Jeova El Wise Mwen Puspis Nu Ke Mwolanu
“Tu fwal nu sel [God] ke el wise mwen puspis nu ke mwolanu, tu el fwa oru Kaptin lun Lango lalos sumwosmwoslanu ke keok.”—HIBRU 2:10.
JEOVA el orala fwalu tu in me muta ma patpat lun sie sou sumwosmwos su engunkin moul su wangin safla. (Ekklisiastis 1:4; Isaia 45:12, 18) Paye, papa matu tumasr pangpang Edam el oru ma koluk a ke ma inge el sang nu sin met nu kemwa ma koluk a mise oanu me usru lalos. Tusruktu akmwuk lun God nu sin metu e fwa akpayeye ke inkanek lun Fute Se Su El Mwolela, Jisus Kraist. (Genesis 3:15; 22:18; Rom 5:12-21; Galetia 3:16) Lungse lal nu sin metu moklel Jeova in sang “Mwen Siefwunnu Isusla nutul, tu el su lalalfongel fwa tia tula, a el fwa eis moul ma patpat.” (Jon 3:16) A lungse moklel Jisus “in sang moul lal in moli met puspis.” (Mattu 20:28) “Me mol” inge el sifwil molela ma sumwos a fwinsrak su Edam el tula a ma inge orala fwinsrak nu ke moul ma patpat in sifwil ikakla.—1 Timote 2:5, 6; Jon 17:3.
2 Sripen me kise lal Kraist el pitse ke Len in Orek Iumwe ke yiu nu kemwa. Ke len senpanu inge, met tol fulat lun Israel el kisekin meet kao mokul soko oanu me kise ke ma koluk a el wisla sran kao soko inge ke Tuptup lun Mwoleung su oasr ke infwokil mutal na mutal in loom sin God, a tok ke tempel. Ma inge el oru kel sifwanu, ke sou lal, a ke sruf lal Livai. In oupanu ou inge, Jisus Kraist el akkalemye nu sin God molin sral in afwunye ma koluk lun “ma wiel in ngun” meet. (Hibru 2:12; 10:19-22; Livitikus 16:6, 11-14) Ke Len in Orek Iumwe, met tol fulat el ouyepa kisekin goat soko oanu me kise ke ma koluk a el wisla sral ke Infwokil Mutal na Mutal, ke ma inge el orek iumwe ke ma koluk lun sruf 12 lun Israel su tia met tol. In oupanu, Met Tol Fulat Jisus Kraist el orekmakin sral in kasru met nu kemwa su akkalemye lalalfongi, a el ela ma koluk lalos.—Livitikus 16:15.
Utukla nu ke Mwolanu
3 Ke lusen 1,900 yiu, God el oru ma yok fwin ke “ma wiel” Jisus. Fwin ke ma se inge, met sap Poul el simusla: “A kut liye Jisus, su orekla pusisel kutu liki lipufon ke keok lun mise, akmwalyeyuk ke mwolanu a sunak, tu ke kulang lun God el fwa pulakin mise ke met nu kemwa. Tu fwal nu sel [Jeova God], su ma nu kemwa ma sel, a ma nu kemwa ma kel, ke el wise mwen puspis nu ke mwolanu, tu el fwa oru kaptin lun lango lalos sumwosmwoslanu ke keok.” (Hibru 2:9, 10) Kaptin lun Lango inge pa Jisus Kraist, su lutlut in akos sumwosmwos ke ma el keok ka a moul oanu sie met fwin fwalu. (Hibru 5:7-10) Jisus pa mwen kulu se meet su el wise nu ke mwolanu oanu mwen nutin God in ngun.
4 Jeova el orekmakin ngun mutal lal, ku lal, in akmwalyeyuk Jisus oanu Mwen nutul in ngun, a el wise nu ke mwolanu in ngun. Ke pal se ma el fwasr nu yurol Jon Baptais, Jisus el baptaisla in kof in sang akul la el akkalemyel sifwanu nu sin God. Gospel lal Luk el fwak: “A ma te oru ke met e nu kemwa baptaisla, a Jisus el ouyepa baptaisla a pre, na kosrao ikakla, a ngun mutal oatui nu fwel in luman mwulioa, a sie pusra tuku in kosrao me: ‘Kom Mwen kulu nutik, Nga insemwomwo keyum.’ ” (Luk 3:21, 22) Jon el liye ngun mutal el oatui nu fwel Jisus a el long pusren insese lun Jeova nu sel oanu sie Mwen kulu nutul. Ke pal inge, ke inkanek lun ngun mutal, Jeova el sulosola Jisus oanu mwen se meet ke ‘mwen puspis su el wise nu ke mwolanu.’
