Jeova El Fwa “Oru Nununku Sumwos In Orek”

“Ya God el fwa tia oru nununku sumwos in orek nu sin met sulosulla lal, su tung nu sel len a fong?”​—LUK 18:7, NW.

1. Su sropon me akkeye nu sum, a efu?

FWIN fwalu nufon, in masrlon Met Lo lun Jeova oasr met Kristian mokul a mutan puspus su kulansap nu sin Jeova ke oaru ke lusen yea puspus. Ya kom etu kutu sin met lili inge? Saap kom nunku ke sie sister matou, sie su baptaisla ke lusen yea puspus somla a suka wangin ke meeting ke Kingdom Hall. Ku saap kom nunku nu sin sie brother matou su oaru in sang kasru ke orekma in luti lun congregation kais sie wik a el oru ma inge ke lusen yea puspus. Aok, pus sin met oaru inge elos nunku mu ke pal inge Armagedun el ku tari in sikyak. Tusruktu, fwinne akwuk lun fwalu srakna oasr ma inge tia akmunasye lulalfongi lalos ke mwulela nukewa lun Jeova ku akmunasye sulela mwo lalos in ‘muteng nu ke safla.’ (Mattu 24:13) Lulalfongi paye a fukoko su akkalemyeyuk sin met kulansap oaru nukewa lun Jeova el sie sropon me akkeye nu sin congregation nufon.​—Sam 147:11.

2. Ma sikyak fuka akasorye kut?

² Tusruktu, oasr pal kut ku in liye ke oiya su tia oana sie. Kutu sin Met Lo elos wi ke orekma in luti ke lusen yea puspus, tusruktu kais kutu srisrik lulalfongi lalos nu sin Jeova munasla, a elos tui in wi ke congregation lun met Kristian. Oiya inge akasorye kut ke met su wi kut meet elos som liki Jeova, a kut lungse na paye in kasru kais sie “sip tula” inge in foloku nu ke congregation. (Sam 119:176; Rom 15:1) Ke sripen oasr kain in ma luo sikyak​—nu sin kutu met lili su sruokye lulalfongi lalos a srakna moniyuk ke orekma in kulansap a oasr kutu su elos lela lulalfongi lalos in munasla a tui in asrouki yurin congregation—​paenang oasr kusensiyuk puspus su sikyak. Mea oru Met Lo puspus elos in sruokye lulalfongi lalos ke mwulela lun Jeova a efu ku kutu Met Lo tula ma inge lukelos? Mea kut sifwana ku in oru in akpayeye la lulalfongi lasr el srakna fukoko ke “len lulap lun Jeova” el apkurun me na paye? (Zefenaia 1:14) Lela kut in sramsramkin me pupulyuk su oasr ke Gospel lal Luk.

Sie Kas in Sensen nu sin Met Puspus su Moul “Ke Mwen Nutin Met el Tuku”

3. Su ku in eis ma lane yok ke me pupulyuk ke sie mutan katinmas a sie met nununku, a efu?

³ In Luk sapta 18, kut ku in rid ke me pupulyuk lun Jisus ke sie mutan katinmas a sie met nununku. Me pupulyuk inge el oana sie nu ke me pupulyuk nu sin met in loomu su kafweang in siyuk ke ma enenu lal, su kut akuteye tari ke me lutlut tari a. (Luk 11:5-13) Tusruktu, ke kutu pa fus ke ma simusla inge in Baibel ke me pupulyuk ke mutan katinmas a ke met nununku el akkalemye la ma inge ku in orekmakinyuk yok nu sin met puspus su moul “ke mwen nutin met el tuku” ke ku lun Togusrai, su mutamwauk ke yea 1914.​—Luk 18:8.a

