Библие евгъаджэхэм Иеговэ и гъуэгур къыхахыну фадэІэпыкъу

1, 2. 1) Иеговэ и Щыхьэт хъуну Библие едгъаджэм сыт зэран къыхуэхъуфынур? 2) Мы статьям сыт щызэпкърытхынур?

БИБЛИЕР бджын щыщІэбдза зэманыр уигу къэгъэкІыж. Абы щыгъуэ Иеговэ и Щыхьэт ухъуну занщІэу унафэ пщІат, хьэмэрэ уэ зыгуэрым укъигъэувыІэрэт? Уэ угузавэу къыщІэкІынт уи благъэхэр, уи ныбжьэгъухэр, къыбдэлажьэхэр абы щхьэкІэ къопсэлъэн щагъэтыну. Е Библием ит хабзэхэм утету упсэуну гугъуІуэу икІи ар уэ пхузэфІэмыкІыну уегупсысу къыщІэкІынт. Апхуэдэу къыпщыщІамэ, иджыпсту Библиер зыджхэм, ауэ Иеговэ и Щыхьэт хъуну темыгушхуэхэм я гурыщІэхэр уэ фІы дыдэу къыбгурыІуэу къыщІэкІынщ.

² Хьисэ ищІэт апхуэдэ гупсысэхэр цІыхум зэран къызэрыхуэхъуфынур Иеговэ хуэлэжьэну (Мт. 13:20—22). Ауэ зы щхьэусыгъуэ гуэркІэ цІыхухэр Хьисэ иужь иувэну темыгушхуэмэ, абы ахэр ІэщІыб ищІтэкъым, атІэ ядэІэпыкъут: 1) Алыхьым гъунэгъу хуэхъуну сыт зэран къахуэхъуми къагурыІуэну, 2) Иеговэ хуаІэ лъагъуныгъэр хагъэхъуэну, 3) Иеговэ хуэлэжьэныр я гъащІэм япэ ирагъэщыну, 4) цІыхухэр къащыпэщІэувэм деж сыт ящІэ хъунуми къагурыІуэну. Хьисэ хуабжьу егъэджакІуэфІт икІи дэ абы щапхъэ тетхыну дыхуейщ. АдэкІэ деплъынщ «ГъащІэ мыухыж уиІэу псэу!» жыхуиІэ тхылъыр къэдгъэсэбэпу, Библие едгъаджэхэм Иеговэ и лъэныкъуэр яубыдыну дапхуэдэу дадэІэпыкъу хъунуми.

БИБЛИЕ ЕБГЪАДЖЭМ ИЕГОВЭ ГЪУНЭГЪУ ЗЫХУИЩІЫНУ СЫТ ЗЭРАН КЪЫХУЭХЪУМИ КЪЫГУРЫІУЭНУ ДЭІЭПЫКЪУ

3. Никодим Хьисэ иужь иувэну сытыт зэран къыхуэхъуфынур?

³ Никодим журт пашэхэм ящыщт. Хьисэ хъыбарыфІыр игъэІун зэрыщІидзэрэ илъэс ныкъуэ фІэкІа дэмыкІыу, Никодим къыгурыІуащ а цІыхур Алыхьым къызэригъэкІуар (Ин. 3:1, 2). Ауэ ар «журтхэм щышынэрти» щэхуу Хьисэ хуэзэну мурад ищІащ (Ин. 7:13; 12:42). Никодим Хьисэ иужь иувэну сытыт зэран къыхуэхъур? Ар шынэу къыщІэкІынт Хьисэ и лъэужь иувэмэ, иІэ увыпІэмрэ и мылъкумрэ фІэкІуэдынуa.

4. Хьисэ дапхуэдэу Никодим зэрыдэІэпыкъуар Алыхьыр сыткІэ къыщыгугъми къыгурыІуэну?

⁴ Никодим Мусэ и хабзэр ищІэт, ауэ Иеговэ сыткІэ къыщыгугъми абы къыгурыІуэтэкъым. Дапхуэдэу Хьисэ абы зэрыдэІэпыкъуар? Ар хьэзырт Никодим зэман хухихыну, уеблэмэ, жэщми абы хуэзэну. Хьисэ Никодим фІыуэ къыгуригъэІуащ и лъэужь къиувэн щхьэкІэ абы и гуэныхьхэм хущІегъуэжын, псым зыщІигъэуэн икІи и фІэщхъуныгъэр ІуэхукІэ игъэлъэгъуэн зэрыхуейр (Ин. 3:5, 14—21).