5 “Ma wiel” Kraist pa eis ma lane se meet ke me kise lal. (Hibru 2:12-18) Ke sie arurumu lal, met sap Jon el liyelos oanu oasr tari in mwolanu fwin Eol Saion in kosrao a Lam wilulos, Leum Jisus Kraist su sifwil moulyuk. Jon el ouyepa akkalemye piselos, el fwak: “A Nga suiye, a liye Lam el tu fwin Eol Saion, a oasr siefok anngoul akosr tausen yurol, simla tari El, a En Papa tumal fwin mutunsrolos. . . . Elos inge moliyukla liki metu, tu elos fwako se meet nu sin God a nu sin Lam, a wangin kikiap in oalulos; a wangin metalos.” (Fwakyuk 14:1-5) Ke ma inge pisen ‘mwen puspis su utukla nu ke mwolanu” in kosrao pa 144,001—Jisus a ma wiel in ngun.
“Isusla Sin God”
6 Elos nu kemwa su sulosola sin Jeova elos inge “isusla sin God.” Ke pal se ma el sramsram nu sin met inge, met sap Jon el simusla: “El su isusla sin God, el tia oru ma koluk, meyen fute Lal [Jeova] on in el, el koflanu oru ma koluk meyen el isusla sin God me.” (1 Jon 3:9) “Fute” se inge pa ngun mutal lun God. Su oru orekma fwal nu ke kas lal, ma inge sang nu sin kais sie met ke 144,000 “sie isusla sasu” ke sie fwinsrak in kosrao.—1 Piter 1:3-5, 23.
7 Jisus el Mwen nutin God ke mutamweyen isusla lal oanu sie met, oanu Edam su sumwosmwos meet, el “mwen nutin God pa.” (Luk 1:35; 3:38) Tusruktu, tukun baptais lal Jisus, arulanu yok sripe ke pal se ma Jeova el fwak: “Kom Mwen kulu nutik; Nga insemwomwo ke kom.” (Mark 1:11) Ke kas lal inge wekunang oatui lun ngun mutal nu fwel, arulanu kalem la God el sulosola Jisus oanu Mwen nutul in ngun. Ke kas in pupulyuk, oanu etukyung nu sel Jisus “sie isusla” su oasr sumwos in sifwil eis moul oanu Mwen nutin God in kosrao. Oanu el, ma wiel inge in ngun su piselos oasr ke 144,000, elos inge “sifwil isusla.” (Jon 3:1-8; srike liye The Watchtower, November 15, 1992, sra 3-6.) Ouyepa oanu Jisus, elos inge akmusrala sin God a pakiyuki in sulkakin peng mwo.—Isaia 61:1, 2; Luk 4:16-21; 1 Jon 2:20.
Me Akpayeye ke Orekma lun God in Pakiyel Tu Lan Ekla Mwen Nutul in Ngun
8 Oasr me akpayeye su akkalemye la Jisus el sulosola ke ngun. Jon Baptist el liye ngun mutal su putati nu fwel Jisus a ouyepa el long kas lun God nu sin Messaia sasu su tufwanu sulosola oanu Mwen nutul in ngun. Tusruktu, fuka met tumal lutlut lal Jisus elos ku in etu la elos sulosola sin ngun mutal? Ke len se el somwak nu in kosrao, Jisus el fwak: “Tu paye Jon el baptaisla ke kof, a komwos fwa baptaisla ke ngun mutal in len tia pus tok.” (Orekma 1:5) Met tumal lutlut lal Jisus elos “baptaisla ke ngun mutal” ke len in Pentecost 33 C.E. Toeni nu ke putati lun ngun mutal inge pa ‘pusra se tuku in kosrao me pusrpusr oanu kusan eng lulap’ a “lo sengalik oanu e sikme nu selos” a on sin kais sie met tumal lutlut. Ma sakuruk pa ku lun met tumal lutlut in “kaskas ke kutena lo, oanu ngun sang nu selos in fwak.” Ke ma inge oasr me akpayeye su elos ku in longyuk a liyeyuk su akkalemye la inkanek ke mwolanu in kosrao oanu mwen nutin God ikakla nu sin met tumal lutlut lal Kraist.—Orekma 2:1-4, 14-21; Joel 2:28, 29.
