Jeova El “Sang Ngun Mutal Nu Selos Su Siyuk Sel”

“Na komwos met koluk fwin etu fuka in sang me sang mwo nu sin tulik nutumwos, fuka yokeyen Papa tumomwos su in kosrao el fwa sang ngun mutal nu selos su siyuk sel!”​—LUK 11:13.

1. Nge kut enenu yok kasru lun ngun mutal?

‘NGA koflana in muteng ma upa inge ke ku luk sifwana. Ke kasru lun ngun mutal mukena Nga fwa ku in muteng ma upa inge!’ Ya kom pulakin ku akkalemye pa kain in nunak oinge? Aok pus sin met Kristian elos oru. Saap kom akkalemye ma inge tokin kom etauk la oasr mas upa lom. Ku saap ma inge sikyak ke pal se mutan kiyom ku mokul tumom el mise. Ku saap nunak in insemwomwo su oasr in kom in pal meeta wanginla ke sripen pal inge kom pulakin asor yok su paenang kom in tila pulakin insemwomwo ke moul lom. Ke pal in ma upa puspus sikyak nu ke moul lom, saap kom pulakin mu kom srakna ku in moul meyen ngun mutal lun Jeova el kasre kom fwal nu ke “yoklanu lun ku.”​—2 Korint 4:7-9; Sam 40:1, 2.

2. (a) Ma upa puspus fuka met Kristian elos sun? (b) Kusensiyuk puspus fuka kut fwa akuteye ke me lutlut inge?

² Met Kristian paye elos enenu in muteng ke ma upa a me lain su yokyokelik fwin fwalu su tuku sin met su tia kulansap nu sin God. (1 Jon 5:19) In wekunang, met kulansap nukewa lun Kraist elos akkolukyeyuk sin Setan su Devil, su orek meun upa nu sin met nukewa su “liaung masap lun God, a srukye lo lun Jisus.” (Fwakyuk 12:12, 17) Pasis, arlana kalem la kut enenu me kasru lun ngun mutal lun God ingena yok liki ke pal meeta. Mea kut ku in oru in etu la kut srakna eis ngun mutal lun God ke inkanek yok? A efu kut ku in lulalfongi la Jeova el lungse na paye in ase nu sesr ku su eneneyuk ke pal su oasr ma upa sikyak? Kut ku in koneak me top nu ke kusensiyuk luo inge ke me pupulyuk luo lun Jisus.

Kafweang Yok in Pre

3, 4. Me pupulyuk fuka Jisus el akkalemye, a fuka el orekmakin ma inge ke pre?

³ Sie sin met tuma lutlut lun Jisus el siyuk: “Leum, luti nu sesr in pre.” (Luk 11:1) Ke me top su el sang Jisus el akkalemye nu sin met tuma lutlut lal ke me pupulyuk luo. Me pupulyuk se meet el sramsramkin pa ke sie met su oasr met muteta yurol, a ma se akluo el pupulyukkin ke sie papa su srike in porongo kas lun mwen natul. Lela kut in sramsramkin kais sie me pupulyuk inge.

⁴ Jisus el fwak: “Su sumwos oasr met kawuk lal, a el fwa som nu yurol ke infulwen fong, a fwak nu sel, ‘Kawuk, sewun nu sik tolu lof, tu sie met kawuk luk tuku nu yuruk ke el fwafwasryesr, a wangin ma luk in filiye ye mutal’? A el su muta lu fwa topuk a fwak, ‘Nik kom aklokwalokye yu. Inge srungul kauli, a tulik nutik elos on yuruk fwin me on; Nga koflanu tukakek a sot nu sum.’ Nga fwak nu sumwos, El fwinne tia lungsel in tukakek a sang nu sel meyen el met kawuk lal, a meyen kaifwe lal el fwa tukakek a sang nu sel ma fwal nu ke enenu lal.” Jisus el akuteye la fuka me pupulyuk inge el orekmakinyuk nu ke pre, el fwak: “A Nga fwak nu sumwos, Kafweang in siyuk, a a fwa etukot nu sumwos; kafweang in suk, a komwos fwa konoiyuk; kafweang in tomwolak, a a fwa ikasla nu sumwos. Tu met e nu kemwa su siyuk elos eis; a el su suk konoiyuk; a nu sel su tomwolak a fwa ikasla.”​—Luk 11:5-10, NW.

