Зыгуэрым теухуауэ щыгъуазэу дыщымытыным сыт хуэдэ сэбэпынагъ хэлъ?

1. Иеговэ сыт хуэдэ зэфІэкІхэр къытхилъхьа икІи сыт щхьэкІэ?

ИЕГОВЭ дэ дыгупсысэфу, щІэ гуэр къэтщІэфу икІи Іущагъ зыхэлъ унафэхэр къэтщтэфу дыкъигъэщІащ. Сыт абы къигъэлъагъуэр? Ар хуейщ «Алыхьым теухуа щІэныгъэр» къэдгъуэтыну икІи ди акъылыр къэдгъэсэбэпу абы дыхуэлэжьэну (Прит. 2:1—5; Рим 12:1).

2. 1) Ди зэфІэкІым сыт хуэдэ гъунэ иІэ? (Иов 37:23, 24). (Сурэтми феплъ.) 2) Псоми зэрыхэдмыщІыкІым арэзы дытехъуэным сэбэпынагъ щІыпылъыр сыт?

² Дэ щІэ гуэр къэтщІэну зэфІэкІ диІэми, ди щІэныгъэм гъунэ иІэщ. (Къеджэ Иов 37:23, 24.) Іэиуб и щапхъэм деплъынщ. Иеговэ Іэиуб упщІэ зыбжанэ кърита иужь, абы къыгурыІуащ Іуэхугъуэ куэдым зэрыхимыщІыкІыр. Алыхьыр Іэиуб къызэрепсэлъар къыдэІэпыкъуащ и щыуагъэр къыгурыІуэжу и гупсысэкІэр ихъуэжыну (Иов 42:3—6). Дэ ди щІэныгъэм гъунэ зэриІэм Іэдэбу арэзы дытехъуэмэ, абы и сэбэп къыдэкІынущ. Апхуэдэ гупсысэкІэр къыддоІэпыкъу унафэ гуэр къэтщтэн щыхуейм деж Иеговэ нэхъыбэу дзыхь хуэтщІыну. Дэ ди фІэщ мэхъу дызыхуэныкъуэ щІэныгъэр Алыхьым къызэрытхузэІуихынур (Прит. 2:6).

3. Мы статьям сыт щызэпкърытхынур?

³ АдэкІэ дэ дытепсэлъыхьынущ сыт хуэдэ Іуэхугъуэхэм дыщымыгъуазэми икІи абы къыхэкІкІэ сыт хуэдэ гугъуехьхэр диІэфынуми. Иджыри дэ къэтлъэгъунущ зыгуэрым хэдмыщІыкІыным сыт хуэдэ сэбэп хэлъми. А псор къыддэІэпыкъунущ шэч къытедмыхьэну «псори зыщІэ» Иеговэ дызыхуэныкъуэ щІэныгъэхэр къызэрыдитынум (Иов 37:16).

ДЭ ТЩІЭКЪЫМ МЫ ДУНЕЙМ И КІЭР КЪЫЩЫСЫНУР

4. Маттэ 24:36 зэритымкІэ сыт дэ дымыщІэр?

⁴ Къеджэ Маттэ 24:36. Мы дунейм и кІэр къыщысынур дэ тщІэкъым. Хьиси щІылъэм щытетам щыгъуэ «а махуэр е а сыхьэтыр» ищІэтэкъымa. ИужькІэ абы апостолхэм яжриІащ Іуэхугъуэ гуэрхэм я «пІалъэмрэ лъэхъэнэмрэ» теухуауэ Иеговэ езым унафэ зэрищІыр (Апост. 1:6, 7). ШейтІаным и ІэмыщІэ илъ дунейр щигъэкІуэдыну махуэр Иеговэ триухуакІэщ. Ауэ ар къыщыхъунур къэтщІэну дэ зэфІэкІ диІэкъым.

5. Мы дунейм и кІэр къыщысынур зэрыдмыщІэм къыхэкІкІэ, сыт хуэдэ гугъуехьхэр диІэфыну?

