Мы «иужьрей махуэхэм» икІэ махуэхэм Алыхьым и Іуэхум псэемыблэжу фыхэт!

1. Мы дунейм и «иужьрей махуэхэм» дызэрыщыпсэур сыт ди фІэщ зыщІыр?

1914-НЭ ГЪЭМ иужь фыкъалъхуауэ щытмэ, фыкъызэралъхурэ «мы дунейм и иужьрей махуэхэм» фыщопсэу (2 Тим. 3:1). Дэ псоми зэхэтхащ къэхъун хуейуэ Хьисэ зи гугъу ищІа Іуэхугъуэхэр. Абы жиІащ зауэхэр, гъаблэр, уз зэрыцІалэхэр зэрыщыІэнур, щІыр зэрыхъеинур, бзаджагъэм зэрыхэхъуэнур, абыхэм нэмыщІ Иеговэ и лъэпкъыр къызэрырахуэкІынур (Мт. 24:3, 7—9, 12; Лк. 21:10—12). Иджыри дэ долъагъу апостол Паул зэрыжиІам хуэдэу цІыхухэр зэрыхъуар. («ЦІыхухэр зэрыхъуар» жыхуиІэ рамкэм феплъ.) А псом къыдгурегъаІуэ мы дунейм и «иужьрей махуэхэм» дызэрыщыпсэур (Мих. 4:1).

2. Сыт хуэдэ упщІэхэм я жэуапхэр къэдгъуэтын хуей?

² 1914-нэ гъэр къызэрихьэрэ зэман куэд дэкІащ, абы къыхэкІкІэ дэ «иужьрей махуэхэм» и кІэ махуэхэм дыщыпсэууэ жыпІэ хъунущ. Мы дунейм и кІэр апхуэдэу гъунэгъу щыхъуакІэ, дэ мыхьэнэшхуэ зиІэ упщІэхэм я жэуапхэр къэдгъуэтын хуейщ: «иужьрей махуэхэм» и кІэм сыт хуэдэ Іуэхугъуэхэр къэхъуну? Мы дунейм и кІэр къызэрысам къыхэкІкІэ сыт Иеговэ къызэрытщыгугъыр?

«ИУЖЬРЕЙ МАХУЭХЭМ» И КІЭМ СЫТ ХУЭДЭ ІУЭХУГЪУЭХЭР КЪЭХЪУНУ?

3. 1 Фессалоникэ 5:2, 3 зэритымкІэ, къэрал унафэщІхэм сыт жаІэнур?

³ Библием итщ: «ДыгъуакІуэр цІыхухэр пэмыплъэххауэ жэщым къызэрыкІуэм хуэдэу, Иеговэ и махуэр фымыщІэххэу къызэрыкІуэнум фыщыгъуазэщ. „Иджы гузэгъэгъуэ диІэщ, шынагъуэ зыри щыІэкъым“, цІыхухэм щыжаІэкІэ, гугъуехьышхуэ ямыщІэххэу къатехъуэнущ, фыз лъэщыджэм лъхугъэр къызэрытелъадэм хуэдэу. Абы фІэкІыпІэ иІэнукъым» (1 Фес. 5:2, 3, ДЩІ). Мы едзыгъуэхэм Паул «Иеговэ и махуэм» и гугъу щещІ. А махуэр щІидзэнущ «Бабилэнышхуэм» — дин нэпцІу дуней псом тетым я империем — щытеуэкІэ икІи АрмагеддонкІэ ар иухынущ (Апок. 16:14, 16; 17:5). Иеговэ и махуэр щІидзэн ипэ, «иджы гузэгъэгъуэ диІэщ, шынагъуэ зыри щыІэкъым» жаІэнущ къэралхэм. Иныкъуэхэм деж къэрал унафэщІхэм мыпхуэдэ псалъэхэр къагъэсэбэп къэралхэм я зэхуаку зэгурыІуэныгъэ дэлъын щхьэкІэ унафэ гуэр щащІым дежb. Ауэ абы щыгъуэ «иджы гузэгъэгъуэ диІэщ, шынагъуэ зыри щыІэкъым» жаІэну Библием ит псалъэхэр япэм жаІахэм къыщхьэщыкІынущ. Дапхуэдэу? А зэманым цІыхухэм къащыхъунущ дунейр мамыру икІи шынагъэ щымыІэу къэрал унафэщІхэм ящІауэ. Ауэ абыхэм «гузэвэгъуэшхуэ» ямыщІэххэу къатехъуэнущ (Мт. 24:21).

