Met Kulansap Nu Kemwa Lun Jeova Elos Insemwomwo
“Insemwomwo elos su nunku yok ke ma enenu lalos in ngun.”—MATTU 5:3, New World Translation.
1. Mea kalmen insemwomwo paye, a fuka ma inge akkalemye?
MET kulansap nukemwa lun God elos arulanu aksaokye oiyen insemwomwo lalos. Devid met sim lun sam el fwak: “Insemwomwo mutanfwal se su God lalos pa Jeova!” (Sam 144:15) Insemwomwo pa sie oiya lun engan su pulakinyuk pal nukemwa sin sie met. Insemwomwo su yok emeet—el sun insiesr—el tuku ke etu lasr fwin kut akinsemwomwoyeyuk sin Jeova. (Soakas 10:22) Kain in me insemwomwo inge akkalemye futoto mwomwo lasr yurin Papa tumasr in kosrao a in etu la kut oru ma lungse lal. (Sam 112:1; 119:1, 2) Jisus el akkalemye ke sripe yuh su ku in oru kut in insemwomwo. In tuni ke sripe inge in insemwomwo su oasr ke me lutlut inge a ke me lutlut toko fwa sang me kasru mwo in etu la kut arulanu insemwomwo kut fwin oaru in kulansapu Jeova, “God su insemwomwo.”—1 Timote 1:11.
Etauk ke Me Enenu Lasr in Ngun
2. Ke pal fuka Jisus el sramsramkin me insemwomwo, a mea kas in mutamwauk lal?
2 In yea 31 C.E., Jisus el orala sie me sramsram su pengpenglanu ke me sramsram lun fwalu. Ma inge pangpang “Me Sramsram fwin Eol” meyen Jisus el oru me sramsram inge ke fwin eol soko su ngetla nu ke Mwea lun Galili. Gospel lun Mattu el fwak: “Ke [Jisus] el liye un met puspus el fwasyuk nu fwin eolu; a ke el muta met tuma lutlut elos tuku nu yurol; a el mangelik a luti nu selos, fwakang: ‘Insemwomwo elos su nunku yok ke ma enenu lalos in ngun, tu togusrai in kosrao ma lalos.’ ” Fwin lungasyukla, kas in mutamwauk lal Jisus ku in ridiyuk oinge: “Insemwomwo elos su sekasrup in ngun,” ku “Insemwomwo elos su oana met ngusr in ngun.” (Mattu 5:1-3; Kingdom Interlinear; footnote)
3. Ke inkanek fuka inse pusisel el kasru insemwomwo lasr?
3 Ke me sramsram lal fwin eolu, Jisus el fwak la sie met el ku in insemwomwo yok fwin el etu la oasr ma enenu lal in ngun. Met Kristian nukemwa su inse pusisel, su etu oiya koluk lalos, elos siyuk nunak munas lun Jeova fwal nu ke me kise lun Kraist. (1 Jon 1:9) Ke inkanek inge elos koneak misla in nunak a insemwomwo paye. “Insemwomwo met se su ma koluk lal nunak munas nu sel ka, a ma sito lal afwinyuki.”—Sam 32:1; 119:165.
4. (a) Ke inkanek puspus fuka kut ku in akkalemye la kut etu me enenu lasr in ngun a lun met puspus? (b) Mea akyokye insemwomwo lasr kut fwin nunku yok ke me enenu lasr in ngun?
4 Etauk lasr ke me enenu lasr in ngun mokle kut in rid Baibel len nukemwa, eis me insemwomwo nukemwa su tuku ke mongo in ngun su kitakat sin “met kulansap oaru a lalmetmet” ke “pal fwal,” a in wi ke meeting nukemwa lun met Kristian pal nukemwa. (Mattu 24:45; Sam 1:1, 2; 119:111; Hibru 10:25) Lungse nu sin met tulan lasr oru kut in etu me enenu in ngun lun met puspus a mokle kut in moniyuk ke orekma in fwakak a luti peng mwo lun Togusrai. (Mark 13:10; Rom 1:14-16) In fwakak ma paye lun Baibel oru kut in insemwomwo. (Orekma 20:20, 35) Insemwomwo lasr yokyokelik kut fwin sifwilpa nunku ke fwinsrak mwolana ke Togusrai a ke me insemwomwo nukemwa su Togusrai inge el fwa wise. Fwinsrak lun “u srisrik” lun met Kristian akmusrala pa in eis moul ma patpat in kosrao oana ipen Guferment lun Kraist in kosrao. (Luk 12:32; 1 Korint 15:50, 54) Nu sin “sip ngia,” elos fwinsrak in eis moul ma patpat ke sie paredais fwin fwalu ye kolyuk lun Togusrai inge.—Jon 10:16; Sam 37:11; Mattu 25:34, 46.
