Mea Kom Ku In Lotela Ke Tulik Srisrik?
“KOM orekma oana oiya lun sie tulik srisrik!” Fwin kas oinge akkalemyeyuk nu sesr su met matu tari, saap kut ku in toasr ka. Fwinne elos mwo a kato, kalem la soenna oasr yurin tulik srisrik oiyen met matu, ke experience ku etauk ke oiyen moul, a lalmetmet su elos ku in eis ke elos kapkapek a matula.—Job 12:12.
Ne oinge, oasr sie pal Jisus el fwak nu sin met tuma lutlut lal: “Payenu Nga fwak nu sumwos, Komwos fwin tia forla, a ekla oana tulik srisrik, komwos koflana ilyuk nu in togusrai in kosrao.” (Mattu 18:3, New World Translation) Mea Jisus el lungse in akkalemye? Kain in oiya mwo puspus fuka oasr yurin tulik srisrik su met matu elos enenu in etawi?
Akkeye Oiyen Inse Pusisel oana Tulik Srisrik
Nunku ke ma sikyak su oru Jisus el an akkalemye kas lal inge. Ke elos tuku nu in an Capernaum tokin sie fwufwasryesr loeloes, Jisus el siyuk sin met tuma lutlut puspus lal: “Mea komwos asiyuki sie sin sie ka inkaneku?” Met tuma lutlut su mwekin ka elos muta na misla tia topuk, meyen elos asiyuki su fulat liki in masrlolos. Ke saflaiye, elos pulaik in siyuk sel Jisus: “Na su yok liki nu kemwa in togusrai in kosrao?”—Mark 9:33, 34; Mattu 18:1.
Ma sikyak inge el luman me lut yok meyen tokin elos welul Jisus apkurun nu ke yea tolu, met tuma lutlut elos akukuin ke an fulat ku mwal. Tusruktu, elos matula a pala tari ke alu lun met Ju, su met nukewa su wi ka elos nunku yok ke mwal a ke oiyen fulat. Kalem la, oiya inge ke alu lalos, a oiyen sesumwos lalos, kufwusla nunak lun met tuma lutlut nukewa inge.
Jisus el muta, pangon met tuma lutlut puspus lal inge nu yurol, a fwak: “Kutena met fwin lungsel tu lan meet, el fwa safla liki nu kemwa, a met kulansap nu sin nu kemwa.” (Mark 9:35) Kas inge saap aklutyelos na paye. Kas lal Jisus el lain na paye nunak lun met Ju ke oiyen fulat ku yok a pengpeng! Na Jisus el pangon ma sie tulik srisrik nu yurol. El kafsulak a filiye paul fwin tulik sa, a el akkalemye yok me luti yok sripe se lal inge: “Payenu Nga fwak nu sumwos, Komwos fwin tia forla, a ekla oana tulik fwusr, komwos koflana ilyuk nu in togusrai in kosrao. Ke ma inge el su fwa sifwana akpusiselyel oana tulik fwusr se inge, elna yok liki nu kemwa in togusrai in kosrao.”—Mattu 18:3, 4.
Sie me lutlut yok sripe na paye pa inge nu ke inse pusisel! Srike petsaela ma sikyak inge. Oasr un met puspus su raunela sie tulik srisrik a suiya akmwoye tulik srisrik se inge. Tulik srisrik se inge el arlana misla a mwekin a el lulalfongi na paye la elos fwa tia ku in akkolukyel! El tia nunku na paye in orek alein a wangin pa nunak koluk lal! El arlana inse pusisel a el misla a el tia srike in akkalemye la el yok ku fulat liki kutena met! Aok tulik srisrik se inge el me srikasrak na mwomwo nu ke oiya lun inse pusisel.
Me luti mwo lun Kraist el arlana kalem. Kut nukewa enenu in akyokye oiya lun inse pusisel oana ke oiya lun tulik srisrik se inge kut fwin lungse in usrui Togusrai lun God. Ke akwuk lun God nu ke fototo lun met Kristian nukewa oana sie sou, wangin an nu ke oiya su lungse in alein ku oiya lun insefulat. (Galetia 5:26) Aok, pa inge oiya se su oru Setan su Devil in lain God. Paenang Jeova el srunga oiya nukewa inge!—Soakas 8:13.