4. 1) «Иджы гузэгъэгъуэ диІэщ, шынагъуэ зыри щыІэкъым» зэрыжаІэнум теухуауэ сыт дэ иджыри къэтщІэн хуейр? 2) Сыт дэ къыдгурыІуэр?

⁴ «Иджы гузэгъэгъуэ диІэщ, шынагъуэ зыри щыІэкъым» зэрыжаІэнум теухуауэ дэ, дауикІ, зыгуэр дощІэ, ауэ иджыри дымыщІэ куэди щыІэщ. Апхуэдэу щІыжаІэнум щхьэусыгъуэ хуэхъунур сыт? Ар дапхуэдэу зэрыжаІэнур? Зэ жаІэну, хьэмэрэ зыбжанэрэ? А упщІэхэм я жэуапхэр тщІэкъым. Ауэ дэ фІыуэ къыдгуроІуэ: къэрал унафэщІхэм дуней псом мамырыгъэ щыІэу яхуэщІыну ди фІэщ тщІыуэ, ди щхьэр къэдгъэпцІэж хъунукъым. Абыхэм а псалъэхэр щыжаІэм деж, зыщыдгъэгъупщэнкъым — Библием итыр къэхъуу аращ. А псалъэхэм къагъэлъэгъуэнущ Иеговэ и махуэр къызэрысыпар.

5. 1 Фессалоникэ 5:4—6 ит псалъэхэр «Иеговэ и махуэм» зыхуэдгъэхьэзырыну дауэ къызэрыддэІэпыкъур?

⁵ Къеджэ 1 Фессалоникэ 5:4—6. Паул и псалъэхэр къыддоІэпыкъу «Иеговэ и махуэм» зыхуэдгъэхьэзырыну. «Аращи, нэгъуэщІ цІыхухэм яхуэдэу дыжей хъунукъым, атІэ дымыжейуэ дысакъын» хуейщ. Псалъэм папщІэ, дысакъын хуейщ политикэм пыщІа Іуэхухэм дыхэмыІэбэн щхьэкІэ икІи мы дунейм зыми и лъэныкъуэр дымыубыдын щхьэкІэ. Армыхъумэ, мы дунейм щыщ дыхъункІэ хъунущ (Ин. 15:19). Дэ шэч къытетхьэкъым: дуней псом мамырыгъэ щыІэу зыщІыфынур Иеговэ и Пащтыхьыгъуэ закъуэращ.

6. ЦІыхухэм сыткІэ дадэІэпыкъун хуей икІи сыт щхьэкІэ?

⁶ Дэ «дымыжейуэ дысакъын закъуэкъым» дызыхущІэкъун хуейр, атІэ жеяхэри къэдгъэушыжын хуейщ. Дэ апхуэдэу дощІэ ди зэманым къэхъун хуейуэ Библием итхэр къащІэну цІыхухэм дащыдэІэпыкъум деж. Зыщыдгъэгъупщэнкъым: гузэвэгъуэшхуэр щІидза иужь цІыхухэм Иеговэ и лъэныкъуэр яубыдыну Іэмал яІэжыну къыщІэкІынукъым. Аращ нобэ хъыбарыфІыр дгъэІуным мыхьэнэшхуэ щІиІэр!c

ЖЫДЖЭРУ ХЪЫБАРЫФІ ГЪЭІУНЫМ ФЫХЭТ

7. Сыт Иеговэ къызэрытщыгугъыр?