5. Библие едгъаджэр Алыхьым гъунэгъу хуэхъуну зэран къыхуэхъур къыгурыІуэну дапхуэдэу дызэрыдэІэпыкъу хъунур?

⁵ Библие едгъаджэм Тхыгъэ ЛъапІэм фІыуэ хищІыкІми, Алыхьым гъунэгъу зыхуищІыну зэран къыхуэхъур къыгурымыІуэнкІэ хъунущ. Псалъэм папщІэ, абы лэжьыгъэм зэман куэдыІуэ тригъэкІуадэу е и Іыхьлыхэр къыпэщІэувэу щытыфынущ. Аращи, абы и гъусэу зэман бгъэкІуэну хьэзыру щыт: зэгъусэу кофе фыздефэ е фи нэгу зевгъэужь. Апхуэдэу зэман щывгъакІуэкІэ, Библие ебгъаджэм нэхъ зыкъызэІуихыу и гугъуехьхэмкІэ къыбдэгуэшэфынущ. А цІыхум сыт ихъуэжын хуейми къыгурыІуэну дэІэпыкъу икІи игу къэгъэкІыж, ар щІищІэн хуейр уэ арэзы уищІын щхьэкІэкъым, атІэ Иеговэ игъэгуфІэн щхьэкІэщ.

6. Библие едгъаджэ цІыхум къищІэр и гъащІэм къыщигъэсэбэпыну дапхуэдэу дызэрыдэІэпыкъуфынур? (1 Коринф 16:13).

⁶ Едгъаджэ цІыхум Библием ит хабзэхэм тетыну Иеговэ къызэрыдэІэпыкъунум шэч къытримыхьэу щытмэ, абы къару иІэнущ къищІэр и гъащІэм къыщигъэсэбэпыну. (Къеджэ 1 Коринф 16:13.) Ебгъаджэм узэрыдэІэпыкъунур къыбгурыІуэн щхьэкІэ школым щылажьэ егъэджакІуэм и щапхъэм уегупсыс хъунущ. ЕгъэджакІуэфІым сабийхэр фІыуэ зэрыригъаджэм нэмыщІ, абыхэм ядоІэпыкъу къащІар я гъащІэм къызэрыщагъэсэбэпыфынур я фІэщ ящІыну. Библием фІыуэ езыгъаджэ цІыхури апхуэдэу щытщ. Абы Библием ит пэжхэр цІыхухэм яжриІэ къудейуэ аракъым, атІэ Иеговэ и фІыгъэкІэ Тхыгъэ ЛъапІэм ит хабзэхэм тету ахэри зэрыпсэуфынур я фІэщ ящІыну доІэпыкъу. Апхуэдэ егъэджакІуэ дапхуэдэу дызэрыхъуфынур?

БИБЛИЕ ЕБГЪАДЖЭМ ИЕГОВЭ ХУИІЭ ЛЪАГЪУНЫГЪЭР ХИГЪЭХЪУЭНУ ДЭІЭПЫКЪУ

7. Хьисэ и гъэсэнхэм Иеговэ хуаІэ лъагъуныгъэр хагъэхъуэну дапхуэдэу зэрадэІэпыкъуар?

⁷ Хьисэ ищІэт и гъэсэнхэм Алыхьыр фІыуэ ялъагъумэ, Библием итыр я гъащІэм къыщагъэсэбэпыну абыхэм гукъыдэж зэраІэнур. Абы щІэх-щІэхыурэ щапхъэхэр къихьт. А щапхъэхэм я фІыгъэкІэ Хьисэ и гъэсэнхэм Иеговэ хуаІэ лъагъуныгъэр хэхъуэт. Псалъэм папщІэ, абы Иеговэ иригъэщхьащ зи сабийм тыгъэхэр хуэзыщІ цІыхум (Мт. 7:9—11, ДЩІ). Хьисэ къедаІуэхэм апхуэдэ адэ зимыІа цІыху хэтауэ къыщІэкІынущ. Фи нэгу къыщІэвгъэхьэт абыхэм яІа гурыщІэхэр, гущІэгъушхуэ хэлъу зи къуэ щыуар къезыгъэблэгъэжа адэм теухуа ущие хъыбарыр Хьисэ щажриІэжам щыгъуэ. Иеговэ щІылъэм щыІэ и бынхэм гущІэгъушхуэ хэлъу зэрахущытыр цІыхухэм къагурыІуэну Хьисэ ядэІэпыкъут (Лк 15:20—24).

