Met Sritel Acrobat Fwin Eol
KE likinpot se liyen Kutulap lun Dead Sea ku in liyeyuk siti puspis in pal meeta a yen mwesis pangpang En-gedi. Inkanek eoteot a an fulat oru nien muta mwomwo lun goat fwin eol inge ke Fwal Mwolela, oanu sie ke ma kut ku in liye ke pitse se inge.
Ma orekla se inge su tia fwusesr in tukulkul pa sie ma orekla sakuruk. Lela kut in ikasla Baibel a tuni kosro soko sakuruk inge.
“Eol Fulat Ma Sin Goat Lemnak”
Pa inge on lun met sim lun Sam. (Sam 104:18) Goat lemnak arulanu akola na paye in muta ke an fulat puspis! Elos arulanu sumat in mokuikui, elos ku in fwasr ke inkanek pisrpisr a wangin sensen ke kain in nien fwasr koluk. El ku in oru ou inge meyen niel orekla ke inkanek sakuruk. Ma sengalik ke tokinnie oru in mangelik ke sripen toasr lal, a ma inge sang nu sel ku in srukye ke pal se ma el tu ku mokuikui ke an eoteot.
Oasr pa balance mwo lun goat lemnak. Elos ku in sro ke an loes a putatla nu ke sie an srisrik su fwal na in filiye nie akosr lal sisken an loal. Sie met Biologist pangpang Douglas Chadwick el tuni sie pal sie kain in goat lemnak su orekmakin balance lal tu lan tia sremla ke sie an srisrik sisken an loal paenang el tia ku in forla liki. El fwak: “Tukun el ngeti ke siepa an srisrik 400 feet ten, goat inge el oru niel ma meet in tu sumwos a oru manol in oanu whil ke kurumu a kakasrisrik mokuikui filiye kapul in fulat liki sifwel. Nga srukye na paye momong luk, goat soko inge el tafwela ke ma el oru nu ke na niel ma tok el tu ke an se ma el tu meet.” (National Geographic) Tia me lut goat lemnak inge pangonyuk “met sritel acrobat fwin eol”!
‘Ya Kom Etu Nge Goat Lemnak El Isusla?’
Goat inge su muta fwin eol elos ma orekla lemnak. Paye arulanu upa nu sin sie met in liye, tuni a in muta futoto nu selos su muta fwin eol. Ke ma inge Met su ma la “kosro nu kemwa in saku fwin sie tausen eol” el sumwos in siyuk sel Job: “Ya kom etu pal se ke goat lemnak lun eotu isusla?”—Sam 50:10; Job 39:1.
Lalmetmet su tuku sin God el fwakak nu sin mutan goat nge pal in isusla lal. El suk sie an su wangin sensen a oswela fwako se ku luo, pal nu kemwa ke saflaiyen May ku June. Goat inge su tufwanu isusla el eis lalmetmet in mokuikui ke lusen len ekasr na.
“Soko Kosro Hind Su Lungse a Soko Goat Fwin Eol”
Togusra lalmetmet Solomon el kaifwe nu sin mokul tuma: “Engun ke mutan kiom ke kom fwusr me, oanu soko kosro hind su lungse a soko goat fwin eol.” (Soakas 5:18, 19) Tia kalme la el pilesru mutan. Arulanu kalem la, Solomon el sramsram ke kato, a kutu oiye mwo lun kosro inge.
Goat fwin eol inge sie inmaslon “ngunmol puspis” su akpayeye a akkalemye lalmetmet lun Met Orala. (Genesis 1:24, 25) Ya kut insemwomwo meyen God el raunikutla ke ma orekla sakuruk puspis?
[Picture Credit Line]
Courtesy of Athens University