Sukosok Lun Mwolanu Ke Pal Futoto Lun Tulik Nutin God

“Tu akpusisilye tari ma orekla nu ke wangin sripe . . . tu ouyepa ma orekla fwa taltala liki sruo lun ma kulamwi nu ke sukosok lun mwolanu lun tulik nutin God.”​—ROM 8:​20, 21.

JEOVA el sang Mwen kulu nutul oanu me kise a lango su ikasla inkanek nu ke moul in kosrao nu sin 144,000 met a fwinsrak ke moul ma patpat fwin fwalu nu sin met puspis. (1 Jon 2:​1, 2) Oanu ma akkalemyeyuk tari ke me lutlut se meet, orekma lun me kise lal Kraist nu sin met Kristian akmusrala el pitse ke orekma lun met tol fulat ke pal se ma el kisekin cow mokul oanu me kise ke ma koluk lal sifwanu, sou lal, a sruf lun Livai ke Len in Orek Iumwe pal se ke yiu se. Ke len senpanu inge, el kisekin goat soko oanu me kise ke ma koluk lun met Israel saye, oanu me kise lal Kraist su sang ma lane nu sin met puspis. Goat soko ma moul el wis ma koluk nu kemwa lun metu ke yiu tari’a oanu ke kas pupulyuk, a el talala goat soko inge nu ke yen mesis.a​—Livitikus 16:​7-​15, 20-​22, 26.

² Tukun el akkalemye fwinsrak lun metu su akola in ekla “mwen nutin God” in kosrao, met sap Poul el fwak: “Tu tawinu ma lulap lun ma orekla tupan sikme lun tulik nutin God. Tu akpusisilye tari ma orekla nu ke wangin sripe, tia ke lungse la sifwanu, a ke el su akpusisilyel, in fwinsrak tu ouyepa ma orekla fwa taltala liki sruo lun ma kulamwi nu ke sukosok lun mwolanu lun tulik nutin God.” (Rom 8:​14, 17, 19-​21) Mea kalmen kas se inge?

³ Ke pal se papa matu tumasr pangpang Edam orekla oanu sie met sumwosmwos, el sie “mwen [ku, tulik] nutin God.” (Luk 3:38) Ke sripen ma koluk lal, el ekla “sruo lun ma kulamwi” a el kitelik luma se inge nu sin met nu kemwa. (Rom 5:12) God el lela metu in isusla nu ke “wangin sripe” ke sripen moul sesumwos su elos usru, tusruktu el sang fwinsrak nu selos ke inkanek lun “fute,” Jisus Kraist. (Genesis 3:​15; 22:18; Galetia 3:​16) Fwakyuk 21:​1-4 el sramsram ke sie pal su wanginla ‘mise, asor, tung, ku ngal.’ Ke sripen ma inge nu kemwa mwolela nu sin “metu,” paenang ma inge oanu me akpayeye nu sesr la sie u sasu lun met fwin fwalu su muta ye koko lun Togusrai elos pulakin sifwil foloko lun mano a nunuk ke sie moul fas a moul ma patpat oanu “mwen nutin God” fwin fwalu. Ke lusen Tausen Yiu Kolyuk lal Kraist, met nu kemwa su lungse akos elos fwa “taltala liki sruo lun ma kulamwi.” Tukun elos akkalemye la elos oaru nu sin Jeova ke me srifwe safla, elos fwa sukosok ma patpat liki ma koluk su elos usru a mise. (Fwakyuk 20:​7-10) Ke ma inge elos nu kemwa su muta fwin fwalu elos fwa eis “sukosok lun mwolanu lun tulik nutin God.

Eltal Fwak “Fwasru!”