5. Mea me pupulyuk ke mokul se su oru kafweang yok lal luti nu sesr ke oiya lasr ke kut pre?

⁵ Me pupulyuk inge su arlana kalem ke sie met su kafweang na paye el akkalemye ke oiya mwo su enenu in oasr yurosr ke kut pre. Loang akmwoye nu ke ma Jisus el fwak ke mokul sa la el ku in eis ma el enenu “ke sripen pulaik lal in kaifwe.” (Luk 11:8, NW) Kas se inge “pulaik in kaifwe” sikyak ke pal sefwanna in Baibel. Kas se inge el tuku ke kas Grik se su oasr kalme ka la “wangin mwekin.” Ke pal puspus oiya inge ke wangin mwekin el akkalemyeyuk nu ke sie oiya koluk. Tusruktu, fwin oiyen wangin mwekin ka ku oiyen kaifwe siyuk el orek ke sripe mwomwo, ma inge akkalemyeyuk oana inkanek mwomwo a fwal. Pa inge ma sikyak nu sin mokul se ke me pupulyuk sa. El tia pulakin kutena nunak in mwekin ke el kaifwe in siyuk ke ma el enenu. Ke sripen Jisus el akkalemye mokul se inge su oasr met muteta yurol oana sie me srikasrak nu sesr, ke ma inge pre lasr enenu in orek ke inkanek in kaifwe yok. Jeova el lungse kut in ‘kafweang in siyuk, kafweang in suk, kafweang in tomwolak.’ Aok, fwin ma inge orek, el fwa “sang ngun mutal nu selos nukewa su siyuk ka.”

6. In len lun Jisus, fuka fasin in akkalemye kulang liyeyuk sin met puspus?

⁶ Jisus el akkalemye nu sesr ke inkanek su kut enenu in pre​—orek ke oiyen pulaik in kaifwe—​a el akkalemye pa la efu kut enenu in oru oinge. In eis kalem yok ke me lutlut inge, kut enenu in nunku yok ke met nukewa su long ke me pupulyuk lun Jisus ke mokul se su akkalemye kafweang yok lal la fuka elos nunku ku liye ke oiya ku fasin in akkalemye kulang nu sin met muteta. Oasr fus puspus in ma Simusla su akkalemye la in pal lun Baibel, in akkalemye kulang a karungin met muteta el sie fasin su arlana yok sripe, yokna nu sin met kulansap puspus lun God. (Genesis 18:2-5; Hibru 13:2) Fwin sie met el tia akkalemye kulang nu sin metsa oasr me mwekin yok ka. (Luk 7:36-38, 44-46) Ke oiya inge oasr ke nunak lasr, lela kut in sifwilpa liye ke me sramsram lun Jisus.

7. Efu ku met in loomu ke me pupulyuk lun Jisus el tia mwekin in okasak kawuk lal?

⁷ Met in loomu ke me pupulyuk el eis met muteta puspus ke infulwen fong. Met in loomu el pulakin la el enenu na paye in sang me mongo nu sin met muteta lal tusruktu “wangin ma lal in filiye ye mutal.” Ke ma sikyak inge, el nunku yok ka la oasr ma eneneyuk upa! El enenu in eis kutu bread, fwinne oasr ma upa su ku in sikyak. Paenang el som nu yurin met kawuk lal a el pulesrela mwekin lal ke el okasalak. “Kawuk, sewun nu sik tolu lof,” mokul se inge el fwak. El kafweang in siyuk nu ke pal se el eis ma el enenu. Ke pal se inge mukena, ke sripen oasr tari yurol lof in bread inge, paenang el ku in akkalemye la el sie met su kulang nu sin metsa su muteta yurul.

Fwin Oasr Ma Enenu Yok​—Enenu Pa Kafweang Yok in Siyuk Ka

8. Mea fwa akkeye kut in kafweang in pre siyuk ke ngun mutal?

⁸ Mea me pupulyuk inge el akkalemye ke sripe ka an la efu kut kafweang in pre? Met in loomu el kafweang in siyuk ke bread meyen el pulakin mu arlana eneneyuk in oasr yurol lof in bread tolu in sang akpayeye kunokon lal oana sie met kulang in loomu. (Isaia 58:5-7) Fwin wangin bread yurol, el fwa tia ku in akpayeye kunokon lal. Ke inkanek oinge, meyen kut etu la enenu na paye ngun mutal lun God in oasr yurosr in akpayeye kunokon lasr oana met Kristian paye, kut pre pal nukewa nu sin God, a kut siyuk ke ngun mutal inge. (Zekaraia 4:6) Fwin ngun mutal lun God wangin yurosr, kut tia ku in akpayeye ma kunesr. (Mattu 26:41) Ya kom akilen me lutlut yok sripe su kut ku in eis ku lotela ke me pupulyuk inge? Kut fwin nunku ke ngun mutal lun God la kut arlana enenu ma inge, oiya mwo inge oru kut in kafweang in siyuk ka.

