Алыхьым и хьэкумхэр. ЦІыхухэр къелын щхьэкІэ ярикъун зэманым хуэдиз Алыхьым яриту пІэрэ?

МЕТЕОРАДАРЫМ къридзэм синоптыкыр набдзэгубдзаплъэу йоплъ. ЦІыху Іув щыпсэу щІыпІэм борэнышхуэ хуабжьу къызэрыблагъэр абы елъагъу. ЦІыхухэр хэкІуэдэнкІэ шынагъэ щыІэщ! Емызэшу абы цІыхухэм хъыбар ярегъащІэ, сыт щхьэкІэ жыпІэмэ Іуэхур гувэнкІэ хъунущ.

Ноби Иеговэ щІылъэм щыпсэу цІыхухэм хъыбар ярегъащІэ «борэнышхуэ» къызэрыблагъэмкІэ. Жьапщэ къэблагъэм теухуауэ синоптикым цІыхухэм яригъэщІэфын хъыбарым нэхърэ куэдкІэ нэхъ шынагъуэщ Иеговэ и махуэр. Дапхуэдэ щІыкІэу Иеговэ цІыхухэм хъыбар зэрыригъащІэр? ИкІи сыт шэч къытепхьэ щІэмыхъунур цІыхухэр къелын щхьэкІэ ярикъун зэман Иеговэ абыхэм зэрыритым? Мы упщІэхэм я жэуапхэр дэ къэтщІэнущ, япэм Иеговэ ищІа апхуэдэ Іуэхухэм дыхэплъэмэ.

ПАСЭРЕЙ ЗЭМАНЫМ ДАПХУЭДЭУ ИЕГОВЭ ЦІЫХУХЭМ ХЪЫБАР ЗЭРЫРИГЪАЩІЭУ ЩЫТАР?

Пасэрей зэманым щыгъуэ «борэнышхуэ» къэкІуэнухэм, е нэгъуэщІу жыпІэмэ хьэкум щыІэнухэм, теухуауэ мызэ-мытІэу Иеговэ цІыхухэм хъыбар яригъащІэу щытащ (Прит. 10:25, Гъэсэпэтхыдэхэр; Иер. 30:23). Апхуэдэ Іуэхугъуэ къэхъун ипэ, зэман иІэу Иеговэ цІыхухэм яжриІэт сыт зэхъуэкІын хуейми абыхэм я гъащІэр и хабзэм техуэн щхьэкІэ (2 Цар. 17:12—15; Неем. 9:29, 30). ЦІыхухэм я гъащІэм зэхъуэкІыныгъэ халъхьэну хуигъэушын щхьэкІэ, Алыхьым и лэжьакІуэ пэжхэр абыхэм яхуигъакІуэт. Абыхэм цІыхухэм жраІэт Алыхьым и хьэкумыр къызэрыблагъэр икІи егъэтІылъэкІ имыІэу я гъащІэр къызэрырагъэлыным иужь зэрихьэн хуейр (Ам. 3:7).

Алыхьым къигъэсэбэпахэм ящыщ зыщ Нухь. Дунейпсо Псыдзэшхуэ зэрыщыІэнумкІэ Нухь илъэс куэдкІэ хъыбар яригъэщІащ а зэманым щыпсэуа цІыхухэм. Ахэр икъукІэ гущІэгъуншэхэт икІи мыхъумыщІагъэ куэд ялэжьт (ЩІэдз. 6:9—13, 17). Нухь абыхэм яжриІэт къелын щхьэкІэ сыт ящІэн хуейми. Къэхъунум теухуауэ Нухь цІыхухэм апхуэдизкІэ куэд яжриІати, иужькІэ абы щхьэкІэ Библием щатхыжащ: «Нухь бегъымбарым щыпкъагъэм и гъуэгум и хъыбарыр иІуатэт» (2 Пет. 2:5).

Дапхуэдиз къару Нухь иримыхьэлІами, Алыхьым жиІэм цІыхухэр едэІуэну хуейтэкъым. ГурыІуэгъуэт абыхэм фІэщхъуныгъэ лъэпкъ зэрамыІэр. ИкІэм-икІэжым «псыдзэр къащІэуэри, ахэр псори ихьащ». Апхуэдэ щІыкІэу псори хэкІуэдащ (Мт. 24:39; Евр. 11:7). Зы цІыхуми хужыІэнутэкъым Алыхьым абы хъыбар иримыгъэщІауэ.

Иныкъуэхэм дежи Иеговэ цІыхухэм хъыбар зэраригъащІэу щытар и хьэкумым щІидзэным куэд имыІэжущ. Ауэ абы щыгъуэми Алыхьым цІыхухэм ярит зэманыр яхурикъунут, къелын щхьэкІэ зэхъуэкІыныгъэ я гъащІэм халъхьэну. Псалъэм папщІэ, апхуэдэу къэхъуащ Иеговэ Мысырым пщІэнейрэ хьэкум щытрищІыхьам. Ебланэ хьэкумыр ищІын ипэ Иеговэ Мусэрэ Хьэрунрэ игъэкІуащ фирхьэунымрэ абы и пщылІхэмрэ я деж. Абыхэм жраІэн хуейт етІуанэ махуэм уэшхуэ къазэрыхуригъэхынур. ЦІыхухэм захъумэну а зэманыр яхурикъуну пІэрэт? Библием щыжыІащ: «Иеговэ и псалъэм едэІуа фирхьэуным и пщылІхэм я былымхэмрэ я унэІутхэмрэ я унэхэм щахъумащ, ауэ Иеговэ и псалъэм едэІуэну зи гур тезымыухуахэм я унэІутхэмрэ я былымхэмрэ губгъуэм къранащ» (Исх. 9:18—21). Зэрытлъагъущи, Иеговэ абыхэм зэман яритар яхурикъунут, и хьэкумым кърикІуэнур къалъымысын щхьэкІэ. Псалъэм щІэдэІуу псынщІэу зэхъуэкІыныгъэ зыщІахэр къелащ.