⁴ Fuka sie fwinsrak mwolanu na paye filiyuki ye mutun metu! Tia me lut paenang met akmusrala Kristian fwin fwalu elos moniyuk in kol ke orekma in fwakak ma inge nu sin kutu met! Nu selos nu kemwa su akola in ekla ipen “mutan pusla” lun lam su eis mwolanu, Jisus Kraist, met lula akmusrala elos wi ke akpayeyen kas palu se inge. “A ngun a mutan pusla eltal fwak: ‘Fwasru!’ A el su long, lan fwak: ‘Fwasru!’ A el su malu, lan fwasru; el su lungse, lela lan eis kof in moul, tia mol.” (Fwakyuk 21:​2, 9; 22:​1, 2, 17) Mo, ma lane su tuku ke lango a me kise lal Kraist tia nu sin 144,000 met akmusrala mukena. Ngun lun God el tafwela in oru orekma ke inkanek lun ma lula ke un mutan pusla su oasr fwin fwalu in fwak “fwasru.” Kutena met su long a malu ke ma sumwosmwos, elos eis me solsol in fwak “Fwasru,” in akmwesasyelos sifwanu ke me sang yok lun Jeova ke molela.

⁵ Met Lo lun Jeova elos lalalfongi ke me sang lun God ke moul ke inkanek lal Jisus Kraist. (Orekma 4:​12) Elos insemwomwo in oasr kutu met inmaslolos su lungse in lutlut ke akmwuk lun God a oru ma lungse lal. Kingdom Hall lalos ikakla nu sin met nu kemwa su lungse in ‘tuku a eis kof in moul wangin mol’ ke “len safla” se inge.”​—Daniel 12:4.

Ekla Su Tuku ke Lusen Pal Somla

⁶ Oasr pal lun God in akpayeye akwuk lal, a oasr ipen ma inge ke ma el oru nu sin metu (Ekklisiastis 3:1; Orekma 1:⁠7) Fwinne ngun mutal lun God el tuku nu sin met kulansap lun God meet liki pal lun met Kristian, tusruktu elos inge tia sulosula in ekla mwen nutul in ngun. Aok, mutamwauk sel Jisus, pal lun Jeova el tuku in orekmakin ngun mutal lal in moswela mokul a mutan su mwolela tari tu elos in eis me usru in kosrao. A fuka ke len lasr? Ngun mutal siefwunnu oru orekma nu sin “sip ngie” lal Jisus, tusruktu ma inge tia purakak insielos ke sie fwinsrak a kena in moul in kosrao. (Jon 10:16) Wikin fwinsrak lalos in moul ma patpat ke sie paredais fwin fwalu, elos insemwomwo in sang kasru met lula akmusrala ke orekma in sang ma lo ke lusen pal in ekla ke fwalu matu se inge nu ke fwalu sasu sumwosmwos lun God.​—2 Piter 3:​5-​13.

⁷ God el mutamwauk in ‘wisla mwen puspis nu ke mwolanu’ ke el okwela ngun mutal ke Pentecost 33 C.E., a arulanu kalem la el pakiye pal in aksafyela pisen met su wi ke “Israel lun God” in ngun su oasr ke 144,000. (Hibru 2:​10; Galetia 6:​16; Fwakyuk 7:​1-8) Mutamwauk 1879, sie pal in kosrani ke met akmusrala Kristian pal nu kemwa sramsramkinyuk ke magasin se inge. Tusruktu Bible Students (su ingenu pangonyuk Met Lo lun Jeova) elos ouyepa etu la Ma Simusla el sramsram ke sie fwinsrak in moul ma patpat in paredais fwin fwalu. Ke sie pupulyuk, Watch Tower ke July 1883 el fwak: “Ke pal se ma Jisus el oakiye togusrai lal, kunausla ma koluk, a ma puspis, na fwalu se inge el ekla sie paredais, . . . a elos nu kemwa su muta in kalyuk elos fwa muta in paredais. A ke sripen akos lalos ke ma sap su oasr we elos ku in moul ma patpat we.” Ke lusen kutu pal somla, pal in kosrani ke met akmusrala srikeni, a kais kutu srisrik met nu kemwa su tia fwinsrak in kosrao elos utyuk nu ke u lun Jeova. In pal se na, God el sang nu sin met kulansap akmusrala lal, met Kristian su sifwil isusla, lalmetmet su ku in akilenyuk.​—Daniel 12:3; Filippai 2:​15; Fwakyuk 14:15, 16.

