Eis Me Kai Lun Jeova Pal Nukewa
“Nik kom pilesru kaiyuk lun Jeova.”—SOAKAS 3:11.
1. Efu ku kut enenu in eis me kai su tuku sin God?
TOGUSRA SOLOMON in an Israel in pal meeta el akkalemye nu sin kais sie sesr sripe mwo in eis me kai lun God. “Mwen nutik, nik kom pilesru kaiyuk lun Jeova,” Solomon el fwak, “ku totola ke kai lal, tu el su Jeova el lungse el kai, oana sie papa nu sin mwen se su el insemwomwo ka.” (Soakas 3:11, 12) Aok, Papa tumasr in kosrao el sang me kai nu sum meyen el lungse kom.
2. Mea kalmen “me kai,” a fuka sie met el ku in kaiyuk?
2 “Me kai” el sramsramkinyuk nu ke me aksumwosye, kas in kasru, a kas in luti. Met sap Poul el simusla: “Kai nu kemwa in pal in kai tia oana ma in akinsemwomwoye, a me akasorye, a tok, kai oswe fwako mutal in elos su kaiyuk tari, aok, fwako lun sumwosmwos.” (Hibru 12:11) In eis a orekmakin me kai lun God ku in kasre kom in kafweang in fwasr ke inkanek sumwos a ku in kasre kom in fototo na paye nu sin God su mutalana, Jeova. (Sam 99:5) Me aksumwos ku in tuku sin met lili puspus, ke ma puspus su lutiyuk ke meeting nukewa, a ke lutlut lom ke Kas lun God a ke me rid nukewa su orekla sin “met kulansap oaru.” (Luk 12:42-44) Fwin oasr kutena ma su enenu in aksumwosyeyuk a ma inge akkalemyeyuk nu sum paye la mwo kom in arlana sang kulo ka! Tusruktu kain in me kai fuka eneneyuk fwin oasr sie ma koluk upa orek?
Efu ku Kutu Met Elos Sisila
3. Ngea orekma in sisila lun sie met e fwa orek?
3 Met kulansap nukewa lun God elos lutlutkin Baibel a me rid puspus lun met Kristian. Akwuk fulat lun Jeova akuteyuki ke pal in meeting nukewa, assembly nukewa, a ke toeni lulap nukewa. Ke ma inge met Kristian elos lutiyuk ke oiya su Jeova el siyuk selos. Sisila lun sie met el e fwa orek mukena fwin sie met ke congregation el oru ma koluk upa a srunga in auliyuk.
4, 5. Mea me pupulyuk su oasr in ma Simusla ke orekma in sisila akkalemyeyuk ke me lutlut inge, a efu ku oasr me kaifwe nu sin congregation in sifwilpa folokla mokul se inge?
4 Nunku ke sie me pupulyuk lun Baibel nu ke sie met su sisila liki congregation. Ke congregation in an Korint elos lela in “oasr kosro yurulos, a kosro oana tia yurin met Pegan, tu sie sumwos eis mutan kien papa tumal.” Poul el kaifwe met Korint elos in “esalang su ou inge nu sin Setan nu ke kunausla lun ikwel, tu ngunal fwa moul.” (1 Korint 5:1-5) Fwin sie met el sisila a ke ma inge el esalang nu sin Setan, met orekma koluk inge el sifwilpa forla nu ke akwuk lun fwal se inge lun Setan. (1 Jon 5:19) Sisila lun met inge el sang me kasru mwomwo in eisla pa me akkoluk nu ke congregation a ma inge sang me kasru yok in karunganang “ngun” mwo, ku oiya mwo yok nu ke congregation.—2 Timote 4:22; 1 Korint 5:11-13.
5 Tia arlana pat tokin pal inge, Poul el kaifwe met Kristian in an Korint elos in sifwilpa folokonla met orekma koluk inge nu in congregation. Efu? Tu elos in tia ku in “akkolukyeyuk sin Setan,” met sap el fwak. Met orekma koluk se inge el auliyuk tari a el mutamwauk tari in moulkin moul nasnas. (2 Korint 2:8-11) Fwin met Kristian in an Korint elos srunga in folokonla met inge su auliyuk, Setan el fwa akkolukyelos ke sripen elos tia akkalemye pakoten a srunga in sang nunak munas oana ma Devil el lungselos in oru. Aok, tia pat elos “nunak munas a akparye” met su auliyuk inge.—2 Korint 2:5-7.