9, 10. (a) Sang me pupulyuk la efu ku kut enenu in kafweang in siyuk ke ngun mutal lun God? (b) Kusensiyuk fuka kut enenu in siyuk sesr sifwana, a efu?

⁹ In orekmakin me lutlut inge nu ke moul lasr ke pal inge, srike nunku nu ke sie sin sou lom el fwin masak ke infulwen fong. Ya kom e fwa som nu yurin taktu a okasalak in siyuk ke kasru in pal san? Mo fwin met mas san el tia arlana mas. Tusruktu, fwin met se el pulakin musen heart upa ku heart attack, kom fwa tia mwekin in pangon taktu. Efu? Meyen oasr ma sikyak su yok eneneya nu sin sie taktu. Kom etu la me kasru su tuku sin sie taktu el eneneyuk na paye. Fwin kom tia siyuk ke kasru met mas se inge el ku na in mise. Ke inkanek oinge, met Kristian paye elos sun ma upa ku me eneneyuk yok pal nukewa, oana ke kas in pupulyuk. Paye la, Setan el fwufwasryesr oana “soko laion ngutngut,” su kafweang in kunauskutla. (1 Piter 5:8) Nu sesr fwin kut lungse in moul pal nukewa fwal nu ke orekma in karungin fototo lasr nu sin Jeova, kut enenu na paye me kasru ke ngun mutal lun God. Kut fwin tia siyuk ke kasru lun God ma inge ku in oru kut in mise. Ke ma inge, ke inkanek in kafweang yok lasr kut ku in siyuk sin God ke ngun mutal lal. (Efesus 3:14-16) In akpayeye ma inge fwa ku in kasre kut in sruokye ku lasr su eneneyuk nu ke ‘muteng nu ke safla.’​—Mattu 10:22; 24:13.

¹⁰ Ke ma inge arlana yok sripe nu sesr in oasr kutupal kut muta nunku a siyuk sesr sifwana, ‘Fuka lupan kafweang luk in pre?’ Esam la, kut fwin etu in akilen na paye la kut enenu kasru lun God, pre lasr in siyuk ke ngun mutal ku in orek ke inkanek su oasr ke kafweang yok.

Mea Mokle Kut in Pre Wi Lulalfongi?

11. Fuka Jisus el orekmakin me pupulyuk ke sie papa a ke tulik natul ke pre?

¹¹ Me pupulyuk lun Jisus ke met in loomu su kafweang yok el akkalemye ke lungse yok lun sie met su pre​—ke met su lulalfongi. Me pupulyuk toku el akkalemye yok ke lungse yok lun sie su long pre​—el pa Jeova God. Jisus el siyuk: “A sin su sumwos sie mwen fwa siyuk sie lof sin papa tumal, a el fwa sang eot nu sel? Ku soko ik, a el fwa sang soko serpent nu sel in aolla ik sokoa? Ku el fwin siyuk sie atro, el fwa sang soko skorpion nu sel?” Jisus el tafwela in akkalemye kalmeyen kas lal inge, el fwak: “Na komwos met koluk fwin etu fuka in sang me sang mwo nu sin tulik nutumwos, fuka yokeyen Papa tumomwos Su in kosrao El fwa sang ngun mutal nu selos su siyuk Sel!”​—Luk 11:11-13.

12. Fuka me pupulyuk ke sie papa su long me siyuk lun mwen natul el akkalemye yok ke inse mulala lun Jeova in topuk pre lasr?

¹² Ke me pupulyuk inge ke sie papa su sang ma mwo nu sin tulik natul, Jisus el akkalemye ke pulakin lun Jeova ke met puspus su forla nu sel ke pre. (Luk 10:22) Ma se meet, loang akmwoye nu ke ma tia oana sie ke me pupulyuk luo inge. Jeova el oana sie papa su kulang, su lungse in long me siyuk lun tulik natul a lungse in sang ma enenu lal, el tia oru oana sie nu sin sie mokul ke me pupulyuk se meet su srunga in sang me top nu ke me siyuk ke kasru. (Sam 50:15) Jisus el akkalemye pa ke oiya lun Jeova su lungse na paye in long ke me siyuk lasr ke el akuteye la papa tumasr su oasr in kosrao el yok liki kutena papa fwin fwalu. El fwak la fwin sie papa, fwinne el “koluk” meyen oasr ma koluk su el usrui, el ku in sang me sang nu sin tulik natul, fuka yokiyen lulalfongi lasr la Papa tumasr in kosrao, ke sripen el kulang, el fwa sang ngun mutal nu sin met nukewa su alu nu sel!​—Jemes 1:17.