4. Mea Jisus el akuteye meet liki el akkalemye me pupulyuk su simusyukla in Luk sapta 18?

⁴ Meet liki el akkalemye me pupulyuk ke mutan katinmas a ke met nununku, Jisus el fwak la me akul ke oasr tari lal ke ku lun Togusrai e fwa arlana kalem “oana sie sarom” su “sikme ye kosrao inge, a akkalemye ye kosrao ingo.” (Luk 17:24; 21:10, 29-33) Ne oinge, oasr met puspus su moul ke “pal safla” elos fwa tia loang akmwoye nu ke me akpayeye su arlana kalem inge. (Daniel 12:4) Efu ku elos tia? Ke sripe su oana sie nu sin metu in len lal Noa a in len lal Lot elos pilesru kas in sensen lun Jeova. In len ingo, metu elos ‘mongo, nim, moli, kuka, eoki, a musai nu ke len se su elos kunausyukla.’ (Luk 17:26-29) Elos mise ke sripen elos arlana nunku yok a kafofo ke orekma nukewa paenang elos tia loang akmwoye nu ke ma lungse lun God. (Mattu 24:39) Ke pal inge, metu elos nunku yok a arlana kafofo pa ke orekma puspus lalos len nukewa a pa inge sripe paenang elos tia akilen me akpayeye ke saflaiyen akwuk puspus lun fwalu la el apkurun.​—Luk 17:30.

5. (a) Nu sin su Jisus el sang kas in sensen, a efu? (b) Mea oru kutu met lili in tula lulalfongi lalos?

⁵ Kalem la, Jisus el nunku yok ke met tuma lutlut nukewa lal la elos ku in akkolukyeyuk pa ke fwal lun Setan, elos fwin akkolukyeyuk saap elos ku in “folokla nu ke ma puspus su filiyuki tari.” (Luk 17:22, 31, NW) Aok, ma inge sikyak nu sin kutu met Kristian. Ke lusen yea puspus met nukewa inge elos tupan ke len lun Jeova in tuku in aksafyela akwuk koluk lun fwal se inge. Tusruktu, ke pal se Armagedun el tia tuku ke pal se su elos tupan ka, elos mutamwauk in akmunasyeyukla na paye. Lulalfongi lalos nu ke len in nununku lun Jeova la apkurun me akmunasyeyukla. Elos tia arlana wi ke orekma in luti a kais kutu srisrik elos arlana kafofo ke orekma puspus lun moul paenang arulana srikla pal lula lalos in oru orekma puspus ke ma lun ngun. (Luk 8:11, 13, 14) Ke saflaiye, elos ‘folokla nu ke ma puspus su filiyuki tari’​—me asor yok na paye pa inge!

Eneneyuk in “Pre Pal Nukewa”

6-8. (a) Akkalemye me pupulyuk ke mutan katinmas a met nununku. (b) Fuka Jisus el orekmakin me pupulyuk inge?

⁶ Mea kut ku in oru in etu na paye la lulalfongi fukoko lasr nu ke me akpayeyen mwulela lun Jeova tia munasla? (Hibru 3:14) Jisus el akkalemye kusensiyuk se inge tokin el sang kas in sensen nu sin met tuma lutlut in tia folokla nu ke fwal koluk lal Setan.

⁷ Luk el simusla la Jisus ke el “fwak sie me pupulyuk nu selos ke ma inge tu fwal nu selos in pre pal e nu kemwa, a tia totola ka.” Jisus el fwak: “Sie met nununku muta in sie siti, su tia sangeng sin God, a tia sunakin met. A sie katinmas muta in siti sa; a el tuku pal puspus nu yurol, a fwak, ‘Kom aksumwosye yu ke met lokwalok luk.’ A el srangesr meet; a tok el fwak insiel, ‘Nga fwinne tia sangeng sin God, ku sunakin met, tusruktu, meyen katinmas se inge el lokwalokye yu, nga fwa aksumwosyella [sang nununku sumwos nu sel, NW], saap el aktotoye yu ke tuku lal pal e nu kemwa.’”

⁸ Tokin el akkalemye ke me sramsram inge, Jisus el akkalemye kas inge: “Long ma met nununku sesumwos el fwak! Ya God el fwa tia oru nununku sumwos in orek nu sin met sulosulla lal, su tung nu sel len a fong, a el mongfusesr nu selos? Nga fwak nu sumwos, tu El fwa sa in oru nununku sumwos in orek nu selos. Tusruktu, ke Mwen nutin met el tuku, ya el fwa konoiyuk lalalfongi fwin fwalu?”​—Luk 18:1-8, NW.