⁸ Yokna mutamwauk 1931 elos nu kemwa su oasr fwinsrak fwin fwalu elos asrouki nu ke congregation lun met Kristian. Ke yiu senpanu inge, Jeova el oru met Kristian akmusrala lula in liye la ma simusla in Ezekiel sapter 9 el sramsram nu ke u se inge su oasr fwinsrak fwin fwalu, su eis akul tu elos in moul ke fwalu sasu lun God. Ke 1932 akkalemyeyuk la met nu kemwa inge su luman sip ke len ingo elos aoliyen met asrouki lal Jehu pangpang Jonadab (Jehonadab). Ke 1934 akkalemyeyuk la “Jonadab” inge enenu in “mwolela” moul lalos nu sin God. In yiu 1935 “u lulap”​—su nunkeyuk mu u akluo in ngun su akola in “wi” mutan pusla lal Kraist in kosrao​—akilenyuk oanu sip ngie su oasr fwinsrak in moul fwin fwalu. (Fwakyuk 7:​4-​15; 21:​2, 9; Sam 45:14, 15) A yokna mutamwauk 1935 met akmusrala elos akpisrpisrye orekma lalos in suk met sumwosmwos su lungse in moul ma patpat fwin fwalu.

⁹ Tukun 1935 kutu sin met Kristian su wi mongo bred a nim wain ke pal in akfulat ke Mongo in Eku lun Leum elos tui. Efu? Meyen elos akilen la fwinsrak lalos oasr fwin fwalu a tia in kosrao. Sie mutan su baptaisla ke 1930 el fwak: “Fwinne in wi mongo bred a nim wain nunkeyuk meet oanu orekma mwo su enenu in oru, yokna nu sin kutu met orekma moniyuk su oru orekma lun forfor pal nu kemwa, tusruktu Nga tia lalalfongi ke kutena pal la oasr fwinsrak luk in kosrao. Na, ke 1935, akkalemyeyuk nu sesr la oasr sie u lulap su akola in esani nu sie su oasr fwinsrak in moul ma patpat fwin fwalu. Met puspis inmaslosr arulanu insemwomwo in etu la kut wi ipen u lulap, na pa kut tui in mongo bred a nim wain.” Fwinne me rid lun met Kristian oasr ma ekla ke koano. Me rid puspis ke yiu puspis somla el sramsram yok ke met tumal lutlut akmusrala lal Jisus, tusruktu mutamwauk 1935 nu tok, Tauer In San a kutu me rid lun ‘met kulansap oaru’ el kitakut me mongo in ngun fwal nu ke ma enenu lun met akmusrala a met asrouki lalos su oasr fwinsrak in moul fwin fwalu.​—Mattu 24:45-​47.

¹⁰ Fuka fwin sie met akmusrala el ekla suoaru ku putatla. Ya oasr kutu met su aulol? Poul el akkalemye yok ma inge ke me sramsram lal ke kas pupulyuk ke sak olive. (Rom 11:​11-32) Fwin enenu in ayaola sie met akmusrala, arulanu kalem la God el sang pangpang lal in kosrao nu sin sie met su lalalfongi lal sie me srikasrak mwo a ma inge ku in akilen ke orekma mutal su el oru nu Sel ke lusen yiu puspis.​—Srike liye Luk 22:28, 29; 1 Piter 1:​6, 7.