9 Tia pat toko, met luti Filip el luti fwin an Samaria. Fwinne met Samaria elos lalalfongi ke ma el luti a elos baptaisla, tusruktu wangin me akpayeye la God el sulosola elos tu in ekla mwen nutul. Ke pal se ma met sap Piter a Jemes elos filiye paultal nu fwelos su lalalfongi, “elos eis ngun mutal” ke inkanek yok ma inge kalem nu sin met su liye ma inge. (Orekma 8:4-25) Ma inge me akpayeye la met Samaria su lalalfongi elos sulosola ke ngun mutal oanu mwen nutin God. Oupanu ou inge, in yiu 36 C.E., Kornelius a kutu sin met Pegan elos eis ma paye lun God. Piter a met Ju puspis su lalalfongi a wilul elos “lut, tu me sang lun ngun mutal okoila pa nu fwin met Pegan. Tu elos long kas lalos ke loa, a kaksakin God.” (Orekma 10:44-48) Met Kristian puspis ke century se meet elos eis “me sang lun ngun,” oanu kaskas ke loa. (1 Korint 14:12, 32) Ke ma inge, oasr me akpayeye na paye nu sin kais sie met inge la elos sulosola ke ngun mutal. Tusruktu, fuka met Kristian toko elos ku in akilen elos fwin sulosola ke ngun mutal ku tia?
Ma Lo lun Ngun Mutal
10 Met akmusrala nu fon su piselos oasr ke 144,000 oasr me akpayeye lalos la ngun mutal lun God oasr yurolos. Ke ma inge, Poul el simusla: “A komwos eis ngun lun ma nutla, su kut ku in pangon ka, ‘Abba, Papa!’ Ngun el sifwanu orek ma lo nu ke ngunasr, tu kut ma nutin God. A kut fwin ma nutul, na kut met usru, met usru lun God, a met usru yurin Kraist, kut fwin keok yurol, tu kut fwa ouyepa mwolanu yurol.” (Rom 8:15-17) Met Kristian akmusrala nu kemwa elos pulakin la elos mwen nutin Papa tumalos in kosrao, sie kain in pulakin yok lun tulik nu sin Papa tumal. (Galetia 4:6, 7) Elos etu na paye la elos akmusrala sin God oanu mwen nutul a met usru yurol Kraist ke Togusrai in kosrao. Ke ma inge, oasr kunokon yok lun ngun mutal lun Jeova.
11 Ye koko lun ngun mutal lun God, ngunalos inge, ku oiye fulat inge lun met akmusrala, kasrelos in sang topuk sumwos ke ma Kas lun God el aketeye ke fwinsrak in kosrao. Ke sie me pupulyuk, ke pal se Ma Simusla el sramsram ke mwen nutin Jeova in ngun, elos etu a pulakin na paye la kas inge fwal nu selos. (1 Jon 3:2) Elos etu la elos “baptaisla in Kraist Jisus” a baptaisla nu in mise lal. (Rom 6:3) Elos etu a lalalfongi na paye la elos mwen nutin God in ngun, akola in mise a sifwil moulyuk nu ke mwolanu in kosrao, oanu ma sikyuk nu sel Jisus.
12 In akmusrala sin ngun mutal tu in ekla mwen nutin God in ngun tia tuku ke kena ku nien sun lun sie met. Met akmusrala inge elos tia lungse in som nu in kosrao ke sripen me keok a ma upa su oasr fwin fwalu misinge. (Job 14:1) A, ngun mutal lun Jeova el akkapye na paye nu sin met akmusrala inge sie kain in kena a fwinsrak su tia eteyuk nu sin met puspis. Met akmusrala elos etu la moul ma patpat ke sie moul sumwosmwos in paredais fwin fwalu yurin sie sou a kamwuk puspis arulanu mwo na paye. Tusruktu, tia pa inge kain in moul su oasr ke insielos. Oasr kena a fwinsrak yok lun met akmusrala ke moul in kosrao paenang elos insemwomwo a akola in pilesru fwinsrak mwomwo nu kemwa fwin fwalu a futoto lalos nu ka.—2 Piter 1:13, 14.