“Kom Oru Tu Nga Fwa Eis Nununku Sumwos”

9. Mea me lutlut yok su akkalemyeyuk ke me pupulyuk lun mutan katinmas a met nununku?

⁹ Me lutlut yok ke me pupulyuk inge arlana kalem. Me lutlut inge akkalemyeyuk ke met luo su oasr ke me pupulyuk a oayepa sin Jisus. Mutan katinmas el siyuk: “Kom oru tu Nga fwa eis nununku sumwos.” Met nununku el fwak: “Nga fwa oru tu el fwa ku in eis nununku sumwos.” Jisus el siyuk: “Ya God el fwa tia oru nununku sumwos in orek?” A Jisus el fwak kel Jeova: “El fwa sa in oru nununku sumwos in orek nu selos.” (Luk 18:3, 5, 7, 8, NW) Ngea God el fwa “oru nununku sumwos in orek”?

10. (a) Ngea pal se nununku sumwos orek in century se meet? (b) Nge a fuka nununku sumwos fwa orek nu sin met kulansap lun God ke pal inge?

¹⁰ In century se meet, “len in foloksak,” ku len in oru nununku sumwos el tuku in yea 70 C.E. ke pal se Jerusalem a temple ka kunausyukla. (Luk 21:22) Nu sin met kulansap lun God in pal inge, nununku sumwos fwa orek in “len lulap lun Jeova.” (Zefenaia 1:14; Mattu 24:21) In pal sa, Jeova el fwa “akkeokyelos su akkeokye” met kulansap lal “ke [Jisus Kraist] el eis foloksak selos su tia etu God a nu selos su tia akos mwosasu lun Leum Jisus.”​—2 Tessalonika 1:6-8; Rom 12:19.

11. Ke inkanek fuka nununku sumwos fwa “sa” tuku?

¹¹ Ke ma inge, fuka kut ku in eis kalem ke ma Jisus Kraist el fwak kel Jeova la el fwa “sa” in oru nununku sumwos? Kas lun God el akkalemye la “fwinne [Jeova] el mongfusesr,” el fwa sa in oru nununku sumwos ke pal pakiyuki fwin sun tari. (Luk 18:7, 8; 2 Piter 3:9, 10) In len lal Noa, ke pal se sronot tuku, met koluk elos sa in kunausyukla. Oapana in len lal Lot, ke pal se e tuku in kosrao me, met koluk elos mise. Jisus el fwak: “A fwa ou inge in len se ke mwen nutin met el sikme.” (Luk 17:27-30) Ke pal se, met koluk elos fwa sun “kunausten su fwa tuku nu fwelos.” (1 Tessalonika 5:2, 3) Paye, la kut ku in lulalfongi na paye la Jeova el fwa tia lela fwal lun Setan in on fwinne ke len se tokin pal in oru nununku sumwos sun tari.

“El Fwa Oru Nununku Sumwos in Orek”

12, 13. (a) Fuka me pupulyuk lal Jisus ke mutan katinmas a ke met nununku luti kut ke sie oiyen me lutlut? (b) Efu ku kut ku in etu la Jeova el fwa long pre lasr a oru nununku sumwos in orek?

¹² Me pupulyuk lal Jisus ke mutan katinmas sa a ke met nununku sa el akkalemye yok ke kutupa ma paye su yok sripe. Ke el orekmakin me pupulyuk inge, Jisus el fwak: “Long ma met nununku sesumwos el fwak! Ya God el fwa tia oru nununku sumwos in orek nu sin met sulosulla lal?” Paye la, Jisus el tia srike Jeova nu sin met nununku sa oana ke God el fwa akkalemye pa oiya inge nu sin met su lulalfongel. A, Jisus el luti met tuma lutlut lal ke sie me lutlut kel Jeova ke el akkalemye yok ke ma su tia oana sie in masrlon met nununku a God. Mea kutu oiya su elos tia oana sie ka?

¹³ Met nununku sa ke me pupulyuk lun Jisus el “sesumwos,” tusruktu “God el sie Met Nununku sumwosmwos.” (Sam 7:11; 33:5) Wangin insemwomwo lun met nununku inge nu sin mutan katinmas sa, tusruktu Jeova el insemwomwo ke kais sie met. (2 Kronikel 6:29, 30) Met nununku el tia arlana lungse in kasru mutan katinmas sa, tusruktu oasr inse mulala lun Jeova in sang kasru​—aok, el lungse na paye—​in sang kasru nu selos su kulansap nu Sel. (Isaia 30:18, 19) Me lutlut fuka tuku ka? Fwin met nununku sa su sesumwos el long ke me siyuk lun mutan katinmas sa a sang nununku sumwos nu sel, fuka yokiyen lungse lun Jeova in long pre lun met kulansap nukewa lal a paye la el oru nununku sumwos su fwal in orek kelos!​—Soakas 15:29.

