Fwufwasryesr Ke Inkanek Lun Kalem Su Saromromelik
“A inkanek lun met sumwosmwos oana kalem lun lenelik, su saromromelik nu ke len sumwosna.”—SOAKAS 4:18.
1, 2. Mea met kulansap lun God elos pulakin oana fwokin kalem lun ngun su saromromelik tuku sin Jeova?
SU KU IN aketeye na paye me kasru ke orekma lun fwatu su takak ke lututang in akwanginyela losr ke fong sayen el su Sropon kalem, Jeova God? (Sam 36:9) God el fwak: ‘Ke lenelik in etu an se in srukye tafwunyen fwalu, el ekla tari oana kle ye silu; a ma nu kemwa tuyuk oana in sie nuknuk.’ (Job 38:12-14) Ke kalem lun fwatu saromromelik ku yokyokelik, ate a luman fwalu arulanu kalem in liyeyuk, oana sie kle fusrasr su ekla nu ke luma lun me akul lun me sil u su siliyuki nu ka.
2 Jeova el Sropon kalem pa lun ngun. (Sam 43:3) Ke fwalu ku met puspus su muta in losr upa, God paye el tafwela in sang kalem nu sin met kulansap nukemwa lal. Mea fwokin ma inge? Baibel el akkalemye me top: “A inkanek lun met sumwosmwos oana kalem lun lenelik, su saromromelik nu ke len sumwosna.” (Soakas 4:18) Ke kalem saromromelik tuku sin Jeova el sang kalem pal nukemwa nu ke inkanek lun met kulansap lal a in oru me aksumwos nu ke akwuk nu ke u, me luti, a ke oiya.
Kalem lun Ngun Saromromelik Kol nu ke Kapkapek lun Akwuk nu ke U
3. Mea ma su mwoleyukla in Isaia 60:17?
3 Ke inkanek lun met palu Isaia, Jeova el palye: “Ke brass Nga fwa wise gold, a ke mwusra Nga fwa wise silfer, a ke sak brass, a ke eot mwusra.” (Isaia 60:17) In oana ke orekma in aolla kofwen me musa munas nu ke kofwen me musa mwomwo su ma inge akkalemye la oasr me aksumwos ku kapkapek, in fwal nu ke ma inge su Met Lo lun Jeova elos pulakin tari ke me aksumwos nu ke akwuk puspus lalos ke u su orek ke pal inge ke “saflaiyen akwuk lun ma puspus inge,” ku “len safla.”—Mattu 24:3, NW; 2 Timote 3:1.
4. Akwuk fuka orekla in yea 1919, a fuka akwuk inge el me kasru na mwomwo?
4 Ke mutamweyen len safla, congregation nukemwa lun Baibel Students, oana Met Lo lun Jeova elos eteyuk ka in pal meeta, elos orek vote nu ke met elder a deacon nukemwa lalos. Tusruktu, wangin yurin kutu sin met elder ngun paye ku moniyuk paye ke orekma in sulkakin peng mwo. Kutu selos srunga in wi ke orekma in luti peng mwo a elos akmunasye pa met lili puspus in wi. Ke ma inge in yea 1919 oasr sie kunokon sasu oakiyuki ke kais sie congregation—kunokon inge pa sevice director ku met kol ke orekma in luti peng mwo. Met elder su kulansap oana service director, tia voteyuk sin congregation, a srusrngiyuki elos ke inkanek in kolyuk lun God sin branch ofus lun met kulansap lun God. In wekunang nu ke kunokon lun service director pa in orala akwuk ke orekma in luti peng mwo, karunganang territory, a in akkeye met lili nukemwa ke congregation in wi ke orekma in luti ke inkanek nukemwa. Ke lusen yea puspus, met orekma puspus elos akkalemye oiya mwomwo lalos in sang kasru nu ke orekma in sulkakin peng mwo lun Togusrai.
5. Me aksumwos fuka akpayeyuk mutamwauk in yea 1920?
5 Met nukemwa ke congregation elos akkeyeyuk pa ke kas in kaifwe inge “Sulkakin, sulkakin, sulkakin, Togusra a togusrai lal,” su akkalemyeyuk in yea 1922 ke sie toeni lulap lun Bible Student in an Cedar Point, Ohio. In yea 1927 oasr akwuk orekla ke orekma in luti peng mwo la Sunday pa len su nunkeyuk mu len mwo emeet in wi ke orekma in luti sie loom nu ke sie loom. Efu ku in len se inge? Meyen ke Sunday met puspus elos tia orekma ke niyen orekma lalos a elos muta na ke loom selos. Met Lo lun Jeova ke pal inge elos akkalemye pa oiya oinge ke elos kaifweang in sun met puspus ke pal su elos oasr na ke loom selos, oana ke saflaiyen wik a ke eku?
