Me Insemwomwo Lun Jeova Ke “Fwal” Lasr

“A ma nu kemwa fwa moul yen nu kemwa infwalu tuku nu we.”—EZEKIEL 47:9.

KOF arulanu yok sripe. Ma moul nu kemwa su ku in liyeyuk elos e mise fwin wangin ma inge. Wangin fwinne sie met inmaslosr su ku in moul fwin wangin ma inge. Kut arle enenu pa ma inge ke aknasnas, meyen kof el ku in eisla a aknasnasye ma fokfok. Ke ma inge kut olla manosr, nuknuk a mongo nesr ke ma sa. Moul lasr ku in molela kut fwin oru ou inge.

² Baibel el orekmakin kof in pupulyukin nu ke me sang in ngun lun Jeova ke moul. (Jeremaia 2:​13; Jon 4:​7-​15) Wikin me sang inge pa akmwuk in aknasnas nu sin met lal ke inkanek lun lango lal Kraist a ke etauk lun God su ku in konoiyukyuk ke Kas Lal. (Efesus 5:​25-​27) Ke arurumu lal Ezekiel ke tempel, infwal soko su orek menmen su surorla liki tempel el pitse nu ke me insemwomwo su ku in wise moul. Tusruktu nge infwal se inge el suror, a mea kalmen ma inge nu sesr ke len inge?

Infwal Soko El Suror nu ke Fwal Su Sifwil Oakiyuki

³ Oanu met kos fwin an Babulon, met lal Ezekiel elos enenu na paye me sang lun Jeova. Ke ma inge, fuka sie me akkeye na paye meet, nu sel Ezekiel in liye suror lun kof el tuku liki loom sin Jeova a el suror nu ke tempel ke arurumu! Sie lipufon el srikeye inmaslon kubit sie tausen infwal soko inge. El mutamwauk in loal, kof sun kapinnie, inti, infwulwe, kofu el lapak paenang fwal in kofkof lu. Infwal el sang moul a kapek. (Ezekiel 47:​2-​11) Kas inge fwakak nu sel Ezekiel: “A sisken infwalu fwin pefwalu, leyenu a leyeno, sak nu kemwa ke me mongo fwa kapak.” (Ezekiel 47:​12a) Ke pal se ma infwal se inge el suror nu ke mwea se inge pangpang Dead Sea​—sie mwea su wangin ma moul ka​—na ma moul mutamwauk in sikyuk! Puseni ik. Sie orekma in patur arulanu kapkapek.

⁴ Kas palu kato inge akismakinye met Ju su muta in kos ke siepa kas palu su simusyukla pus liki century luo somla. “A sie unon in kof fwa illa liki loom sin Jeova, a fwa akeouye infwalfwal lun Sak Acacia.”a (Joel 3:​18 NW) Kas palu lal Joel, oanu kas palu lal Ezekiel, el palye la infwal soko el surorla liki loom sin God, pa tempel, a el sang moul nu ke an su wangin kof.

⁵ The Watchtower el aketeye ke lusen yiu puspis la kas palu lal Joel el akpayeyuk ke len lasr.b Ke ma inge, arulanu paye ou inge ke arurumu lal Ezekiel su oanu kas palu la Joel. Ke fwal lun met lun God su sifwil oakiyuki, me insemwomwo puspis lun Jeova el suror na paye.

Sie Suror Fukoko ke Me Insemwomwo

⁶ Mea srupon me insemwomwo nu sin met lun God su sifwil foloko? Tuni, meyen kof el illa liki tempel lun God. In oupanu, misinge, me insemwomwo el tuku sin Jeova ke inkanek lun tempel lulap lal in ngun​—akmwuk ke alu nasnas. Oasr pa kutu ma saok ke arurumu lal Ezekiel. Ke inkalkal lu, kof se inge el suror alukela liki me loang, leyen epang lal. (Ezekiel 47:1 NW) Loang se inge oasr infwulwen tempel ke arurumu. Jeova el aketeye mwo ma inge nu sel Ezekiel a el sapkin in aksroksrokye ma inge ke sran me kise. (Ezekiel 43:13-​18, 20) Oasr kalme yok lun loang inge nu sin met Israel. Mwoleaung lalos nu sin Jeova oakiyuki in pal meeta ke pal se ma Moses el aksroksrokye loang fwin Eol Sainai ke sra. (Exodus 24:​4-8) Orekma in aksroksrokye loang ke sra ke arurumu se inge akismakinyelos la, ke pal se ma elos foloko nu ke fwal selos su sifwil oakiyuki, me insemwomwo lun Jeova el suror pal nu kemwa elos fwin akfulatye mwoleung lalos nu sel.​—Duteronomi 28:​1-​14.