⁵ Мы дунейм и кІэм дапхуэдизрэ дежьэн хуейми дэ тщІэкъым. Абы къыхэкІкІэ зыгуэрым шыІэныгъэ фІэкІуэдыфынущ е и лъэр щІэхуфынущ, псом хуэмыдэу, ар Иеговэ и махуэм куэд щІауэ ежьэу щытмэ. Хэти и унагъуэм щыщхэр е нэгъуэщІ цІыхухэр къызэрыщыдыхьэшхым гугъу иригъэхьыфынущ (2 Пет. 3:3, 4). А псом къыхэкІкІэ мыпхуэдэу дегупсысыфынущ: «А махуэмрэ а сыхьэтымрэ къыщысынур тщІамэ, гугъуехьхэр тшэчыну куэдкІэ нэхъ тынш хъунут».

6. Мы дунейм и кІэр къыщысынур зэрыдмыщІэр ди дежкІэ щІэнэхъыфІыр сыт?

⁶ Пэжыр жыпІэмэ, мы дунейм и кІэр къыщысынур Иеговэ къызэрытхузэІуимыхар ди дежкІэ нэхъыфІщ. Апхуэдэу дэ къэдгъэлъэгъуэфынущ уафэм щыІэ ди Адэр фІыуэ зэрытлъагъур икІи абы дзыхь зэрыхуэтщІыр. Дэ мы дунейм и кІэр къэсыхукІэкъым, атІэ игъащІэ псокІэ Иеговэ дыхуэлэжьэнущ. Аращи, «Тхьэм и махуэр» къыщысынум куэдрэ демыгупсысу, абы къытхуихьыну фІыгъуэхэм ди акъылыр тедухуэмэ нэхъыфІщ. Ар къыддэІэпыкъунущ Алыхьым худиІэ ныбжьэгъугъэр дгъэбыдэну икІи ар дгъэгуфІэн щхьэкІэ тхузэфІэкІыу хъуар тщІэну (2 Пет. 3:11, 12).

7. Сыт дэ дызыщыгъуазэр?

⁷ Иджы нэгъэсауэ дызыщыгъуазэ Іуэхугъуэхэм дегупсысынщ. Библием ит къэхъун хуей псалъэхэм тепщІыхьмэ, 1914 гъэм мы дунейм и иужьрей махуэхэм щІадзащ. Тхыгъэ ЛъапІэм зэпкърыхауэ итщ а зэманым къыщыщІэдзауэ дунейм сыт хуэдэ Іуэхугъуэхэр къыщыхъунуми. Абы къыхэкІкІэ дэ шэч лъэпкъ къытетхьэкъым «Иеговэ и махуэшхуэр» гъунэгъу зэрыхъуам (Соф. 1:14). Абы нэмыщІ дэ дощІэ мыхьэнэшхуэ зиІэ лэжьыгъэ Иеговэ къызэрытхуигъэфэщар. Дэ «Тхьэм и Тепщэныгъэшхуэм теухуа хъыбарыфІыр» зэрыхъукІэ цІыху нэхъыбэм яжетІэн хуейщ (Мт. 24:14). А хъыбарыр къэрал 240 хуэдизым бзэ 1 000 щІигъукІэ щагъэІу. Мыхьэнэшхуэ зиІэ а лэжьыгъэм псэемыблэжу дыхэтын щхьэкІэ «а махуэр е а сыхьэтыр» тщІэн хуейуэ щыткъым.

ДЭ ТЩІЭКЪЫМ ИЕГОВЭ ДАПХУЭДЭ ЩІЫКІЭКІЭ КЪЫДДЭІЭПЫКЪУНУМИ

8. Экклезиаст 11:5 ит «Алыхь пэжым ищІэ Іуэхухэр» жыхуиІэм сыт къикІыр?