8. Библие ебгъаджэм Иеговэ хуиІэ лъагъуныгъэр хигъэхъуэну дапхуэдэу узэрыдэІэпыкъуфынур?

⁸ Библие ебгъаджэм Иеговэ хуиІэ лъагъуныгъэр хигъэхъуэну дапхуэдэу узэрыдэІэпыкъуфынур? Іэмал щыІэху Алыхьым и хьэл-щэн дахэхэм ебгъаджэмрэ уэрэ фытепсэлъыхь. Еджэгъуэ къэс ебгъаджэм къилъэгъуну дэІэпыкъу зэпкърыфх темэм Иеговэ и лъагъуныгъэр къызэрыхэщыр. Псалъэм папщІэ, Хьисэ и щхьэщэхуж къурмэныпхъэм теухуауэ ебгъаджэм уепсалъэу жытІэнщ. Абы щыгъуэ мыхьэнэшхуэ иІэщ Иеговэ щхьэщэхуж къурмэныпхъэр щІитар цІыхуу хъуам щхьэкІэ имызакъуэу, езым щхьэкІи зэритар къыгурыІуэным (Рим 5:8; 1 Ин. 4:10). Библиер зыджым Иеговэ фІыуэ къызэрилъагъур къыгурыІуа иужь, езыми Алыхьым хуиІэ лъагъуныгъэр нэхъ къызэщІэплъэнущ (Гал. 2:20).

9. Майкл и гъащІэр ихъуэжу Иеговэ и лэжьакІуэ хъуну сыт хуэзыгъэушар?

⁹ Индонезием щыщ Майкл и щапхъэм деплъынщ. Ар Иеговэ и Щыхьэту щыт унагъуэм къыщыхъуат, ауэ абы езым псым зыщІигъэуатэкъым. Майкл илъэс 18 щыхъум машинэшхуэм дэсу лэжьэн щхьэкІэ нэгъуэщІ къэралым Іэпхъуащ. Зэман дэкІа иужь, ар унэм къэкІуэжри щхьэгъусэ зригъэгъуэтащ. Ауэ лэжьэн щхьэкІэ абы и унагъуэр къигъанэри аргуэру нэгъуэщІ къэралым игъэзэжащ. А зэманым къриубыдэу Майкл и щхьэгъусэмрэ и пхъумрэ Библиер яджу икІи къащІэр я гъащІэм къыщагъэсэбэпу щІадзат. Майкл и анэр лІа иужь, ар унэм къэкІуэжыну унафэ ищІащ и адэр зыхуей хуигъэзэн щхьэкІэ икІи Библиер иджын щІидзащ. «ГъащІэ мыухыж уиІэу псэу!» жыхуиІэ тхылъым и 27 урокыр щызэпкърахым, «Нэхъ куууэ хэплъэ» жыхуиІэ разделым ит гупсысэхэр абы хуабжьу игу лъэІэсат. Хьисэ гугъу зэрехьыр щилъагъум Иеговэ иІа гурыщІэхэм Майкл егупсыса иужь, ар къэгъащ. Иеговэрэ Хьисэрэ ар фІыуэ къызэралъагъур Майкл къыгурыІуа иужь, абы и гум фІыщІэшхуэ илъ хъури и гъащІэр ихъуэжащ икІи псым зыщІигъэуащ.

БИБЛИЕ ЕБГЪАДЖЭМ ИЕГОВЭ ХУЭЛЭЖЬЭНЫР И ГЪАЩІЭМ ЯПЭ ИРИГЪЭЩЫНУ ДЭІЭПЫКЪУ

10. Хьисэ и гъэсэнхэм дапхуэдэу зэрадэІэпыкъуар Иеговэ хуэлэжьэныр я гъащІэм япэ ирагъэщыну? (Лука 5:5—11). (Сурэтми феплъ.)