6. Orekma in sisla met orekma koluk liki congregation el ku in akpayeye mea?
6 Mea orekma in sisla met orekma koluk el ku in akpayeye? El karungin in e mutal lun Jeova in wangin kutena me akkolukye a in sang karungin oiya mwomwo lun met kulansap nukewa lal. (1 Piter 1:14-16) Orekma in sisla sie met orekma koluk liki congregation el orek fwal nu ke masap ku akwuk lun God a in karungin oiyen nasnas nu ke ngun lun congregation. Akwuk inge ku in kasru sie met in ku in akilen upaiyen ma koluk lal.
Auliyuk el Yok Sripe nu ke Sifwil Foloku
7. Ke pal se Devid el tia akkalemye ma koluk lal mea ma inge oru nu sel?
7 Met puspus su oru ma koluk upa elos akkalemye auliyuk paye a pa inge sripe paenang elos in tia sisila liki congregation. Aok, nu sin kutu met tia fusrasr in akkalemye auliyuk paye. Nunku kel Togusra Devid lun an Israel, su simusla Sam ak 32. Ke on soko inge el akkalemye la oasr lusen pal su Devid el tia akkalemye ma koluk upa lal, saap ke ma koluk lal yurol Bat-siba. Fwokin ma inge paenang in oasr asor yok ke ma koluk lal inge akmusnasyella, oana ke pulanpal su arlana fwol el akpaoyela saku. Devid el sun ma upa ke mano a nunak, tusruktu ke pal se el ‘fwakak ma koluk lal, Jeova el nunak munas nu sel.’ (Sam 32:3-5) Tokin ma inge Devid el akkalemye ke on soko lal inge la: “Insemwomwo met se su Jeova el tia oekla ma koluk lal nu sel.” (Sam 32:1, 2) Arlana mwo in oasr pulakinyen pakoten lun God!
8, 9. Fuka auliyuk el ku in akkalemyeyuk, a fuka ma inge el yok sripe nu ke sifwil foloku lun sie met sisila nu ke congregation?
8 Ke ma inge, kalem la, sie met orekma koluk el enenu in auliyuk fwin el lungse in eis pakoten a nunak munas. Tusruktu, fwin sie met el pulakin mwekin ku pulakin sangeng ke ma koluk lal in eteyukyak, kain in nunak inge el tia akkalemye la el auliyuk paye. Kalmeyen “in auliyuk” pa in “ekulla nunak” su akkalemye la wanginla ella ku orekma koluk, meyen oasr asor yok el akkalemye ka. Sie met su auliyuk el pulakin la oasr “sie inse musalla a toasr ke ma koluk lal,” a el lungse in ‘aksumwosye ma koluk’ lal fwin ku.—Sam 51:17; 2 Korint 7:11.
9 Oiyen auliyuk el sie ma su arlana yok sripe nu ke reinstatement ku sifwilpa folok lun sie met nu ke congregation lun met Kristian. Sie met sisila liki congregation el tia sifwilpa foloku nu ke congregation tokin lusen pal fwin oasr akilenyel la el tia auliyak na paye liki ma koluk lal meet. Meet liki el ku in sifwilpa foloku, enenu oiyen moul ku insiyel in oasr ekla ke inkanek yok. El enenu in akilen upaiyen ma koluk lal a ke me akkoluk se su el orala nu sin Jeova a nu ke congregation. Met su orala ma koluk el enenu in auliyuk, pre siyuk ke nunak munas, a akfwalye moul lal nu ke masap sumwosmwos lun God. Fwin sie met el siyuk ke sifwil folokla lal, el enenu in sang me akpayeye nu ka la el auliyuk na paye a el akkalemye ke “orekma fwal nu ke auliyuk.”—Orekma 26:20.
Efu in Akkalemye Ma Koluk?
10, 11. Efu ku kut tia enenu in mwukunla ma koluk lasr?
10 Saap kutu sin met su orala ma koluk elos fwak: ‘Fwin Nga fwa fwak nu sin kutena met ke ma koluk luk, saap Nga enenu in sang me top nu ke kusensiyuk puspus su fwa akmwekinyeyu a saap Nga ku in sisila. Tusruktu fwin Nga tia akkalemye ma koluk luk, me mwekin luk ku in tia sikyak a wangin met ke congregation fwa etu ka.’ Kain in nunak oinge el tia mwo nu ke kutu oiya su yok sripe. Mea oiya puspus inge?
