Mwolanu Lun Jeova El Tolak Nu Sin Met Lal
“Tu Jeova el fwa kalem ma patpat lom.”—ISAIA 60:20.
1. Fuka Jeova el akinsemwomwoye met oaru lal?
“TU Jeova el insemwomwo ke met sral. El e fwa akoaskuye met fwolpap ke lango.” (Sam 149:4) Pa inge ma met sim lun Sam in pal meeta el fwak, a me sramsram in pal meeta akkalemye ma paye ke kas lal. Ke pal se met kulansap lun Jeova elos oaru, el nunkelos, akkapyelos, a kurunginelos. El sang kutangla nu selos lain met lokwalok lalos in pal meeta. Ke len inge, el kasrelos in fukoko pal nu kemwa ke ma lun ngun a el mwolela nu selos ke molela su tuku ke me kise lun Jisus. (Rom 5:9) El oru ou inge meyen elos oasku ye mutul.
2. Fwinne elos sun ma upa, met lun God elos ku in lalalfongi ke mea?
2 Aok, ke sie fwal su arulanu losr, elos su “lungse in moulkin moul mutal” elos fwa sun kolyai. (2 Timote 3:12) Fwinne ou inge, Jeova el loang nu sin met lokwalok inge, a el sang kas in sensen nu selos: “Tu mutanfwal se a togusrai se su tia lungse orekma nu sum fwa tula.” (Isaia 60:12) Ke len inge, me lain ku in sikyuk ke kain in luma puspis. In kutu an, met lokwalok elos srike in kutongye alu su met Kristian oaru elos oru nu sin Jeova. In kutu an, met fanatics ku met su moniyuk ke alu lalos elos akngalye na paye met su alu nu sin Jeova a esukak pa ma lalos. Tusruktu lela kut in esam pal nu kemwa la, Jeova el oakiye tari saflaiyen met nu kemwa su lainel in akpayeye akmwuk lal. Met lokwalok nu kemwa elos tia kutangla. Elos nu kemwa su lain Zion, su tulik nutul aoliyen fwin fwalu, elos tia ku in kutangla. Ya tia sie me akkeye na paye pa inge su tuku sin God fulat, Jeova?
Akinsemwomwoyeyuk Yok Ma Elos Nunku
3. Fuka oasku a fwako mwomwo lun met nu kemwa su alu nu sin Jeova akkalemyeyuk?
3 Arulanu paye la ke lusen saflaiyen akmwuk inge, Jeova el akinsemwomwoye na paye met lal yok liki ma elos nunku. El tafwela in akmwoye an in alu lal a elos nu kemwa su pangpang nu ke el. Fwal nu ke kas palu lal Isaia, el fwakak ou inge nu Zion: “Mwolanu lun Lebanon fwa tuku nu yurum, sak fus a pam, a sak box pa, in akoaskuye nien loom mutal sik; a Nga fwa oru nien niuk mwolanu.” (Isaia 60:13) Eol puspis su nenela ke insak arulanu mwo in liyeyuk. Ke ma inge sak mwolanu puspis pa sie akul lun oasku a kapkapek lun met nu kemwa su alu nu sin Jeova.—Isaia 41:19; 55:13.
4. Mea se inge “loom mutal” a “an lun nien,” [Jeova] a fuka ma inge akmwoyeyuk?
4 Mea se inge “loom mutal” ke “nien [Jeova]” su sramsramkinyuk in Isaia 60:13? Kas se inge el sramsram ke inkalkal lun tempel lulap in ngun lun Jeova, su pa inge akmwuk lal in osun nu sel ke alu ke inkanek lun Jisus Kraist. (Hibru 8:1-5; 9:2-10, 23) Jeova el akkalemye akmwuk lal in akfulatye tempel in ngun inge ke el esani met puspis lun mutanfwal nu kemwa in tuku a alu we. (Haggeai 2:7) Isaia el liye u lun met puspis meet su tuku nu ke eol lun Jeova su lumeyuk nu ke akmwuk fulat lal ke alu in alu we. (Isaia 2:1-4) Foko puspis lun yiu toko, met sap Jon el liye ke sie arurumu “sie u lulap, su wangin met ku in oekla, sin mutanfwal nu kemwa, a sin sruf nu kemwa, a fwil nu kemwa, a loa nu kemwa.” Elos tu “ye mutun tron lun God . . . , a elos kulansapul len a fong in tempel lal.” (Fwakyuk 7:9, 15) Kas palu se inge akpayeyuk in len lasr, a kut ku in liye na paye la loom sin Jeova akmwoyeyuk ye mutusr.