⁷ In oupanu, met lun God ke len inge akinsemwomwoyeyuk ke inkanek lun sie mwoleaung​—sie su mwo liki, mwoleaung sasu. (Jeremaia 31:31-​34) Ma inge oakiyuki pa tari in pal meeta ke sripen sra, aok, sran Jisus Kraist. (Hibru 9:​15-​20) Ke len inge, fwinne kut wi sin met akmusrala, su wi ke mwoleung inge, ku fwinne kut wi ke “sip ngie,” su oasr ma lane su ku in eis ka, kut ku in konaok kalme yok ke loang inge ke arurumu. Ma inge el pitse ke ma lungse lun God su kapsreni nu ke me kise lal Kraist. (Jon 10:16; Hibru 10:10) Oanu loang se inge ke arurumu su oasr ke infwulwen tempel in ngun, lango lal Kraist el ouyepa center lun alu nasnas. Ke sripen lango nunuk munas ke ma koluk lasr kut ku in eis a ke ma inge fwinsrak lasr nu fon ke pal fwasru oakiyuki nu ka. (1 Jon 2:2) Kut kaifweung na paye in moul fwal nu ke ma sap su kapsreni nu ke mwoleaung sasu, “ma sap lun Kraist.” (Galetia 6:2) Kut fwin oru ou inge, kut ku in eis ma lane su tuku ke me sang lun Jeova ke moul.

⁸ Sie nu ke ma lane pa moul nasnas ye mutun Jeova. Ke tempel ke arurumu, oasr ma wangin ke inkalkal lu su arulanu pengpeng meet ke inkalkal lun loom alu ke tempel lal Solomon​—sie alu lulap, su tok ma inge pangpang mwea, nien wonwon lun met tol. (Exodus 30:18-​21; 2 Kronikel 4:​2-6) Mea met tol ke arurumu lal Ezekiel ke tempel elos orekmakin in aknasnasyelos? Aok, elos ku in orekmakin kof ke infwal su suror nu ke inkalkal lu! Aok, Jeova el akinsemwomwoyelos ke sie inkanek tu elos in ku in engunkin sie moul mutal, a nasnas ye mutal.

⁹ In oupanu ke len lasr, met akmusrala elos akinsemwomwoyeyuk ke sie moul nasnas ye mutun Jeova. Jeova el liyelos oanu mutal, a el aksumwosyelosla. (Rom 5:​1, 2) A fuka “u lulap,” su lumeyuk nu ke sruf su tia met tol? Elos alu ke inkalkal lik, a infwal siefwunnu el suror pa ke an inge lun tempel ke arurumu. Ke ma inge, arulanu fwal, ke pal se met sap Jon el liye u lulap nukomang nuknuk fwasrfwasr elos alu ke inkalkal lun tempel in ngun! (Fwakyuk 7:​9-​14) Fwinne fwalu koluk se inge pilesrelos ku akkolukyelos, elos ku in lalalfongi la Jeova el liyelos oanu sie met nasnas a mutal, elos fwin tafwela in akkalemye lalalfongi ke lango lal Kraist. Fuka elos akkalemye lalalfongi lalos? Ke inkanek in fwasr tokin me srikasrak lal Jisus, meyen oasr yurolos lalalfongi yok ke lango.​—1 Piter 2:​21.

¹⁰ Oanu ma akkalemyeyuk tari, oasr pa kutu ma yok sripe ke kof se inge ke arurumu​—etauk. Nu sin met Israel su sifwil foloko, Jeova el akinsemwomwoye met lal ke me lutlut puspis in ngun ke inkanek lun met tol. (Ezekiel 44:23) In oanu ma inge, Jeova el akinsemwomwoye met lal ke len inge ke me luti puspis ke Kas paye lal, ke inkanek lun “met tol leum.” (1 Piter 2:9) Etauk ke Jeova God, ke akmwuk lal nu sin metu, ke Jisus Kraist a ke Togusrai lal ye koko lun Messaia ma inge nu kemwa el suror oanu infwal ke lusen len safla se inge. Arulanu yok na paye me mongle in ngun su kut ku in eis ke kof se inge su suror a lapak!—Daniel 12:4.