6. In yea 1931, resolution fuka orekla, a fuka ma inge sang kasru nu ke orekma in sulkakin peng mwo lun Togusrai?
6 Sie me akkeye mwomwo nu ke orekma in sulkakin peng mwo lun Togusrai akkalemyeyuk ke tafun len tok ke Sunday, July 26, 1931, ke pal se sie resolution el mutamwauk in orekmakinyuk ke sie toeni lulap in an Columbus, Ohio, a tokin ma inge orekmakinyuk pa fwin fwalu nufon. Sie ip ke resolution inge el akkalemye: “Kut met kulansap lun Jeova God sapkinyuk in oru sie orekma ke el, a in akkalemye akosten lasr nu ke masap lal inge, in sulkakin peng mwo su Jisus Kraist el sulkakin, a in akkalemye nu sin met nukemwa la Jeova pa God Kulanu a paye; ke ma inge kut insemwomwo in eis a orekmakin e se inge su oalin Leum el akkalemye, a kut lungse in eteyuk a pangonyuk oana ke e se inge, Met Lo lun Jeova.” (Isaia 43:10) Arulanu kalem la e sasu inge el akkalemye orekma se emeet lun met nukemwa su orekmakin e se inge! Aok, oasr orekma su Jeova el lungse met kulansap nukemwa lal in wi ka. Arulanu mwo oiya su akkalemyeyuk sin met kulansap puspus lun God in sang kasru ke orekma inge!
7. Oasr kain in ekla fuka akkalemyeyuk in yea 1932, a efu?
7 Met elder puspus elos inse pusisel in orekmakunelos sifwana nu ke orekma in sulkakin peng mwo. Tusruktu, ke kutu an, met elder puspus su voteyuki elos lain na paye akwuk inge la met nukemwa ke congregation elos enenu in wi oru orekma in luti sie loom nu ke sie loom ku in oru in an nukemwa su oasr met we. Ne oinge, oasr kutupa me aksumwos orek tok. In yea 1932 congregation nukemwa sapkinyuk elos ke inkanek lun Tauer in San in tui ke orekma in voti met elder a deacon puspus lalos. A, elos in oru na vote nu ke sie service committee lun met puspus su matu in ngun su wi ke orekma in luti peng mwo sie loom nu ke sie loom a yen nukemwa su oasr met puspus we. Ke ma inge, orekma in karungin congregation itukyung nu sin brother puspus su wi pal nukemwa ke orekma in luti, a orekma inge orek pal nukemwa a tia tulokinyuk.
Ke Kalem lun Ngun Yokyokelik Oasr Kutupa Me Aksumwos Orek
8. Me aksumwos fuka orek in yea 1938?
8 Kalem lun ngun el “saromromelik yok pal nukemwa.” In yea 1938 akwuk nu ke vote el tui tila orekmakinyuk. Met elder a deacon nukemwa fwa srusngiyuki ke inkanek lun theocratic ku sie akwuk mwo fwal nu ke akwuk lun Ma Simusla ke karunginyuk lun “met kulansap oaru a lalmetmet.” (Mattu 24:45-47) Apkurun congregation nukemwa lun Met Lo lun Jeova elos eis me aksumwos nu ke akwuk inge, a ke sripe inge orekma in sang ma lo oasr fwako mwomwo ka pal nukemwa.
9. In yea 1972, akwuk fuka mutamwauk in orekmakinyuk, a efu ma inge sie me aksumwos?
9 Mutamwauk in October 1, 1972, sie pa me aksumwos ke orekma in liaung congregation mutamwauk in orekmakinyuk. Akwuk nu ke orekma in karungin congregation sin u lun met elder puspus mutamwauk in orekmakinyuk ke congregation nukemwa lun Met Lo lun Jeova fwin fwalu nu fon, ma inge sang aolla orekma in karungin lun met elder in tia met elder sefwanna in karungin congregation. Akwuk sasu inge sang me akkeye yok nu sin mokul ku brother puspus su matu in ngun in kafweang in sun moul fwal nu ke orekma lun sie met liaung ke congregation. (1 Timote 3:1-7) Fwako mwo lun akwuk inge paenang oasr brother puspus elos eis experience ku etauk yok in karungin kunokon puspus ke congregation. Arulanu saok me kasru elos oru ke orekma in karungin nu sin met lili sasu nukemwa su eis ma paye lun Baibel ke u lun Jeova ke yea puspus tok.