13 Fwinsrak lalos in kosrao su tuku sin God arulanu fukoko nu sin met akmusrala inge paenang pulakin lalos oanu pulakin lal Poul, su simusla: “Tu kut etu tu loom in manosr luman fwalu fwin taltalla, oasr loom sesr sin God, loom tia orek ke po, kamwil, in kosrao. Tu paye in ma inge kut sao, in arulanu kena nukomang loom sesr in kosrao me, fwin ou inge oasr nuknuk lasr a kut in tia konoiyukyuk koflufol. Tu paye kut su muta in loom se inge kut sao, tu kut toasr; a tia tu kut kena sarukla ma inge, a tu in nukomyukyung kut, tu ma su mise fwa okomyukla in moul. A el su orekutla ke ma inge el God, su ase nu sesr me akpayeye lun ngun.” (2 Korint 5:1-5) ‘Kena yok’ lal Poul pa in sifwil moulyuk in kosrao oanu ma orekla in ngun su on nu tok ma patpat. Ke pal se ma el sramsram ke manol oanu sie met, el orekmakin me pupulyuk ke “loom nuknuk,” sie nien muta munas ke kitin pal na kut fwin srikeye nu ke loom na paye. Fwinne elos muta fwin fwalu ke sie mano in ikwe, tusruktu met Kristian nu kemwa su oasr ngun mutal lun God oanu me akpayeye ke moul in kosrao lalos su apkurun in tuku elos ku in ngetuk nu ke “sie loom su tuku sin God” me, sie su on nu tok, mano in ngun su tia ku in musalla. (1 Korint 15:50-53) Oanu Poul, elos ku in insemwomwo in fwak: “Kut pulaik, Nga fwak, a kut kena tu kut wanginla liki mano, a muta yurin Leum.”—2 Korint 5:8.
Utukla Nu Ke Sie Mwoleaung
14 Met akmusrala Kristian inge elos lalalfongi na paye la elos nu kemwa utukla nu ke mwoleung luo. Jisus el sromon ma se ke pal se ma el orekmakin bred tia pulol a wain in oakiye me esmakin ke mise lal su apkurun in tuku a el fwak ou inge ke wain: “Kup se inge mwoleung sasu in srak, su surorla keyumwos.” (Luk 22:20; 1 Korint 11:25) Su ku in wi ke mwoleung sasu se inge? Jeova God a met nu kemwa su wi ke Israel in ngun—elos nu kemwa su Jeova God el sulosola in wisla nu ke mwolanu in kosrao. (Jeremaia 31:31-34; Galetia 6:15, 16; Hibru 12:22-24) Mwoleung se inge el orekma ke sripen sral Jisus su surorla liki manol, ou inge mwoleung sasu el wisla liki mutanfwal nu kemwa sie un met in en Jeova a el oru met Kristian akmusrala inge in wi ipen “futen” Ebream. (Galetia 3:26-29; Orekma 15:14) Mwoleung sasu el oru Israel in ngun nu kemwa in wisla nu ke mwolanu ke inkanek lun sifwil moulyuk in kosrao su on na tok ma patpat. Ke sripen “mwoleung ma patpat” pa inge, paenang ma lane su tuku ka on nu tok ma patpat. Pal fwasru el akkalemye fwin mwoleaung se inge el oru orekma lal ke inkanek saye ke lusen pal in millennium a tukun ma inge.—Hibru 13:20.
15 “Mwen puspis” inge su Jeova el akmwuki in ‘wisla nu ke mwolanu’ elos ouyepa utukla nu ke mwoleung se ke Togusrai in kosrao. Ke pal se ma el sramsram ke mwoleung se inge inmaslon El a met tumal lutlut lal, Jisus el fwak: “A komwos elos su wi yu in mel luk; a Nga pakiye nu sumwos sie togusrai, oanu Papa tumuk el pakiye nu sik, tu komwos fwa mongo a nim ke tebu luk in togusrai luk, a komwos fwa muta fwin tron a nununku sruf siengoul luo lun Israel.” (Luk 22:28-30) Mwoleung ke togusrai inge oakiyuki ke pal se ma met tumal lutlut lal Jisus sulosola ke ngun mutal ke Pentekost 33 C.E. Mwoleung se inge el tafwela na in oru orekma lal ma patpat inmaslon Kraist a togusra puspis su wilul. (Fwakyuk 22:5) Ke ma inge, met akmusrala Kristian elos etu a lalalfongi na paye la elos wi ke mwoleung sasu a ke mwoleung lun Togusrai. Ke ma inge, ke pal in Mongo in Eku lun Leum, ma lula mukena ke met akmusrala su arulanu supus fwin fwalu pa ku in mongo bred, su aoliyen mano nasnas lal Jisus, a nim wain, su aoliyen sra sumwosmwos lal Kraist su surorla liki manol ke pal in mise a oru mwoleung sasu in orekma.—1 Korint 11:23-26; srike liye The Watchtower, February 1, 1989, sra 17-20.