⁸ «Алыхь пэжым ищІэ Іуэхухэм» дэ сыт щыгъуи щыгъуазэу дыщыткъым. (Къеджэ Экклезиаст 11:5.) Сыт хуэдэ Іуэхухэра мыбдеж зи гугъу ищІыр? Иеговэ и мурадыр игъэзэщІэн щхьэкІэ, абы езым зыгуэр ищІэфынущ е Іуэху гуэрхэр къэхъуну хуит ищІыфынущ. Зыгуэр къэхъуну Иеговэ хуит щІищІым и щхьэусыгъуэ псор дэ тщІэкъым. Абы нэмыщІ дэ тщІэкъым дапхуэдэ щІыкІэкІэ Иеговэ къыддэІэпыкъунуми (Пс. 37:5). Анэм и ныбэм илъ сабийм зэрызиужьыр щІэныгъэлІхэм иджыри къыздэсым икІэм нэсу къагурыІуэкъым. Апхуэдэ дыдэу, Алыхьым и Іуэхухэри ди дежкІэ щІэхъумауэ щытщ.

9. Иеговэ къызэрыддэІэпыкъуну щІыкІэр зэрыдмыщІэм къыхэкІкІэ, сыт хуэдэ гугъуехьхэр диІэфыну?

⁹ Иеговэ къызэрыддэІэпыкъуну щІыкІэр зэрыдмыщІэм къыхэкІкІэ дэ тегушхуэгъуей дыхъуфынущ. Псалъэм папщІэ, ахъшэ нэхъ мащІэкІэ дыпсэууэ зедгъэсэну е хъыбарыфІыр зыгъэІухэр мащІэу здэщыІэ щІыпІэм дыІэпхъуэну дытемыгушхуэнкІэ хъунущ. НэгъуэщІ гугъуехьми дыпэщІэхуэфынущ, псалъэм папщІэ, Иеговэ къызэрытхуэарэзым шэч къытетхьэу щІэддзэнкІэ хъунущ. Апхуэдэ гурыщІэ диІэфынущ Алыхьым и лэжьыгъэм пыщІа мурад гуэрхэр къыдэмыхъулІэмэ, хъыбарыфІ гъэІуным жыджэру дыхэту, ауэ ехъулІэныгъэ димыІэмэ е ди организацэм иригъэкІуэкІ лэжьыгъэ гуэрым дыхэту, ауэ а лэжьыгъэр зы щхьэусыгъуэ гуэркІэ мыкІуатэмэ.

10. Иеговэ къызэрыддэІэпыкъуну щІыкІэр зэрыдмыщІэм и фІыгъэкІэ, дэ сыт хуэдэ хьэл-щэнхэр зыхэтлъхьэфыну?

¹⁰ Иеговэ къызэрыддэІэпыкъуну щІыкІэр зэрыдмыщІэм и фІыгъэкІэ, дэ мыхьэнэшхуэ зиІэ хьэл-щэнхэр зыхэтлъхьэфынущ, псалъэм папщІэ, Іэдэбагърэ ди зэфІэкІыр здынэсыр зэрытщІэжымрэ. Дэ нэхъыфІу къыдгурыІуэу дохъу Алыхьым и гупсысэхэмрэ и гъуэгухэмрэ дыдейм нэхърэ куэдкІэ зэрынэхъ лъагэр (Ис. 55:8, 9). Абы нэмыщІ Иеговэ нэхъыбэу дзыхь хуэтщІу зыдогъасэ, сыт щхьэкІэ жыпІэмэ абы сыт хуэдэ лэжьыгъэмкІи ехъулІэныгъэ къыдитыфынущ. ХъыбарыфІ гъэІунымкІэ ехъулІэныгъэ дыщиІэм е къыдата къалэныр фІыуэ щытхуэгъэзащІэм деж, абы щхьэкІэ уафэм щыІэ ди Адэр догъэлъапІэ (Пс. 127:1; 1 Кор. 3:7). Ауэ псори дызэригугъам хуэдэу мыхъуми, ди Іуэхур зыІутыр Иеговэ зэрилъагъур зыщыдгъэгъупщэн хуейкъым (Ис. 26:12). Дэ ди лъэныкъуэкІэ тщІэн хуейр дощІэ икІи шэч лъэпкъ къытетхьэкъым Иеговэ и лъэныкъуэкІи ищІэн хуейр зэрищІэнум. ДауикІ, дэ дыщыгугъкъым Иеговэ пасэрей зэманым и лэжьакІуэхэм щхьэкІэ ищІа телъыджэхэм хуэдэ дэр щхьэкІи ищІэну. Ауэ абы дызэриунэтІыным дэ шэч лъэпкъ къытетхьэкъым (Апост. 16:6—10).