5. Mea ekla lulap nu ke ma mwo tulik nutul Zion elos pulakin?
5 Sie kapkapek na paye pa inge a ma inge nu kemwa orek ke Zion! Jeova el fwak: “Ke kom filiyuki a srungeyuk, a ou inge wangin met alikikomla, Nga fwa orek kom sie ma mwolanu nu tok, me engun nu sin fwil puspis.” (Isaia 60:15) Ke saflaiyen meun lulap akluo, “Israel lun God” el pulakin sie pal in oanu ma musalla. (Galetia 6:16) El pulakin oanu “el filiyuki,” meyen tulik nutul nu kemwa fwin fwalu elos tia etu mea ma lungse lun God. Na, in yiu 1919, Jeova el oru met kulansap akmusrala lal in tukakak, a mutamwauk ke pal ingo el akinsemwomwoyelos ke kapkapek sakuruk in ngun. Sayen ma inge, ya tia sie me insemwomwo na paye in liye mwolela su oasr ke fus inge? Nunuk lun Jeova ke Zion pa “ma mwolanu” se. Aok, mwen nutin Zion, a Jeova elos insemwomwo ke Zion. El sie “me engun,” sropon me insemwomwo yok. A ma inge tia orek ke lusen kitin pal na. Me insemwomwo ke Zion, su tulik nutul nu kemwa fwin fwalu elos aol fwa oan nu tok ma patpat, “fwil nu ke fwil.” El tia tui.
6. Fuka met Kristian paye elos orekmakin me kasrup lun mutanfwalu?
6 Porongo ingenu ke siepa mwolela mutal. Ke pal se el sramsram nu ke Zion, Jeova el fwak: “Kom fwa titi pa titi lun mutanfwalu, a kom fwa titi ke imwen togusra; a kom fwa etu tu Nga, Jeova, Met Lango lom, a Met Molela lom, El su Ku in Jekob.” (Isaia 60:16) Fuka Zion el titi ke “titi lun mutanfwal” a “titi ke imwen togusra”? Kalmen ma inge pa, met Kristian akmusrala a “sip ngie” su oelulos elos fwa orekmakin me kasrup saok lun mutanfwalu in akkapye alu nasnas. (Jon 10:16) Me kasru su tuku ke insielos sang kasru yok ke orekma in luti a fwakak fwin fwalu nu fon. Orekmakinyen nien orekma mwo a kofwen orekma sasu akfwusesrye orekma in orala me rid ke Baibel ke kain in kas puspis. Ke len inge, oasr pal mwo lun met puspis in eis ma paye ke Baibel yok liki meet. Citizen lun mutanfwal puspis, elos lutlut a akilen la Jeova, su sifwil molela met kulansap akmusrala lal tu in sifwil kafofo ke orekma in ngun, pa Met Molela na paye.
Kapkapek Ke Orekma in Kurunganang U
7. Kain kapkapek mwolanu fuka tulik nutul Zaion elos pulakin?
7 Jeova el akoaskuye met lal ke siepa inkanek. El kasrelos in kapkapek oanu sie u. Kut ku in rid in Isaia 60:17: “Ke brass Nga fwa wise gold, a ke mwusra Nga fwa wise silfer, a sak brass, a ke eot mwusra, Nga fwa oru pa met roso lom misla, a leum lom sumwosmwos.” In ayaola brass nu ke gold sie kapkapek pa inge, a ma inge paye pa ke kutu kofwen me musa su akkalemyeyuk ke fus inge. In fwal nu ke ma inge, Israel lun God el pulakin kapkapek na paye ke u ke lusen len safla se inge. Loang akmwoye ke kutu nu ke ma inge.
8-10. Akkalemye kutu kapkapek ke u su sikyuk ke yiu 1919.