11 Jeova el “sie God pakomuta a kulang, tia sa in mulat, a yoklanu lungkulang a paye Lal, in srukye lungkulang nu sin tausen, nunak munas ke ma koluk a ma sito a meta.” Tusruktu, el aksumwosye met kulansap lal “ke nununku sumwos.” (Exodus 34:6, 7; Jeremaia 30:11) Kom fwin orala ma koluk upa, fuka kom ku in eis pakoten lun God kom fwin wukanla ma koluk lom? Jeova el etu ka, a el tia lela in oasr orekma koluk su tia eis nununku ka.—Soakas 15:3; Hebakkuk 1:13.
12, 13. Mea ku in sikyak fwin sie met el srike in mwukunla ma koluk lal?
12 Kom fwin oru ma koluk upa, orekma in akkalemye ma inge ku in kasre kom in sifwilpa eis sie conscience ku pulakin mwomwo. (1 Timote 1:18-20) Tusruktu fwin kom tia akkalemye ma koluk lom e fwa ku in akkolukye pulakin ku conscience lom su ku in kol kom in oru ma koluk puspus. Esam la ma koluk lom el tia lain mukena siepa met ku congregation. Ma inge lain God. Met sim lun sam el akkalemye ke on lal: “Jeova—tron lal oasr in kosrao. Mutal liye, kulin mutal srike mwen nutin met. Jeova El srike met sumwosmwos a el srunga met koluk.”—Sam 11:4, 5.
13 Jeova el fwa tia akinsemwomwoye kutena met su mwukunla ma koluk upa a srike in wi muta ke congregation nasnas lun met Kristian. (Jemes 4:6) Ke ma inge kom fwin oru ma koluk a kom lungse in oru ma sumwos, nik kom alolo in akkalemye ma koluk lom ke inkanek paye. Fwin tia, e fwa oasr yurum pulakin ku nunak su tia mwo, yokna ke pal se kom ridi ku long kas in kai su fwal nu ke ma koluk upa oana ma kom oru. Na fuka fwin Jeova el eisla ngun mutal lal liki kom, oana ma el oru nu sel Togusra Soul? (1 Samuel 16:14) Fwin ngunin God el wanginla yurum, pa inge pal se su kom fwa ku in putatla ke ma koluk puspus su upalanu.
Lulalfongi Brother Puspus Wiyom su Oaru
14. Efu ku sie met su orala ma koluk el enenu in orekmakin kas in kai lun Jemes 5:14, 15?
14 Ke ma inge, mea sie met orekma koluk su auliyuk el enenu in oru? “Lela lan soloeni met elder lun congregation; a elos in pre kel a mwoswella ke oil in En Jeova. A pre lun lalalfongi fwa akkeyela met mas se, a Jeova el fwa taksalak.” (Jemes 5:14, 15) Osun nu sin met elder pa sie inkanek su sie met el “isus fwako fwal nu ke auliyuk.” (Mattu 3:8) Met inge su oaru a kulang fwa ‘pre kel a moswella ke oil in en Jeova.’ In oana oil su sang kasru, kas in kai lalos su tuku ke Baibel el akpayeye la sie me akkeye nu sin kutena met su akkalemye auliyuk paye.—Jeremaia 8:22.
15, 16. Fuka met Kristian elder elos etawi me srikasrak su God el akkalemye ka, in oana ma simusyukla in Ezikiel 34:15, 16?
15 Sie me srikasrak mwomwo nu ke kulang pa akkalemyeyuk sin met Seperd lasr, Jeova, ke el aksukosokyela met Ju liki sruo lalos in an Babulon in yea 537 B.C.E. a ke pal se el aksukosokyela met Israel in ngun liki “Babulon Lulap” in yea 1919 C.E.! (Fwakyuk 17:3-5; Galetia 6:16) Ke ma inge el akpayeye mwulela lal: “Nga sifwana fwa met seperd lun sip nutik, a nga fwa oralos in onnu . . . Nga fwa suk ma tula, a fwa sifwil wise ma lusla, a fwa kapriye ma kaptelik, a fwa akkeye ma mas.”—Ezikiel 34:15, 16.
16 Jeova el kite met kulansap lal su oana sip, a ke kas pupulyuk orelos in oana sip su onnu misla, a el suk ma tula nukewa. Ke inkanek oinge, met Kristian su oana met seperd elos kafweang yok in karungin u lun God a in kitelos fwal ke ma lun ngun a akenganyelos in misla puspus. Met elder elos suk sip su som liki congregation. In oana God su ‘kapriye ma kaptelik,’ met elder elos “kapriye” ku sang kasru nu selos su mas in ngun, saap ke sripen ma koluk lalos sifwana. A ke God el ‘akkeye met mas,’ met elder elos kasru met nukewa su mas in ngun, saap ke sripen orekma koluk lalos sifwana.
