Библием едгъаджэр псым зыщІигъэуэну дауэ зэрыхуэдгъэхьэзырынур? (япэ Іыхьэр)

1. Библием едгъаджэ цІыхур псым зыщІигъэуэну хуэгъэхьэзырыныр ди дежкІэ пщІэшхуэу зэрыщытыр 2 Коринф 3:1—3 ит псалъэхэм дауэ къагъэлъагъуэрэ? (Обложкэм тет сурэтым феплъ.)

БИБЛИЕР зыдж, фи зэхуэсым къекІуалІэ цІыхум псым зыщыщІигъауэм деж, сыт хуэдэ гурыщІэхэр фиІэ хъурэ? ДауикІ, ар щыфлъагъум деж фи гум гуфІэгъуэр из хъууэ къыщІэкІынщ (Мт. 28:19). Ауэ ар Библием езыгъэджар фэрауэ щытмэ, фи гуфІэгъуэм гъунэ иІэкъым! (1 Фес. 2:19, 20). Библиер зыдж цІыхум псым зыщыщІигъауэм деж, ар Библием езыгъэджам дежкІи зэхуэсым щыщ псоми дежкІи «къытщытхъу тхылъым» хуэдэ мэхъу. (Къеджэ 2 Коринф 3:1—3.)

2. 1) Мыхьэнэшхуэ зиІэ сыт хуэдэ упщІэ дэ зэпкърытхын хуейр икІи сыт щхьэкІэ? 2) ЦІыхур Библием ебгъаджэу жыпІэ щыхъунур дапщэщ? (Сноскэм феплъ.)

² Дуней псом иужьрей илъэсиплІым къриубыдэу мазэ къэс Иеговэ и Щыхьэтхэм цІыху 10 000 000 хуэдиз Библием ирагъэджащb. ИкІи илъэс къэс цІыху 280 000 хуэдизым псым зыщІагъэуащ. Ар, дауикІ, гуфІэгъуэшхуэщ! Ауэ иджыри псым зыщІэзымыгъэуа мелуан бжыгъэ хъу цІыхухэм дапхуэдэу дазэрыдэІэпыкъунур? Иеговэ иджыри шыІэныгъэ зыхегъэлъ икІи и лъэныкъуэр яубыдыну цІыхухэм Іэмал ярет. Абы къыхэкІкІэ дэ тхузэфІэкІыр тщІэн хуейщ абыхэм зэрыхъукІэ нэхъ псынщІэу псым зыщІагъэуэну дадэІэпыкъун щхьэкІэ. «Къэнэжа зэманыр мащІэщ»! (1 Кор. 7:29 и япэ Іыхьэр; 1 Пет. 4:7).

3. Мы статьям сыт щызэпкърытхынур?

³ Хьисэ и лъэужь ирикІуэн щхьэкІэ цІыхухэр гъэхьэзырыным нобэ псом хуэмыдэу мыхьэнэшхуэ иІэщ. Абы къыхэкІкІэ Библиер зыдж цІыху нэхъыбэм псым зыщІагъэуэну зэрыдэІэпыкъуну щІыкІэр къыгурыІуэн щхьэкІэ УнафэщІ гупым къэрал зэмылІэужьыгъуэхэм щыІэ филиалхэм зыхуигъэзащ. Мы статьямрэ къыкІэлъыкІуэмрэ къыщытщІэнущ хъыбарыфІ гъэІуным куэд щІауэ хэт пионерхэм, миссионерхэм икІи районым и нэхъыжьхэм сытым дыхуагъэсэфынуми (Прит. 11:14; 15:22, Гъэсэпэтхыдэхэр)c. Абы нэмыщІ дэ къэтщІэнущ ехъулІэныгъэ яІэн щхьэкІэ Библиер зыдж цІыхумрэ, ар езыгъаджэмрэ сыт ящІэ хъунуми. Мы статьям чэнджэщитху щызэпкърытхынущ, абыхэм я фІыгъэкІэ Библием едгъаджэ цІыхум дыдэІэпыкъуфынущ и гъащІэм зэхъуэкІыныгъэ хилъхьэу, псым зыщІигъэуэну.