Fuka Met Asor Elos Ku in Insemwomwo
5. (a) Mea kalmen kas inge “elos su asor”? (b) Fuka met asor inge elos fwa akkeyeyuk?
5 Kas su Jisus el fwak tok ke insemwomwo luman lain sie sin sie. El fwak: “Insemwomwo elos su asor, tu elos fwa pwarak.” (Mattu 5:4) Fuka sie met su asor el ku in insemwomwo ke pal senpana? In etu kalmeyen kas lun Jisus inge, kut enenu in etu kain in asor fuka el sramsrakin inge. Met tuma lutlut Jemes el aketeye la kut enenu in asorkin oiya koluk lasr sifwana. El simusla: “aknasnasye poumwos, komwos met koluk, a akmutalye insiomwos, komwos met inse luo. Komwos in pakomuta a asor a tung. Lela israsr lomwos in ekla asor, a engan lomwos in ekla toasr. Komwos in akfulpapye komwos ye mutun Leum, a el fwa akfulatye komwos.” (Jemes 4:8-10) Elos su asor na paye ke oiya koluk lalos elos akpwaryeyuk ke elos lotela la ma koluk lalos ku in nunak munas fwin elos akkalemye lalalfongi ke me kise lun lango sin Kraist a in akkalemye auliyuk paye ke inkanek in oru ma lungse lun Jeova. (Jon 3:16; 2 Korint 7:9, 10) Ke inkanek inge, oasr pal mwo lalos in futoto nu sin Jeova a fwinsrak in moul ma patpat ke orekma in kulansap a in kaksakunul. Ma inge sang nu selos insemwomwo yok su elos pulakin ke insielos.—Rom 4:7, 8.
6. Ke oiya fuka kutu met elos pulakin asor, a elos akpwaryeyuk fuka?
6 Wekunang nu ke kas lun Jisus elos su asor ke sripen me srungeyuk puspus su sikyuk fwin fwalu. Jisus el orekmakin nu sel sifwana kas palu in Isaia 61:1, 2, su fus inge fwak: “Ngunin leum Jeova on fwuk, tu Jeova el mosweyula tu Nga in fwakak kas mwo nu sin met fulpap. El supeyula tu Nga in pela met su musalla insie, . . . in akpwaryelos nukemwa su asor.” Kunokon inge eneneyuk pa nu sin met Kristian akmusrala su srakna oasr fwin fwalu, su akpayeye kunokon inge wi kasru lun un “sip ngie”. Met nukemwa inge elos wi ke orekma in sang akul nu fwin mutonsron “met nukemwa su mongi a su tung ke me srungeyuk nu kemwa su orek in masrlo [Jerusalem su som liki alu paye, su lumeyuk nu ke alu nukemwa lun Kristendom].” (Ezikiel 9:4) Met asor nukemwa inge elos akpwaryeyuk ke “peng mwo lun togusrai.” (Mattu 24:14) Elos insemwomwo in etu la akwuk koluk nukemwa lal Setan fwa wanginla a akmwuk sasu a mwolana lun Jeova fwa aolla ma inge.
Insemwomwo Elos su Fwokpap
7. Mea tia kalmekinyuk nu ke kas inge “fwokpap”?
7 Jisus el tafwela Me sramsram lal fwin Eol in fwakang: “Insemwomwo elos su fwokpap, tu fwalu fwa ma lalos.” (Mattu 5:5) Kutu met elos nunku mu oiyen fwokpap pa ke oiya munas lun sie met. Tusruktu, tia oinge. In oana ke me aketeye nu ke kalmen kas inge su lungasyukla “fwokpap” nu ka, oasr sie scholar lun Baibel el simusla: “Oiya mwo emeet lun sie met su [fwokpap] pa el sie met su ku in sifwana leumi ku karungin. Fwokpap el tia lumeyuk nu ke kulang su tia sumwos, oasr lungse su tingtingi ke pakoten alukela ma fwal, oasr oiya lun misla a srunga in wi oru kutena oiya. Ma inge el sie oiye su ku in karunginyuk.” Jisus el fwak kel sifwana: “Nga fwokpap a inse pusisel.” (Mattu 11:29) Fwinne oinge, Jisus el pulaik in karungin masap sumwosmwos.—Mattu 21:12, 13; 23:13-33.
