Ya Kom Kafweang In “Fwufwasryesr ke Ngun”?
“Komwos in fwufwasryesr ke Ngun, a komwos fwa tia akpayeye lung lun ikwe.”—GALETIA 5:16.
1. Fuka me fosrnga ku aksangeng in oru ma koluk lain ngun mutal ku in akwanginyeyukla?
OASR sie inkanek mwo in akwanginyela me fosrnga ke kut nunku mu saap kut oru ma koluk in lain ngun mutal lun Jeova. Inkanek se inge pa fwin kut oru ma met sap Poul el fwak: “Komwos in fwufwasryesr ke Ngun, a komwos fwa tia akpayeye lung lun ikwe.” (Galetia 5:16) Kut fwin lela ngun mutal lun God in kol kut, kut fwa tia fuleak in oru kena koluk lun ikwe su tia fwal.—Rom 8:2-10.
2, 3. Kut fwin kafweang in fwasr ke ngun, fuka ma inge fwa kasre kut?
2 Orekma lasr in kafweang in “fwufwasryesr ke ngun,” ku lun God fwa akkeye kut in akos Jeova. Kut fwa ku in etawi oiya mwomwo lun God ke orekma in luti lasr nu sin met puspus, ke congregation lasr, ke loom, a yen nukewa. Fwako lun ngun mutal fwa ku in liyeyuk arulanu kalem ke oiya su kut akkalemye nu sin mutan ku mokul tumasr, tulik nutusr, nu sin met lili wiyesr, a nu sin met puspus saye.
3 In moulkin “moul fwal nu ke nunak lun God in ngun” ku in kasre kut in tui liki orekma koluk. (1 Piter 4:1-6) Fwin oasr yurosr me kasru lun ngun mutal, paye la kut fwa tia oru ma koluk su tia ku in eis nunak munas ka. Tusruktu piya kutupa inkanek mwo puspus su sang kasru nu sesr kut fwin kafweang in fwasr ke ngun?
Kafweang in Fototo nu sin God a nu sin Kraist
4, 5. Fuka fwufwasryesr lasr ke ngun kasru nunak lasr kel Jisus?
4 Meyen kut fwufwasryesr ke ngun mutal, paenang kut ku in karungin fototo lasr nu sin God a nu sin Mwen nutul. Ke el simusla ke me sang puspus lun ngun, Poul el fwak nu sin met lili nukewa in an Korint: “Nga aketeye nu sumwos [met su alu nu ke ma srolela meeta], tu wangin sie met su kaskas ke ngun lun God el fwak: ‘Jisus el anatema!’ [“selngawiyuk,” NW] a wangin sie met ku in fwak: ‘Jisus el Leum!’ a ke ngun mutal.” (1 Korint 12:1-3) Kutena ku su mokle met puspus in fwak sie kas in selnga nu sin Kraist el ma tuku sin Setan su Devil. Ke ma inge, in oana met Kristian, kut lulalfongi na paye la Jeova el akmoulyelak Jisus liki mise a akfulatyel liki kutena ma orekla. (Filippai 2:5-11) Oasr lulalfongi lasr ke me kise lun lango lun Kraist a in eisel Jisus oana Leum su srusrngiyuki nu sesr sin God.
5 Oasr kutu met su fwak mu elos met Kristian in century se meet C.E. tusruk elos lafwekin mu Jisus el tuku in ikwe. (2 Jon 7-11) Oasr met puspus su eis a lulalfongi ke nunak tia paye inge a oru kutu selos in pulesru me luti paye nukewa kel Jisus, su Messaia. (Mark 1:9-11; Jon 1:1, 14) In fwufwasryesr ke ngun mutal fwa ku in kasre kut in tia lulalfongi ke kain in luti kikiap inge. Tusruktu kut fwin loang akmwoye pal nukewa nu ke me luti sumwos nukewa a ke nunak lun God su oasr in Baibel pa inge inkanek sefwanna su ku in kasre kut in tafwela na in eis kulang lun God su alukela ma fwal a in “fwufwasryesr in ma paye.” (3 Jon 3, 4) Ke ma inge lela kut in akkalemye la kut lungse na paye in pulesru tia loang nu ke me luti kikiap nukewa tu kut fwa ku in engankin pal nukewa ke fototo mwomwo nu sin Papa tumasr su oasr in kosrao.