11. Иеговэ теухуауэ сыт дэ тщІэр?

¹¹ Дэ дощІэ Иеговэ лъагъуныгъэ, захуагъэ икІи Іущагъ зэрыхэлъыр. Иджыри дэ дощІэ Иеговэ езым щхьэкІи къуэш, шыпхъухэм щхьэкІи тщІэуэ хъуар лъапІэу зэрилъытэр. Абы нэмыщІ дэ дощІэ Иеговэ хуэпэж цІыхухэм сыт щыгъуи и нэфІ зэрыщыхуэр (Евр. 11:6).

ДЭ ТЩІЭКЪЫМ ПЩЭДЕЙ КЪЭХЪУНУР

12. Екъуб 4:13, 14 зэритымкІэ сыт дэ дымыщІэр?

¹² Къеджэ Екъуб 4:13, 14. Пэжыр жыпІэмэ, пщэдей къэхъунур дэ тщІэкъым. Мы дунейм дэ зэманымрэ къэхъукъащІэмрэ щыхъумауэ дыщыткъым (Эккл. 9:11). Абы къыхэкІкІэ дэ тщІэкъым ди мурадхэр къыдэмыхъулІэнуми икІи щІэддза Іуэхур икІэм нэдгъэсын щхьэкІэ псэууэ дыщытынуми.

13. Пщэдей къэхъунур зэрыдмыщІэм къыхэкІкІэ, сыт хуэдэ гурыщІэхэр диІэфыну?

¹³ Пщэдей къэхъунур зэрыдмыщІэр ди дежкІэ гугъуехьу щытыфынущ. Сыт щхьэкІэ? КъэкІуэну зэманым теухуауэ дызэрыгузавэм ди гуфІэгъуэр тфІигъэкІуэдыфынущ. ДымыщІэххэу дызыпэщІэхуэ гуауэхэми гупсэхугъуэ тфІагъэкІуэд. Абы нэмыщІ дызыщыгугъахэр къызэрымыхъуам къыхэкІкІэ, дынэщхъейуэ икІи ди лъэр щІэхуауэ дыщытыфынущ (Прит. 13:12).

14. Ди насыпыр зэлъытар сыт? (Сурэтхэми феплъ.)

¹⁴ Теубыдагъэ тхэлъу гугъуехьхэм дызэрыпэщІэтымкІэ дэ къыдогъэлъагъуэ уафэм щыІэ ди Адэм лъагъуныгъэм къыхэкІыу дызэрыхуэлажьэр. Библием зэритымкІэ, Иеговэ гугъуехь псоми дыщихъумэкъым икІи ди гъащІэм къыщыхъуну псор триухуэкъым. Абы ещІэ ди къэкІуэным теухуауэ зэрытщІэм ди насыпыр елъытауэ зэрыщымытыр. Дэ дынасыпыфІэщ Иеговэ дыщечэнджэщым икІи дыщедаІуэм деж (Иер. 10:23). Унафэ гуэр къыщытщтэкІэ, Иеговэ къыддэІэпыкъуну дыщелъэІум деж дэ мы псалъэхэм дытету жыпІэ хъунущ: «Зиусхьэныр хуеймэ, дыпсэунущ, мыр е мор тщІэнущ» (Екъуб 4:15).

15. КъэкІуэным теухуауэ сыт дэ тщІэр?