10. Akwuk fuka mutamwauk in orekmakinyuk in yea 1976?
10 Met lili puspus su wi ke u lun Governing Body akwuki nu ke committee onkosr, a mutamwauk ke January 1, 1976, orekma nukemwa lun u a lun congregation nukemwa fwalu na fon karunginyuk sin committee onkosr inge. Akwuk mwomwo inge akpayeye la arulanu yok sripe la orekma nukemwa lun Togusrai in karunginyuk sin “met papu puspus”!—Soakas 15:22; 24:6.
11. Me aksumwos fuka mutamwauk in orekmakinyuk in 1992, a efu?
11 In yea 1922 oasr pa sie me aksumwos su orekla, su ma sikyuk inge ku in lumeyuk nu ke ma su sikyuk nu sin met Israel puspus a metsa puspus su folokla nu in an Jerusalem liki an Babulon ke pal in sruo lalos. In pal ingo, arulanu supus met Livai in oru orekma nukemwa in temple. Ke ma inge, oasr orekma puspus su itukyang nu sin met Netinim in sang kasru met Livai. Ke oiya sepana inge, in kasru u lun met kulansap oaru a lalmetmet in karunganang ma kunelos su yokyokelik fwin fwalu, paenang in yea 1992 kutu sin met su wi ke “sip ngia” elos eis kutupa kunokon ke orekma in kulansap lalos. Elos srusrngiyuki in sang kasru committee puspus lun Governing Body.—Jon 10:16.
12. Fuka Jeova el use ‘gold in aolla copper’?
12 Mea fwokin ma inge nukemwa? “Nga fwa oru pa met roso lom misla, a leum lom sumwosmwos,” Jeova el fwak. (Isaia 60:17) Oasr “misla” inmasrlon met kulansap nukemwa lun Jeova ke pal inge, a lungse ke ma “sumwosmwos” ekla ‘leum lalos’—ku pulakin mwomwo lalos su moklelos in kulansapu God. Oasr akwuk mwomwo lalos in akpayeye orekma in sulkakin peng mwo lun Togusrai a in oru met tuma lutlut.—Mattu 24:14; 28:19, 20.
Jeova el Sang Kalem a Etauk Mwomwo ke Me Luti
13. In yea 1920, fuka Jeova el sang kasru nu sin met kulansap nukemwa lal in aksumwosye etauk lalos ke kutu me luti?
13 Jeova el akkalemye pa kais kutu srisrik etauk mwomwo ke me luti ku masap lal nu sin met kulansap nukemwa lal. Fwakyuk 12:1-9 sang me pupulyuk ka. Me sramsram inge el sramsramkin ma tolu: “sie mutan” su putete, sie “dragon,” a “sie mwen, ku tulik mokul.” Ya kom etu la mea kalmen ma tolu inge? Ma inge akkalemyeyuk ke me lutlut inge “Isusla lun sie Mutanfwal,” su sramsramkinyuk ke March 1, 1925, issue lun Tauer in San. Me lutlut inge el sang kasru nu sin met kulansap nukemwa lun God in oasr kalem mwomwo ke kas palu ke isusla ku mutamweyen Togusrai, a in oasr etauk mwo ka la oasr u luo su arulanu kalem—u lun Jeova a u lun Setan. A in yea 1927/28, met kulansap lun God elos akilen la in akfulatye Christmas a birthday tia fwal nu ke ma simusla a elos mutamwauk in pal sa elos in tila wi oru me akfulat inge.