¹⁰ Япэ лІэщІыгъуэм Хьисэ и лъэужь ирикІуэ языныкъуэхэм занщІэу къагурыІуащ ар Мэссихьу зэрыщытыр. Ауэ хъыбарыфІ гъэІуным псэемыблэжу хэтын зэрыхуейр абыхэм занщІэу къагурыІуакъым. Псалъэм папщІэ, Хьисэ Петррэ Индрисрэ сыт щыгъуи и лъэужь ирикІуэну къыщригъэблэгъам щыгъуэ, ахэр зэман гуэр хъуауэ абы и гъусэт (Мт. 4:18, 19). Ахэр Екъубрэ Иуанрэ я гъусэу бдзэжьеящэу щытт икІи абы ахъшэ хъарзынэ къахуикІт (Мк. 1:16—20). Петррэ Индрисрэ «яхъхэр... къагъэна» иужь абыхэм я унагъуэхэр зыхуей хуагъэзэн щхьэкІэ нэгъуэщІ Іэмал къагъуэтауэ къыщІэкІынущ. А цІыхухъухэм ахъшэ къэлэжьыныр япэ ирамыгъэщу, Иеговэ хуэлэжьэныр япэ ирагъэщыну сыт къадэІэпыкъуар? Лука итхыжа ХъыбарыфІым зэрыщыжыІамкІэ, Хьисэ абыхэм телъыджэ яригъэлъагъури, Алыхьым нэхъыбэу дзыхь хуащІыну ядэІэпыкъуащ. Абыхэм къагурыІуащ я гъащІэм Иеговэ япэ ирагъэщмэ, абы и нэІэ сыт щыгъуи къазэрытригъэтынур. (Къеджэ Лука 5:5—11.)

11. Библие ебгъаджэм и фІэщхъуныгъэр нэхъ быдэ хъун щхьэкІэ сытым теухуауэ удэгуашэ хъуну?

¹¹ Дэ Хьисэ хуэдэу Іуэху телъыджэхэр тхуэщІэкъым. Ауэ дэ Библие едгъаджэм дыдэгуэшэфынущ зи гъащІэм Иеговэ япэ изыгъэщхэм, дапхуэдэу абы и нэІэ ятригъэтми. Псалъэм папщІэ, уигу къэгъэкІыж, зэІущІэм укІуэн щыщІэбдза къудейм Иеговэ къызэрыбдэІэпыкъуауэ щытар. Уэ узыгъэлажьэм уепсалъэу, къыгурыбгъэІуэн хуей хъуауэ къыщІэкІынщ, зэІущІэхэр щекІуэкІ махуэхэм гувэху узэрымылэжьэфынур. Аращи, Библие ебгъаджэм дэгуашэ Иеговэ хуэлэжьэныр япэ щибгъэщам щыгъуэ дапхуэдэу абы и нэфІ къыпщыхуами икІи абы и фІыгъэкІэ дапхуэдэу уи фІэщхъуныгъэр нэхъ быдэ хъуами.

12. 1) Къуэш, шыпхъу зэмылІэужьыгъуэхэр Библие джыным къегъэблэгъэн щІыхуейр сыт? 2) Библие ебгъаджэм видеохэм сэбэпынагъ нэхъыбэ къыхихыну дапхуэдэу узэрыдэІэпыкъу хъунур? Щапхъэ къэфхь.

¹² Библие ебгъаджэм иджыри сэбэп къыхуэхъунущ нэгъуэщІ къуэш, шыпхъухэм я гъащІэм къыщыхъуа Іуэхугъуэхэр. Абыхэм жаІэж хъунущ Библие джыныр зэрыщІадза щІыкІэмрэ Иеговэ хуэлэжьэныр я гъащІэм япэ ирагъэщыну къадэІэпыкъуамрэ теухуауэ. Аращи, къуэш, шыпхъу зэмылІэужьыгъуэхэр Библие джыным къегъэблагъэ. Абы нэмыщІ «ГъащІэ мыухыж уиІэу псэу!» жыхуиІэ тхылъыр щывджкІэ «Нэхъ куууэ хэплъэ» икІи «Нэхъыбэ къащІэ» жыхуиІэ разделхэм ит видеохэм феплъ. Псалъэм папщІэ, 37 урокыр щызэпкърыфхкІэ «Иеговэ дызыхуэныкъуэр къыдитынущ» жыхуиІэ видеом феплъ хъунущ. Библие зыджым къыгурыІуэну дэІэпыкъу и гъащІэм Иеговэ япэ иригъэщмэ, абы и нэІэ къызэрытригъэтынур.