Sripe Puspis in Oaru

¹¹ An nu kemwa kut kulansap nu sin Jeova ke oaru, el akkupye ma enenu lasr a kena sumwosmwos lasr. (Sam 145:16; Luk 1:​67-​74) Fwinne fwinsrak lasr na paye pa moul in kosrao ku moul fwin fwalu, oasr sripe puspis lasr in sang kulu nu sin God. Pal nu kemwa el oru ma puspis su akinsemwomwoyelos nu kemwa su lungse el. Met tumal lutlut Jemes el fwak la “me kite mwo nu kemwa a kite fwal ma lung me, a tuku lung me yurin Papa tuman kalem,” Jeova God. (Jemes 1:​17) Lela kut in tuni kutu nu ke me sang a me insemwomwo inge.

¹² Jeova el sang nu sin kais sie met kulansap oaru lal sie fwinsrak mwolanu. El pangon kutu selos in moul in kosrao. Nu sin met lo lal meet liki pal lun met Kristian, Jeova el sang nu selos fwinsrak mwolanu ke sifwil moulyuk a moul ma patpat fwin fwalu. Ke sie me pupulyuk, oasr lalalfongi lal Ebream ke sifwil moulyuk a el sano “sie siti su oasr foundeson”​—Togusrai in kosrao su ke kolyuk lal el sifwil moulyuk a muta fwin fwalu. (Hibru 11:10, 17-​19) Sulpa, ke len safla se inge, God el sang fwinsrak nu sin million puspis sin met in moul ma patpat ke sie paredais fwin fwalu. (Luk 23:43; Jon 17:3) Paye, kutena met su eis fwinsrak mwolanu inge su tuku nu sin Jeova enenu in akkalemye kulo na paye ka.

¹³ Jeova el sang ngun mutal lal oanu me sang nu sin met lal. Met Kristian nu kemwa su oasr fwinsrak lalos in kosrao elos akmusrala sin ngun mutal. (1 Jon 2:​20; 5:​1-4, 18) Aok, met kulnsap lun God su oasr fwinsrak in moul ma patpat fwin fwalu oasr pa yurol kasru a kol lun ngun mutal. Sie selos pa Moses, su oasr ngun mutal lun Jeova, ouyepa met 70 su pakiyuki in kasrel ke orekma. (Oekyuk 11:24, 25) Ye koko lun ngun mutal, Bezalel el kulansap oanu met orekma usrnguk ke pal in musaiyuk lun loom alu fwin an Israel. (Exodus 31:​1-​11) Ngun mutal lun God el tuku nu sel Gideon, Jephthah, Samson, David, Elijah, Elisha, a kutupa met. Fwinne met inge nu kemwa in pal meeta tia utukla nu ke mwolanu in kosrao, tusruktu elos eis me kol a kasru lun ngun mutal, oanu ma sikyuk pa nu sin sip ngie lal Jisus ke len inge. Ke ma inge, fwinne ngun mutal oasr yurosr, tia kalme la oasr fwinsrak lasr in kosrao. Tusruktu, ngun mutal lun Jeova el sang kolyuk, el kasru kut in luti a oru kutu kunokon su God el ase nu sesr, el ase nu sesr ku su alukela ma kut nunku, a el oswela nu sesr fwako lal inge lungse, engun, misla, mongfusas, kulang, inse mwo, oaru, fwokpap, a sifwanu leum fwom. (Jon 16:13; Orekma 1:8; 2 Korint 4:​7-​10; Galetia 5:​22, 23) Ya tia fwal nu sesr in sang kulo ke me sang mwomwo inge nu kemwa su tuku sin God?