8. Nu ke ma fuka fwokpap el kupasr futoto nu ka, a efu ku kut enenu oiya inge nu ke futoto lasr nu sin met puspus?
8 Ke sripe se inge, oiya lun fwokpap, el kupasr futoto nu ke akwuk lun sifwana leum fwom. Paye la, fwokpap a sifwana leum fwom tukeni simusyukla sin met sap Poul ke el simusla “fwako lun ngun mutal.” (Galetia 5:22, 23) Fwokpap enenu in akkeyeyuk ke kasru lun ngun mutal. Pa inge sie oiya lun met Kristian su sang kasru in oasr misla yurin met selalalfongi a yurin met nukemwa ke congregation. Poul el simusla: “Ke ma inge komwos nukomang oana met sulosula lun God, mutal a kulo, inse pakoten, kulang, fwokpap, fulpap, mongfusesr. Muteng nu sin sie sin sie a nunuk munas nu sin sie sin sie.”—Kolosse 3:12, 13.
9. (a) Efu ku in fwokpap el tia akkalemyeyuk mukena nu ke futoto lasr nu sin met puspus? (b) Fuka met fwokpap elos “fwa usrui fwalu”?
9 Tusruktu, fwokpap el tia akkalemyeyuk mukena nu ke futoto lasr nu sin met puspus saye. Ke kut akpusiselye kut sifwana nu ke kolyuk lun Jeova, kut akkalemye la kut fwokpap. Me srikasrak mwo emeet ke ma inge pa Jisus Kraist, su ke el muta fwin fwalu el akkalemye fwokpap a akpusiselyel sifwana nu ke ma lungse lun Papa tumal ke inkanek nukemwa. (Jon 5:19, 30) Jisus el pa met se meet su usrui fwalu, ke sripen el pa Met kol su pakiyuki nu ke ma inge. (Sam 2:6-8; Daniel 7:13, 14) Met 144,000 oana “met usru yurin Kraist” elos welul Kraist in eis me usru inge, elos “su moliyukla liki metu” in “kol oana togusra fwin fwalu.” (Rom 8:17; Fwakyuk 5:9, 10; 14:1, 3, 4; Daniel 7:27) Kraist a met kol nukemwa inge su welul elos fwa kol million sin met oana sip, mokul a mutan, su kas palu inge in sam e fwa akpayeyuk: “A met fwokpap elos fwa usru fwalu, a fwa sifwana akengunyelos in misla puspus.”—Sam 37:11; Mattu 25:33, 34, 46.
Insemwomwo Elos Su Musrinsral
Ke Ma Sumwosmwos
10. Piye sie inkanek in akkupyelos su ‘musrinsral a malu ke ma sumwosmwos’?
10 Me insemwomwo su Jisus el fwak tok ke el oru sramsram lal fwin eolu in an Galili pa: “Insemwomwo elos su musrinsral a malukin ma sumwosmwos, tu elos fwa kup.” (Mattu 5:6) Nu sin met Kristian, Jeova el oakiye akwuk mwo ke ma sumwosmwos. Paenang, elos su musrinsral a malu ke ma sumwosmwos kalem la elos musrinsral a malu nu ke kolyuk mutal lun God. Met inge nukemwa etu na paye ma koluk lalos a oiya sesumwos lalos a elos fwinsrak in eis sie oiya mwomwo ye mutun Jeova. Elos arulanu insemwomwo ke elos lotela ke Kas lun God la fwin elos auli a suk nunak munas fwal nu ke me kise ke lango lun Kraist, elos ku in engankin oiya sumwosmwos ye mutun God!—Orekma 2:38; 10:43; 13:38, 39; Rom 5:19.