13. Kut ku in lulalfongi na paye ke mea ke pal se kut pre nu sin Jeova?

¹³ Mea me lutlut su oasr ka el oru nu sesr? Kut ku in lulalfongi la ke pal se kut siyuk sin Papa tumasr in kosrao ke ngun mutal, el arlana lungse in ase me siyuk lasr. (1 Jon 5:14) Ke kut forla nu sel ke pre ke pal puspus, Jeova el fwa tia fwak: “Nik kom aklokwalokye yu. Inge srungul kauli.” (Luk 11:7) Aok God el fwa tia oru ma inge, Jisus el fwak: “Kafweang in siyuk, a a fwa etukot nu sumwos; kafweang in suk, a komwos fwa konoiyuk; kafweang in tomwolak, a a fwa ikasla nu sumwos.” (Luk 11:9, 10, NW) Aok, Jeova el fwa “topuk nu sesr ke kut pang.”​—Sam 20:9; 145:18.

14. (a) Kain in nunak tafongla fuka akkolukye kutu met su sun me srife puspus? (b) Ke kut sun ma upa puspus, efu ku kut ku in pre nu sin Jeova wi lulalfongi?

¹⁴ Me pupulyuk lun Jisus ke papa se su kulang el akkalemye pa la mwoiyen Jeova el yok liki kutena oiyen kulang su akkalemyeyuk sin kutena papa. Ke ma inge, wangin in masrlosr fwa nunku mu ma upa puspus su sun kut el me akpayeye la God el tia insemwomwo sesr. Setan, su met lokwalok se meet lasr, el pa lungse kut in nunku mu oinge. (Job 4:1, 7, 8; Jon 8:44) Kain in nunak inge in nununke kut sifwana el tia fwal nu ke ma Simusla. Jeova el tia srike kut “ke ma koluk.” (Jemes 1:13) El tia ase nu sesr sie ma upa ku sie me srife in akkolukye kut. Papa tumasr in kosrao el sang “ma mwo nu selos su siyuk sel.” (Mattu 7:11; Luk 11:13) Paye la, ke kut akilen yok mwoiyen Jeova a inse mulala lal in kasre kut, kut fwa akkeyeyuk yok in pre wi lulalfongi. Ke kut oru ma inge, kut ku in akkalemye pa nunak mwo oana nunak lun met sim lun sam su simusla: “A paye God el long; El nununku [loang akmwoye, NW] ke pusren pre luk.”​—Sam 10:17; 66:19.

Ke Inkanek Fuka Ngun Mutal el Me Kasru Lasr

15. (a) Kas in mwulela fuka Jisus el fwak ke ngun mutal? (b) Mea sie inkanek su ngun mutal el kasre kut ka?

¹⁵ Tia pat tokin el mise, Jisus el sifwilpa akkalemye kas in mwulela su el fwak ke me pupulyuk lal. Ke el sramsramkin ke ngun mutal, el fwak nu sin met sap lal: “A Nga fwa pre nu sin Papa, a el fwa sot nu sumwos siepa akmwoyauk, tu lan wi komwos ma patpat.” (Jon 14:16) Ke ma inge Jisus el mwulela ka la me kasru, ku ngun mutal, e fwa oasr yurin met tuma lutlut lal ke pal fwasru, wekunang ke len lasr inge. Mea sie inkanek yok sripe su kut ku in eis ke pulakinyen me kasru oinge ke pal lasr? Ngun mutal el kasru kut in muteng ke kain in ma upa puspus. Ke inkanek fuka? Met sap Poul, su sun ma upa puspus, el akuteye ke sie leta lal nu sin met Kristian in an Korint la fuka ngun lun God sang kasru nu sel. Lela kut in loang akmwoye ke kitin pal in liye ke ma el simusla.