¹¹ Oanu infwal su lapak su lipufon inge el srikeye, suror lun me insemwomwo lun Jeova su ku in sang moul arulanu kapkapek tu lan ku in akfwalye nu sin met su muta ke fwal in ngun mwo lasr su arulanu puseni. Siepa kas palu ke sifwil oakiyuki el fwak: “El su srik fwa ekla sia, a el su fwusr sie mutanfwal ku. Nga Jeova fwa aksaye in pal se.” (Isaia 60:22) Kas se inge el akpayeye​—million puspis sin met elos tuku in wi kut ke alu nasnas! Jeova el oru in yok “kof” su met nu kemwa su forla nu sel elos ku in eis. (Fwakyuk 22:17) El oru na paye u lal fwin fwalu in ku in kitakut Baibel puspis a me rid puspis su tuku ke Baibel fwin fwalu nu fon, ke kain in kas puspis. In oupanu, meeting lun met Kristian a toeni lulap orekla fwin fwalu nu fon in kasru met nu kemwa in eis kof nasnas lun ma paye. Fuka me sang inge el purakak metu?

Kof El Wise Moul!

¹² Infwal ke arurumu lal Ezekiel el wise moul a ku lun mano. Ke pal se ma Ezekiel el akilen sak puspis su kapek sisken infwal, na kas se akkalemyeyuk nu sel: “A sra ka fwa tia paola, ku fwako ka tarla. . . . A fwako ka fwa me mongo, a sra ka fwa me akkeye.” Efu sak inge el oswela fwako ke inkanek sakuruk? “Tu kof we​—suror liki loom mutal.” (Ezekiel 47:12b) Sak inge ke arurumu el lumeyuk nu ke me sang lun God in sifwil folokonang moul sumwosmwos nu sin met ke inkanek lun me kise lango lal Kraist. Fwin fwalu ke pal inge, met akmusrala lula elos kol ke orekma in kitakut me mongo a me akkeye in ngun. Tokin met nu kemwa ke 144,000 elos eis tari me usru lalos in kosrao, ma lane su tuku ke orekma lalos oanu met tol a met kol wilul Kraist el tafwela nu ke pal fwasru, ke saflaiye el kutangla liki mise su tuku sel Edam.​—Fwakyuk 5:​9, 10; 21:​2-4.

¹³ Infwal ke arurumu el suror nu ke mwea su wangin ma moul ka pangpang Dead Sea a el akkeye ma nu kemwa su el sun. Mea se inge el lumeyuk nu ke ma raunekutla nu kemwa su mise in ngun. Tusruktu ma moul el sikyuk “yen nu kemwa kof inge su lapak suror nu we.” (Ezekiel 47:9) In oupanu, ke len safla, met nu kemwa su kof in moul inge el sun elos oanu moulyuk in ngun. Met se meet su moulyuk pa met akmusrala lula ke yiu 1919. Elos tia orekma, elos tuku liki mise, a folokla nu ke moul in ngun. (Ezekiel 37:​1-​14; Fwakyuk 11:​3, 7-​12) Mutamwauk ke pal inge, kof saok inge el sun kutupa met su mise in ngun, a elos moul a orala sie u su arulanu kapkapek pangpang u lulap lun sip ngie, su lungse a kulansap nu sin Jeova. Tia pat toko, me sang inge el sun million puspis lun met su e fwa sifwil moulyuk.

¹⁴ Ku in ngun kol nu ke kapkapek. Ma inge akkalemyeyuk ke orekma in patur su arulanu kapkapek ke mwea se inge su wangin ma moul meet. Jisus el fwak nu sin met tumal lutlut lal: “Nga fwa ore komtel met kwa met.” (Mattu 4:​19) Ke len safla se inge, orekma in patur el mutamwauk ke pal in esani lun met akmusrala, tusruktu tia ke pal inge. Kof su sang moul su tuku ke tempel in ngun lun Jeova, wekunang etauk sumwos, el sun met nu kemwa ke mutanfwal nu kemwa. An nu kemwa kof inge el sun, moul in ngun el sikyuk.

¹⁵ Paye, tia met nu kemwa ke pal inge elos insemwomwo ke peng mwo lun moul; fwinne kutu selos su e fwa sifwil moulyuk ke lusen Tausen Yiu Kolyuk lal Kraist. (Isaia 65:20; Fwakyuk 21:8) Lipufon el fwak la kutu an lun mwea tia akkeyeyuk. An furarar, an su wangin ma moul inge ‘etukyung nu ke sol.’ (Ezekiel 47:11) Fwin ke met ke len inge, tia met nu kemwa su eis me solsol in eis kof in moul lun Jeova elos eis. (Isaia 6:​10) Ke pal lun Armagedun, elos nu kemwa su sulela in muta na ke sie luma su wangin moul a mas elos fwa etukyung nu ke sol, elos inge, mise ma patpat. (Fwakyuk 19:11-​21) Tusruktu, elos nu kemwa su oaru in nim ke kof inge elos ku in fwinsrak in moul a liye akpayeye safla lun kas palu inge.