11, 12. (a) Fuka met Kristian akmusrala elos ekla met sumwosmwos? (b) Fuka malu ke ma sumwosmwos lun met nukemwa su wi met akmusrala fwa akpayeyuk?
11 Jisus el fwak la met inge fwa insemwomwo, ke sripen elos fwa “kup” ku akinsemwomwoyeyuk (Mattu 5:6, Kingdom Interlinear) Met Kristian akmusrala su pangonyuk in “kol oana togusra” yurin Kraist in kosrao elos akkalemyeyuk “sumwosmwos nu ke moul.” (Rom 5:1, 9, 16-18) Jeova el nutelosla oana tulik natul in ngun. Elos ekla met usru yurin Kraist, pangonyuk elos nukemwa togusra a met tol nu in Togusrai lal in kosrao.—Jon 3:3; 1 Piter 2:9.
12 Met nukemwa su wi met akmusrala elos sonna akkalemyeyuk sumwosmwos lalos nu ke moul. Tusruktu, oasr lupan oiyen sumwosmwos su Jeova el liye yurolos ke inkanek lun lalalfongi lalos ke sran Kraist. (Jemes 2:22-25; Fwakyuk 7:9, 10) Elos oekyukla sumwosmwos oana met kamwuk lun Jeova su oasr fwinsrak lalos in moliyukla liki “ongoiye lulap.” (Fwakyuk 7:14) Malu lalos ke ma sumwosmwos fwa folokinyuk ke inkanek yok, ye kolyuk lun “kosrao sasu,” su elos fwa ekla ip in fwalu sasu yen “sumwosmwos on we.”—2 Piter 3:13; Sam 37:29.
Insemwomwo Elos su Pakoten
13, 14. Ke inkanek mwo puspus fuka kut enenu in akkalemye la kut pakomuta, a ma lane fuka kut ku in eis ke ma inge?
13 Ke el tafwela Me sramsram lal fwin Eolu, Jisus el fwak: “Insemwomwo elos su pakomuta, tu elos fwa eis pakomuta.” (Mattu 5:7) Fwin lumeyuk nu ke ma sikyuk ke sie court, pakoten el akkalemyeyuk nu sin met puspus ke pal se sie met nununku el tia sang nununku nukemwa fwal nu sin sie met su oru ma tafongla in eis ye akwuk lun masap, a el akfusresrye nununku lal ke sripen el pakomutal. Tusruktu, in fwal nu ke inkanek lun Baibel in orekmakin kas inge, su lungasyukla nu ke “pakomuta” el sramsramkinyuk pal nukemwa nu ke sie orekma kulang ku pakoten su akkalemyeyuk nu selos su enenu ma inge. Ke ma inge, elos su pakomuta akkalemye la elos kulang a pakoten. Me pupulyuk lun Jisus ke sie met Samaria su lungse in sang kasru pa sie me srakasrak mwo nu sin sie met su “akkalemye pakomuta” nu sin sie met enenu.—Luk 10:29-37.
14 Kut fwin lungse in pulakin insemwomwo su tuku ke oiyen pakoten, kut enenu in oru orekma kulang nu sin met enenu nukemwa. (Galetia 6:10) Jisus el pakomuta met puspus su el liye. “El pakomutalos, tu elos oana sip su wangin met sropu lalos. A el luti ma puspus nu selos.” (Mark 6:34) Jisus el etu la me enenu yok emeet lun met nukemwa pa ma lun ngun. Kut ku in akkalemye pa la kut pakomuta a pakoten in sang nu sin met puspus me enenu yok emeet lalos—“peng mwo lun togusrai.” (Mattu 24:14) Oayepa kut ku in sang me kasru mwo nu sin met Kristian matu puspus, mutan katinmas puspus, a nu sin met mukaimtal a “akpulaikyelos su munas insie.” (1 Tessalonika 5:14; Soakas 12:25; Jemes 1:27) Ma inge ku in oru kut in tia insemwomwo mukena a ma inge ku in kasre kut in eis pakomuta lun Jeova.—Orekma 20:35; Jemes 2:13.