⁷ Иеговэ и махуэр щІидзэным зэман мащІэщ къэнар, абы къыхэкІкІэ Алыхьыр къытщогугъ хъыбарыфІ гъэІуным жыджэру дыхэтыну. ДызэупщІыжын хуейщ: «„Зиусхьэным и Іуэхум“ жыджэру сыхэту пІэрэ?» (1 Кор. 15:58). Хьисэ жиІауэ щытащ сыт хуэдэ лэжьыгъэ дэ дгъэзэщІэнуми. Иужьрей махуэхэм къэхъунум и гугъу щищІым абы мыпхуэдэ псалъэхэр жиІауэ щытащ: «ХъыбарыфІыр лъэпкъ псоми хуаІуэтэн хуейщ япэщІыкІэ» (Мк. 13:4, 8, 10; Мт. 24:14). Фегупсысыт: хъыбарыфІыр вгъэІуну фыкІуэхукІэ Хьисэ иужьрей махуэхэм екІуэкІын хуейуэ жыхуиІа лэжьыгъэм фыхэтщ!

8. ХъыбарыфІ гъэІуныр зэрекІуэкІым теухуауэ сыт жыпІэ хъунур?

⁸ ХъыбарыфІ гъэІуныр зэрекІуэкІым теухуауэ сыт жыпІэ хъунур? Дуней псом хъыбарыфІыр зэхэзыххэм я бжыгъэр илъэс къэс хохъуэ. Псалъэм папщІэ, фегупсысыт иужьрей махуэхэм Алыхьым и лэжьакІуэхэм я бжыгъэр зэрыхэхъуам. 1914-нэ гъэм къэрал 43-м Алыхьым и лэжьакІуэу 5 155 щыІэт. Ауэ нобэ цІыху мелуанийрэ ныкъуэм хуэдизым къэрал 240-м хъыбарыфІыр щагъэІу! ИкІи лэжьыгъэр иджыри иухакъым. АдэкІи цІыхухэм яжетІэн хуейщ абыхэм я гугъуехьхэр Алыхьым и Пащтыхьыгъуэ закъуэм фІэкІ нэгъуэщІым зыми зэрызэхимыгъэкІыфынур (Пс. 145:11—13).

9. ХъыбарыфІ гъэІуным сыт адэкІи дыщІыхэтын хуейр?

⁹ ХъыбарыфІ гъэІуныр дыухауэ Иеговэ жиІэху дэ а лэжьыгъэм дыхэтынущ. ЦІыхухэм Иеговэрэ Хьисэрэ къацІыхун щхьэкІэ дапхуэдиз зэман къахуэнар? (Ин. 17:3). Ар дэ тщІэкъым. Ауэ дэ дощІэ «пэжыр къэзыщІэну хуей» дэтхэнэ зыми Іэмал зэриІэр гузэвэгъуэшхуэр къэмыс щІыкІэ пэжыр къищтэну (Апост. 13:48, ДЩІ). Къелыну цІыхухэм Іэмал яІэ щІыкІэ дауэ дазэрыдэІэпыкъу хъунур?

10. ЦІыхухэр пэжым хуедгъэджэну дауэ Иеговэ къызэрыддэІэпыкъур?

¹⁰ ЦІыхухэр пэжым хуедгъэджэн щхьэкІэ Иеговэ и организацэр къигъэсэбэпу дызыхуэныкъуэ псор къыдет. Псалъэм папщІэ, цІыхухэр щылажьэ махуэм пщыхьэщхьэм екІуэкІ зэІущІэм тхьэмахуэ къэс докІуэ. А зэІущІэм дэ зыщыдогъасэ цІыхухэм япэу депсэлъэну, етІуанэу тедгъэзэжыну икІи Библием едгъэджэну. Абы нэмыщІ Иеговэ и организацэм къыдет хъыбарыфІыр щыдгъэІукІэ къэдгъэсэбэп хъуну Іэмэпсымэхэр. А Іэмэпсымэхэр къыддоІэпыкъу:

• цІыхухэм епсэлъэн щІэддзэну,

• пэжыр яфІэгъэщІэгъуэн тщІыну,

• Библием теухуауэ нэхъыбэ къащІэну хуэдгъэушыну,

• цІыхур щедгъаджэм деж Библием ит пэжым хуедгъэджэну,

• Библием итыр зыфІэгъэщІэгъуэн хъуахэр ди сайтым ихьэну хуэдгъэушыну икІи ахэр дыщызэхуэс Унэм къедгъэблэгъэну.