8 Meet liki 1919, congregation puspis lun met lun God elos muta ye koko lun met elder a deacon, elos inge nu kemwa sulosola sin met nu kemwa in congregation ke inkanek lun vote. Mutamwauk ke yiu inge, “met kulansap oaru a lalmetmet” elos pakiye sie service director ke kais sie congregation in kurunganang orekma lun forfor. (Mattu 24:45-47) Tusruktu, kain in akmwuk inge tia orekma nu ke kutu congregation meyen kutu sin met elder su sulosolla ke inkanek lun vote tia lungse in akesrui ke orekma in luti forfor. Ke ma inge, in yiu 1932, sapkinyuk nu ke congregation nu kemwa in aksafyela akmwuk lalos in vote ke met elder a deacon. Akmwuk sasu pa, elos enenu in sulela ku vote mokul nu kemwa su akola in kulansap nu ke sie service committee a in wi orekma yurin service director. Sie kapkapek pa inge—oanu “sak” nu ke “brass”!
9 In yiu 1938, congregation nu kemwa fwin fwalu nu fon elos insese in eis sie akmwuk su arulanu kapkapek, kain in akmwuk su fwal nu ke Kas lun God. Orekma in kurungin congregation etukyung nu sin sie company servant a kutupa servant, elos inge nu kemwa pakiyuki sin met kulansap oaru a lalmetmet. Wanginla elections! Ke ma inge akmwuk nu kemwa in pakiye sie met su liaung congregation orekla ke inkanek lun theocratic. Sie kapkapek pa inge oanu “eot” nu ke “mwusra” ku “brass” nu ke “gold.”
10 Mutamwauk ke pal ingo kapkapek tia tui. Ke sie me pupulyuk, in yiu 1972 elos akilen la congregation nu kemwa su muta ye liaung lun sie un met elder su pakiyuki ke inkanek lun theocratic, a wangin met elder su fulat liki kutu, ma inge oanu akmwuk in liaung su orekmakinyuk ke century se meet ke congregation lun met Kristian. Sayen ma inge, ke yiu luo somla, siepa step ke kapkapek akilenyuk. Sie akmwuk sasu orekla ke directorship lun kutu legal corporation, ma inge akmwesasye Governing Body a sang pal mwo lalos in loang yok nu ke me enenu in ngun lun met lun God a tia sifwil kafofo ke akmwuk lun fwalu se inge ke ma sap.
11. Su sropon ekla lulap ke u inmaslon met lun Jeova, a mea fwokin ekla inge nu kemwa?
11 Su sropon kapkapek a ekla inge nu kemwa inge? Arulanu kalem la Jeova God pa sropon ma inge. El pa fwak: “Ke brass Nga fwa wise gold.” A el fwa fwak: “Nga fwa oru pa met roso lom misla, a leum lom sumwosmwos.” Aok, Jeova pa oasr kunokon in liaung nu sin met lal. Kas palu se inge ke kapkapek lun u el siepa inkanek in akmwoye met lal. A ke sripe se inge Met Lo lun Jeova elos eis me insemwomwo ke inkanek puspis. In Isaia 60:18, kut ku in rid: “Silolel fwa tia sifwil longyuk in fwal sum, sukela ku kunausten in siskenfwal sum. A kom pa pangon pot lom Lango, a mutanpot lom Kaksak.” Arulanu kato na paye kas inge! Tusruktu, fuka ma inge el akpayeye?
12. Fuka misla lulap oasr yurin met Kristian paye nu kemwa?
12 Met Kristian paye elos ngetuk nu sin Jeova pal nu kemwa ke lutlut a me kasru, a fwokin ma inge fwal nu ke ma Isaia el palye: “A tulik nutum nu kemwa fwa lutiyuk sin Jeova, a misla lun tulik nutum fwa yok.” (Isaia 54:13) Sayen ma inge, ngun mutal lun Jeova orekma nu sin met lal, a sie fwako lun ngun mutal pa misla. (Galetia 5:22, 23) Misla inmaslon met lun Jeova orelos in oanu nien mwukla ke sie fwal koluk. Misla lalos, su tuku ke lungse paye lun met Kristian nu sin sie sin sie, pa sie kain in moul su e fwa oasr ke sie fwal sasu. (Jon 15:17; Kolosse 3:14) Paye, kais sie sesr arulanu lungse in engunkin a in akkeye misla se inge su ku in sang kaksak a akfulat nu sin God lasr a pa inge ip yok ke paredais in ngun lasr!—Isaia 11:9.
