pa lipufan puspus a met akmusrala puspus su eis tari me insemwomwo lalos in kosrao.​—Mattu 25:31, 32; Fwakyuk 2:26, 27.

20:11-15​—Inen su simusyukla ke “buk in moul”? Oasr ke buk se inge inen met nukewa su fwal in itukyang nu selos moul ma patpat. Aok, inen met Kristian akmusrala, met nukewa su wi ke u lulap, a met kulansap oaru nukewa lun God su mise tari su e fwa wi ke ‘sifwil moulyuk lun met sumwos.’ (Orekma 24:15; Fwakyuk 2:10; 7:9) Nu selos su wi ke ‘sifwil moulyuk lun met sesumwos,’ inelos e fwa simusyukla ke “buk in moul” fwin elos akfwalye inkanek in moul lalos fwal nu ke “ma simla in buk inge” ke masap puspus su fwa akkalemyeyuk ke lusen Sie Tausan Yea ke Kolyuk lun Kraist. Tusruktu fwinne simla tari inelos ma inge ku in itukla ku iyukla liki buk se inge pa. Inen met akmusrala fwa simla ke pal nukewa elos akpayeye nu selos sifwana la elos oaru nu ke mise lalos. (Fwakyuk 3:5) Inen met nukewa su eis moul ma patpat fwin fwalu e fwa on pa ke buk inge ma patpat fwin elos kutangla liki me srufwe safla ke saflaiyen sie tausan yea.​—Fwakyuk 20:7, 8.

Me Lutlut Nu Sesr:

17:3, 5, 7, 16. “Lalmetmet lung me” kasre kut in kalem ke “ma lukma lun mutan se inge a kosro soko el muta fwe.” (Jemes 3:17) Kosro soko el lumeyuk nu ke League of Nations su wanginla a tok el sifwil pa sikyak oana United Nations. Kalem paye lasr nu ke ma lukma inge ku in akkeye kut in moniyuk in sulkakin peng mwo ke Togusrai lun God a in fwakak ke len in nununku lun Jeova.

21:1-6. Kut ku in lulalfongi la me insemwomwo nukewa su palyeyuk tari ye kolyuk lun Togusrai fwa akpayeyuk. Efu? Meyen Baibel el akkalemye: “Ma inge elos summu!”

22:1, 17. “Infwal ke kof in moul” el lumeyuk nu ke akwuk lun Jeova in sang kasru nu sin met akosten nukewa in akwanginyela fwako koluk nukewa lun ma koluk a mise. Kain in kof inge oasr tari ke pal lasr inge. Lela kut in akkalemye kulo lasr in porongo me solsol inge in tuku a “eis kof in moul tia mol” a kut in akkalemye pa me solsol inge nu sin met puspus!

[Footnotes]

[Picture on page 9]

Oasr me insemwomwo puspus nu sin met akosten nukewa elos fwa pulakin a eis ye kolyuk lun Togusrai!