Met Su Lain Kraist Akkalemyeyuk
FUKA kom ku in karungin kom sifwana fwin kom etu la oasr sie mas upa su ku in oru metu in mise su sikyak ke an sum? Saap kom enenu in akkeye ku lun monum in lain mas a in tia muta yurin met su oasr kain in mas upa inge yuru. Kut enenu in oru oinge ke oiyen ngun. Ma Simusla el akkalemye nu sesr la met su lain Kraist “el tufwa muta fwalu.” (1 Jon 4:3) Kut fwin lungse in tia “masek,” kut enenu in etu ke “met su oasr kain mas inge” yuru a kut srike in fwasr lukelos. Kut ku in sang kulo meyen Baibel el akkalemye nu sesr ke ma puspus ke oiyen me sifwe inge.
Kalmeyen “Antichrist” pa “met su lain Kraist.” Ke kalme yok a paye nu ke kalmeyen kas se inge el sramsramkin ke met nukewa su lain ku fwak mu elos wi Kraist ku elos met tutafpo ku kulansap lal. Tusruktu Jisus el sifwana fwak: “El su tia wi Yu el lain yu; a el su tia wi yu esani, el siselik.”—Luk 11:23.
Aok, Jon el simusla ke met su lain Kraist ke lusen yea pus liki yea 60 tokin Jisus el mise a sifwil akmoulyeyukyak som nu in kosrao. Ke ma inge, orekma nukewa lun met su lain Kraist enenu in kalem a eteyuk mwo la fuka orekma inge ku in orek nu sin met tuma lutlut lun Jisus su oaru a paye fwin fwalu.—Mattu 25:40, 45.
Met su Lain Kraist elos lain Met Kulansap lun Kraist
Jisus el sang kas in sensen nu sin met tuma lutlut lal la met puspus fwin fwalu fwa srungelosla. El fwak: “Na elos fwa eskomwosyung in akkeokye komwos, a fwa unikomwosi, a mutanfwal nukemwa fwa srungekomwos ke ek. A met palu kikiap puspus fwa sikyuk, a fwa aktafongyela met puspus.”—Mattu 24:9, 11.
Ke sripen met tuma lutlut lun Kraist elos kalyaiyuk “ke el [Jisus],” paenang kalem la met kalyai inge elos antichrist, elos met su lain Kraist. “Met palu kikiap puspus,” su kutu selos wi ke u lun met Kristian in pal meeta, a elos wi pa ke u lun met su lain Kraist. (2 Jon 7) “Met lain Kraist puspus,” Jon el simusla, “Elos som liki kut, a elos tia ma wiyasr; tu elos fwin met wiyasr, elos nu mutana yurosr.”—1 Jon 2:18, 19.
Kas lun Jisus a Jon akkalemye la met su lain Kraist el tia met sefwanna a elos orekla ke un met puspus su lain Kraist. Sayen ma inge, meyen elos met palu kikiap, elos lungse in oru pa ma kikiap ke alu. Mea kutu inkanek lalos inge?
Elos Akkalemye Kas Kikiap Puspus Ke Alu
Met sap Poul el sang kas in sensen nu sin met su welul orekma su pangpang Timote in taran ke me luti kikiap lun met puspus inge su som liki alu paye, oana Hymenaeus a Philetus, su “kas lalos fwa mongoelik oana ruf aryar.” Poul el fwak pa: “Met su sitoela liki ma paye, a fwak, tu sifwil moulyuk somla tari, a elos lungasla [kunausla, New World Translation] lalalfongi lun kutu.” (2 Timote 2:16-18) Saap, Hymenaeus a Philetus elos luti ka la sifwil moulyuk el me na pupulyuk a met Kristian elos akmoulyeyukyak tari ke ma lun ngun. Paye la, ye mutun God, sie met el moulyuk ke pal se el ekla met tuma lutlut lun Jisus, oana Poul sifwana el akkalemye. (Efesus 2:1-5) Ne oinge, me luti lal Hymenaeus a Philetus el pulesru mwulela lun Jisus ke sie orekma in sifwil akmoulyeyuk met mise ye kolyuk lun Togusrai lun God.—Jon 5:28, 29.