БИБЛИЕ ЕБГЪАДЖЭМ ЦІЫХУХЭР КЪЫЩЫПЭЩІЭУВЭМ ДЕЖ СЫТ ИЩІЭ ХЪУНУМИ КЪЫГУРЫІУЭНУ ДЭІЭПЫКЪУ

13. Дапхуэдэу Хьисэ и гъэсэнхэр цІыхухэр къазэрыпэщІэувэным зэрыхуигъэхьэзырар?

¹³ Хьисэ мызэ-мытІэу и гъэсэнхэм яжриІэт цІыхухэр къазэрыпэщІэувэнур, уеблэмэ, я Іыхьлыхэри абыхэм яхэту (Мт. 5:11, ДЩІ; 10:22, 36). Хьисэ лІэным куэд имыІэжу и гъэсэнхэм яжриІащ абыхэм щыщ языныкъуэхэр зэраукІынур (Мт. 24:9; Ин. 15:20; 16:2). Абы ахэр хуигъэушащ хъыбарыфІыр щагъэІукІэ акъылыфІагъэ ягъэлъэгъуэну. Псалъэм папщІэ, Хьисэ и гъэсэнхэм чэнджэщ яритащ я еплъыкІэм теухуауэ зыми емыдэуэну. Абы иджыри и гъэсэнхэм яжриІащ жаІэмрэ ящІэмрэ хуэсакъыну. А псом и фІыгъэкІэ абыхэм адэкІи хъыбарыфІыр ягъэІуну Іэмал яІэнут.

14. Библие ебгъаджэм цІыхухэр къызэрыпэщІэувэным зыхуигъэхьэзырыну дапхуэдэу узэрыдэІэпыкъу хъунур? (2 Тимофей 3:12).

¹⁴ Библие ебгъаджэм цІыхухэр къызэрыпэщІэувэным зыхуигъэхьэзырыну дапхуэдэу узэрыдэІэпыкъу хъунур? Абы жепІэ хъунущ къыдэлажьэхэм, и ныбжьэгъухэм е и Іыхьлыхэм Библие зэриджыр къащІа иужь къыжраІэнкІэ хъунур. (Къеджэ 2 Тимофей 3:12.) Къыдэлажьэхэм щыщ гуэрхэр абы къыщыдыхьэшхынкІэ хъунущ. НэгъуэщІхэри, уеблэмэ, и Іыхьлыхэри абы и еплъыкІэм ІейкІэ тепсэлъыхьынкІэ хъунущ. Библие едгъаджэм цІыхухэр къызэрыпэщІэувэным нэхъ пасэу дыхутепсэлъыхьмэ, а гугъуехьым пэщІэхуа иужь, ар абы нэхъ хуэхьэзыру щытынущ.

15. Библие ебгъаджэм и Іыхьлыхэр къызэрыпэщІэувэм пэлъэщыну сыт къыдэІэпыкъунур?

¹⁵ Библие ебгъаджэм и Іыхьлыхэр къыпэщІэувэмэ, абы и щхьэусыгъуэхэм егупсысыну дэІэпыкъу. Абыхэм къащыхъункІэ хъунущ ар къагъапцІэу. Е Иеговэ и Щыхьэтхэр цІыху Іейуэ абыхэм къалъытэнкІэ хъунущ. Къапщтэмээ, Хьисэ и Іыхьлыхэри абы ищІэмкІэ арэзытэкъым (Мк. 3:21; Ин. 7:5). Аращи, ебгъаджэм гуапэу, шыІэныгъэ хэлъу и Іыхьлыхэми, нэгъуэщІ цІыхухэми яхущыту зригъэсэну дэІэпыкъу.

16. Библие ебгъаджэм и фІэщ хъумкІэ гуапэу нэгъуэщІхэм дэгуэшэну сыт къыдэІэпыкъунур?