Pangonyuk, Sulosula, a Oaru
16 Orekma se meet lun lango lal Kraist, oru 144,000 in pangonyuk nu ke moul in kosrao a sulosula ke pal se ma ngun mutal lun God moswelosla. Paye, tu elos in ‘wisla nu ke mwolanu,’ elos enenu in ‘akpayeye pang a sulela lalos,’ a elos enenu in akkalemye oaru nu ke mise. (2 Piter 1:10; Efesus 1:3-7; Fwakyuk 2:10) Met lula akmusrala su srakna muta fwin fwalu elos srukye na oaru lalos fwinne “togusra siengoul” su aoliyen ku lun politic el lainelos. “Elos inge fwa meun nu sin Lam,” lipufon el fwak, El fwa kutngalosla, tu el Leum fwin leum, a Togusra fwin togusra. A elos su yurol elos fwa ouyepa kutangla, elos su pangonyuk a sulosula a oaru.”—Fwakyuk 17:12-14.
17 Met kol lun met elos tia ku in oru kutena ma lain Jisus, el su “Togusra lun togusra,” meyen el oasr in kosrao. Tusruktu elos akkalemye srunga nu sin met lula akmusrala ke “ma wiel” su srakna muta fwin fwalu. (Fwakyuk 12:17) Srunga se inge e fwa aksafyeyukla ke meun lun Armagedun lun God, pa inge pal su kutangla etukyung nu sin “Togusra lun togusra” a nu sin “ma wiel”—“elos su pangonyuk a sulosula, a oaru.” (Fwakyuk 16:14, 16) Meet liki pal inge tuku, met Kristian akmusrala inge arulanu kafofo. Mea elos oru ke pal inge, meet liki Jeova el wiselosla nu ke mwolanu?
Mea Topuk Lom?
◻ Su met inge su God el ‘wisla nu ke mwolanu in kosrao’?
◻ Mea kalmen “isusla sin God me”?
◻ Fuka ‘ngun el orek lo’ nu sin kutu met Kristian?
◻ Met akmusrala elos utukla nu ke kain in mwoleuang fuka?
[Study Questions]
1. Efu kut ku in lalalfongi na paye la akmwuk lun Jeova nu sin metu e fwa akpayeye na paye?
2. Fuka orekma lun lango lal Kraist oanu me kise el oanu pitse ke Len in Orek Iumwe lun Israel ke yiu nu kemwa?
3. Fwal nu ke ma simusla in Hibru 2:10, mea God el oru ke lusen yiu 1,900?
4. Nge a fuka Jisus el ekla akmusrala oanu Mwen nutin God in ngun?
5. Su met inge su eis ma lane se meet su tuku ke me kise lal Kraist, a ekasr piselos?
6, 7. Su met inge su “Isusla sin God me,” a mea kalmen ma inge nu selos?
8. Mea me akpayeye ke sulosula sin ngun mutal ku in liyeyuk ke ma sikyuk nu sel (a) Jisus (b) met tumal lutlut lal in pal meeta?
9. Mea me akpayeye su akkalemye la met Samaria, Kornelius, a kutu met ke century se meet elos akmusrala ke ngun mutal?
10, 11. Fwal nu ke ma simusla in Rom 8:15-17, fuka kom ku in aketeye la ngun el orek lo nu selos nu kemwa su met usru yurol Kraist?
12. Mea ngun mutal lun God el akkapye nu sin met Kristian akmusrala?
13. Fwal nu ke ma simusla in 2 Korint 5:1-5, mea ‘kena lulap’ lal Poul, a mea ma inge el akkalemye fwin ke met akmusrala?
14. Ke pal se ma el oakiye me esmakin ke Memorial, kain in mwoleuang fuka Jisus el akkalemye meet, a mea ma inge el oru nu sin met Israel in ngun?
15. Fwal nu ke ma simusla in Luk Luk 22:28-30, met tumal lutlut akmusrala lal Jisus elos utukla nu ke kutu mwoleung fuka, a nge?
16, 17. (a) Tu in ‘utukla nu ke mwolanu,’ mea ma inge su arulanu paye nu sin 144,000? (b) Mea se inge “togusra siengoul,” a oiye fuka elos akkalemye nu sin met lula akmusrala “wiel” Kraist?
[Picture on page 23]
In Pentecost 33 C.E., me akpayeye akkalemye la inkanek nu ke mwolanu in kosrao ikakla