Ya Kom Orek Ma Koluk Lain Ngun Mutal?

“Oasr ma koluk su ma nu ke mise.”​—1 JON 5:16.

1, 2. Kut etu fuka la sie met el ku in oru ma koluk lain ngun mutal lun God?

“NGA nunku yok pal nukewa mu Nga oru ma koluk lain ngun mutal.” Oasr sie mutan in an Germany el simusla, fwinne el kulansap nu sin God. Ya sie met Kristian el ku in oru ma koluk lain ngun mutal, ku ku lun God?

² Aok, sie met el ku in oru ma koluk su lain ngun mutal lun Jeova. “Kain in ma koluk a kaskou nu kemwa fwa nunak munas nu sin metu” Jisus Kraist el fwak, “a kaskou lain ngun mutal fwa tia nunak munas nu sin metu.” (Mattu 12:31) Kut sensenkinyuk: “Tu kut fwin oru ma koluk ke lungse lasr tokin kut eis tari etauk lun ma paye, wangin pa sie me kise ke ma koluk, tu oasr tawi fosrnga nu ke nununku.” (Hibru 10:26, 27) A met sap Jon el simusla: “Oasr ma koluk su ma nu ke mise.” (1 Jon 5:16) Tusruktu ya ma lun sie met su oru ma koluk in etu fwin el orala kain in “ma koluk su ma nu ke mise”?

Auliyuk Fwa Ku in Eis Nunak Munas

3. Kut fwin arlanu asor ke sie ma koluk su kut orala, saap oiya inge el akkalemye mea?

³ Jeova el pa Met Nununku safla lun met orekma koluk nukewa. Aok, kut nukewa fwa nununkeyuk sin God, a el oru ma sumwos pal nukewa. (Genesis 18:25; Rom 14:12) Jeova pa oru sulela fwin kut oru ma koluk su wanginla nunak munas ka, a el ku in eisla ngun lal liki kut. (Sam 51:11) Tusruktu, kut fwin arlanu asor ke sie ma koluk su kut orala, saap ma inge ku in akkalemye la kut auliyuk na paye ke ma koluk lasr. Ke ma inge, mea se inge auliyuk paye?

4. (a) Fuka kom akuteye kalmeyen kas inge auliyuk? (b) Efu ku kas in Sam 103:10-14 el sropon me akkeye mwomwo?

⁴ In akkalemye auliyuk paye el ku in kalmekin la kut ekulla oiyesr liki ma koluk su kut orala ku ke ma koluk su kut lungse na paye in oru meet liki kut auliyuk. Kalmen ma inge pa kut pulakin asor yok ku auli yok a kafweang in forla liki inkanek koluk nukewa. Kut fwin orek ma koluk upa tusruktu kut orala inkanek su eneneyuk in sang akkalemye la kut auliyuk na paye, kut ku in eis me akkeye ke kas lun met sim lun sam inge: “El [Jeova] tia oru nu sesr in oanu koluk lasr, ku ase nu sesr ma fwal nu ke ma koluk lasr. Tu oana ke kosrao el fulat liki fwalu, oinge lupan pakoten lal nu selos su sangeng sel. Oana lusen an kutulap nu roto, oinge el wisla ma koluk lasr loes liki kut. Oana sie papa el pakomuta tulik natul, oinge Jeova el pakomutalos su sangeng sel. Tu El etu lumasr; El esam tu kut kutkut.”​—Sam 103:10-14.

5, 6. Akkalemye ke me lutlut yok ke 1 Jon 3:19-22, a akuteye ke kalmeyen kas lun met sap inge.

⁵ Oasr pa kas in akkeye ke kas lun met sap Jon: “Ke ma inge, kut fwa etu tu kut ma sin paye, a fwa akkeye insiesr ye mutal tu insiesr fwin liskutla, God El yok liki insiesr a etu ma nu kemwa. Met kulu, insiesr fwin tia liskutla, kut pulaik nu sin God, a kutena ma kut siyuk ka, kut eis sel, meyen kut liaung ma sap lal a oru ma su me insemwomwoye mutal.”​—1 Jon 3:19-22.