¹⁶ Едгъаджэ цІыхум и Іыхьлыхэр Библием теухуауэ къеупщІынкІэ хъунущ. Ауэ абы ищІэу хъуар занщІэу жимыІэмэ нэхъыфІщ, сыт щхьэкІэ жыпІэмэ иужькІэ ахэр абы къедэІуэну хуэмеижынкІэ хъунущ. Абы къыхэкІкІэ ебгъаджэм жеІэ Библием теухуауэ и Іыхьлыхэм щепсалъэкІэ куэд жимыІэну, иужькІэ а темэм тепсэлъыхьыну абыхэм гукъыдэж яІэн щхьэкІэ (Кол. 4:6). Псалъэм папщІэ, абы и Іыхьлыхэм jw.org сайтыр яригъэлъагъу хъунущ. Абы щыгъуэ езыхэм къыхахыфынущ Иеговэ и Щыхьэтхэм теухуауэ сытым еджэнуми икІи дапхуэдиз еджэнуми.

17. Библие ебгъаджэм Иеговэ и Щыхьэтхэм теухуауэ кърат упщІэхэм жэуап ириту зригъэсэну дапхуэдэу узэрыдэІэпыкъуфынур? (Сурэтми феплъ.)

¹⁷ jw.org сайтым «Иеговэ и Щыхьэтхэм теухуауэ нэхъыбэу ят упщІэхэр» жыхуиІэ статья гуп итщ. Ахэр къэбгъэсэбэпу Библие ебгъаджэр ебгъэсэфынущ и Іыхьлыхэм е къыдэлажьэхэм кърат упщІэхэм жэуап иритыжыфу (2 Тим. 2:24, 25). Абы нэмыщІ «ГъащІэ мыухыж уиІэу псэу!» жыхуиІэ тхылъым ит «Зыгуэрым жиІэфынущ» е «Зыгуэр къоупщІынкІэ хъунущ» жыхуиІэ рамкэхэр зэпкърыфхыну зыщывмыгъэгъупщэ. Ебгъаджэр хуэгъэуш езым и псалъэкІэ и фІэщ хъум теухуауэ къыбгуригъэІуэну. Хуей хъумэ и еплъыкІэр нэхъыфІу къызэрыбгуригъаІуэ хъуну щІыкІэр умыукІытэу жеІэ. Библие ебгъаджэм апхуэдэу зэрызригъасэр къыдэІэпыкъунущ къимыкІуэту и фІэщхъуныгъэм къыщхьэщыжыну.

18. Библие ебгъаджэр зэхуэсым и гъусэу хъыбарыфІыр игъэІуну дапхуэдэу хуэбгъэуш зэрыхъунур? (Маттэ 10:27).

¹⁸ Хьисэ и гъэсэнхэм унафэ яхуищІащ хъыбарыфІыр цІыху псоми хуаІуэтэну. (Къеджэ Маттэ 10:27.) Библие ебгъаджэм зэхуэсым и гъусэу хъыбарыфІыр игъэІуну нэхъ псынщІэу щІидзэмэ, Иеговэ дзыхь хуищІу нэхъ псынщІэу зригъэсэнущ. Абы апхуэдэ мурад игъэувыну дапхуэдэу узэрыдэІэпыкъуфынур? ХъыбарыфІ гъэІуным епха кампанием теухуауэ фи зэхуэсым объявленэ щащІмэ, ебгъаджэ цІыхум жеІэ зэхуэсым и гъусэу хъыбарыфІыр игъэІун щхьэкІэ сыт ищІэн хуейми. Апхуэдэ кампаниехэр щекІуэкІым деж куэдым я дежкІэ хъыбарыфІ гъэІуныр щІадзэну нэхъ тыншу щІыщытыр абы къыгурыгъаІуэ. Ебгъаджэм иджыри зы мурадыфІ игъэув хъунущ — тхьэмахуэм и кІуэцІым екІуэкІ зэІущІэхэм заданиехэр щигъэзэщІэну. Ар къыдэІэпыкъунущ и фІэщ хъур нэгъуэщІхэм нэхъыфІу къагуригъэІуэну.

БИБЛИЕ ЕБГЪАДЖЭМ ЕГЪЭЛЪАГЪУ АР ИЕГОВЭ ХУЭПЭЖУ ЩЫТЫНУ ЗЭРЫХУЕЙМ ШЭЧ КЪЫЗЭРЫТОМЫХЬЭР

19. Дапхуэдэу Хьисэ игъэлъагъуэу зэрыщытар и гъэсэнхэм дзыхь зэрахуищІыр икІи дэ дапхуэдэу абы щапхъэ зэрытетхыфынур?