ТХЬЭМАХУЭ КЪЭС ЦІЫХУР БИБЛИЕМ ЕГЪАДЖЭ

4. ЦІыхур бжэІупэм деж Библием щедгъаджэкІэ сыт къыдгурыІуэн хуейр?

⁴ Къуэш, шыпхъу куэдым цІыхур Библием ирагъаджэ абы и бжэІупэм деж. ЦІыхум Библиер фІэгъэщІэгъуэн хъун щхьэкІэ апхуэдэ бгъэдыхьэкІэр ІэмалыфІми, цІыхур дакъикъэ зытІущкІэ фІэкІа бжэІупэм деж щебгъэджэфынукъым икІи ар тхьэмахуэ къэс емыкІуэкІынкІэ хъунущ. Библием итыр адэкІи къищІэну цІыхур хуагъэушын щхьэкІэ языныкъуэ къуэш, шыпхъухэм абы зэрызыпащІэ хъунур къащІэри, Библием ит гупсысэ гуэрхэмкІэ дэгуэшэн щхьэкІэ звонить хуащІ е письмо хурагъэхьd. Апхуэдэ щІыкІэкІэ цІыхур мазэ бжыгъэкІэ ебгъэджэфынущ, ауэ абы лъэбакъуэхэр имычынкІэ хъунущ. ЦІыхум Библие джыным къарурэ зэман куэдрэ тримыгъэкІуадэмэ, щІэныгъэ зригъэгъуэту, и гъащІэр Алыхьым и ІэмыщІэ ирилъхьэу, псым зыщІигъэуэфыну пІэрэ? ЗыщІигъэуэфыну къыщІэкІынкъым.

5. Лука 14:28—33 ит Хьисэ и псалъэхэр абы и лъэужь иувэну хуей цІыхухэр дгъэхьэзырыну дапхуэдэу къызэрыддэІэпыкъур?

⁵ И лъэужь иувэну хуей цІыхухэм ящІэн хуейр къащыгуригъаІуэм щыгъуэ, Хьисэ гъэщІэгъуэн щапхъитІ къихьат: зыр — чэщанэ зыухуэну мурад зыщІа цІыхум теухуат, адрейр — зауэм кІуэну зызыгъэхьэзыр пщым теухуат. Хьисэ зэрыжиІамкІэ, чэщанэ зыухуэну мурад зыщІа цІыхум япэщІыкІэ абы текІуэдэнур къибжу, зэхигъэкІын хуейщ а лэжьыгъэр икІэм хунэгъэсынрэ хунэмыгъэсынрэ. Пщыри тІысу нэгъуэщІхэм ечэнджэщын хуейщ, и дзэм хуигъэува къалэныр хуэгъэзэщІэнрэ хуэмыгъэзэщІэнрэ къыгурыІуэн щхьэкІэ. (Къеджэ Лука 14:28—33.) Апхуэдэ дыдэу Хьисэ и лъэужь иувэну хуей цІыхум абы и лъэужь уитыным къикІыр фІыуэ къыгурыІуэн хуейщ. Хьисэ и лъэужь иувэну хуей цІыхум дыдэІэпыкъуфынущ, Библиер тхьэмахуэ къэс ди гъусэу иджыну хуэдгъэушмэ. Ауэ ар дапхуэдэу зэрытщІынур?

6. ЕхъулІэныгъэ уиІэу цІыхур ебгъэджэн щхьэкІэ сыт пщІэ хъунур?