⁶ Kut “etu la kut ma sin paye” ke sripen kut akkalemye lungse paye nu sin met lili a kut tia oru ma koluk pal nukewa. (Sam 119:11) Kut fwin pulakin la kut liskutla ke kutu sripe, lela kut in esam la “God el yok liki insiesr a el etu ma nukewa.” Jeova el akkalemye nu sesr pakoten meyen el etu ke “lungse paye lasr nu sin met lili,” ke meun lasr in lain ma koluk, a ke kafweang lasr in oru ma lungse lal. (1 Piter 1:22) Insiesr fwa “tia liskutla” kut fwin lulalfongi Jeova, a kut akkalemye lungse paye nu sin met lili, a kut tia orala akwuk in orek ma koluk. Kut “pulaik nu sin God” in sramsram nu sel ke pre, a el fwa topuk pre lasr meyen kut liaung masap nukewa lal.

Elos Orek Ma koluk Lain Ngun lun God

7. Fuka in eteyuk fwin sie ma koluk el ku in eis nunak munas ka ku tia?

⁷ Kain in ma koluk fuka wangin nunak munas nu ka? In sang me top nu ke kusensiyuk inge, lela kut in akuteye kutu me srikasrak su oasr in Baibel. Ma inge el me akkeye nu sesr kut fwin akkalemye la kut auliyuk paye fwinne kut srakna asor yok ke ma koluk upa puspus lasr. Kut fwa liye la tia ke sripen kain in ma koluk upa su sie met el orala paenang wanginla nunak munas ka, a sripe yok ka pa tuku ke nunak lasr, insiesr, a ke lungse yok lasr in oru ma koluk, a ma inge nukewa pa ku in akkalemye fwin sie ma koluk el ku in eis nunak munas nu ka ku tia.

8. Fuka kutu sin met kol lun alu lun met Ju in century se meet elos oru ma koluk lain ngun mutal?

⁸ Met kol puspus ke alu lun met Ju in century se meet su lainul Jisus Kraist elos orek ma koluk lain ngun mutal. Elos liye la ngun mutal lun God el orekma yurol Jisus ke el orala mwenmwen puspus su akfulatye Jeova. Tusruktu met lokwalok nukewa inge lun Kraist elos fwak mu ku lal Setan su Devil pa orekma inge. In fwal nu sin Jisus, elos nukewa su kaskou lain ngun mutal lun God elos orala sie ma koluk su tia ku in nunak munas nu selos ka “tia in pal se ingo ku ke pal su fwa tuku.”​—Mattu 12:22-32.

9. Mea se inge kaskou, a mea Jisus el fwak ke orekma inge?

⁹ Kaskou el sie kain in kas su ku in kunausla inen met se, me akngal, ku kas upa. Ke sripen ngun mutal el tuku sin God me oana Sropon ma inge, paenang in kaskaskin ma puspus in lain ngun mutal el oana sie nu ke kaskas in lain Jeova. Sie met su tia auliyuk a el tafwela na in orekmakin kain in kaskas inge el tia ku in eis nunak munas ka. Kas lun Jisus ke ma koluk oinge el akkalemye la Jisus el sramsramkin met puspus su arulanu lungse in lain orekma lun ngun mutal lun God. Ke sripen ngun mutal lun Jeova el orekma in Jisus tusruktu met su lainul elos fwak mu ku se inge el tuku sin Devil, paenang elos orek ma koluk ke elos kaskou lain ngun mutal. Ke ma inge, Jisus el fwak: “A el su fwa kaskou lain ngun mutal fwa tiana eis nunak munas, a oasr metal ke sie ma koluk kamwul.”​—Mark 3:20-29.