6. Kain in oiya mwo puspus fuka ngun mutal lun God el orala nu selos su fwufwasryesr ke ngun?
6 Poul el simusla ke orekma in sifwilpa oru alu nu ke ma srolela a srukasrak kas [“u srisrik puspus su tia sruokye ma paye,” NW] pa kutu “orekma lun ikwe” a kosro a oiya fokfok. Tusruktu el akuteye: “A elos, su met sran Kraist Jisus, uniye tari ikwe fwin sakseng [“sak soko,” NW] wikin rapku a lung lal. Kut fwin moul ke ngun, lela kut in ouyepa fwufwasryesr ke ngun.” (Galetia 5:19-21, 24, 25) Kain in oiya fuka ngun mutal lun God el orala nu sin met nukewa su moul a fwufwasryesr ke ngun? “Fwako lun ngun,” Poul el simusla, “lungse, engun, misla, mongfusesr, kulang, inse mwo, oaru, fwokpap, sifwana leum fwom.” (Galetia 5:22, 23) Lela kut in akuteye oiya mwomwo ke fwako nukewa lun ngun.
“Lungse Sie Sin Sie”
7. Mea kalmen lungse, a mea kutu oiya lun ma inge?
7 Lungse—el sie fwako lun ngun mutal—su akkalemyeyuk pal nukewa ke inkanek lun pulakin mwomwo ku lung paye a kain in nunak su wangin kutasrik ka nu sin met puspus, wi pa fototo mwomwo nu selos. Ma Simusla el akkalemye la “God el lung” meyen el pa me srikasrak mwo emeet ke oiya mwomwo inge. Lungse yok lun God a lun Mwen Natul nu sin metu el akkalemyeyuk ke me kise lun lango lun Jisus Kraist. (1 Jon 4:8; Jon 3:16; 15:13; Rom 5:8) Oana met su fwasr tokin Jisus, kut akilenyuk ke lungse su oasr yurosr nu sin sie sin sie. (Jon 13:34, 35) Paye la, kut sapkinyuk in “lungse sie sin sie.” (1 Jon 3:23) A Poul el fwak la lungse el mongfusesr a kulang. El tia sok, el tia sifwana konkun, el tia inse fulat ku tia oru ma sufwal, el tia suk ma lal sifwana. Lungse el tia sa in mulat, el tia nunuk koluk a tia engun in ma koluk. El engun ke ma paye, a tia ke ma sesumwos. Lungse el lulalfongi ma nu kemwa, el fwinsrak ke ma nu kemwa, el muteng in ma nu kemwa. Yok liki nukewa, lungse el tia na wanginla.—1 Korint 13:4-8.
8. Efu kut enenu in akkalemye lungse nu sin met nukewa su alu pa nu sin Jeova?
8 Kut fwin lela ngun mutal lun God in orala lungse in kut, oiya mwo inge fwa liyeyuk ke fototo lasr nu sin God a nu sin met tulan lasr. (Mattu 22:37-39) “El su tia lungse el mutana in mise,” met sap Jon el simusla. “Kutena met su srunga met lel, el sie met akmas, a komwos etu tu moul ma patpat tia on in el.” (1 Jon 3:14, 15) Sie met akmas ku in som nu ke sie siti lun molela in an Israel fwin el tia srunga met su anwuki. (Duteronomi 19:4, 11-13) Fwin ngun mutal el kol kut, kut fwa akkalemye lungse nu sin God, nu sin met lili nukewa, a nu sin met puspus saye.
“Engun lun Jeova El Ku Lom”
9, 10. Mea se inge engun, a mea kutu sripe tu kut in engun yok?
9 Engan el sie kain in insemwomwo yok. Jeova el “God su insemwomwo.” (1 Timote 1:11; Sam 104:31) Mwen el insemwomwo in oru ma lungse lun Papa tumal. (Sam 40:8; Hibru 10:7-9) A “engun lun Jeova ku [lasr].”—Niemaia 8:10.
10 Engan su God el ase nu sesr oru kut in insemwomwo yok ke kut oru ma lungse lun God fwinne ke pal su oasr ma upa puspus, asor, ku me kalyai. Aok “etauk lun God” el ase nu sesr insemwomwo yok! (Soakas 2:1-5) Fototo mwomwo lasr nu sin God su kut insemwomwo ka el fwalna nu ke etauk sumwos a lulalfongi nu sel a nu ke me kise lun lango lun Kraist. (1 Jon 2:1, 2) Ke sripen kut wi ke u lun met lili paye fwin fwalu nufon el siepa sropon me engan. (Zefenaia 3:9; Haggeai 2:7) Fwinsrak lasr ke Togusrai a kunokon mwomwo lasr in sulkakin peng mwo oru kut in engan na paye. (Mattu 6:9, 10; 24:14) Oayepa, fwinsrak ke moul ma patpat el oru kut in insemwomwo pa. (Jon 17:3) Ke sripen oasr yurosr kain in fwinsrak na mwomwo inge, paenang kut fwa “arulana engun.”—Duteronomi 16:15.
