4. Өмірге қиналу үшін келдік пе?

Ақиқатын анықтайық

Егер бұл сұрақтың жауабын білсек, өмірге деген көзқарасымыз өзгереді.

Ойлап көріңіз

Ғаламды ғажап, Жерімізді сұлу етіп жаратқан Құдай қайғы-қасіретке жол беруі мүмкін бе?

Өздері не өзгелер қиындыққа тап болғанда, дінге сенбейтіндер Құдай қайғы-қасіретті тоқтатуға дәрменсіз немесе тоқтатқысы келмейді деп, оның ниетіне шек келтіреді. Я болмаса Құдай жоқ дейді.

Не үшін қиналатынымыздың басқа да себебі болуы мүмкін бе?

Киелі кітаптың жауабы

Құдай бізді қиналсын деп жаратпады.

Жаратушы бізді өмірдің рақатын көрсе екен дейді.

“Адам үшін өмірде қуанудан және жақсылық жасаудан артық ештеңе жоқ... Әрбір адам ішіп-жеп, еңбегінің жемісіне қуансын. Бұл — Құдайдың сыйы” (УАҒЫЗДАУШЫ 3:12, 13).

Құдай алғашқы еркек пен әйелге еш қайғы-мұңсыз, бақытты өмір сыйлаған.

Жаратушы оларды да, ұрпақтарын да қиналу үшін жаратпаған.

“Құдай оларға... былай деді: “Өсіп-өніп көбейіңдер, ұрпақтарың жайылып, жер бетін толтырыңдар, әрі оны өңдеңдер” (МҰСАНЫҢ 1-ЖАЗБАСЫ 1:28).

Алғашқы адам жұбы Құдайға бағынбауды таңдады.

Нәтижесінде олар өздерін де, ұрпақтарын да үлкен қасіретке душар етті.

“Бір адам арқылы дүниеге күнә, ал күнә арқылы өлім келді, осылайша адамдардың бәрі өлетін болды, себебі бәрі күнә жасады” (РИМДІКТЕРГЕ 5:12)a.

Адам баласы Құдайдың жетелеуінсіз өмір сүре алатындай етіп жаралмаған.

Біз суда өмір сүру үшін жаралмағанымыздай, бір-бірімізге билік ету үшін де жаралмағанбыз.

“Адам тіпті өз қадамына бағыт бере алмайды” (ЕРЕМИЯ 10:23).

Құдай біздің қасірет шеккенімізді қаламайды.

Ол бізді мүмкіндігінше қиындықтардан қашық жүрсе екен дейді.

“Өсиеттеріме ден қойсаңдар ғой, шіркін! Сендердегі тыныштық өзендей... болар еді” (ИШАЯ 48:18).