10. Efu ku Jisus el panglol Judas oana “mwen nutin mise”?

¹⁰ Nunku pa ke ma sikyak nu sel Judas Iskariot. El fwasr ke inkanek koluk, el pusrela mani ke pok su itukyang nu sel elan liaung. (Jon 12:5, 6) Tok Judas el som nu yurin met kol puspus lun met Ju a el orala akwuk nu selos in tukakunullak Jisus ke ipin silfer 30. Aok, Judas el pulakin la el orala ma koluk tokin orekma in tukak lal inge, tusruktu el tia auliyuk ke ma koluk su el lungse in oru. Ke ma inge, Judas el tia fwal in wi ke sifwil moulyuk. Ke ma inge Jisus el panglol “mwen nutin mise.”​—Jon 17:12; Mattu 26:14-16.

Me Srikasrak lun Met Puspus su Tia Orek Ma Koluk Lain Ngun Mutal

11-13. Fuka Devid el orek ma koluk yurol Batsiba, a me akkeye fuka kut ku in eis ke inkanek su God el oru nu selos?

¹¹ Oasr kutu pal, met Kristian puspus su fwakak ma koluk upa lalos a elos eis tari me kasru sin met elder puspus ke congregation saap elos srakna asor yok ke ma koluk puspus lalos in lain masap lun God su orek in pal somla. (Jemes 5:14) Kut fwin pulakin ma inge, paye la kut ku in eis ma lane ka fwin kut akuteye la mea ma Simusla el akkalemye ke met puspus su ma koluk lalos eis nunak munas ka.

¹² Togusra Devid el orala ma koluk upa yurol Batsiba, mutan kiyel Uraia. Ke el muta fwin sekunim ku fasu in lom sel, el ngeti nu ten a el liye sie mutan kato su yuyu, a Devid el usella nu in loom sel a el oan yurol. Tok kutu ke el etauk la mutan se inge el puteteyuk, Devid el orala sie akwuk tu mokul tumal, Uraia, elan oan yurol in afwunye orekma lun kosro su el orala inge. Ke pal se akwuk inge tia akpayeyuk, togusra se inge el orala sie pa inkanek tu Uraia el an anwuki ke sie meun. Tokin ma inge, Batsiba el ekla mutan kiyel Devid a oswela sie tulik su mise.​—2 Samuel 11:1-27.

¹³ Jeova el aksumwosye ma sikyak inge kel Devid a Batsiba. God el sang nunak munas nu sel Devid, saap el liye la el lungse in auliyuk a ke mwuleang ke Togusrai su orek nu sel. (2 Samuel 7:11-16; 12:7-14) Kalem la Batsiba el akkalemye oiya mwo ke el auliyuk, paenang el akinsemwomwoyeyuk in ekla nine kiyel Togusra Solomon a ekla nine matou kiyel Jisus Kraist. (Mattu 1:1, 6, 16) Kut fwin orekma koluk, mwo kut in esam la Jeova el loang akmwoye nu ke oiya mwo lasr fwin kut auliyuk paye.

14. Fuka lupan nunak munas lun God akkalemyeyuk ke ma sikyak nu sel Togusra Manassa?

¹⁴ Lupan nunak munas lun Jeova el akkalemyeyuk pa ke ma sikyak nu sel Togusra Manassa lun an Juda. El oru ma koluk ye mutun Jeova. Manassa el orala loang puspus nu sel Beal, el orek alu nu ke “un kosrao nufon,” a el musaela pa loang nu sin god kikiap puspus ke inkalkal luo lun temple. El esokak mwen puspus natul in sasla ke e, el akkeye orekma lun enutnut, a el oru met puspus su muta in an Juda a Jerusalem “in oru ma koluk yok liki mutanfwal su Jeova el kunausla ye mutun tulik natul Israel.” Kas in sensen su akkalemyeyuk sin met palu puspus lun God el tia porongo. Ke saflaiye togusra lun an Assiria el sruokilya Manassa oana sie met sruo. Ke el muta in an saye oana sie met sruo, Manassa el auliyuk a el pusisel in kafweang in pre nu sin God, su sang nunak munas nu sel a sifwilpa folokonla nu sel kolyuk lal oana sie togusra in an Jerusalem, in an se inge el akkeye alu paye.​—2 Kronikel 33:2-17.