ДауикІ, а Іэмэпсымэхэр уиІэ закъуэкІэ зэфІэкІкъым, атІэ ахэр къэгъэсэбэпын хуейщd. Псалъэм папщІэ, цІыхум гуапэу уепсэлъа иужь буклет е журнал къыхуэбгъанэмэ, ар абыхэм еджэнущ, тебгъэзэжыну ущыгурыІуа зэманыр къэсыху. Дэ псоми ди къалэнщ мазэ къэс хъыбарыфІ гъэІуным жыджэру дыхэтыну.

11. Библиер зэрадж онлайн-курсыр сыткІэ дэІэпыкъуэгъу хъурэ?

¹¹ ЦІыхухэм пэжыр къащІэну ядэІэпыкъун щхьэкІэ Иеговэ иджыри зы Іэмал къегъэсэбэп — jw.org^® сайтым ит Библиер зэрадж онлайн-курсыр. Сыт а курсыр щІыщыІэр? Мазэ къэс дуней псом цІыху куэдым Библиер зэрадж хъун курсхэр интернетым къыщалъыхъуэ. Ди сайтым ит онлайн-курсыр апхуэдэ цІыхухэм къадэІэпыкъунущ Алыхьым и Псалъэм ит пэжыр къащІэну. Языныкъуэхэр темыгушхуэнкІэ хъунущ Библиер ди гъусэу яджыну. Іэмал фиІэу щытмэ, апхуэдэ цІыхухэм ди сайтым ит онлайн-курсыр къызэрыбгъуэт хъунур евгъэлъагъуe.

12. Библиер зэрадж онлайн-курсым сыт хуэдэ упщІэхэм я жэуапхэр иритрэ?

¹² Библиер зэрадж онлайн-курсым мыпхуэдэ темэхэр хохьэ: «Библия и ее Автор», «О ком говорится в Библии» икІи «Библейская весть надежды». А курсым мыпхуэдэ упщІэхэм я жэуапхэр ирет:

• Библиер дапхуэдэу къызэрыбдэІэпыкъуфынур?

• Хэт хъуну Иеговэ, Хьисэ Мэссихь икІи мелыІычхэр?

• Алыхьым цІыхухэр сыт къыщІигъэщІар?

• Апхуэдиз Іеймрэ гузэвэгъуэмрэ щІыщыІэр сыт?

Абы нэмыщІ курсыр топсэлъыхь:

• Иеговэ гуауэмрэ лІэныгъэмрэ кІэ къызэрыхуигъэкІуэнум,

• лІахэр къызэригъэтэджыжынум икІи

• цІыхухэм я пащтыхьыгъуэр езым и ПащтыхьыгъуэмкІэ зэрызрихъуэкІынум.

13. ЦІыхум онлайн-курсым ит темэхэмкІэ Библиер иджамэ, Иеговэ и Щыхьэтым и гъусэу еджэн хуэмейуэ жыпІэ хъуну? КъыдгурывгъаІуэ.

¹³ ЦІыхум онлайн-курсым ит темэхэмкІэ Библиер иджамэ, Иеговэ и Щыхьэтым и гъусэу еджэн хуэмейуэ щыткъым. ЦІыхухэр пэжым хуедгъэджэну Хьисэ унафэ зыхуищІар дэращ. Дэ дыщогугъ цІыхур урокхэм блэкІыу, программэр игу ирихьу, нэхъыбэ къищІэну хуеину. Абы апхуэдэу ищІэмэ, Библиер иджыну гукъыдэж иІэнкІэ хъунущ. Дэтхэнэ зы урокри иуха иужь цІыхум Іэмал иІэщ Иеговэ и Щыхьэтым и гъусэу Библиер иджыну хуеймэ, заявкэ итыну. Дуней псом зы махуэм и кІуэцІым апхуэдэ заявкэу 230-м хуэдиз къытІэрохьэ! Аращи, мыхьэнэшхуэ иІэщ Иеговэ и Щыхьэтым и гъусэу цІыхум Библиер иджыным!