Kalem lun Jeova El Tafwela in Tolak
13. Efu kut ku in lalalfongi la kalem lun Jeova ma patpat oan yurin met lal?
13 Ya kalem lun Jeova el tafwela in tolak nu sin met lal? Aok, in Isaia 60:19, 20, kut ku in rid: “Fwatu fwa tia sifwil kalem lom ke len, a malem fwa tia tol kom in saromrom. A Jeova el fwa sie kalem ma patpat nu sum, a God lom mwolanu lom. Fwat lom fwa tia sifwil tili, ku malem lom wanginla; tu Jeova el fwa kalem ma patpat lom, a len in memelil lom fwa safla.” Ke pal se “memelil” ke sripen srou in ngun aksafyeyukla in yiu 1919, kalem lun Jeova mutamwauk in tolak nu selos. Yiu 80 somla tari, elos srakna engunkin insemwomwo lun Jeova meyen kalem lal tafwela in tolak nu selos. Ma inge fwa tia tui. Nu sin met nu kemwa su alu nu sel, God lasr el tia “tili” oanu fwat ku el oanu malem su “wanginla.” A, el fwa kalem ma patpat nu selos. Sie me akkeye mwolanu na paye pa inge nu sesr kemwa su moul ke len safla lun fwal koluk inge!
14, 15. (a) Ke inkanek fuka met nu kemwa lun God elos met “sumwosmwos”? (b) Fwal nu ke Isaia 60:21, sip ngie elos ngetuk nu ke akpayeye saok lun mea ke pal fwasru?
14 Porongo, ingenu, meyen oasr siepa mwolela lun Jeova nu sin met nu kemwa ke Israel lun God fwin fwalu su aoliyen Zion. Isaia 60:21 el fwak: “Ouyepa met lom nu kemwa fwa sumwosmwos; elos fwa usru fwal se ma patpat, laa in eoki luk, orekma lun pouk, tu Nga fwa akmwoyeyuk.” In 1919 ke pal se met Kristian akmusrala elos sifwil foloko nu ke orekma lalos, elos tia oanu u puspis lun met fwin fwalu. Ke sie fwal koluk inge, elos nu kemwa “akmsumwosyeyuk tari” ke sripen lalalfongi ku lalos ke me kise lango lun Kraist Jisus. (Rom 3:24; 5:1) Na, oanu met Israel su sukosokla liki srou lalos fwin an Babulon, elos inge eis pa sie “an,” sie an in ngun, ku an in orekma, ke an se inge elos ku in pulakin paredais in ngun. (Isaia 66:8) Oasku lun an inge su oanu Paredais tia ku in wanginla meyen Israel lun God elos oaru, tia oanu met Israel in pal meeta su suoaru paenang an selos tula lukelos. Lalalfongi lalos, muteng lalos, a moniyuk lalos tia ku in wanginla paenang elos sang mwolanu ke en God.
15 Met nu kemwa su wi ke mutanfwal in ngun inge elos wi ke mwoleaung sasu. Ma sap lun Jeova simusyukla nu ke insielos, a Jeova el sang nunuk munas nu ke ma koluk lalos, ke sripen me kise lango lun Jisus. (Jeremaia 31:31-34) El aksumwosyelos oanu “mwen” nutul a el nunkelos oanu met sumwosmwos. (Rom 8:15, 16, 29, 30) Sip ngie su welulos elos ouyepa eis nunuk munas ke ma koluk lalos ke inkanek lun me kise lal Jisus, a oanu Ebream, aksumwosyeyuk pa oanu met kamwuk lun God ke sripen lalafongi lalos. “Elos owo nuknuk lalos, a akfwofwosrye in sran Lam.” A sip ngie su welulos elos ngetuk nu ke pal fwasru ke sie me insemwomwo lulap. Tokin elos moula liki “ongoiye lulap” ku tokin elos sifwil moulyuk, elos fwa liye fwa liye na paye ke mutalos akpayeye lun ma simusla in Isaia 60:21 ke pal se fwalu nu fon ekla nu ke sie paredais. (Fwakyuk 7:14; Rom 4:1-3) Ke pal inge, “A met fwokpap elos fwa usru fwalu, a fwa sifwanu akengunyelos in misla puspis.”—Sam 37:11, 29.