15. Mea ma sikyak ke moul lal Piter su akkalemye la Jeova el sang nunak munas “ke inkanek yok”?

¹⁵ Century puspus tok, met sap Piter el orek ma koluk upa ke el lafwekinul Jisus. (Mark 14:30, 66-72) Ne oinge, Jeova el sang nunak munas nu sel Piter “ke inkanek yok.” (Isaia 55:7, NW) Efu? Meyen Piter el auliyuk paye. (Luk 22:62) Oasr me akpayeye kalem ke nunak munas lun Jeova tokin len 50 ke pal in Pentecost, oasr pal mwomwo itukyang nu sel Piter in sang ma lo kel Jisus ke inkanek pulaik. (Orekma 2:14-36) Ya oasr kutena sripe in lulalfongi mu God el tia arlanu sang nunak munas nu sin met Kristian puspus ke pal inge su auliyuk na paye? “Jeova, kom fwin akilenye ma koluk, O Jeova, su a fwa tu? met sim lun sam el fwak, “a oasr nunak munas [“paye,” NW] yurum.”​—Sam 130:3, 4.

Aksrikyela Nunak in Sangeng ke Ma Koluk Lain Ngun Mutal

16. Nu ke ma sikyak puspus God el sang nunak munas?

¹⁶ Me srikasrak puspus su tufwana akkalemyeyuk el fwa kasre kut in aksrikyela sangeng ku fosrnga yok lasr fwin kut orek ma koluk lain ngun mutal. Ma inge nukewa akkalemye la Jeova el sang nunak munas nu sin met orekma koluk su auliyuk. Ma yok sripe emeet u pa pre paye lasr nu sin God. Kut fwin orek ma koluk, kut ku in siyuk ke nunak munas fwal nu ke me kise lun lango lun Jisus, ke pakoten lun Jeova, ke oiyen sesumwos su kut usrui, a ke oiyen oaru lasr in oru orekma in kulansap lasr. In etu ke kulang lun God su alukela ma fwal, kut ku in suk ke nunak munas a kut ku in lulalfongi la ma inge fwa akkalemyeyuk nu sesr.​—Efesus 1:7.

17. Mea enenu in orek fwin kut orek ma koluk a enenu me kasru lun ngun?

¹⁷ Na fuka kut fwin orala ma koluk upa tusruktu kut tia ku in pre meyen ma koluk lasr kunausla na paye fototo lasr nu sin Jeova paenang kut pulakin mu kut tia ku in pre nu sel? Ke ma inge, met sap Jemes el simusla: “Lela lan soloeni met elder lun surs; a elos in pre kel a mwoswella ke oil in En Jeova. A pre lun lalalfongi fwa akkeyela met mas se, a Leum El fwa taksalak. A el fwin oru ma koluk, a fwa nunak munas nu sel ka.”​—Jemes 5:14, 15.

18. Efu ku ma koluk lun sie met fwinne el sisila liki congregation el tia kalme la wanginla fwinsrak lun nunak munas nu ka?

¹⁸ Fwinne sie met su orek ma koluk el tia akkalemye la el auliyuk ke pal sa a el sisila liki congregation, tia kalme pa ma koluk lal el wanginla nunak munas nu ka. Poul el akkalemye ke sie met akmusrala su orek ma koluk a sisila liki congregation in an Korint, el simusla: “Fwal nu sin sie su oana kai inge, su met puspus elos oru, ke ma inge mwo tu komwos fwa nunak munas nu sel a akparyel, saap, ke kutena ma el su oinge fwa okomla ke asor lulap lal.” (2  Korint 2:6-8; 1 Korint 5:1-5) Tusruktu, fwin elos lungse fototo lal nu sin Jeova in sifwil folokinyukla, met orek ma koluk nukewa elos enenu in eis me kasru su tuku ke Baibel su akkalemyeyuk sin met Kristian elder puspus a sang me akpayeye nu ke auliyuk paye. Elos enenu in “isus fwako fwal nu ke auliyuk.”​—Luk 3:8.