Met Kristian paye elos suk inkanek in kulansap, a tia in suk in orekmakin ku lalos. Fwinne kut oru orekma su tia me akinsemwomwoye ku la met se su kut kulansap nu se el arlana pusisel a tia met pengpeng a yok se, lela oiyen inse pusisel paye in mokle kut in kulansap nu sin met puspus. Kain in orekma pusisel inge use me insemwomwo puspus. Jisus el fwak: “El su fwa eis sie sin tulik srisrik ou inge in ek, el eis yu; a el su eis yu, el tia eis yu mukena, a el su supeyume.” (Mark 9:37) In akkeye oiya kulang, inse pusisel oana oiyen tulik srisrik ku in oru kut in fototo nu sin Met su Fulatlanu in kosrao a fwalu a nu sin Mwen natul. (Jon 17:20, 21; 1 Piter 5:5) Kut fwa kosrani me insemwomwo su tuku ke orekma in engan in sang. (Orekma 20:35) A kut insemwomwo ke sripen kut sang kasru nu ke oiyen misla a inse sefwanna su liyeyuk in masrlon met kulansap lun God.—Efesus 4:1-3.
Fusrasr in Lutiyuk a Lungse in Lulalfongi
Tok Jisus el akkalemye siepa me lutlut su met matu elos ku in lotela ke oiyen tulik srisrik: “El su fwa tia eis togusrai lun God oana sie tulik fwusr, el fwa tiana ilyuk nu lu.” (Mark 10:15) Tulik srisrik elos tia inse pusisel mukena; a elos fusrasr in lutiyuk. “Elos sruokye me lutlut oana ke sponges ku me akpao,” sie nine el fwak.
Ke ma inge, in usrui Togusrai lun God, kut fwa eis a akos peng lun Togusrai. (1 Tessalonika 2:13) Oana ke tulik srisrik su tufwana isusla, kut enenu in “lungse titi lun ngun su tia oasr kutasrik ka, tu [kut] in kapek ka nu ke molela.” (1 Piter 2:2) Na fuka, fwin sie me luti ke Baibel el upa in kalem ka? “Tulik srisrik elos siyuk pal nukewa la ‘Efu?’ ne ke na elos koneak me top se su fwal nu ke kusensiyuk lalos,” sie sin mutan su orekma ke ofus in karungin tulik el fwak. Mwo kut in etawi me srikasrak lalos. Ke ma inge tafwela in lutlut a oru ma inge pal nukewa. Sramsram nu sin met Kristian su yok experience lalos. Siyuk sin Jeova ke lalmetmet. (Jemes 1:5) Wangin alolo ka la, kafweang nukewa lom wi pre fwa akinsemwomwoyeyuk ke pal fwal.—Mattu 7:7-11.
Tusruktu, saap oasr kutu met elos fwa nunku, ‘Ya met su fusrasr in lutiyuk tia fusrasr pa in kiapeyukla?’ Mo tia ku fwin oasr me kol mwomwo lalos. Ke sie me pupulyuk, tulik srisrik elos etu la mwo elos in forla nu sin papa a nine kiyelos in siyuk ke me kasru. “Papa a nine elos akpayeye la elos ku in paye a oaru in sang me kasru a karunginyuk mwomwo a in sang ma enenu lun tulik natulos len nukewa,” oasr sie papa el fwak. Aok oasr pa sripe puspus lasr su oapana nu ke lulalfongi lasr nu sin Jeova, su Papa tumasr in kosrao. (Jemes 1:17; 1 Jon 4:9, 10) Jeova el sang me kasru su oasr pal nukewa ke inkanek lun Kas lal su simusyukla. Ngun mutal lal a u lal elos akkeye kut a kasre kut. (Mattu 24:45-47; Jon 14:26) In orekmakin akwuk nukewa inge fwa karungin kut pal nukewa liki me sensen nu ke ma lun ngun.—Sam 91:1-16.
Orekma lasr in akyokye lulalfongi nu sin God el oayepa ase nu sesr misla ke nunak. Oasr sie Bible scholar el fwak: “Ke pal se kut srakna tulik srisrik kut oru fwufwasryesr ke inkanek wangin mani in moli, a kut nukin la fuka ne kut ku in sun an se su kut som nu we, ne oinge, wangin pal kut ku in oana tulik srisrik in alolo ka la papa a nine kiyesr elos fwa us kut nu ke an se su kut som nu we.” Ya kut akkalemye pa lulalfongi oinge nu sin Jeova ke kut fwufwasryesr ke inkanek lun moul?—Isaia 41:10.
