Kom Ku In Kalem Fuka ke Baibel?
1. Siyuk Sin God Ke Me Kasru
“Oasr kutu pal nga ridi Baibel meet liki nga motulla,” Ninfa, sie tulik mutan su muta in an Italy el fwak. “Nga oru ouinge meyen nga etu la Kas lun God pa inge, a fwinne nga tia engunkin in ridi, tusruktu nga lungse in koneak la mea God el simusla ke kas lal in Baibel. Paenang nga lungse in ridela nufon. Ke nga mutawauk in rid nga liye tu arlana mwo a fusrasr, tusruktu ke nga tafwela in akyokyelik rid luk nga koneak la upa ngan kalem na paye ke ma nga ridi, ke sripe inge paenang nga tui ke rid Baibel luk.”
YA MA sikyak inge kel Ninfa sikyak pa nu sum? Met puspus elos pulakin pa ouinge. Tusruktu, in oana ke ma kut liye ku esam ke me lutlut meeta, Jeova God su Orala Baibel, el lungse met nukewa in eis etauk a kalem ke Kas lal. Ke ma inge, fuka kom ku in eis etauk? Ma se meet kom enenu in siyuk kasru sin el su Orala Baibel.
Met tuma lutlut nukewa lun Jisus elos “tia met lutlut a met silalkung” meyen elos tia wi kutena lutlut lun met rabbai su orek ke alu lalos ke inkanek in akpa. (Orekma 4:13) Ne ouinge, Jisus el akkeyelos la tu elos ku in kalem ke Kas lun God. Ke inkanek fuka? Jisus el akuteye: “A akmwoyauk, ngun mutal, su Papa el fwa supamu in ek, el fwa luti nu sumwos ma nukewa.” (Jon 14:26) God el orekmakin ngun mutal se inge, ku ku lal, in orala fwalu a ma moul nukewa su oasr ka. (Genesis 1:2) El orekmakin pa ma inge in akkeye met sim 40 in simusla nunak lal in Baibel. (2 Piter 1:20, 21) Ngun sepana inge el sang kasru met su suk in kalem ke Baibel.
Kom ku in eis fuka ngun mutal lun God? Kom ku in siyuk ke ma inge ke lulalfongi. Ke ma paye, kom enenu in siyuk pal nukewa. “Siyuk, a a fwa etukot nu sumwos,” Jisus el fwak. “Na komwos . . . fwin etu fuka in sang me sang mwo nu sin tulik nutumwos, fuka yokeyen Papa tumomwos su in kosrao el fwa sang ngun mutal nu selos su siyuk sel!” (Luk 11:9, 13) Jeova el fwa insemwomwo in sang ngun mutal nu sin met su siyuk ke ma inge na paye. Ku lun God inge ku in kasre kom in kalem ke kalmeyen kas nukewa simusyukla in Baibel in yea tausan puspus somla. Ngun mutal lun God ku in kasre kom pa in etu la fuka in orekmakin kas fokoko lun Baibel ke moul lom.—Hibru 4:12; Jemes 1:5, 6.
Ke ma inge, pal nukewa kom muta rid Baibel, pre nu sin God, siyuk sel ke ngun mutal in kasre kom in kalem ke Kas lal.