⁶ ЯпэщІыкІэ цІыхур Библием бжэІупэм деж зэребгъаджэр нэхъ кІыхь зэрыпщІыным иужь ит. Фэ фызэхуэза иужь Библием ит зы едзыгъуэ мыхъуу, едзыгъуитІ зэпкърыфхыфыну къыщІэкІынщ. Нэхъ кІыхьу фызэпсалъэу цІыхур еса иужь, абы уеупщІ хъунущ Библиер адэкІи вджын щхьэкІэ зыщІыпІэ фытІыс хъунрэ мыхъунрэ. Абы и жэуапым къигъэлъэгъуэнущ ар Библие джыным зэрыхущытыр. Ебгъаджэр Алыхьым нэхъ гъунэгъу хуэхъун щхьэкІэ, иужькІэ абы уеупщІ хъунущ тхьэмахуэм тІэу еджэну хуейрэ хуэмейрэ. Ауэ ебгъаджэ цІыхум псым зыщІигъэуэн щхьэкІэ, ар тхьэмахуэм зэ е тІэу зэребгъаджэм нэмыщІ нэгъуэщІ зыгуэри пщІэн хуейщ.

ЦІЫХУР БИБЛИЕМ ЕБГЪЭДЖЭНУ УКІУЭХУ ЗЫГЪЭХЬЭЗЫР

7. ЦІыхур Библием ебгъэджэну укІуэху дапхуэдэу зэрызыбгъэхьэзыр хъунур?

⁷ Уэ зыгуэр Библием ебгъаджэу щытмэ, абы и деж укІуэху зыбгъэхьэзырын хуейщ. ЯпэщІыкІэ материал вджымрэ абы едзыгъуэ къихьхэмрэ еджэ. Гупсысэ нэхъыщхьэхэр къыхэгъэщ. ФІыуэ егупсыс фызэджэ урокым и цІэм, подзаголовокхэм, упщІэ къихьхэм, «къеджэ» жиІэу едзыгъуэ итхэм, сурэтхэм, абы нэмыщІ фызэджэ темэр нэхъ гурыІуэгъуэ зыщІ видеороликхэм. Абы иужь егупсыс темэр ебгъаджэм къызэрыгурыбгъэІуэным, къищІа щІэныгъэхэр и гум нэсу, и гъащІэм къыщигъэсэбэпын щхьэкІэ (Неем. 8:8; Прит. 15:28 и япэ Іыхьэр, Гъэс.).

8. Библием едгъаджэхэм щхьэкІэ Алыхьым лъэІукІэ зэрызыхуэдгъэзэн хуейм теухуауэ Колоссэ 1:9, 10 ит Паул и псалъэхэм сытым дыхуагъасэрэ?

⁸ Зыщыбгъэхьэзырым деж цІыху ебгъаджэм щхьэкІэ икІи ар зыхуэныкъуэхэм щхьэкІэ Иеговэ лъэІукІэ зыхуэгъазэ. Вджы материалыр цІыху ебгъаджэм и гум нэсын хуэдэу къыгурыбгъэІуэн щхьэкІэ Иеговэ къыбдэІэпыкъуну елъэІу. (Къеджэ Колоссэ 1:9, 10.) ЦІыху ебгъаджэм къыгурыІуэну къегугъуэкІынкІэ е арэзы техъуэну къехьэлъэкІынкІэ хъунум егупсыс. Зыщумыгъэгъупщэ: уэ уи къалэныр — псым зыщІигъэуэну Библием ебгъаджэр хуэбгъэхьэзырыныращ.

9. Библием ебгъаджэм зигъэхьэзырыну дапхуэдэу узэрыдэІэпыкъу хъунур?

⁹ Дэ дыщогугъ цІыхум Библиер щІэх-щІэхыурэ зэриджым и фІыгъэкІэ Иеговэрэ Хьисэрэ абы хуащІар фІыщІэ ищІу хъуну икІи щІэныгъэ нэхъыбэ зригъэгъуэтыну хуеину (Мт. 5:3, 6). Библием едгъаджэм материал иджым и гур триухуэн хуейщ, къищІэм сэбэпынагъ нэхъыбэ къыхуихьын щхьэкІэ. Аращи, абы къыгурыгъаІуэ Библие джыгъуэ къэс зыбгъэхьэзырыным мыхьэнэшхуэ зэриІэр: урокым еджэну икІи материалыр езым дапхуэдэу ехьэлІами егупсысыну. Апхуэдэу ищІэну абы дапхуэдэу узэрыдэІэпыкъу хъунур? Зы урок гуэр и гъусэу гъэхьэзыр, зэрызагъэхьэзырыр къыгурыбгъэІуэн щхьэкІэe. УпщІэм и жэуапыр абзацым къызэрыщыбгъуэтыр егъэлъагъу икІи къыгурыгъаІуэ псалъэ нэхъыщхьэхэмрэ гупсысэ нэхъыщхьэхэмрэ къыхэбгъэщмэ, жэуапыр къэпщІэжыну зэрынэхъ тыншыр. Абы иужь абзацым хуэхьа упщІэм и жэуапыр езым и псалъэкІэ итыну елъэІу. Апхуэдэу ищІэмэ, абы а материалыр къызэрыгурыІуар уэ зэхэбгъэкІыфынущ. Библием ебгъаджэр сытым иджыри хуэбгъэуш хъуну?