ЕпщІанэ хьэкумым ипэ Иеговэ фирхьэунымрэ абы и пщылІхэмрэ хъыбар яригъэщІащ. Ауэ я акъылыншагъэм къыхэкІкІэ ахэр Алыхьым и псалъэм едэІуакъым (Исх. 4:22, 23). Абы къыхэкІкІэ абыхэм я щыпэлъхухэр яфІэкІуэдащ. Сыту гуауэшхуэ! (Исх. 11:4—10; 12:29). Абыхэм захъумэну зэман яІауэ пІэрэт? ДауикІ, яІащ! ЕпщІанэ хьэкумым теухуауэ Мусэ занщІэу израил цІыхухэм яжриІащ сыт ящІэн хуейми я щыпэлъхухэр къелын щхьэкІэ (Исх. 12:21—28). Куэд едэІуауэ пІэрэ Мусэ? Языныкъуэхэм зэрабжымкІэ, Алыхьым и хьэкумым къелауэ Мысырым цІыху мелуанищ къыдэкІащ. Израил цІыхухэм нэмыщІ абыхэм яхэтащ «лъэпкъ зэмылІэужьыгъуэхэм щыщ цІыху куэди». Абыхэм яхэтт мысыр цІыхухэри (Исх. 12:38).

Мы щапхъэхэм къагъэлъагъуэ цІыхухэр къелын щхьэкІэ Иеговэ сытым щыгъуи абыхэм ярикъун зэман яриту зэрыщытар (Втор. 32:4). Сытыт абы апхуэдэу щІищІэр? Апостол Паул жиІауэ щытащ: «Сыт щхьэкІэ жыпІэмэ зы цІыхуи кІуэдыну хуэмейуэ, цІыху псори я гуэныхьхэм хущІегъуэжыну хуейщ ар» (2 Пет. 3:9). Зэрытлъагъущи, Алыхьым ищІэр лъагъуныгъэм къыхэкІыу ещІэ. Ар хуейщ и хьэкумыр щІимыдзэ щІыкІэ цІыхухэр я гуэныхьхэм хущІегъуэжу и псалъэм щІэдэІуну (Ис. 48:17, 18; Рим. 2:4).

АЛЫХЬЫМ КЪЫДЖИІЭМ ДАПХЭДЭУ ДЫЗЭРЫХУЩЫТЫН ХУЕЙР?

Нобэ дуней псом щагъэІу хъыбарым цІыхухэр щІэдэІун хуейщ. Хьисэ жиІэу щытащ дыщыпсэу дунейр гузэвэгъуэшхуэм зэрыхэкІуэдэнур (Мт. 24:21). Хьисэ гурыІуэгъуэу жиІащ Алыхьым и хьэкумым ипэ къихуэ зэманым и лъэужь ирикІуэхэм сыт ялъэгъунуми, сытым ІущІэнуми. Хьисэ жиІауэ хъуар нобэ долъагъу (Мт. 24:3—12; Лк. 21:10—13).

А махуэшхуэр къызэрыблагъэм къыхэкІыу Иеговэ нобэ цІыху псори къыхуреджэ и лъабжьэм щІэувэну. Ар хуейщ абы хуэжыІэдаІуэ цІыхухэм нобэ я гъащІэр нэхъыфІ хъуну, къэкІуэну зэманми къытхуихьыну фІыгъуэхэр къалъысыну (2 Пет. 3:13). ЦІыхухэм фІэщхъуныгъэ яІэн щхьэкІэ, Иеговэ абыхэм гъащІэр къезыгъэл хъыбар яжреІэ. Ар «Тхьэм и Тепщэныгъэшхуэм теухуа хъыбарыфІщ» икІи, Хьисэ зэрыжиІам хуэдэу, абы «щІылъэ псом тет цІыхухэр ирагъэдэІуэн хуейуэ щытщ, цІыху лъэпкъ псоми я пащхьэм щыхьэт щыхъун щхьэкІэ» (Мт. 24:14). Иеговэ къалэн ящищІащ и лэжьакІуэхэм а хъыбарыфІыр дуней псом щагъэІуну. Нобэ а хъыбарыфІыр къэрал 240 хуэдизым щагъэІу. Иеговэ хуейщ цІыху нэхъыбэ и псалъэм щІэдэІуу а «борэным», нэгъуэщІу жыпІэмэ абы и хьэкум пэжым, къелыну (Соф. 1:14, 15; 2:2, 3).

Япэм къэхъуа Іуэхугъуэхэм къагъэлъагъуэ цІыхухэр къелын щхьэкІэ ярикъун зэман Иеговэ абыхэм яриту зэрыщытар. Ауэ псом нэхърэ нэхъапэр — Алыхьым цІыхухэм ярита зэманыр къагъэсэбэпыну пІэрэ я гъащІэм зэхъуэкІыныгъэ халъхьэн щхьэкІэ? Алыхьым ди пщэм къыдилъхьа къалэныр, дауикІ, дэ дгъэзэщІэнущ икІи а хъыбарыр цІыхухэм яжедмыІэу къэдгъэнэнукъым. АдэкІи ди къарум къихьыр тщІэну дыхуейщ, цІыху нэхъыбэ къелын щхьэкІэ!