Akkalemye Misla a Mongfusesr
11, 12. (a) Kom e akuteye fuka misla? (b) Mea misla su tuku sin God ku in oru nu sesr?
11 Misla—el siepa fwako lun ngun mutal—el sie oiya su oasr misla ke nunak a sukosok liki kutena me fosrnga. Papa tumasr su oasr in kosrao el sie God lun misla, a oasr mwulela se su akkalemyeyuk nu sesr: “Jeova El a fwa akinsemwomwoye met sral ke misla.” (Sam 29:11; 1 Korint 14:33) Jisus el fwak nu sin met tuma lutlut lal: “Nga filiye misla yurumwos, misla luk Nga sot nu sumwos.” (Jon 14:27) Fuka misla inge ku in kasre met tuma lutlut lal?
12 Misla su Jisus el sang nu sin met tuma lutlut lal akmisyela insielos a nunak lalos a aksrikyela sangeng lalos. Oasr misla lulap yurolos yokna ke pal se elos eis ngun mutal su mwuleyukla nu selos. (Jon 14:26) Ke kasru lun ngun mutal a ke me top nu ke pre lasr ke pal inge, kut insemwomwokin “misla lun God” su wangin ma oana, su akmisyela insiesr a nunkesr. (Filippai 4:6, 7) Sayen ma inge, ngun lun Jeova el kasre kut in akkalemye misla nu sin met lili wiyesr a nu sin met puspus.—Rom 12:18; 1 Tessalonika 5:13.
13, 14. Mea se inge mongfusesr, a efu kut enenu in akkalemye ma inge?
13 Mongfusesr el kupasr nu ke oiya mwo su lungse in orek misla ka, meyen pa inge oiya mwomwo lasr ke kut muteng ke me purakak koluk ku ke ma koluk ke kut fwinsrak mu ma upa su sikyak el ku in akmwoyeyuk. God el muteng in mongfusesr. (Rom 9:22-24) Jisus el akkalemye pa oiya mwomwo inge. Kut ku in eis ma lane ke Jisus el akkalemye oiya inge, meyen Poul el simusla: “Ke sripe se inge nga eis lungkulang, tu Jisus Kraist lan fwakak in nga, oana met se su koluk yok lukelos, mongfusesr nu kemwa Lal, tu in me srikasrak nu selos su fwa lulalfongi in el nu ke moul ma patpat.”—1 Timote 1:16.
14 Oiya mwomwo lun mongfusesr inge el kasre kut in muteng ke pal se metu elos fwak ku oru ma puspus su tia mwo a oru inkanek sekulang. Poul el kaifwe met Kristian nukewa: “Mongfusesr nu sin met e nu kemwa.” (1 Tessalonika 5:14) Ke sripen kut nukewa sesumwos a oru ma koluk, paye kut lungse metu elos in muteng nu sesr, a elos in mongfusesr ke kut oru ma koluk nu selos. Ke ma inge lela kut in kafweang in insemwomwo in “mongfusesr.”—Kolosse 1:9-12.
Akkalemye Kulang a Mwo Oiya
15. Akuteye kalmeyen kulang, a akkalemye ke me pupulyuk ka.
15 Kulang el akkalemyeyuk fwin kut akkalemye insemwomwo lasr nu sin met puspus ke inkanek lun kas kulang a orekma mwomwo su ku in sang kasru. Jeova el kulang, a Mwen natul pa. (Rom 2:4; 2 Korint 10:1) Kulang el sapkinyuk in akkalemyeyuk nu sin met kulansap nukewa lun God a Kraist. (Maika 6:8; Kolosse 3:12) Fwinne met puspus su wangin fototo mwomwo lalos nu sin God elos akkalemye pa “kulang.” (Orekma 27:3; 28:2) Ke ma inge, paye la, kut ku in akkalemye kulang kut fwin kaifweang in “fwufwasryesr ke ngun.”