Fuka Met Seperd Elos Sang Kasru
17. Efu ku kut tia enenu in alolo in suk me kasru ke ma lun ngun sin met elder nukewa?
17 Met elder elos insemwomwo in orekmakin kas in kasru inge: “Komwos in pakomutalos wi sangeng.” (Jud 23) Ke sripen elos oru orekma lun kosro, paenang oasr kutu sin met Kristian elos oru ma koluk upa. Tusruktu fwin elos akkalemye auliyuk paye, elos ku in lulalfongi la elos ku in eis me kasru ke inkanek pakoten, kulang sin met elder su lungse na paye in kasrelos ke ma lun ngun. Wekunang nu sel sifwana, Poul el akkalemye ke met elder puspus inge: “Tia tu kut leum fwin lulalfongi lomwos, a kut met kasru in engun lomwos.” (2 Korint 1:24) Ke ma inge, nikmet alolo ka in suk ke me kasru lalos in ngun.
18. Oiya fuka met elder elos akkalemye nu sin sie met lili su oru ma koluk?
18 Kom fwin oru ma koluk upa, efu ku kom ku in lulalfongi met elder puspus? Meyen elos met seperd ke u lun God. (1 Piter 5:1-4) Wangin met seperd kulang el fwa uni a akkolukye soko kosro muna, ku uni soko sip su tung ke sripen ngal manol. Ke ma inge, ke pal se met elder elos kasru sie met lili su oru ma koluk, elos fwa tia loang ku nunku yok ke me kai upa su elos ku in sang nu ke ma koluk, a elos loang yok nu ke ma koluk a la fuka elos ku in sifwilpa akkeyel ke ma lun ngun fwin ku. (Jemes 5:13-20) Met elder elos enenu in oru nununku ke inkanek sumwosmwos a in karunganang u ke inkanek kulang. (Orekma 20:29, 30; Isaia 32:1, 2) Oana ke met Kristian puspus, met elder elos enenu in ‘orekmakin nununku sumwos, lungse kulang, a akkalemye oiyen fwokpap in fwasr wi God.’ (Maika 6:8) Kain in oiya mwo nukewa inge yok sripe nu sin met elder fwin elos oru sulela nu ke moul a orekma in kulansap mutal lun “sip lun ima lun [Jeova].”—Sam 100:3.
19. Oiya fuka met elder elos fwa akkalemye ke elos srike in aksumwosye kutena met su oru ma koluk?
19 Met Kristian oana met puspus elos srusrngiyuki ke inkanek lun ngun mutal a elos kafweang in lela ngun mutal in kol moul lalos. Fwin “sie met el oru ma koluk meet liki el etu ka”—oana el srufweyukla ke sripen elos nukin la oasr me sensen su ku in sikyak ka—met matu in ngun elos fwa srike in “aksumwosye el su oinge in ngun lun fwokpap.” (Galetia 6:1; Orekma 20:28) Met elder elos fwa srike in aksumwosye nunak lal, ke inkanek kulang tusruktu ku in orekmakin akwuk ke masap lun God, oana ke sie taktu el arlana taran ke el fwin sifwilpa folokonla soko sri su musalla ke fwintokin met, in sang kasru mwomwo nu sin met in tia pulakin ngal upa a elos akkalemye la elos lungse in sang kasru nu ke ma upa inge. (Kolosse 3:12) Ke sripen met elder elos orekmakin a lulalfongi ke pre a ma Simusla in sang kasrelos fwin elos fwa akkalemye pakoten ku tia, ke ma inge sulela lun met elder fwa akkalemye nunak lun God ke ma upa inge.—Mattu 18:18.