Infwal El Suror Nu Ke Paredais

¹⁶ Oanu kutu kas palu ke sifwil oakiyuki, arurumu lal Ezekiel ke tempel el akpayeye nu fon ke lusen pal in millenium. Ke pal inge un met tol wanginla fwin fwalu. “Elos fwa met tol lun God a lun Kraist, a elos fwa togusra yurol [in kosrao] sie tausen yiu.” (Fwakyuk 20:6) Met tol inge in kosrao elos akesrui sel Kraist ke orekma in sang me insemwomwo nu fon su tuku ke lango lal Kraist. Ke ma inge met sumwosmwos nu kemwa fwa moliyukla, elos sifwil foloko nu ke moul sumwosmwos!​—Jon 3:​17.

¹⁷ Ke ma inge, infwal su Ezekiel el liye el e fwa suror kof in moul su fokoko emeet. Pa inge pal in akpayeye na paye lun kas palu su akkalemyeyuk in Fwakyuk 22:​1, 2: “A el fwakak nu sik infwal lun kof in moul, saromrom oanu kristal, surorla liki tron lun God, a Lam, infwulwen inkanek lal. A sak lun moul on sisken infwal lefwalu a lefwalo, a isus fwako, kain in siengoul luo, a el fwok in malem nu kemwa. A sra sak soko inge me akkeye lun mutanfwal.”

¹⁸ Ke lusen pal in millenium, kain in mas nu kemwa​—in mano, nunuk, inse​—e fwa akkeyeyuk. Ma inge el pitse ke “me akkeye lun mutanfwal” ke inkanek lun sak puspis ke me pupulyuk. Kulo ke me sang su tuku sin Kraist a 144,000, “met su muta we fwa tia fwak: ‘Nga mas.’ ” (Isaia 33:24) A infwal el tuku ke pal in lapak na paye lal. Enenu in akloalye a aksralapye tu in fwal nu sin million puspis ku saap billion puspis lun met su e fwa sifwil moulyuk su akola in nim kof nasnas inge lun moul. Infwal ke arurumu el akkeye mwea su pangpang Dead Sea, el sang moul ke an nu kemwa el suror nu we. In Paredais, mokul a mutan elos fwa moul ke sie moul paye, meyen elos fwa akkeyeyuk liki mise su tuku sel Edam elos fwin akkalemye lalalfongi ke ma lane su tuku ke lango su etukyung nu selos. Fwakyuk 20:12 el akkalemye la sie “buk” e fwa ikakla ke len inge, in toeni kutu kalem su met inge nu kemwa su sifwil moulyuk elos eis ma lane ka. Sie me asor, meyen kutu sin met elos srunga me akkeye, fwinne in Paredais. Met koluk inge pa lumeyuk nu selos su ‘etukyung nu ke sol’ lun nununku ma patpat.​—Fwakyuk 20:​15.

¹⁹ Ouyepa, ke pal ingo, kitakatelik lun an ke arurumu lal Ezekiel el sun akpayeye safla lal. Ezekiel el liye la an inge kitakatelik ke inkanek fwal; in oupanu, kais sie met Kristian elos ku in lalalfongi na paye la oasr sie an lalos, sie me usru, in Paredais. Kalem la, kena lun sie met in oasr loom sel sifwanu tu lan muta ka a liaung e fwa akpayeyuk ke inkanek sumwos. (Isaia 65:21; 1 Korint 14:33) Siti su Ezekiel el liye el arulanu fwal in pitse ke akmwuk in kol su Jeova el akmwuki ke fwalu sasu. Un met tol akmusrala elos fwa tia muta in mano yurin metu. Arurumu el aketeye yok ke el akkalemye la siti se inge on ke “an tia mutal” a loes ke tempel. (Ezekiel 48:15) Ke pal se 144,000 elos wilul Kraist in kol in kosrao, tia ku in wangin met tutafpo lun Togusra fwin fwalu. Met nu kemwa su muta ye koko lal elos eis ma lane lulap su tuku ke kolyuk mwo a me kasru lun un met leum. Tusruktu, tia fwin fwalu pa nien muta lun guferment, a in kosrao. Met nu kemwa fwin fwalu wekunang met leum, elos fwa muta ye koko lun Togusrai lun Messaia.​—Daniel 2:​44; 7:​14, 18, 22.