Akwuk lun nunak ke sifwil moulyuk la ma inge el oana me pupulyuk mukena el orekla sin sie u lun met su pangpang Gnostics ke pal tok. U lun met puspus inge su pangpang Gnostics elos lulalfongi mu etauk (gnoʹsis ke kas Greek) el ku in eis ke inkanek su oasr kasru lun ngun ku inutnut ka, a elos orani me luti kikiap lun met Kristian kikiap nu ke lalmetmet lun met Grik a orekma lun met inutnut lun met in an Orient ku an Asia nu sie. Ke sie me pupulyuk, elos lulalfongi mu, ma nukewa su liyeyuk el koluk, a ke sripe se inge, Jisus el tia tuku oana sie ikwe a in oasr ke sie mano lun met tusruk tia paye—kain in lulalfongi inge pangpang Docetism. Oana ma kut liye tari, paye la pa inge oiya su paenang met sap Jon el sang kas in sensen nu ka.—1 Jon 4:2, 3; 2 Jon 7.
Sie pa ma kikiap, su orekla ku akkalemyeyuk ke century puspus tokin pal sa, pa ke me luti su pangpang holy Trinity, su fwak mu Jisus el God Kulana a Mwen nutin God pa. Ke buk inge Church of the First Three Centuries (Alu ke Century Tolu Se Meet), natul Dr. Alvan Lamson el akkalemye la luti lun Trinity “el tia oana sie nu ke me luti lun met Ju a ke ma Simusla lun met Kristian; la ma inge orekla, a sang toeni nu ke me luti lun Christianity, ke inkanek lun Platonizing Fathers.” Su elos an su pangonyuk “Platonizing Fathers”? Elos u lun met kol puspus lun alu su lungse yok me luti lun met Grik lalmetmet se inge su pangpang Plato.
Orekma in akkalemye a luti me luti lun Trinity pa me luti a orekma kutasrik se meet lun met puspus su lain Kraist, meyen me luti inge el oru God in oana sie ma lukma sakuruk a aklosrye kalmeyen fototo lal nu sin Mwen natul. (Jon 14:28; 15:10; Kolosse 1:15) Srike nunku, fwin God el sie ma lukma sakuruk fuka sie met el ku in “kalukyang nu yurin God,” oana me akkeye lun ma Simusla nu sin sie met in oru?—Jemes 4:8.
In sang akyokye nu ke me akfos inge, oasr met leng puspus lun Baibel elos eisla inen God, Jeova, liki Baibel su elos lungasla, fwinne inen God el sikyak in ma simusla in pal meeta pus liki pal 7,000! Kalem la, kafweang lalos in oru God Fulatlanu in oana sie ma lukma sakuruk mukena a sie ma lukma sakuruk su wangin e ka el sie orekma su wangin na paye sunak ka nu sin Met Orekutla a ke Kas lal. (Fwakyuk 22:18, 19) Sayen ma inge, in aolla inen God nu ke mwal puspus oana Leum ku God el sie ma tafongla yok nu ke pre lun Jisus, su akkalemye ke kas inge: “Em in akmutalyeyuk [ku, oru in mutal].”—Mattu 6:9, The New English Bible.
Met su Lain Kraist Elos Pulesru Togusrai lun God
Met puspus su lain Kraist elos arlana moniyuk ke lusen “len safla,” inge su kut moul ka. (2 Timote 3:1) Ma lungse yok lun met kikiap ke pal lasr inge pa in kiapela metu ke kunokon lal Jisus oana Togusra ke Togusrai ku guferment lun God su oasr in kosrao, su tia pat el fwa oru kolyuk lal fwin fwalu nu fon.—Daniel 7:13, 14; Fwakyuk 11:15.