20. Ngea pal su eneneyuk in akkalemyeyuk nu ke congregation la sie met el eis me aksumwos ku ke me kai?
20 Fwin sie ma koluk el eteyuk sin met puspus ku fwin eteyukyak tok, fwal in orekla sie me fwakak in akkalemye nu sin congregation ke ma sikyak inge in sang karungin oiya mwomwo lun congregation. Sie me akkalemye fwa orek pa fwin oasr ma eneneyuk in sang akkalemye ma inge nu sin congregation. Ke lusen pal se su sie met el eis me kai sin un met elder su pangpang judicial committee el ku in kais kutu srisrik kela ke mas lun ngun, el ku in pupulyukkinyuk nu sin sie met su kela liki sie kain in mas ku liki oiyen musalla lun mano lal, su tia ku in oru kutena ma puspus. Ke lusen sie pal, paye la oasr ma lane ku in sikyak nu sin met su auliyuk fwin el ku in long mukena a tia sang comment lal ke pal in meeting nukewa. Met elder elos fwa orala akwuk nu sin sie met lili in oru lutlut Baibel nu sel in akkeyel a in kasrel in orala kapkapek mwomwo lal ke oiya puspus lal su el munas ka el an ku in sifwilpa eis “sumwos [ku, NW] in lulalfongi.” (Taitus 2:2) Ma inge nukewa orek ke inkanek lun lungse a tia orek in sang me kai upa mukena nu sin met orekma koluk.
21. Ke inkanek fuka kutu orekma koluk ku in aksumwosyeyuk?
21 Met elder elos ku in sang me kasru lun ngun ke inkanek puspus. Ke sie me pupulyuk, fwin oasr sie brother su oasr me munas yok lal in pal meeta ke orekmakinyen wain alukela ma fwal el sifwilpa numla wain alukela ma fwal ke pal se ku luo ke el mukelanu muta in loom sel. Ku saap oasr sie met lili su sisla tari orekmakinyen paip ku tobacco in pal meeta a el sifwilpa orekmakin paip ke pal se ku luo ke pal se el mutamwauk in sifwilpa nunkeak ke me munas lal inge. Fwinne el pre tari ka a el lulalfongi mu God el nunak munas ke ma koluk lal inge, el enenu in suk me kasru sin sie met elder in kasrel ke ma koluk lal ku me munas lal inge in tia sikyak ku orek pal nukewa. Sie met elder ku met elder luo elos ku in osun a sramsram nu sel in kasrel. Tusruktu, met elder inge elos enenu in akkalemye ma inge nu sin presiding overseer, ke sripen saap oasr pa ma puspus saye su eneneyuk nu ka.
Tafwela na in Eis Me Kai lun God
22, 23. Efu ku kom enenu in tafwelana in eis me kai lun God?
22 In eis me insemwomwo lun God, kais sie met Kristian elos enenu in loang akmwoye nu ke me kai lun Jeova. (1 Timote 5:20) Ke ma inge kom in orekmakin kutena me aksumwos su kom eis ke pal se kom lutlutkin ma Simusla a me rid puspus lun met Kristian ku ke pal se kom long ke kas in kai su akkalemyeyuk ke pal in meeting, assembly, a toeni lulap nukewa lun met kulansap lun Jeova. Kom ku in loang yok pal nukewa in orekmakin ma fwal nu ke ma lungse lun Jeova. Ke ma inge me kai su tuku sin God fwa kasre kom in sruokye pal nukewa sie me loeyuk lun ngun—oana sie pot fukoko su oana me loeyuk in lain ma koluk.
23 In eis me kai lun God fwa ku in kasre kom in sruokya na ku lungse lun God. Paye la, oasr kutu met su sisila liki congregation lun met Kristian, tusruktu ma inge fwa tia sikyak nu sum kom fwin “karungin insiom” a kom ‘fwufwasryesr oana sie met lalmetmet.’ (Soakas 4:23; Efesus 5:15) Tusruktu, kom fwin sisila tari ke pal inge, efu ku kom tia oru inkanek puspus in sifwilpa foloku nu ke congregation? God el lungse met nukewa su mwulela moul lalos nu sel in alu nu sel ke inkanek paye a oaru a oasr pulakinyen “engan ke inse” lalos. (Duteronomi 28:47) Kom ku in oru ma inge ma patpat kom fwin eis me kai lun Jeova pal nukewa.—Sam 100:2.
Kom E Topuk Fuka?
• Efu ku kutu met elos sisila liki congregation lun met Kristian?
• Orekma fuka eneneyuk nu ke auliyuk paye?
• Efu ku ma koluk upa enenu in akkalemyeyuk?
• Ke inkanek puspus fuka met Kristian elder elos ku in kasru met orekma koluk su auliyuk?
[Picture on page 12]
Efu ku met sap Poul el sang kas in kasru ku masap nu sin met Kristian in an Korint ke orekma in sisila?
[Picture on page 15]
In oana met seperd in pal meeta, met Kristian elder elos “kapriye” ku unwela kinet lun sip nutin God