16. Mea kutu luma su fwa mokle kut in akkalemye kulang?
16 Kulang el ku in akkalemyeyuk fwinne oasr sripe mwo lasr in mulat ke sripen kas ku orekma tia mwo lun sie met. “Komwos in mulat, a tia orek ma koluk,” Poul el fwak. “Tia lela fwatu in tili fwin mulat lomwos, a komwos in tia sang an sin Devil. . . . A komwos in kulang nu sin sie sin sie, ke mwo insiomwos, nunak munas nu sin sie sin sie, oana God el ouyepa nunak munas nu sumwos in Kraist.” (Efesus 4:26, 27, 32) Arulanu fwal in akkalemye kulang nu selos nukewa su sun me srifwe puspus. Aok, sie met Kristian elder el tia akkalemye kulang fwin el tia sang kas in kai su tuku ke ma Simusla ke sripen el srunga in akngalye pulakin lun sie met su arulanu kalem la oasr ke me sensen la el apkurun in som liki inkanek “mwo a sumwosmwos a paye.”—Efesus 5:9.
17, 18. Mea kalmen mwo oiya, a fuka oiya mwo inge fwa sang me kasru nu ke moul lasr?
17 Mwo oiya el sie ella na mwomwo, sie oiya su akkalemye ke oaru a kulang a lungse in sang kasru. Arulanu yok mwo lun God. (Sam 25:8; Zekaraia 9:17) Jisus el sumwosmwos a oasr yurol ella su arulanu mwo. Ne oinge, el tia eis “Mwo” oana sie mwal ke pal oasr met panglol “Met Luti Mwo.” (Mark 10:17, 18) Kalem la el oru ma inge ke sripen el akilen la God pa me srikasrak mwo emeet nu ke oiya mwo.
18 Ku lasr in oru ma mwo el kosreyukla ke sripen ma koluk su kut usrui. (Rom 5:12) Tusruktu, kut ku in akkalemye oiya mwo inge fwin kut pre nu sin God a siyuk in ‘luti kut ke ma mwo.’ (Sam 119:66) Poul el fwak nu sin met lili puspus in an Rom: “A Nga oayepa sifwana kaifweyuk tari keyumwos, met lili, tu komwos sifwana sesesla ke ma mwo, tingtingi ke etauk nukewa.” (Rom 15:14) Sie met Kristian elder el enenu in “lungse ma mwo.” (Taitus 1:7, 8) Fwin kut kolyuk sin ngun mutal lun God, kut fwa eteyuk oana met su lungse ma mwo, a Jeova el fwa ‘esam kut ke ma mwo su kut oru.’—Niemaia 5:19; 13:31.
“Lulalfongi su Wangin Kutasrik”
19. Akuteye kalmeyen lulalfongi, in fwal nu ke Hibru 11:1.
19 Lulalfongi—el sie pa fwako lun ngun mutal—“el me etauk lun ma su a fwinsrak ka, a me akkalemye ke ma paye nukewa fwinne tia liyeyuk.” (Hibru 11:1, NW) Fwin oasr lulalfongi lasr, kut etu la ma nukewa su Jeova el mwulela ka el oana akpayeyuk tari. Lulalfongi ke ma paye puspus su tia liyeyuk el arulanu fukoko paenang ma inge ku in fwak mu me akpayeye kalem ke ma paye puspus su tia liyeyuk. Ke sie me pupulyuk, oasr lun ma orekla puspus el oru kut in lulalfongi na paye la oasr sie Met Orala ma Nukewa. Kut ku in akkalemye kain in lulalfongi inge fwin kut kafweang in fwufwasryesr ke ngun.
20. Mea se inge “ma koluk su fusrasr in kuluskuti,” a fuka kut ku in fwasr liki ma inge a ke orekma lun ikwe?
20 Fwin wangin lulalfongi kalme pa “ma koluk su apkurun [“fusrasr,” NW ] in kuluskuti.” (Hibru 12:1) Kut enenu in lulalfongi ke ngun mutal lun God in kasre kut in tia oru orekma lun ikwe, tia lungse ma puspus lun fwalu, a in fwasr liki me luti kikiap su ku in kunausla lulalfongi. (Kolosse 2:8; 1 Timote 6:9, 10; 2 Timote 4:3-5) Ngun mutal lun God el orala ku akkeye lulalfongi lun met kulansap lun Jeova ke pal inge oana ke lulalfongi lun Met Lo puspus met liki pal lun met Kristian a lun kutupa met su simusyukla in Baibel. (Hibru 11:2-40) A “lulalfongi paye” lasr sifwana ku in akkeye lulalfongi lun met puspus.—1 Timote 1:5; Hibru 13:7.
Akkalemye Oiya Fwokpap a Sifwana Leum Fwom
21, 22. Mea kalmen fwokpap, a efu kut enenu in akklemye ma inge?