²⁰ Tuni kas safla ke arurumu lal Ezekiel: “A en sitiu in len sa me fwa Jeova El Oasr We.” (Ezekiel 48:35) Siti se inge el tia oasr in sang ku nu sin met; ku el tia oasr in patokye ma lungse lun met. Siti lun Jeova pa inge, paenang el akkalemye nunuk lal a inkanek lungse sumwosmwos lal. (Jemes 3:​17) Ma inge el ase nu sesr me purakak inse oru kut in lalalfongi na paye la Jeova el akinsemwomwoye “fwalu sasu” lun met su el musa ke sie pal fwasru mwo su wangin saflaiye.​—2 Piter 3:​13.

²¹ Ya kut tia insemwomwo ke fwinsrak lasr ke pal fwasru? Ke ma inge, arulanu fwal, kais sie sesr ku in siyuk: ‘Fuka topuk luk ke me insemwomwo mwolanu su akkalemyeyuk ke arurumu lal Ezekiel? ‘Ya Nga oaru in sang kasru a akesrui ke orekma su met liaung mwo, met lula akmusrala, wekunang met su oasr fwinsrak in wi ke un met leum elos oru? Ya Nga orekmakin mwo kof in moul su arulanu suror yok ke len inge?’ Lela kais sie sesr in tafwela in oru ou inge, a akkalemye insemwomwo ke me sang lun Jeova ke pal fwasru ma patpat!

[Footnotes]

Fuka Kom Topuk?

◻ Kof su surorla liki tempel el lumeyuk nu ke mea?

◻ Kain in akkeye fuka Jeova el oru ke inkanek lun infwal ke arurumu a efu infwal se inge el lapak?

◻ Sak puspis sisken infwal el pitse ke mea?

◻ Siti se inge el pitse ke mea ke lusen pal in Kolyuk ke Millenium, a efu en siti se inge arulanu fwal?

[Study Questions]

1, 2. (a) Efu kof arulanu yok sripe? (b) Mea kof ke arurumu lal Ezekiel el pitse?

3. Mea experience lal Ezekiel, oanu ma akkalemyeyuk in Ezekiel 47:​2-​12?

4, 5. Fuka kas palu lal Joel ke infwal oanu sie ke arurumu lal Ezekiel, a efu ma inge arulanu yok sripe?

6. Orekma in aksroksrokye loang ke sra ke arurumu akismakinye met Ju ke mea?

7. Kain in kalme fuka met Kristian ke len inge elos konaok ke loang ke arurumu?

8. (a) Mea ma wangin ke inkalkal lu ke arurumu ke tempel? (b) Ke inkanek fuka met tol ke arurumu ke tempel elos ku in aknasnasyelos sifwanu?

9. Fuka met akmusrala a met nu kemwa su wi ke u lulap elos ku in srukye sie moul nasnas ke len inge?

10, 11. Mea orekma saok lun kof inge ke arurumu, a fuka ma inge el kapsreni nu ke infwal su arulanu lapak?

12. (a) Efu sak puspis ke arurumu lal Ezekiel elos ku in oswela fwako oanu ma elos oru? (b) Sak inge su arulanu oswela fwako el pitse ke mea ke len safla se inge?

13. Kain in orekma in akkeye fuka akpayeye ke lusen pal lasr?

14. Orekma in patur su arulanu kapkapek ke an nu kemwa sisken mwea se inge Dead Sea el akkalemye mea ke len inge?

15. Mea ma inge su akkalemye la tia met nu kemwa elos eis me sang lun God ke moul, a mea saflaiyen met inge nu kemwa?

16. Nge a fuka arurumu lal Ezekiel ke tempel el sun safla lal?

17, 18. (a) Fuka infwal inge su sang moul akkalemyeyuk in Fwakyuk 22:​1, 2, a nge pal in akpayeyuk yok ke arurumu se inge? (b) In Paredais, efu infwal lun kof in moul el lapak na paye ke pal inge?

19. (a) Fuka kitekatelik ke an akpayeyuk in Paredais? (b) Mea ma inge ke Paredais su el pitse ke siti? (c) Mea ma yok ke an se ma siti el muta su loes liki tempel?

20, 21. (a) Efu ku en siti se inge arulanu fwal? (b) Kain in kusensiyuk fuka ke kalem lasr ke Ezekiel mokle kut in siyuk sesr sifwanu?

[Pictures on page 21]

Infwal lun moul el lumeyuk nu ke me sang lun God ke molela