¹⁵ Пщэдей къэхъунур дымыщІэми, дэ дощІэ Иеговэ гъащІэ мыухыжкІэ дыкъызэригъэгугъэр. Хэти уафэм, хэти щІылъэм щыпсэунущ. Дэ дощІэ Алыхьым пцІы зэримыупсыр икІи дыкъызэригъэгугъауэ хъуар игъэзэщІэжыну абы зыри зэран зэрыхуэмыхъуфынур (Тит 1:2). Иеговэ закъуэщ къыджезыІэр «икІэм къэхъунур... икІи пасэрей зэманым щыщІэдзауэ — иджыри къэмыхъуар». Пасэрей зэманым къэхъун хуея Іуэхугъуэхэр псори къэхъуащ. Апхуэдэ дыдэу, ди къэкІуэным теухуауэ Алыхьым жиІауэ хъуар къэхъунущ (Ис. 46:10). Дэ нэгъэсауэ дощІэ: Иеговэ фІыуэ дыкъимылъагъужу зыми ищІыфынукъым (Рим 8:35—39). Сыт хуэдэ гугъуехьми дыпэлъэщын щхьэкІэ абы дэ гупсэхугъуи, Іущагъи, къаруи къыдитынущ. Иеговэ сыт щыгъуи къыддэІэпыкъунущ икІи и нэфІ къытщыхуэнущ (Иер. 17:7, 8).

ИЕГОВЭ ФІЫУЭ ДЫКЪЫЗЭРИЦІЫХУР ДЭ И КІЭМ НЭС КЪЫДГУРЫІУЭФЫНУКЪЫМ

16. Иеговэ дэтхэнэ зы цІыхуми теухуауэ сыт ищІэр икІи абы сыт хуэдэ гурыщІэхэр къыуитрэ? (Псалом 139:1—6).

¹⁶ Къеджэ Псалом 139:1—6. Иеговэ дэ ттеухуауэ псори ещІэ. Абы ещІэ ди гупсысэхэмрэ ди гурыщІэхэмрэ лъабжьэ хуэхъур. Дэ жытІэри ди гум илъри абы ещІэ. Абы иджыри ещІэ дэ тщІэ Іуэхугъуэхэри, ахэр щІэтщІэм и щхьэусыгъуэхэри. Пащтыхь Даут итхат Иеговэ и нэІэ къызэрыттригъэтыр икІи къыддэІэпыкъун щхьэкІэ сыт щыгъуи дызэригъусэр. Егупсысыт: Уафэри щІылъэри къэзыгъэщІа, Псори зыхузэфІэкІ ди Алыхь Иеговэ и нэІэ уэ къыптригъэтщ икІи уи гъащІэр абы къыфІэмыІуэхуу щыткъым. Сыт хуэдэ гурыщІэхэр абы къыуитрэ? Даут жиІа мы псалъэхэм уэ арэзы утехъуэну къыщІэкІынщ: «Уэ фІыуэ сыкъызэрыпцІыхур хуабжьу согъэщІагъуэ. Сэ ар и кІэм нэсу къызгурыІуэкъым» (Пс. 139:6)

17. Иеговэ фІыуэ дыкъызэрилъагъур икІи дыкъызэрыгурыІуэр ди фІэщ тщІыну ди дежкІэ гугъуу щІыщытынкІэ хъунур сыт?

¹⁷ Иеговэ фІыщэу дыкъызэрилъагъур икІи и нэІэ къызэрыттригъэтыр ди фІэщ тщІыну ди дежкІэ гугъуу щытыфынущ дызыщІапІыкІа хабзэм, дыкъызыхэкІа лъэпкъым е тІыгъа диным къыхэкІкІэ. Абы нэмыщІ ди щыуагъэхэр дигу къэдгъэкІыжурэ, мыпхуэдэу дегупсысыфынущ: «Ахэр апхуэдизкІэ хьэлъэщи, Иеговэ си ныбжьэгъуу щытыну хуеину къыщІэкІынкъым». Апхуэдэ гурыщІэхэр Даути зэзэмызэ иІэу щытащ (Пс. 38:18, 21). Хэти Алыхьыр игъэгуфІэн щхьэкІэ и дуней тетыкІэр ихъуэжыну къегугъуэкІыу щытыфынущ. Апхуэдэ цІыхум мыпхуэдэ упщІэ иІэфынущ: «Алыхьым пэж дыдэу сыкъыгурыІуэу щытмэ, сызэрыщыт дыдэм хуэдэу щхьэ сыкъимыщтэрэ? Си дежкІэ тэмэму щытыр зыхэзныну щхьэ къысхуигъэуврэ?»