Inse Nasnas a Akiumwe Metu
15. Fuka kut ku in eis sie inse nasnas a akiumwe metu?
15 Jisus el akkalemye me insemwomwo akonkosr a akitkosr oana kas inge:“Insemwomwo elos su nasnas insielos, tu elos fwa liye God. Insemwomwo elos su akiumwe metu, tu pangpang elos tulik nutin God.’ ” (Mattu 5:8, 9) Sie inse nasnas el tia nasnas mukena a nasnas pa in ngun wangin metal a el inse sefwanna, tia inse luo ke alu lal nu sin Jeova. (1 Kronikel 28:9; Sam 86:11) Kas Grik su lungasyukla oana kas inge “akiumwe metu” oasr kalme paye nu ka oana “sie su lungse in orek misla.” Met su lungse in orek misla elos muta in misla yurin met Kristian wiyelos a, fwin elos ku, elos ku in oru pana nu sin met tulan lalos. (Rom 12:17-21) Elos “suk misla a fwasr ka.”—1 Piter 3:11.
16, 17. (a) Efu ku met akmusrala elos pangpang “tulik nutin God,” a elos “liye God” fuka? (b) Fuka “sip ngie” elos “liye God”? (c) Fuka a nge, “sip ngie” elos fwa ekla “tulik nutin God,” ke oiya nukemwa?
16 Nu sin met su lungse in akkalemye misla paye ke nasnas insielos, mwoleyukla nu selos la elos “fwa pangpang ‘tulik nutin God’ ” a “elos fwa liye God.” Met Kristian akmusrala nukemwa elos tulik su isusla in ngun a nutla sin Jeova oana “mwen puspus natul” ke elos srakna oasr fwin fwalu. (Rom 8:14-17) Ke pal se elos akmoulyeyukyak in muta yurin Kraist in kosrao, elos oru orekma in kulansap ye mutun Jeova a elos fwa liyel.—1 Jon 3:1, 2; Fwakyuk 4:9-11.
17 Met puspus su akkalemye pa misla su wi ke un “sip ngie” elos kulansapu Jeova ye koko lun Met Seperd Mwo, Jisus Kraist, su ekla “Papa Ma Patpat” lalos. (Jon 10:14, 16; Isaia 9:6) Elos su kutangla me srife safla tokin Kolyuk lun Kraist ke lusen tausen se yea elos fwa nutla oana tulik nutin Jeova fwin fwalu a “fwa engankin sukosokla lun mwolana lun tulik nutin God.” (Rom 8:21; Fwakyuk 20:7, 9) Ke elos fwinsrak nu ke ma inge, elos pangon Jeova oana Papa tumalos, ke sripen elos mwolela moul lalos nu sel, a akilenul oana Met su Sang Moul lalos. (Isaia 64:8) In oana Job a Moses in pal meeta, elos ku in “liye God” ke mutun lalalfongi lalos. (Job 42:5; Hibru 11:27) Ke inkanek lun ‘mutun insielos’ a etauk sumwos ke God, elos liye oiya mwomwo lun Jeova a elos kaifweang in etawi el ke elos oru ma lungse lal.—Efesus 1:18; Rom 1:19, 20; 3 Jon 11.
18. In fwal nu ke me insemwomwo itkosr meet su akkalemyeyuk sin Jisus, su koneak insemwomwo paye ke pal inge?
18 Kut liye la elos su nunku yok ke ma enenu lalos in ngun, elos su asor, elos su fwokpap, elos su musrinsral a malu ke ma sumwosmwos, elos su pakomuta, a nasnas insie, a elos su lungse in akiumwe metu elos koneak insemwomwo paye in kulansapu Jeova. Tusruktu, met oinge ke pal puspus elos sun me lain, a me kalyai. Ya ma inge kunausla insemwomwo lalos? Kusensiyuk inge fwa aketeyuki ke me lutlut toku.
Ke Inkanek lun Kalweni
• Me insemwomwo fuka pulakinyuk selos su nunku yok ke me enenu lalos in ngun?
• Ke inkanek puspus fuka elos su tung fwa akpwaryeyuk?
• Fuka kut ku in akkalemye fwokpap?
• Efu kut enenu in akkalemye pakoten, inse nasnas, a akiumwe met?
[Picture on page 8]
“Insemwomwo elos su nunku yok ke me enenu lalos in ngun”
[Pictures on page 8]
“Insemwomwo elos su musrinsral a malu ke ma sumwosmwos”
[Picture on page 8]
“Insemwomwo elos su pakoten”