19. Mea ku in kasre kut in kafweang in “sumwos in lulalfongi”?

¹⁹ Mea kutu sripe su ku in paenang in oasr pulakinye mu kut orek ma koluk lain ngun mutal? Saap kut arulanu nunku yok ke kutu ma sikyak ku saap kut mas ke mano a nunak su oru kut in nunku yok ka. Ke oiya oinge, pre a kutupa pal in oasr mongla ku in sang kasru yok. Yokna kut tia enenu in lela Setan el an akmunasye kut, in oru kut in tui in oru kulansap nu sin Jeova. Ke sripen wangin insemwomwo lun Jeova ke mise lun met koluk, ke ma inge wangin pa insemwomwo lal fwin kutena met kulansap lal el tula. Ke sripe inge fwin kut sangeng a nunku mu kut oru ma koluk lain ngun mutal, kut enenu in ridi Kas lun God, wekunang ma simusla su oasr me akkeye yok ka oana buk lun Sam. Kut enenu pa in kafweang in wi meeting nukewa a wi ke orekma in luti peng mwo lun Togusrai. In oru ma inge nukewa fwa kasre kut in “sumwos in lulalfongi” a sukosokla liki kutena kain in nunak su oru kut in nunku mu ma koluk su kut orala wanginla nunak munas nu ka.​—Taitus 2:2.

20. Kain in kusensiyuk puspus fuka ku in sang kasru sie met in liye la el tia oru ma koluk lain ngun mutal?

²⁰ Kutena met su sangeng in nunku mu elos orek ma koluk lain ngun mutal ku in siyuk selos sifwana: ‘Ya Nga kaskou lain ngun mutal? Ya Nga auliyuk na paye ke ma koluk luk? Ya Nga lulalfongi ke nunuk munas lun God? Ya Nga sie met apostate su pulesru me luti paye?’ Saap, met puspus su oinge elos ku in akilen la elos tia kaskas kou lain ngun mutal lun God, ku elos tia pa na ekla met apostate. Elos auliyuk, a oasr lulalfongi lalos pal nukewa ke nunak munas lun Jeova. Fwin oinge, elos tia oru ma koluk lain ngun mutal lun Jeova.

21. Me lutlut toko fwa sang me top nu ke kusensiyuk fuka?

²¹ Sie me insemwomwo ku me akkeye na paye pa inge in etu la kut tia oru ma koluk lain ngun mutal! Tusruktu, in kupasr nu ke me lutlut inge ke ngun mutal, oasr kusensiyuk puspus su fwa akuteyuki ke me lutlut toko. Ke sie me pupulyuk, kut ku in siyuk sesr sifwana: ‘Ya Nga kolyuk na paye ke ngun mutal lun God? Ya fwako lun ngun mutal akkalemyeyuk ke moul luk?’

Mea Me Top Lom?

• Efu kut ku in fwak mu ku in orek ma koluk lain ngun mutal?

• Mea kalmen auliyuk?

• Su orek ma koluk lain ngun mutal ke pal se Jisus el oasr fwin fwalu?

• Fuka me fosrnga yok ke ma koluk su nunkeyuk mu wanginla nunak munas ka el ku in kutangyukla?

[Picture on page 15]

Nu selos nukewa su fwak mu Jisus el orala mwenmwen puspus ke sripen ku lal Setan elos oru ma koluk lain ngun mutal lun God

[Picture on page 16]

Fwinne el lafwekinul Jisus, Piter el tia oru ma koluk su wanginla nunak munas ka