14. In yea 1930 me aksumwos fuka ke me luti akkalemyeyuk?
14 In yea 1930 oasr kutupa me aksumwos ke me luti tolu. Ke lusen yea puspus, Baibel Student elos etu tari la u lulap, su sramsramkinyuk ke Fwakyuk 7:9-17 el tia oana sie nu ke u lun met 144,000, su fwa welul Kraist in kol oana togusra a met tol. (Fwakyuk 5:9, 10; 14:1-5) Tusruktu, tia kalem nu selos la su u lulap inge. In oana ke kalem ke lututang saromromelik oru ma puspus in liyeyuk na paye ke luma a tun, ke inkanek oapana inge in yea 1935 u lulap inge akkalemyeyuk oana met puspus su fwa moliyukla liki “ongoiye lulap,” su oasr fwinsrak in moul ma patpat fwin fwalu. Tok kutu in yea sepana inge oasr sie me aksumwos su sang me kasru yok nu sin tulik nukemwa nutin Met Lo lun Jeova su srakna lutlut ke loom lutlut. Ke met puspus elos akkalemye pulakin yok ke lungse lalos nu sin mutanfwal selos, Met Lo elos akilen la oasr pa ma saye su kupasr nu ke orekma in akfulatye flag. Ke kutu yea tok, oasr sie me lutlut su akkalemyeyuk la Jisus el mise fwin sak soko, a tia fwin sakseng.—Orekma 10:39.
15. Nge a fuka sra akkalemyeyuk oana ma su arulanu yok sripe?
15 Ke pal se tokin Meun Lulap Akluo, oasr akwuk ke ono su orek ke ituk sra nu sin met meun su kinet, ke pal inge oasr kalem mwomwo ke sra la ma inge el yok sripe a mutal. Ke July 1, 1945, issue lun Tauer In San el akkeye “met nukemwa su alu nu sin Jeova su suk moul ma patpat ke fwalu sasu lal su oasr ma sumwosmwos we elos enenu in akkalemye sunak nu ke oiya mutal ke sra a in akfwalye moul lalos nu ke masap sumwosmwos lun God ke ma yok sripe inge.”
16. Nge leng lun Baibel su pangpang New World Translation of the Holy Scriptures orekla, a ma mwomwo fuka luo oasr ka?
16 In 1946 arulanu kalem la oasr enenu nu ke orekma in leng lun Baibel su orekla ke inkanek in kasru yok ke lalmetmet ku etauk a tia akfokfokyeyuk ke kutena kain in lulalfongi fwal nu ke fasin puspus lun Kristendom. In December 1947 orekma in leng inge mutamwauk. In yea 1950 leng lun Baibel inge su pangpang New World Translation of the Christian Greek Scriptures orekla ke kas Merika. Ma Simusla lun Hibru ke kas English orekla ke volume limekosr, mutamwauk in yea 1953. A volume safla ka aksafyeyukla ku orekla in yea 1960, ke lusen yea 12 kutu tokin orekma in leng mutamwauk. Koano nukemwa ke leng lun Baibel inge su pangpang New World Translation of the Holy Scriptures su toeni in orala sie buk lulap orekla in yea 1961. Leng inge lungasyukla nu ke kas puspus ke pal inge su oasr na paye ma mwo ka. Ma inge folokonak e mutal, Jeova. Sayen ma inge, inkanek in lungasla kais sie kas ka el sang kasru in akyokyelik etauk ke Kas lun God.
17. Mea kalem ku etauk yok akkalemyeyuk in yea 1962?
17 Me lutlut mwo su sang kalem ke “ku su fulat liki kut” simusyukla in Rom 13:1 a ke oiyen akosten lun sie met Kristian nu selos akkalemyeyuk in yea 1962. Orekma in lutlutkin yok sapta ak 13 ke buk lun Rom a kutupa ma Simusla oana Taitus 3:1, 2 a 1 Piter 2:13, 17 el sang kasru in akkonye la kas inge “ku su fulat liki kut” el sramsramkinyuk, tia nu sin Jeova God a Jisus Kraist, a nu ke met kol puspus lun guferment.
18. Mea kutu ma paye su akkalemyeyuk yok in yea 1985 a 1987?
18 Ke yea puspus tok, inkanek lun met sumwos tafweyukla in saromromelik na paye. In yea 1985 oasr kalem ku etauk mwomwo su aketeye ke kalmeyen oiya inge in akkalemyeyuk oana sie met su sumwosmwos “nu ke moul” a sumwosmwos oana sie met kawuk lun God. (Rom 5:18; Jemes 2:23) Kalmeyen Sukosokla lun Met Kristian el aketeyuki ke inkanek yok in yea 1987.
19. Ke inkanek fuka Jeova el sang kasru nu sin met kulansap lal in oasr etauk sumwos ke me luti puspus ke yea puspus somla?