ИЕГОВЭ МАХУЭ КЪЭС ЛЪЭІУКІЭ ЗЫХУИГЪАЗЭУ БИБЛИЕМ ЕБГЪАДЖЭР ЕГЪАСЭ

10. Библием махуэ къэс уеджэн щІыхуейр сыт? Библие джыным сэбэпынагъ нэхъыбэ къыпхуихьын щхьэкІэ сыт пщІэн хуейр?

¹⁰ ЦІыхум тхьэмахуэ къэс ди гъусэу Библиер зэриджым нэмыщІ, мыхьэнэшхуэ иІэщ езыр махуэ къэс Иеговэ жиІэм едэІуэным икІи абы епсэлъэным. Алыхьым жиІэм уедэІуэн щхьэкІэ Библием махуэ къэс уеджэн хуейщ (Иис. Н. 1:8; Пс. 1:1—3). Абы егъэлъагъу jw.org сайтым ит «Библием узэреджэ хъун график»f жыхуиІэр къызэрыбгъэсэбэп хъунур. Ебгъаджэм Библие джыным сэбэпынагъ нэхъыбэ къыхуихьын щхьэкІэ, ар хуэгъэуш Иеговэ теухуауэ Библием итымрэ къищІэр и гъащІэм къызэрыщигъэсэбэпынымрэ егупсысыну (Апост. 17:11; Екъуб 1:25).

11. Алыхьым зэрызыхуигъэзэн хуей щІыкІэр ебгъаджэм дапхуэдэу къызэрыгурыбгъэІуэнур икІи ар Иеговэ щІэх-щІэхыурэ епсэлъэным сыт мыхьэнэшхуэ щІиІэр?

¹¹ Ебгъаджэр хуэгъэуш Иеговэ епсэлъэну, нэгъуэщІу жыпІэмэ махуэ къэс лъэІукІэ зыхуигъэзэну. Еджэн щІэвдзэн ипэ икІи фыуха иужь уи гум къыбгъэдэкІыу Алыхьым лъэІукІэ зыхуэгъазэ, ебгъаджэм щхьэкІи елъэІу. Иеговэ лъэІукІэ зэрызыхуэбгъазэр ебгъаджэм щызэхихым деж, абы къыгурыІуэнущ Хьисэ и цІэкІэ Алыхьым зэрызыхуэбгъэзэн хуейр икІи и гум къыбгъэдэкІыу уафэм щыІэ ди Адэм епсалъэу абы зригъэсэнущ (Мт. 6:9; Ин. 15:16). Ебгъаджэр Библием махуэ къэс еджэмэ, нэгъуэщІу жыпІэмэ Иеговэ жиІэм едаІуэмэ икІи лъэІукІэ зыхуигъазэу, Иеговэ епсалъэмэ, уи нэгу къыщІэгъэхьэт ар дапхуэдизу Алыхьым гъунэгъу хуэхъунуми! (Екъуб 4:8). Абы ар хьэл хуэхъумэ, Алыхьым нэхъ гъунэгъу хуэхъуну икІи адэкІэ абы и гъащІэр Иеговэ и ІэмыщІэ ирилъхьэу, псым зыщІигъэуэну къыдэІэпыкъунущ. Ауэ ебгъаджэм иджыри сыткІэ удэІэпыкъун хуей?