Kapkapek El Tafwela
16. Kain in mwolela sakuruk fuka Jeova el orala, a fuka ma inge akpayeyuk tari?
16 Ke fus safla lun Isaia sapter 60, kut ku in rid mwolela safla lun Jeova. El fwak ke Zion: “El su srik fwa ekla siu, a el su fwusr sie mutanfwal ku. Nga Jeova, fwa aksaye in pal se.” (Isaia 60:22) Ke len lasr misenge, Jeova el akpayeye ma el mwolela. Ke pal se met Kristian akmusrala elos sifwil foloko ke orekma lalos in yiu 1919, piselos arulanu supus—paye, arulanu “srik.” Piselos kapkapek ke pal se toeni nu selos kutu sin met su wi ke Israel in ngun. Na tok, sip ngie mutamwauk in tuku nu selos ke sie pise su yokyokelik. Misla yok lun met lun God, paredais in ngun su oasr ke “an” lalos, purakak met fwokpap puspis paenang “el su srik” inge, el ekla nu ke “sie mutanfwal ku.” Ke pal inge, “mutanfwal inge”—Israel lun God a “metsa” su mwolela tari su piselos oasr ke million onkosr kutu—elos pus liki pisen met ke mutanfwal puspis fwin fwalu. (Isaia 60:10) Citizen nu kemwa lal akkalemye kalem lun Jeova, paenang elos inge nu kemwa arulanu oasku ye mutul.
17. Fuka me sramsram inge in Isaia sapter 60 purakak insiom?
17 Aok, sie me akkeye na paye ke lalalfongi in sramsramkin me lutlut yok ke buk lun Isaia sapter 60. Sie me pwarak na paye in liye la ke mutamwauk me, Jeova el etu la met lal efwa muta ke sruo in ngun a fwa sifwil sukosok. Ma inge arulanu aklutye kut, meyen Jeova el etu tari ke mutamwauk me la oasr kapkapek lulap lun met alu paye nu kemwa in len lasr. Sayen ma inge, sie me insemwomwo na paye in esam la Jeova el fwa tia som liki! Sie me akkeye na paye in etu la mutunpot lun “siti” se fwa ikakla pal nu kemwa in eis met nu kemwa su “pakiyuki nu ke moul ma patpat”! (Orekma 13:48) Jeova el kalem nu sin met lal pal nu kemwa. Zion el tafwela in sropon me insemwomwo ke pal se tulik nutul elos tafwela in lela kalem lalos in saromromelik. (Mattu 5:16) Paye, kut kaifweung na paye in futoto nu ke Israel lun God pal nu kemwa a aksaokye me sang nu sesr kemwa in akkalemye kalem lun Jeova!
Ya Kom Ku In Aketeye?
• Kut fwin sramsram ke me lain, kut ku in lalalfongi ke mea?
• Fuka mwen nutin Zion elos ‘titi ke titi lun mutanfwalu’?
• Ke inkanek fuka Jeova el ekula ‘sak nu ke brass’?
• Kain in oiye luo fuka akkalemyeyuk in Isaia 60:17, 21?
• Fuka “el su srik” ekla “sie mutanfwal ku”?
[Box/Pictures on page 28]
KAS PALU LUN ISAIAH—Kalem lun Met Nu Kemwa
Me lutlut saok ke me sramsram inge akkalemyeyuk ke sie me sramsram yok su orekla ke 2001/02 Toeni Lulap lun District pangpang “Met Luti ke Kas lun God”. Ke saflaiyen sramsram, met sramsram el kitakut ke an puspis buk sasu se inge su oasr sifwe Isaiah’s Prophecy—Light for All Mankind, Volume Two. Ke yia tari’a, buk inge, Isaiah’s Prophecy—Light for All Mankind, Volume One elos kitakut tari. Ke sripen oasr yurosr ingenu buk sasu inge, paenang kut ku in sramsram fus nu ke fus ke buk lun Isaia ke pal inge. Volume luo inge sie me kasru na paye in akyokye kalem lasr a insemwomwo lasr ke buk mwomwo lun Isaia su oasr kas palu mwolanu.
[Pictures on page 25]
Ye me lain upa, ‘Jeova el akmwoye met lal ke molela’
[Pictures on page 26]
Met lun God elos orekmakin me kasrup lun mutanfwalu in akkeye alu nasnas
[Picture on page 27]
Jeova el akinsemwomwoye met lal ke kapkapek lun u a misla