Lulalfongi lasr nu sin God ke inkanek nukewa kasre kut in tia akkalemye ella puspus a orekma puspus su ku in aksensenye orekma lasr in alu nu sin God. A, oasr lulalfongi yok lasr ke kas lun Jisus la Papa tumasr su in kosrao el etu orekma lasr a kut lulalfongi pa la ke kut suk meet Togusrai a ma sumwosmwos lun God, God el fwa karungin kut. Ma inge fwa kasre kut in lain me srife in nunku yok ke ma puspus lun fwalu a ke kut nunku yok ka paenang kut mulkunla in oru kunokon lasr ke ma lun ngun.—Mattu 6:19-34.
“In Ma Koluk Komwos Oana Tulik Srisrik”
Fwinne elos isusla oana met sesumwos, oasr yurin tulik srisrik inse a nunak mwo a nasnas. Ke sripe se inge, Baibel el kaifwe met Kristian nukewa: “In ma koluk komwos in oana tulik srisrik.”—1 Korint 14:20.
Nunku ke sie tulik srisrik inge su pangpang Monique su oasr ke yea limekosr matwel, el insemwomwo in fwak nu sin nine kiyel: “Tulik kawuk sasu se luk, Sera, el siringring pa aunsifwel oana aunsifwuk!” Tun a sruf lal Sera su tia oana sie nu ke ma lal tia akkalemyeyuk. Oasr sie nine el fwak: “Tulik srisrik elos tia liye ke tun lun met. Wangin etauk lalos ke sruf ku orekma in srisri.” Ke ma inge, tulik srisrik elos akkalemye na paye nunak lun God lasr su tia sulosol met, su lungse met lun mutanfwal nukewa.—Orekma 10:34, 35.
Oasr pa yurin tulik srisrik oiya mwo in sang nunak munas. Oasr sie papa el fwak: “Ke pal se tulik mokul luo inge Jack a Levi elos anwuk, kut fwak nu selos in siyuk ke nunak munas nu sin sie sin sie, a tia pat elos sifwil tukeni insemwomwo in srital. Elos tia sruokye mulat, elos tia nunku a sramsramkin ma koluk su sikyak in pal somla, ku siyuk ke ma puspus meet liki elos sang nunak munas. Elos sisla tari ma inge a mutamwauk ke ma sasu.” Sie me srikasrak na mwomwo nu sin met matu pa inge in etawi!—Kolosse 3:13.
In wekunang ma inge, tulik srisrik elos sa in akilen la oasr God. (Hibru 11:6) Oiya mwo lalos in sramsramkin ma puspus ke inkanek paye akkeyelos pal nukewa in sang ma lo nu sin met puspus ke inkanek pulaik. (2 Togusra 5:2, 3) Inkanek fusrasr nu selos in pre tuku ke insielos su ku in sun insien met puspus su upa insiyelos. A ke pal su oasr me srife, elos ku in akkalemye ku lalos in orekmakin oiyen moul nasnas. Tulik srisrik elos me sang su arlana mwo!—Sam 127:3, 4.
Oiya Mwo a Kato Folokinyukla
Saap kom nunku, ‘Ya met matu elos ku in sifwilpa orekmakin oiya mwomwo nukewa su akkalemyeyuk ke moul lun tulik srisrik?’ Me top fusrasr a mwo nu ke kusensiyuk inge pa aok! Paye la masap lun Jisus in “ekla oana tulik srisrik” el me akpayeye la ma inge ku in orek.—Mattu 18:3.
In pupulyukkin: Team soko lun met puspus su pangpang art restorer elos ku in sifwilpa akmwoye sie ma musalla su arlana yok molo. Ke elos orekma, elos eisla kutkut pukanten su kais kutu srisrik sremla ka a akmwoye inkanek su tia mwo su orek in pal meeta in akmwoye ma saok inge. Tokin elos orekmakin mongfusesr yok a kafweang upa nu ka, tun mwomwo a katoiyen artwork se inge akkalemyeyuk nu sin met nukewa in liye ma inge. Ke inkanek oinge, ke kafweang yok, kasru lun ngun mutal lun Jeova, a ke kasru mwo lun congregation lun met Kristian, kut ku in sifwilpa sruokye a orekmakin oiya mwomwo puspus su oasr yurosr ke pal se kut tulik srisrik me.—Efesus 5:1.
[Picture on page 5]
Tulik srisrik elos inse pusisel
[Picture on page 4]
Tulik srisrik elos tia sulosol met, a elos sa in sang nunak munas a sa in mulkunla ma nukewa