ЕБГЪАДЖЭМ ДЭІЭПЫКЪУ ИЕГОВЭ И НЫБЖЬЭГЪУ ХЪУНУ

12. Алыхьым ныбжьэгъу хуэхъун щхьэкІэ ебгъаджэм дапхуэдэу удэІэпыкъу хъуну?

¹² Библиер зыджым къищІэр къыгурыІуэн хуей закъуэкъым, атІэ и гуми нэсын хуейщ. Сыт щхьэкІэ жыпІэмэ, гуращ ухуэзыгъэушыр щІэныгъэ зэбгъэгъуэтахэр уи гъащІэм къыщыбгъэсэбэпыну. Хьисэ цІыхухэм гурыІуэгъуэу пэжыр зэрабгъэдилъхьэм нэмыщІ, ар абыхэм я гум лъэІэст икІи аращ цІыхухэр абы и лъэужь иувэну хуэзыгъэушу щытар (Лк. 24:15, 27, 32). Алыхьыр зэрыщыІэр икІи абы ныбжьэгъу зэрыхуэхъуфынур ебгъаджэм къыгурыІуэным мыхьэнэшхуэ иІэщ. Абы Иеговэ Адэу, Алыхьу икІи Ныбжьэгъуу къилъытэну удэІэпыкъун хуейщ (Пс. 25:4, 5). ЦІыхур щебгъаджэм деж сыт хуэдэ темэ зэпкърывмыхами мыхьэнэшхуэ иІэщ Алыхьым и хьэл-щэн дахэхэм абы гу лъебгъэтэным (Исх. 34:5, 6; 1 Пет. 5:6, 7). Иеговэ и лъагъуныгъэр, гуапагъэр, абы нэмыщІ гущІэгъур фІыщІэ ищІыну абы дэІэпыкъу. Хьисэ зэрыжиІамкІэ, «я нэхъ ин дыдэу япэрей унафэр» — «уэ уигу псомкІи... Зиусхьэну уи Тхьэр фІыуэ» плъагъуныращ (Мт. 22:37, 38). Ебгъаджэм игу псомкІи Алыхьыр фІыуэ илъагъуну дэІэпыкъу.

13. Ебгъаджэм Иеговэ и хьэл-щэнхэр къицІыхун щхьэкІэ дапхуэдэу удэІэпыкъу хъуну? Щапхъэ къэфхь.

¹³ Уэ Иеговэ фІыуэ щІэплъагъум и щхьэусыгъуэхэмкІэ ебгъаджэм дэгуашэ. Абы ар хуигъэушыфынущ Алыхьыр фІыуэ илъагъуу зригъэсэну икІи и ныбжьэгъу хъуну (Пс. 73:28). Псалъэм папщІэ, фызэджэ материалым е Библием ит едзыгъуэм ит гупсысэ гуэр уи гум лъэІэсамэ икІи Иеговэ и лъагъуныгъэм, Іущагъым, захуагъэм икІи и къарум теухуауэ нэхъыбэ къэпщІэну къыбдэІэпыкъуамэ, абыкІэ ебгъаджэм дэгуашэ. ИкІи а хьэл-щэнхэр ди Адэм зэрыхэлъым щхьэкІэ, ар фІыуэ щІэплъагъум и щхьэусыгъуэхэм ящыщ зыуэ зэрыщытыр ебгъаджэм ирелъагъу. Ауэ Библиер зыджым псым зыщІигъэуэн щхьэкІэ сыт иджыри ищІэн хуейр?

ЕБГЪАДЖЭР ЗЭХУЭСЫМ КЪЭКІУЭНУ ХУЭГЪЭУШ

14. Еврейхэм 10:24, 25 зэІущІэхэм теухуауэ сыт итыр?