14. Efu ku kut tia enenu in fuleak lulalfongi lasr ke len in nununku lun God su fwa tuku?

¹⁴ Ke ma inge, elos su fuleak lulalfongi lalos ke len in nununku lun God su fwa tuku elos tafongla na paye. Efu? Meyen elos fuleak lulalfongi fukoko lalos ke “len lulap lun Jeova” el apkurun me, su kalem ke orekma lalos la elos alolo ku oasr nunak luo lalos, fwin Jeova el ku in lulalfongiyuk la el oaru in akpayeye mwulela lal. Tusruktu wangin kutena met ku in siyuk sumwos ke paye a oaru lun God. (Job 9:12) Sie kusensiyuk mwo in siyuk pa, Ya kut fwa sruokye oiyen oaru lasr pal nukewa? A pa inge sifwe su Jisus el siyuk ke saflaiyen me pupulyuk lal ke mutan katinmas a ke met nununku.

“Ya El Fwa Koneak Lulalfongi Inge Fwin Fwalu?”

15. (a) Kusensiyuk fuka Jisus el siyuk, a efu? (b) Mea kut ku in siyuk sesr sifwana?

¹⁵ Jisus el siyuk ke kusensiyuk mwomwo inge: “Ke Mwen nutin met el tuku, ya el fwa konoiyuk lalalfongi inge fwin fwalu?” (Luk 18:8, NW footnote) Kas se inge “lulalfongi inge” el akkalemye la Jisus el sramsramkin, tia ke lulalfongi nu ke oiya nukewa, a ke kain in lulalfongi mwo​—oana lulalfongi su oasr yurin mutan katinmas sa. Jisus el tia sang me top nu ke kusensiyuk lal. El siyuk ma inge in oru met tuma lutlut lal elos in nunku ke lulalfongi lalos fwin fukoko oana ke kain in lulalfongi mwo inge. Ya ma inge kais kutu srisrik in munasla, paenang oasr me sensen ka la elos ku in folokla nu ke ma puspus su elos filiyuki tari? Ku ya oasr yurolos kain in lulalfongi su akkalemyeyuk sin mutan katinmas sa? Ke pal inge, kut enenu pa in siyuk sesr sifwana, la ‘Kain in lulalfongi fuka “Mwen nutin met” el ku in koneak ke insiuk?’

16. Kain in lulalfongi fuka oasr yurin mutan katinmas?

¹⁶ Kut fwin lungse in sie sin met su fwa eis nununku sumwos lun Jeova, kut enenu in fwasr ke inkanek lun mutan katinmas se inge. Kain in lulalfongi fuka oasr yurul? El akkalemye lulalfongi lal ke el kafweang in “som [nu yurin met nununku], a fwak, ‘Kom oru tu Nga eis nununku sumwos.’” Mutan katinmas sa el kafweang in eis nununku sumwos sin sie met su sesumwos. Ke oiya oinge, met kulansap nukewa lun God ke pal inge elos ku in lulalfongi la elos ku in eis nununku sumwos lun Jeova​—fwinne elos eis ma inge ke pal se su pat liki ma elos nunku ka. Sayen ma inge, elos akkalemye lulalfongi lalos ke mwulela lun God ke elos kafweang in pre​—aok, ke elos ‘tung nu sin Jeova len a fong.’ (Luk 18:7, NW) Paye la, fwin oasr sie met Kristian el tui in pre ke nununku sumwos in orek, ke ma inge el akkalemye la tula lulalfongi lal nu sin Jeova la el ku in oru orekma in akinsemwomwoye met kulansap nukewa lal.

17. Sripe puspus fuka oasr yurosr in kafweang in pre a sruokye ku lulalfongi mwo lasr nu ke len in nununku lun Jeova su fwa tuku na paye?