Ke sie me pupulyuk, kutu sin met kol lun alu elos luti mu Togusrai lun God el sie oiya su oasr ke insien metu, nunak oinge tia fwal nu ke ma Simusla. (Daniel 2:44) Oasr met puspus su fwak mu Kraist el orekmakin inkanek lun guferment a u puspus lun metu. Tusruktu, Jisus el fwak: “Togusrai luk tia ma lun fwal se inge.” (Jon 18:36) Paye, Setan, tia Kraist, pa “leum lun fwalu” a “god lun fwal se inge.” (Jon 14:30; 2 Korint 4:4) Ma inge akuteye pa la e fwa tia pat Jisus el fwa akwanginyela guferment nukewa lun metu a el fwa ekla Met Kol sefwanna fwin fwalu. (Sam 2:2, 6-9; Fwakyuk 19:11-21) Metu elos pre ka ke elos akkalemye Pre lun Leum, a fwak kas inge: “Togusrai lom in tuku. Ma lungse lom in orek fwin fwalu.”—Mattu 6:10.
Ke sripen elos sang kasru nu ke akwuk ke politic lun fwalu, oasr met kol puspus lun alu su lain, a sang me kalyai, nu sin met nukewa su akkalemye ke ma paye ke Togusrai lun God. Aok, buk se in Baibel su pangpang Fwakyuk el akkalemye ke sie me pupulyuk ke mutan kosro—su pangpang “Babulon Lulap”—su “srui ke sran met mwo a ke sran met lo lun Jisus.” (Fwakyuk 17:4-6) El oru pa orekma lun kosro in ngun ke el sang kasru lal nu sin “togusra puspus” lun fwalu ku met kol puspus lun politic, ke sripe se inge el eis me insemwomwo puspus selos. Mutan kosro se inge el lumeyuk nu ke alu kikiap nukewa lun fwalu. El pa u lulap se meet su lain Kraist.—Fwakyuk 18:2, 3; Jemes 4:4.
Met su Lain Kraist el ‘Akinsemwomwoye Srelos in Long’
Sayen orekma lalos in pulesru ma paye lun Baibel, pus sin met su fwak mu elos met Kristian elos sisla a srunga in fwasr ke akwuk sumwos lun Baibel ke oiya mwomwo ke sripen elos lungse in orekmakin oiyen moul su orekmakinyuk sin met puspus. Kas lun God el palye ke luma a ma sikyak inge, el akkalemye: “Tu pal se fwa tuku kelos [met puspus su fwak mu elos kulansap nu sin God] fwa tia muteng me luti paye; a meyen srelos srung, elos fwa akpusye nu selos met luti in akinsemwomwoye srelos in long.” (2 Timote 4:3, NW) Met puspus inge su fwak mu elos met luti tusruktu luti ke ma kikiap akkalemyeyuk pa elos oana “met sap kikiap, met orekma kutasrik, elos sifwana oralos met sap lun Kraist.” Baibel el akkalemye pa la: “Saflaiyelos fwa fwal nu ke orekma lalos.”—2 Korint 11:13-15.
Orekma lalos wekunang “orekma koluk lalos,” su pulesru na paye oiya mwo a oiya fulat nukewa. (2 Piter 2:1-3, 12-14) Ya kut tia liye la puseni pisen met kol lun alu a met puspus su welulos su orekmakin—ku tia srunga a tia selngawi—orekma puspus su tia fwal nu sin met Kristian, oana mokul orek ma koluk nu sin mokul a orek kosro nu sin mokul ku mutan su elos tia payuk se? Nunak munas komwos eis kitin pal in srike nunku ke oiyen nunak puspus a inkanek lun moul su orekmakinyuk yok sin met puspus nu ke ma Baibel el akkalemye in Livitikus 18:22; Rom 1:26, 27; 1 Korint 6:9, 10; Hibru 13:4; a Jud 7.