21 Fwokpap el sie oiya su ku in akkalemye sifwana leumi a ella mwomwo. Sie nu ke oiya mwomwo lun God pa fwokpap. Kut etu ma inge, ke sripen Jisus, su sie met fwokpap, el etawi ke inkanek mwo a oiya mwomwo lun Jeova. (Mattu 11:28-30; Jon 1:18; 5:19) Ke ma inge, mea sapkinyuk nu sesr in oru oana met kulansap lun God?
22 Oana met Kristian, kut enenu in akkalemye ‘fwokpap nu kemwa nu sin met nu kemwa.’ (Taitus 3:2) Kut akkalemye fwokpap nu sin met puspus ke orekma in luti lasr. Met liaung nukewa elos kaiyuk in sang me aksumwos nu sin met Kristian su oru ma koluk ke “ngun lun fwokpap.” (Galetia 6:1) Kut nukewa ku in sang kasru nu ke inse sefwanna a misla lun met Kristian ke inkanek in akkalemye “pusisel nu kemwa, a fulpap.” (Efesus 4:1-3) Kut ku in akkalemye fwokpap fwin kut fwufwasryesr ke ngun a akkalemye sifwana leumi pal nukewa.
23, 24. Mea se inge sifwana liaung, a fuka ma inge kasre kut?
23 Sifwana leumi ku liaung el kasre kut in karungin liki nunak, kas, a orekma su tia mwo. Jeova el ku in “sruokilye” pal nukewa ke orekma lal nu sin met Babulon su kunausla Jerusalem. (Isaia 42:14) Mwen natul el ‘likiye nu sesr sie me srikasrak’ ke el akkalemye la el sifwana liyalang ke el sun me keok puspus. A met sap Piter el sang kas in kai nu sin met lili Kristian in ‘sifwana liaung nu ke etauk lalos.’—1 Piter 2:21-23; 2 Peter 1:5-8.
24 Met Kristian elder elos enenu in akkalemye oiya mwo inge sifwana leumi ku liaung. (Taitus 1:7, 8) Aok, met nukewa su oasr kolyuk lun ngun mutal yurolos elos ku in akkalemye oiya mwo inge sifwana liaung a ke ma inge elos ku in fwasr liki orekma lun kosro, kaskas fokfok, ku kutena ma su ku in oru Jeova in tia insemwomwo kesr. Kut fwin lela ngun mutal lun God in akkeye oiya mwo inge sifwana leumi ku liaung in kut, ma inge fwa arulanu kalem nu sin met puspus ke sripen kas lasr a ella mwomwo.
Kafweang in Fwufwasryesr ke Ngun Mutal
25, 26. Fuka orekma lasr in fwufwasryesr ke ngun fwa akkeye fototo lasr nu sin met lili ke pal inge a sang kasru nu ke fwinsrak nukewa lasr ke pal fwasru?
25 Fwin kut fwufwasryesr ke ngun, kut fwa met orekma su moniyuk in sulkakin peng mwo lun Togusrai. (Orekma 18:24-26) Kut fwa oana me asrouki mwomwo, a met nukewa su lungse God elos fwa insemwomwo in asrouki nu sesr. Kut oana met puspus su oasr kolyuk lun ngun mutal yurulos, kut fwa sropon me akkeye nu sin met kulansap nukewa lun Jeova in tafwela in fwufwasryesr ke ngun. (Filippai 2:1-4) Ya tia pa inge ma met Kristian nukewa elos lungse in oru?
26 Ke fwalu inge su oasr ye koko lun Setan, tia fusrasr in fwufwasryesr ke ngun. (1 Jon 5:19) Ne oinge, million puspus elos oru ma inge ke pal inge. Kut fwin lulalfongi paye nu sin Jeova ke insiesr kemwa, kut fwa engankin moul ke pal inge a kut fwa ku in kafweang in fwufwasryesr nu tok ma patpat ke inkanek sumwosmwos lun Met Sang ngun mutal su kulang.—Sam 128:1; Soakas 3:5, 6.
Mea Me Top Lom?
• Fuka orekma lasr in “fwufwasryesr ke ngun” akkeye fototo lasr nu sin God a Mwen natul?
• Mea fwako puspus lun ngun mutal?
• Mea kutu inkanek in akkalemye fwako lun ngun mutal lun God?
• Fuka orekma in fwufwasryesr ke ngun el sang kasru nu ke moul lasr ke pal inge a ke fwinsrak nukewa lasr ke pal fwasru?
[Picture on page 19]
Ngun mutal lun Jeova akkeye lungse nu sin met lili wiyesr
[Picture on page 20]
Akkalemye kulang ke inkanek lun kas a orekma mwo