16. Fuka ma sikyak nu sesr oana sie nu ke ma sikyak nu sel Poul?

¹⁶ Ma se meet, Poul el fwak nu sin met lili wiyel la oasr “sie otunmu in ikwel” su el pulakin, ku sie kain in ma upa. Tokin ma inge el fwak: “Nga siyuk na nu sin Leum [Jeova] pal tolu ke ma inge, tu in wanginla liki yu.” (2 Korint 12:7, 8) Fwinne Poul el siyuk in eisla me keok lal, ma inge tia wanginla tusruktu on na. Saap kom sun pa kain in oiya inge ke pal inge. Oana Poul, saap kom kafweang in pre wi lulalfongi, siyuk Jeova in eisla sie ma upa nu sum. Fwinne kom siyuk ka ke pal puspus, tusruktu, kom srakna pulakin ma upa. Ya kalmen ma inge pa Jeova el tia topuk pre lom a la ngun mutal lal el tia kasre kom? Mo tia oinge! (Sam 10:1, 17) Loang akmwoye nu ka la mea met sap Poul el fwak tokin ma inge.

17. Fuka Jeova el topuk pre lal Poul?

¹⁷ In oana me top nu ke pre lal Poul, God el fwak nu sel: “Kulang luk fwalnu nu sum; tu ku luk akfwalye in munas.” Poul el fwak: “Ke ma inge, nga fwa arulanu engan in konkun in munas luk, tu ku lun Kraist fwa on fwuk [ku lun Kraist el oana sie loom nuknuk su on fwuk, NW].” (2 Korint 12:9; Sam 147:5) Ke ma inge, Poul el pulakin la ke inkanek lun Kraist, me karungin ku me loeyuk su tuku sin God me afwunyel oana sie loom nuknuk. Ke pal inge, Jeova el topuk pre lasr ke inkanek oapana inge. El sang me karungin yok lal oana me loeyuk nu sin met kulansap nukewa lal.

18. Efu ku kut ku in muteng ke ma upa puspus?

¹⁸ Aok, sie loom nuknuk el tia ku in tulokinye af fwin kakla, ku in sruokya in tia engyeng, tusruktu loom nuknuk el ku in sang me loeyuk nu sin sie met liki af u a eng u. Ke inkanek oinge, me loeyuk su tuku ke “ku lun Kraist” el tia eisla me sruf puspus liki kut ku ma upa puspus in sikyak nu sesr. Tusruktu, el sang me loeyuk lun ngun in me karungin in lain akwuk a met koluk puspus lun fwalu a ke me akkoluk nukewa lun leum lun fwalu, Setan. (Fwakyuk 7:9, 15, 16) Ke ma inge, fwinne kom muteng ke sie ma upa su kom ‘pulakin pal nukewa,’ kom ku in lulalfongi la Jeova el etu ke me keok lom inge a el sang me top nu ke “pusren wowoyuk lom.” (Isaia 30:19; 2 Korint 1:3, 4) Poul el simusla: “God El oaru, su fwa tia liki komwos in srifweyuk yok liki ku lomwos; a in me srifwe El fwa oru inkanek in kaengla tu komwos in ku ka.”​—1 Korint 10:13; Filippai 4:6, 7.

19. Sulela fuka kom lungse in oru, a efu?

¹⁹ Paye la, “len safla” lun fwal se inge su wangin lulalfongi lalos nu sin God el akkalemyeyuk ke pal se inge su “pal in ongoiye lulap.” (2 Timote 3:1) Ne oinge, nu sin met kulansap lun God, elos ku in muteng ke pal inge su oasr ongoiye puspus ka. Efu? Ke sripen me kasru a me karungin lun ngun mutal lun God, su Jeova el sang ke inse mulala a paye lal a ke inkanek yok nu sin met nukewa su siyuk sel ka wi kafweang a lulalfongi yok lalos. Ke ma inge, lela kut in oru sulela lasr in pre pal nukewa siyuk ke ngun mutal len nukewa.​—Sam 34:6; 1 Jon 5:14, 15.

Kom E Topuk Fuka?

• Mea kut enenu in oru in eis ngun mutal lun God?

• Efu kut ku in lulalfongi la Jeova el fwa topuk pre lasr ke ngun mutal?

• Fuka ngun mutal el kasre kut in muteng ke ma upa puspus?

[Picture on page 9]

Mea kut ku in lotela ke me pupulyuk lun Jisus ke met in loomu su kafweang yok?

[Picture on page 10]

Ya kom kafweang in pre siyuk ke ngun mutal lun God?

[Picture on page 11]

Mea kut ku in lotela kel Jeova ke me pupulyuk ke sie papa kulang?