“Akpayeye Kas Nukewa lun Ngun”
In nunku ke ma akuteyuki tari, kut enenu in porongo ke kas lun met sap Jon in tia nunku mu ma kut lulalfongi ka el tia arlana yok sripe. “Met kulu, komwos in tia lalalfongi kas nukewa lun ngun,” el fwak, “a akpayeye kas nukewa lun ngun, elos fwin ma sin God me, ku tia, tu met palu kikiap puspus elos fwasrelik nu fwalu.”—1 Jon 4:1, NW.
Nunku ke me srikasrak mwomwo lun met puspus su oasr “nunak mwomwo” lalos su muta ke siti lun an Berea in century se meet. Elos “eis kas inge ke insielos kemwa, a suk in ma Simusla len nu kemwa in liye ma inge [kas lal Poul a Sailas] la paye, ku sito.” (Orekma 17:10, 11) Aok, fwinne elos lungse in lutlut, met Berea elos akpayeye la ma elos long a eis tari el fwal na paye nu ke ma Simusla.
Oapana ke pal inge, met Kristian paye elos tia akkolukyeyuk ke tuku a wanginla lun nunak pengpeng puspus a elos sruokye ku ke ma paye lun Baibel. Met sap Poul el simusla: “A ma inge nga pre ka, tu lung lomwos fwa yokyokelik in etauk sumwos a lalmetmet nu kemwa.”—Filippai 1:9, NW.
Kom fwin soenna orala ma inge, kafweang in oru ma inge oana niyen sun lom in eis “etauk sumwos a lalmetmet nukewa” ke kom lotela ke ma Baibel el luti na paye. Elos nukewa su etawi met Berea elos tia kiapeyukla ke “kas kikiap puspus” lun met puspus su lain Kraist. (2 Piter 2:3) A, elos aksukosokyela ma paye in ngun ke Kraist a ke met kulansap paye lal.—Jon 8:32, 36.
[Box/Picture on page 4]
MEA BAIBEL EL FWAK KE MET SU LAIN KRAIST
“Tulik srisrik, pa inge aur se safla, a oana komwos nu long tu met lain Kraist a tuku, aok inge met lain Kraist puspus sikme; ke ma inge kut etu tu pa inge aur se safla.”—1 Jon 2:18.
“Su met kikiap fwin tia el su lafwekin tu Jisus el Kraist? Pa inge met lain Kraist, aok el su lafwekin Papa a Mwen.”—1 Jon 2:22.
“A ngun nu kemwa su tia fwakulak Jisus, el tia ma sin God me. A pa inge ngunin met lain Kraist, su komwos long tari tu a tuku; a inge el tufwa muta fwalu.”—1 Jon 4:3.
“Tu met kutasrik puspus fwasrelik nu fwin fwalu, aok, elos su tia fwakak tu Jisus Kraist El tuku in ikwe. Pa inge met kutasrik a met lain Kraist.”—2 Jon 7.
[Box/Pictures on page 5]
SIE MET KIKIAP NU KE OIYA PUSPUS?
Kas se inge “met su lain Kraist” el orekmakinyuk nu sin met puspus su pulesru ma Baibel el akkalemye kel Jisus Kraist, met nukewa su lain Togusrai lal, a met nukewa su akkolukye met tuma lutlut puspus lal. Wekunang pa met nukewa, u nukewa, a mutanfwal nukewa su tafongla in fwak mu elos aoliyen Kraist ku elos sifwana tafongla in fwakulos la elos pakiye nu selos sifwana kunokon lun Messaia paenang elos fulangkin in oru mwulela lalos nu ka mu elos ku in oru ma inge su Kraist mukena el ku in oru—in use misla paye a moul mwomwo.
[Credit Line]
Augustine: ©SuperStock/age fotostock
[Picture on page 7]
Oana met Berea, kut enenu in ‘tuni ma Simusla len nukewa’