ХЬИСЭ И ЛЪЭУЖЬ ИУВЭНУ ХУЕЙ ЦІЫХУХЭР АДЭКІИ КЪЭФЛЪЫХЪУЭ

14. Маттэ 28:19, 20 зэритымкІэ, сыт дэ тщІэн хуейр икІи сыт щхьэкІэ?

¹⁴ Къеджэ Маттэ 28:19, 20. ЦІыхухэр Библием щедгъаджэм деж Хьисэ унафэу къыджиІа «псори ягъэзэщІэну» едгъасэурэ, «лъэпкъ псори и гъуэгу» къытедгъэхьэн хуейщ, нэгъуэщІу жыпІэмэ цІыхухэм дадэІэпыкъун хуейщ Хьисэ и лъэужь иувэну. Иеговэрэ абы и Пащтыхьыгъуэмрэ и лъэныкъуэр яубыдыным мыхьэнэшхуэ зэриІэр цІыхухэм къагурыдгъэІуэн хуейщ. Аращи, Библием ит пэжхэм тету псэуну, я гъащІэр Иеговэ и ІэмыщІэ иралъхьэну икІи псым зыщІагъэуэну хуэдгъэушын хуейщ. Абы щыгъуэщ ахэр Иеговэ и махуэм къыщелынур (1 Пет. 3:21).

15. Сыт ди зэманыр зытедгъэкІуадэ мыхъунур икІи сыт щхьэкІэ?

¹⁵ ИпэкІэ зэрыжытІащи, мы дунейм и кІэр къэсыным къэнэжар мащІэ дыдэщ. Абы къыхэкІкІэ Хьисэ и лъэужь иувэн щхьэкІэ зызыхъуэжыну хуэмей цІыхухэр Библием едгъаджэу зэманыр дгъэкІуэд хъунукъым (1 Кор. 9:26). Зэманыр къэсыпащ! Алыхьым и Пащтыхьыгъуэм теухуауэ иджыри цІыху куэдым зэхахын хуейщ, къелыну Іэмал яІэ щІыкІэ!

ДИН НЭПЦІЫМ ПЭІЭЩІЭУ ФЫЩЫТ

16. Апокалипсис 18:2, 4, 5, 8 зэритымкІэ, сыт дэтхэнэ зыми тщІэн хуейр? (Абы нэмыщІ сноскэм феплъ.)

¹⁶ Къеджэ Апокалипсис 18:2, 4, 5, 8. Мы едзыгъуэхэм щыжыІащ Иеговэ сыткІэ иджыри и лэжьакІуэхэм щыгугъми. Хьисэ и лъэужь ирикІуэхэр Бабилэн къалэшхуэм зыкІи пыщІауэ щытын хуейкъым. Иеговэ и Щыхьэт хъун ипэ цІыхур дин нэпцІым щыщу, абы Іуэху ирихьэкІхэм хэту икІи и зэхуэсхэм кІуэуэ щытагъэнкІэ хъунущ. Е а диным и Іуэхур ефІэкІуэн щхьэкІэ ахъшэ хилъхьэу щытауэ къыщІэкІынщ. ЦІыхум хъыбарыфІыр игъэІуу хъун ипэ дин нэпцІым пыщІауэ зэрыщытахэр псори къигъэнэн хуейщ, псалъэм папщІэ письмо итх хъунущ е здэкІуэу щыта члисэм е Бабилэн къалэшхуэм пыщІа организацэм къызэрыхэкІыжыр къагуригъаІуэ хъунущf.

17. Иеговэ и Щыхьэтым сыт хуэдэ лэжьыгъэ имыгъэзэщІэнур икІи сыт щхьэкІэ?