¹⁹ Хьисэ уафэм дэкІуеижын ипэ и гъэсэнхэм яжриІащ ахэр зэгъусэу щыщытыну зэман зэрыщыІэнур. Абыхэм къагурыІуакъым Хьисэ ахэр уафэм дришеину мурад зэриІэр. Апостолхэм псори къагурыІуэу щымытами, Хьисэ шэч къытрихьэтэкъым ахэр абы иужь итыну зэрыхуейм (Ин. 14:1—5, 8). Хьисэ ищІэт апостолхэм пэж гуэрхэр къагурыІуэн щхьэкІэ зэман гуэр дэкІын зэрыхуеинур, псалъэм папщІэ, ахэр уафэм зэрыщыпсэуным теухуа пэжыр (Ин. 16:12). Дэри едгъаджэхэм едгъэлъагъу хъунущ Иеговэ ягъэгуфІэну гукъыдэж зэраІэм шэч къызэрытедмыхьэр.

20. Малави щыщ ди зы шыпхъум иригъаджэм теухуауэ и гугъэр зэрыхимыхыжар дапхуэдэу къызэригъэлъэгъуар?

²⁰ Дэ шэч къытетхьэкъым Библие едгъаджэхэр Алыхьым хуэпэжу щытыну зэрыхуейм. Малави щыщ ди шыпхъу Чифу́ндо и щапхъэм деплъынщ. Абы «ГъащІэ мыухыж уиІэу псэу!» жыхуиІэ тхылъыр къигъэсэбэпу, католик дин зыІыгъ, Алина́фе зи цІэ хъыджэбзыр иригъаджэу щІидзащ. Абыхэм 14 урокыр яуха иужь, Чифундо иригъаджэ хъыджэбзым еупщІащ, тхьэнапэхэр къэбгъэсэбэпыным теухуауэ сыт хуэдэ еплъыкІэ иІэми. Алинафе а упщІэр игу ирихьакъым икІи абы жиІащ: «Ар сэ си Іуэхужщ!» Чифундо и гугъат Алинафе куэд мыщІэу Библие джыныр къигъэнэну. Ауэ абы шыІэныгъэ хэлъу ар адэкІи иригъаджэт икІи зэман дэкІмэ, абы псори къыгурыІуэну щыгугът. Мазэ зыбжанэ дэкІауэ 34 урокыр яджу, Чифундо 6 пунктым хуэхьа мы упщІэр къиІэтащ: «Библием къыщыпщІамрэ Алыхь пэж Иеговэ теухуауэ къэпщІамрэ сыткІэ сэбэп къыпхуэхъуа?» Чифундо игу къегъэкІыж: «Алинафе абы щыгъуэ сыту куэд кърибжэкІат! Абы къыхигъэщат Иеговэ и Щыхьэтхэм Библием имыдэ зы Іуэхугъуи зэрамыщІэр». Куэд дэмыкІыу, Алинафе тхьэнапэхэр къигъэсэбэпын щигъэтри, псым зыщІигъэуащ.

21. Едгъаджэм Иеговэ и лъэныкъуэр иубыдыну иІэ гукъыдэжыр дапхуэдэу зэрыхэдгъэхъуэфынур?

²¹ Библие едгъаджэм ехъулІэныгъэ иІэн щхьэкІэ нэхъыбэ лэжьыгъэр зыщІэр Иеговэщ, ауэ дэри абы дыдэІэпыкъун щхьэкІэ тхузэфІэкІыу хъуар дощІэ (1 Кор. 3:7). Дэ цІыхум Алыхьыр къызэрыщыгугъыр жетІэ къудейуэ аракъым, атІэ абы Иеговэ хуиІэ лъагъуныгъэр хигъэхъуэну дыдоІэпыкъу. Иджыри дэ абы дыдоІэпыкъу Иеговэ хуэлэжьэныр и гъащІэм япэ иригъэщыну. Абы нэмыщІ едгъаджэр Иеговэ щыгугъыу идогъасэ икІи цІыхухэр къыщыпэщІэувэм деж ар къызэрыдэІэпыкъуным шэч къытримыхьэну дыдоІэпыкъу. Едгъаджэм дзыхь зэрыхуэтщІыр едгъэлъагъумэ, Алыхьым и гъуэгум быдэу зэрытетыфынум шэч къытримыхьэну ар къыдэІэпыкъунущ.