¹⁴ Etauk a lalmetmet me sang pa inge su tuku sin God, ke ma inge kut sang kulo ka fwinne fwinsrak lasr som nu in kosrao ku muta fwin fwalu. Etauk sumwos ke Jeova kasru kut in “akilen ma mwo” a “fwafwasryesr fwal nu sin Jeova, nu ke akinsemwomwo nu kemwa.” (Filippai 1:​9-​11; Kolosse 1:​9, 10) Lalmetmet mutal el orekma oanu me loeyuk a me kol ke moul. (Soakas 4:​5-7; Ekklisiastis 7:​12) Etauk paye a lalmetmet paye tuku ke Kas lun God, a met lula ekasr ke met akmusrala elos arulanu pwar ke ma el fwak ke fwinsrak lalos in kosrao. Tusruktu, lungse ke Kas lun God a kalem mwo lasr nu ka tia pa inge sie akul ke inkanek lun God in sulekutla in moul in kosrao. Mokul puspis oanu Moses a Daniel elos simusla kutu ipen Baibel, tusruktu elos fwa sifwil moulyuk fwin fwalu. Fwinne fwinsrak lasr in kosrao ku fwin fwalu, kut nu kemwa eis me mongo in ngun su tuku ke u se su oasr insese lun Jeova pangpang “met kulansap oaru a lalmetmet.” (Mattu 24:45-​47) Fuka yokiyen kulo lasr ke etauk su kut eis!

¹⁵ Sie nu ke me sang yok emeet lun God pa lango a me kise lun Mwen nutul su sang ma lane puspis nu sesr fwinne fwinsrak lasr in kosrao ku fwin fwalu. Tu God el lungse metu ou inge, “tu el ase Mwen siefwunnu isusla nutul, tu el su lalalfongel fwa tia tula, a el fwa eis moul ma patpat.” (Jon 3:16) Lungse lal Jisus moklel in “sang moul lal in moli met puspis.” (Mattu 20:28) Oanu met sap Jon el aketeye, Jisus Kraist “el me iumwe ke ma koluk lasr [met akmusrala], a tia ke ma lasr mukena, a ouyepa ke ma koluk lun met in fwalu nu fon. (1 Jon 2:​1, 2) Ke ma inge, kut nu kemwa enenu in akkalemye kulo yok ke me sang kulang inge lun molela a moul ma patpat.b

Ya Kom Akola in Wi?

¹⁶ Oiye kulo lasr ke lango su God el ase nu sesr ke inkanek lun Mwen nutul enenu in mokle kut in wi ke Kingdom Hall a kutu an su Met Lo lun Jeova elos sulela in toeni tukun fwatu tilli ke April 11, 1998, in esmakin mise lal Kraist. Ke pal se ma el oakiye me esmakin inge ke mise lal wikin met sap oaru lal ke fong safla lun moul lal fwin fwalu, Jisus el fwak: “Oru ma inge in esam yu.” (Luk 22:19, 20; Mattu 26:26-​30) Ma lula ke met akmusrala elos wi mongo ke bred tia pulol su aoliyen manol Kraist su wangin ma koluk a nim wain srasra su aoliyen sral su aksuroryeyuk in oanu me kise. Met akmusrala mukena ke ngun mutal ku in wi mongo a nim meyen elos wi ke mwoleaung sasu a ke mwoleaung lun Togusrai a oasr yurolos me akpayeye su tuku ke ngun mutal su akkalemye nu selos la fwinsrak lalos oasr in kosrao na paye. Million puspis sin met elos wi ke sunak in liye a akkalemye kulo lalos ke lungse su God a Kraist elos akkalemye ke inkanek lun me kise lal Jisus su oru inkanek nu ke moul ma patpat in ikakla.​—Rom 6:​23.

¹⁷ Lalalfongi ke alu lun sie met in pal meeta, asor yok su tuku ke mise lun sie met su kom lungse, ma upa ke moul su tuku ke fwalu se inge len nu kemwa, ku sie pulakin oanu sie met el eis me insemwomwo su tuku sin Jeova, ma inge nu kemwa ku in mokle met puspis in srukye nunuk tafongla, la oasr fwinsrak lalos in kosrao. Tusruktu kut nu kemwa enenu in esam la Ma Simusla el tia sapkin nu sesr in wi mongo bred a nim wain ke pal in Memorial tu in akkalemye kulo lasr ke lango a me kise lal Kraist. Tusruktu, met akmusrala “na ou inge, a tia ke el su lungse, ku ke el su kasrusr, a ke God,” El su sulela Jisus oanu Mwen kulu nutul in ngun a wisla 144,000 nu ke mwolanu oanu mwen nutul.​—Rom 9:​16; Isaia 64:8.