18. Дэ ди щхьэ зэрытцІыхум нэхърэ Иеговэ нэхъыфІу дыкъызэрицІыхум шэч къытедмыхьэным мыхьэнэшхуэ щІиІэр сыт? (Сурэтхэми феплъ.)

¹⁸ Ди щхьэ зэрытцІыхум нэхърэ Иеговэ нэхъыфІу дыкъызэрицІыхум шэч къытедмыхьэным мыхьэнэшхуэ иІэщ. Дэ тхэлъ фІым гу лъыдмытэми абы ар елъагъу. Ди щыуагъэхэри абы дежкІэ щІэхъумауэ щыткъым. Ауэ, абы емылъытауэ, Иеговэ фІыуэ дыкъелъагъу, сыт щхьэкІэ жыпІэмэ зыгуэр щІэтщІэм е диІэ гурыщІэм щхьэусыгъуэ хуэхъуар абы къыгуроІуэ (Рим 7:15). Иеговэ елъагъу икІэм-икІэжым дэ сыт хуэдэ цІыху дыхъуфынуми. Ар зыщыдмыгъэгъупщэмэ, къарурэ гуфІэгъуэ нэхъыбэрэ диІэу абы дыхуэлэжьэфынущ.

19. Иеговэ теухуауэ дэ сытым дыщыгъуазэ?

¹⁹ Дэ дощІэ Иеговэ езыр лъагъуныгъэу зэрыщытыр икІи абы шэч лъэпкъ къытетхьэкъым (1 Ин. 4:8). Ар зыгуэр тщІэну е дымыщІэну къыщІыдэлъэІур фІыуэ дыкъелъагъу икІи гъащІэ нэхъыфІ дыдэ диІэну хуейщи аращ. Дэ дощІэ гъащІэ мыухыж диІэу дыпсэуну Иеговэ зэрыхуейр икІи аращ абы щхьэщэхуж къурмэныпхъэр щІитар. Хьисэ Мэссихь и къурмэныпхъэм дэ быдэу ди фІэщ ещІ гуэныхь тхэлъым емылъытауэ, Иеговэ дгъэгуфІэу дызэрыхуэлэжьэфынур (Рим 7:24, 25). Библием щыжыІащ: «Тхьэр дигухэм нэхъри нэхъ инщ икІи псори ещІэ» (1 Ин. 3:19, 20). Иеговэ ди гупсысэхэри ди гурыщІэхэри фІы дыдэу къыгуроІуэ икІи абы шэч лъэпкъ къытрихьэкъым и Іэмырыр дгъэзэщІэну зэрытхузэфІэкІыным.

20. Дэ зыгуэр зэрыдмыщІэм къыхэкІкІэ хуабжьу дымыгузэвэну сыт къыддэІэпыкъунур?

²⁰ Дэ дызыщыгъуазэу щытын хуейуэ хъуар Иеговэ къытхузэІуех. Аращи, зыхэдмыщІыкІым теухуауэ дыгузэвэн хуейкъым. Пэж дыдэу мыхьэнэшхуэ зиІэ Іуэхухэм ди акъылыр тедухуэмэ нэхъыфІщ. Апхуэдэу, «псори зыщІэ» Иеговэ нэгъэсауэ дзыхь зэрыхуэтщІыр къэдгъэлъэгъуэнущ (Иов 36:4). Иджыпсту зыгуэр къыдгурымыІуэми, дэ дощІэ игъащІэ псокІэ Иеговэ и деж зэрызыщыдгъэсэнур. А зэманым дэ къытхуэмыгъэсу дыпоплъэ, сыт щхьэкІэ жыпІэмэ ди Алыхь лъэщым теухуауэ сыт щыгъуи щІэ гуэр къэтщІэнущ (Эккл. 3:11).