¹⁷ Ma sikyak ke mutan katinmas sa akkalemye nu sesr la oasr yurosr kutupa sripe yok in kafweang in pre. Nunku ke kutu ma su tia oana sie ke oiyel a oiyesr. Mutan katinmas se inge el siyuk sin met nununku sa pal nukewa fwinne wangin kutena met kaifwel in oru ma inge, tusruktu kas lun God el akkeye kut ke inkanek yok in “kafweang in pre.” (Rom 12:12) Wangin me akpayeye ka la me siyuk lun mutan katinmas sa el fwa topukyukla, tusruktu Jeova el mwulela nu sesr la nununku sumwos fwa orek. Ke inkanek lun met palu lal, Jeova el fwak: “Fwinne pat, sano nu ka; tu paye a fwa tuku. A fwa tia pat.” (Hebakkuk 2:3; Sam 97:10) Wangin met kasru mutan katinmas in siyuk ke me siyuk lal. Tusruktu oasr me kasru fukoko lasr, el pa Jisus, “su muta lepo leyut sin God, su ouyepa kaifwe kasr.” (Rom 8:34; Hibru 7:25) Ke ma inge, fwin mutan katinmas sa, fwinne upa oiya su sikyak nu sel, el kafweang in siyuk pal nukewa nu sin met nununku sa la oasr nununku sumwos fwa orek, fuka yokiyen kafweang lasr in sruokye ku lulalfongi lasr nu ke len in nununku lun Jeova su fwa tuku!

18. Fuka pre el akkeye lulalfongi lasr a kasre kut in eis nununku sumwos?

¹⁸ Me pupulyuk ke mutan katinmas sa el luti kut la pre a lulalfongi el kupasr nu sin sie sin sie a ke kafweang lasr in pre el ku in sang kasru yok in lain a in kunausla me akkoluk su ku in akmunasye lulalfongi lasr. Paye la, tia kalmen ma inge pa pre su orek in oana me luma na su tia tuku ke insie el sie me kasru in tia munasla lulalfongi. (Mattu 6:7, 8) Ke kut akkeyeyuk in pre ke sripen kut akilen la kut arlana enenu God, ke ma inge pre lasr oru kut in fototo nu sin God a akkeye lulalfongi lasr. A ke sripen lulalfongi el eneneyuk nu ke molela, ke ma inge Jisus el nunku yok ka la oasr me eneneyuk in sang akkeye met tuma lutlut nukewa lal in “pre pal e nukewa a tia totola ka”! (Luk 18:1; 2 Tessalonika 3:13) Paye la, tuku lun “len lulap lun Jeova” tia ke sripen pre lasr​—el fwa tuku fwinne kut pre ka ku tia. Tusruktu fwinne kut eis nununku sumwos a moulla liki meun lun God ku tia, ma inge fwal nu ke lulalfongi su oasr yurosr a ke inkanek sumwos su kut kafweang in moulkin wi pre lasr pal nukewa.

19. Kut akpayeye fuka la kut lulalfongi na paye la God el fwa “oru nununku sumwos in orek”?

¹⁹ Oana ma kut esam, ke Jisus el siyuk: “Ke Mwen nutin met el tuku, ya el fwa koneak lulalfongi inge fwin fwalu?” Mea me top nu ke kusensiyuk lal? Kut arlana insemwomwo ke sripen oasr million puspus sin met kulansap lun Jeova fwin fwalu nufon ke pal inge elos akpayeye ke pre lalos, muteng a mongfusesr lalos la oasr yurolos kain in lulalfongi mwomwo inge! Ke ma inge, me top nu ke kusensiyuk lal Jisus pa aok el koneak lulalfongi mwomwo inge. Aok, fwinne oasr nununku sesumwos puspus su tuku ke fwal lun Setan ke pal inge su akkeokye kut, lela kut in lulalfongi na paye la God el fwa “oru nununku sumwos in orek nu sin met sulosolla nukewa lal.”

[Footnote]

Ya Kom Esam?

• Mea oru kutu met Kristian in fuleak lulalfongi lalos?

• Efu ku kut ku in akkalemye lulalfongi fukoko lasr ke tuku lun len in nununku lun Jeova?

• Sripe puspus fuka oasr yurosr in kafweang in pre?

• Fuka orekma lasr in kafweang in pre kasre kut in tia fuleak lulalfongi lasr?

[Picture on page 14]

Mea akkalemyeyuk yok ke me pupulyuk ke mutan katinmas a ke met nununku?

[Pictures on page 17]

Oasr million puspus sin met ke pal inge elos arlana lulalfongi la God el fwa “oru nununku sumwos in orek”