19 In yea 1995 oasr sie me lutlut mwo su sang kasru in oasr kalem mwomwo nu ke orekma in srela sip liki goat. In yea 1998, oasr sie me aketeye mwo ke aruruma lal Ezikiel ke temple, su mutamwauk in akpayeyuk ke pal lasr inge. In yea 1999 oasr pa me lutlut su sang kasru in etu nge a fuka ‘me srungeyuk lun ma kunausten tu yen mutal.’ (Mattu 24:15, 16) A in yea 2002 oasr kutupa etauk yok nu sin met kulansap nukemwa lun God la mea kalmeyen orek alu nu sin God “ke ngun a paye.”—Jon 4:24.
20. Mea kutupa oiya met kulansap lun God elos aksumwosyeyuk ka?
20 In wekunang nu ke me aksumwos nukemwa ke akwuk lun u a ke me luti, oasr pa me aksumwos nu ke oiya lun met Kristian. Ke sie me pupulyuk, in yea 1973, oasr kalem mwomwo nu ke orekmakinyen tobacco la el oana sie orekma in “akfokfokye ikwe” a ma inge sie ma koluk upa. (2 Korint 7:1) Yea sengoul tokin ma inge, ke July 15, 1983, issue lun Tauer in San el akkalemye yok ke oiya a sulela lasr nu ke orekmakinyen likesik. Pa inge kutu me pupulyuk ke kalem su yokyokelik ku saromromelik ke pal lasr inge.
Tafwela in Fwufwasryesr ke Inkanek lun Kalem su Saromromelik
21. In oasr oiya a nunak fuka fwa kasre kut in fwufwasaryesr ke inkanek lun kalem su saromromelik?
21 “In eis me aksumwos fwin ma inge sikyak a in orekmakin me kasru inge ku in upa,” sie met elder ke lusen pal loeloes el fwak. Mea kasrel in eis me aksumwos nukemwa su el pulakin ke lusen yea 48 su el oru orekma in kulansap oana sie met luti peng mwo lun Togusrai? El topuk: “Me kasru yok nu sik pa in oasr sie nunak mwo. Fwin Nga srunga in eis me aksumwos kalme pa nga tia kapkapek ke u lun Jeova el kapkapek a tafwela in fwasr nu meet. Fwin oasr me aksumwos a nga sifwana pula mu me aksumwos inge upa ngan eis, lela ngan nunku ke kas lal Piter nu sel Jisus: ‘Leum, kut fwa som nu yurin su? Kas lun moul ma patpat oasr Yurum.’ Tokin ma inge lela ngan siyuk sik sifwana, ‘Oya Nga fwa som u—nu ke losr lun fwalu?’ Ma inge kasre yu in sruokye ku u lun Jeova.”—Jon 6:68.
22. Fuka kut ku in eis insemwomwo ke fwufwasryesr lasr ke kalem?
22 Fwalu ku met puspus su raunekutla oasr ke losr upa. Ke Jeova el tafwela in tolak kalem nu sin met kulansap nukemwa lal, oasr ma puspus su tia oana sie inmasrlon met kulansap lun God a nu sin met puspus lun fwalu su yokelik. Mea kalem inge ku in oru nu sesr? Paye, in oana ke orekmakinyen sie lamp ke soko inkanek losr su oasr luf ka, lamp ku tenki el tia eisla ku akwanginyela luf se, oapana kalem ke kas lun God tia akwanginyela me sruf puspus. Tusruktu, kalem su tuku ke Kas lun God kasre kut in fwasr liki me sruf nukemwa tu kut in fwasr ke inkanek lun kalem su yokyokelik ku saromromelik. Ke ma inge, lela kut in loang akmwoya pal nukemwa nu ke kas in palu lun Jeova, “oana kalem su tolak ke sie an losr.”—2 Piter 1:19, NW.
Ya Kom Esam
• Me aksumwos puspus fuka Jeova el akkalemye nu sin met kulansap nukemwa lal?
• Kalem su yokyokelik ku saromromelik el wise me aksumwos fuka nu ke me luti?
• Kain in me aksumwos fuka kom liye tari, a mea kasre kom in eis ma inge?
• Efu kom lungse in fwasr pal nukemwa ke inkanek lun kalem su yokyokelik?
[Petsa ke sra 15]
Toeni lulap su orek in yea 1922 in an Cedar Point, Ohio, akkeye Bible Student nukemwa in oru orekma lun God
[Petsa ke sra 16]
“New World Translation of the Christian Greek Scriptures” orekla in yea 1950, a akkalemyeyuk sel N. H. Knorr
[Picture Credit Line on page 13]
© 2003 BiblePlaces.com