¹⁴ Дэ дыхуейщ Библиер зыджхэм псым зыщІагъэуэну унафэ къащтэну. Ауэ абы щхьэкІэ ахэр зэІущІэхэм кІуэн хуейщ. Библиер яджыну куэдым дэІэпыкъуа къуэш, шыпхъухэм гу лъатащ нэхъ щІэх зэІущІэхэм кІуэн щІэзыдзэхэр нэхъ псынщІэу Алыхьым гъунэгъу зэрыхуэхъур (Пс. 111:1). Языныкъуэ къуэш, шыпхъухэм ирагъаджэхэм къыгурагъаІуэ Библиер щаджым деж зэмыджэ куэд зэІущІэхэм къызэрыщащІэфынур. Ебгъаджэм и гъусэу Еврейхэм 10:24, 25 зэпкърыхи, ди зэІущІэхэм сыт хуэдэ сэбэпынагъ къыхуихьынуми жеІэ (къеджэ). «Сыт къыщекІуэкІыр Иеговэ и Щыхьэтхэр щызэхуэс Унэм?»g жыхуиІэ видеороликыр егъэлъагъу. Тхьэмахуэ къэс екІуэкІ зэІущІэхэр ебгъаджэм и гъащІэм щыщ хъуну дэІэпыкъу.

15. ЗэІущІэхэм димыгъэхуу кІуэну ебгъаджэр дауэ зэрыхуэбгъэушыфынур?

¹⁵ Ебгъаджэр зэІущІэм зэи мыкІуамэ е зэман-зэманкІэ фІэкІа мыкІуэмэ, сыт пщІэ хъунур? Уэ иужь дыдэу уздэщыІа зэІущІэм къыщыпщІар гушхуэныгъэ хэлъу абы жеІэж. Апхуэдэу жепІэмэ, ар нэхъ тегушхуэну къыщІэкІынущ зэІущІэм кІуэну, ауэ сытми къебгъэблагъэ нэхърэ. Иджыпсту зэпкърыфх «ХъумакІуэ чэщанэ» журналыр е «Ди гъащІэмрэ лэжьыгъэ лъапІэмрэ» жыхуиІэ дызэрылажьэ тхылъыр абы ет. КъыкІэлъыкІуэ зэІущІэм зэпкърахынухэр егъэлъагъу икІи программэм и сыт хуэдэ Іыхьэр нэхъ гъэщІэгъуэну къыщыхъуми абы еупщІ. Ебгъаджэр япэ дыдэу зэІущІэм кІуа иужь, абы щилъэгъунумрэ щызэхихынумрэ куэдкІэ нэхъыфІщ нэгъуэщІ динхэм ирагъэкІуэкІ зэІущІэ здэкІуахэм щилъэгъуамрэ щызэхихамрэ нэхърэ (1 Кор. 14:24, 25). Ди зэІущІэхэм ар къуэш, шыпхъухэм щыхуэзэнущ икІи абыхэм щапхъэ ятрихыфынущ. Ахэр ебгъаджэм дэІэпыкъуфынущ Алыхьым гъунэгъу хуэхъуну икІи псым зыщІигъэуэну зыхуигъэхьэзырыну.

16. Библием ебгъаджэр псым зыщІигъэуэну дапхуэдэу зэрыхуэбгъэхьэзырынур? КъыкІэлъыкІуэ статьям сыт щызэпкърытхынур?

¹⁶ Аращи, Библием ебгъаджэр псым зыщІигъэуэну дапхуэдэу зэрыхуэбгъэхьэзырынур? Ебгъаджэм къыгурыгъаІуэ Библие джыным мыхьэнэшхуэ зэриІэр: тхьэмахуэ къэс уи гъусэу Библиер иджыну икІи зигъэхьэзырыну хуэгъэуш. Абы нэмыщІ хуэгъэуш Иеговэ и ныбжьэгъу хъуну, махуэ къэс абы епсэлъэну икІи димыгъэхуу зэІущІэхэм кІуэну. («Библиер зыджым псым зыщІигъэуэну дауэ зэрызыхуигъэхьэзырынур?» жыхуиІэ рамкэм феплъ.) Ауэ къыкІэлъыкІуэ статьям иджыри чэнджэщитху щызэпкърытхынущ. Ахэр къэдгъэсэбэпмэ, Библиер зыджым псым зыщІигъэуэну дыдэІэпыкъуфынущ.