¹⁷ Иеговэ и Щыхьэтым и лэжьыгъэр Бабилэн къалэшхуэм зыгуэркІэ пыщІарэ пымыщІарэ зэхигъэкІын хуейщ (2 Кор. 6:14—17). Псалъэм папщІэ, члисэм е мэжджытым щылэжьэну ар увынукъым. Абы нэмыщІ дин нэпцІым щхьэкІэ къагъэсэбэп унэм Иеговэ и лэжьакІуэм, дауикІ, лэжьыгъэшхуэ щищІэнукъым. ИкІи абы езым бизнес гуэр иІэмэ, заказ къыІырихыну е Бабилэн къалэшхуэм хэт дин нэпцІым контракт ирищІылІэну хэтынукъым. Сыт дэ апхуэдэ еплъыкІэм быдэу дыщІытетыр? Сыт щхьэкІэ жыпІэмэ, дэ дыхуейкъым Иеговэ и дежкІэ къабзэу щымыт динхэм ящІэ Іуэхухэмрэ гуэныхьхэмрэ дыхэтыну (Ис. 52:11)g.

18. Ди зы къуэшым дауэ къызэригъэлъэгъуар лэжьыгъэм теухуауэ Библием ит принципхэм зэрытетыр?

¹⁸ Илъэс зыбжанэ ипэ пхъащІэу лажьэ зэхуэсым и нэхъыжьым къелъэІуауэ щытащ я къалэм дэт члисэм лэжьыгъэ гуэр щищІэну. Къуэшыр члисэм щылэжьэн зэи идэу щытакъым, икІи абы къелъэІуам ар ищІэт. Ауэ иджы лэжьыгъэр псынщІэу зэфІагъэкІын хуейти, ар зыщІын къагъуэтын хуейт. Дапхуэдэу щымытми, къуэшыр Библием ит принципхэм ебэкъуакъым икІи а лэжьыгъэр игъэзэщІэн идакъым. КъыкІэлъыкІуэ тхьэмахуэм газетым сурэт къытрадзат нэгъуэщІ пхъащІэм а члисэм жор тригъэувэу. Ди къуэшым а лэжьыгъэр игъэзэщІэну идатэмэ, сурэтым езырат итынур. Фегупсысыт, зэхуэсым щыщхэм ар дапхуэдэут къазэрыщыхъунур икІи Иеговэ сытыт зыхищІэнур?!

СЫТ ДЭ КЪЭТЩІАР?

19, 20. 1) Сыт дэ мы статьям къыщытщІар? 2) Сыт иджыри къэтщІэн хуейр?

¹⁹ Библием зэрыжиІэмкІэ, куэд дэмыкІыу мыхьэнэшхуэ зиІэ Іуэхугъуэ къэхъунущ — къэрал унафэщІхэм жаІэнущ: «Иджы гузэгъэгъуэ диІэщ, шынагъуэ зыри щыІэкъым». Ауэ Иеговэ къыдгуригъэІуауэ дэ дощІэ дуней псом мамырыгъэ щыІэу цІыхухэм зэрамыщІыфынур. Сыт дэ тщІэн хуейр апхуэдэу жамыІэ щІыкІэ икІи гузэвэгъуэшхуэр къэмыхъу щІыкІэ? Иеговэ дэ къытщогугъ Пащтыхьыгъуэм теухуа хъыбарыр адэкІи жыджэру дгъэІуну икІи Хьисэ и лъэужь иувэну хуейхэр къэтлъыхъуэну. Абы нэмыщІ дин нэпцІу хъуам пэІэщІэ зыхуэтщІын хуейщ. НэгъуэщІу жыпІэмэ, Бабилэн къалэшхуэм пыщІа организацэхэм дыкъыхэкІын хуейщ икІи ди лэжьыгъэр дин нэпцІым зыгуэркІэ пыщІарэ пымыщІарэ зэхэдгъэкІын хуейщ.

²⁰ Мы «иужьрей махуэхэм» икІэ махуэхэм нэгъуэщІ Іуэхугъуэхэри къэхъунущ. Абы щыгъуэ сыт хуэдэ Іуэхугъуэхэр къэхъуну икІи Иеговэ сыткІэ къытщыгугъыну? Куэд мыщІэу къэхъунум дауэ зэрызыхуэдгъэхьэзыр хъунур? Мы упщІэхэр къыкІэлъыкІуэ статьям щызэпкърытхынщ.