¹⁸ Moul ma patpat in Paredais fwin fwalu pa fwinsrak su etuku sin God nu sin met puspis su kulansap nu sin Jeova ke len safla se inge. (2 Timote 3:​1-5) Kitin pal lula, elos fwa engunkin paredais mwolanu. Ke pal ingo met fwisrak pa kol ke orekma fwin fwalu ye koko lun Met kol in kosrao. (Sam 45:16) Misla oasr fwin fwalu meyen met nu kemwa ma muta ka elos akos ma sap lun God a lutlut yok ke inkanek puspis lun Jeova. (Isaia 9:​6, 7; Fwakyuk 20:12) Oasr orekma yok su enenu in orek, oanu in musaiyuk loom puspis a in akkatoye fwalu se inge. (Isaia 65:17-​25) A nunku ke sifwil tukeni nu sie lun sou puspis meyen met mise elos fwa sifwil moulyuk! (Jon 5:​28, 29) Tukun me srifwe safla, ma koluk nu kemwa wanginla. (Fwakyuk 20:​7-​10) Tukun ma inge, ma nu kemwa wanginla saflaiye, fwalu nu fon nenela ke met sumwosmwos su “taltala liki sruo lun ma kulamwi nu ke sukosok lun mwolanu lun tulik nutin God.’

[Footnotes]

Fuka Kom Topuk?

◻ Mea kalmen “eis kof in moul wangin mol”?

◻ Fwinne fwinsrak lasr in kosrao ku fwalu, sripe fuka oasr yurosr tu kut in sang kulo nu sin God?

◻ Kain in me akfulat fuka ke yiu nu kemwa kut nu kemwa enenu in wi?

◻ Nu sin met kulansap puspis lun Jeova, mea pal fwasru el akola nu selos?

[Study Questions]

1. Fuka me kise lal Kraist el pitse nu ke Len in Orek Iumwe?

2, 3. Mea kalmen kas lal Poul su simusyukla in Rom 8:​20, 21?

4. Mea kalmen “eis kof in moul wangin mol?”

5. Su Met Lo lun Jeova elos insemwomwo in muta inmaslolos?

6. Fuka ngun mutal lun God el orekma nu sin met kulansap lun Jeova ke lusen kain in pal puspis?

7. Kain in orekma in kosrani fuka Bible Student elos arulanu fosrngakin, tusruktu mea elos etu ke paredais?

8. Fuka kalem ke fwinsrak in moul fwin fwalu yokelik ke mutamweyen 1930’?

9. Tukun 1935, efu met Kristian puspis elos tui in mongo bred a nim wain ke pal in akfulat ke Mongo in Eku lun Leum?

10. Fuka in ayaola sie met akmusrala suoaru?

11. Fwinne fwinsrak lasr in kosrao ku fwin fwalu, mea Jemes 1:17 el fwak in akkeye kut?

12. Efu kut ku in fwak la Jeova el sang nu sin kais sie met kulansap oaru lal sie fwinsrak mwolanu?

13. Fuka ngun mutal lun God el orekma nu sin met lal?

14. Fuka kut eis ma lane su tuku ke me sang lun God ke etauk a lalmetmet?

15. Mea sie nu ke me sang yok emeet lun God, a mea nunuk lom nu ke ma inge?

16. Me akfulat fuka e fwa orek tukun fwatu tilli ke April 11, 1998, a su enenu in wi?

17. Mea ma inge su kut enenu in esam fwin ke orekma lun ngun mutal in akmusrala met se?

18. Nu selos nu kemwa su kulansap nu sin Jeova ke len inge, me insemwomwo fuka ke pal fwasru oasr ye mutulos

[Picture on page 26]

Million sin met elos ‘eis kof in moul wangin mol.’ Ya kom sie selos su oru ou inge?