“Ọghẹnẹ nọ Ọ rẹ Ta Uzẹme” na O re Ru Oware nọ Ọ Gwọlọ Gba

1. Fikieme ma sai ro fievahọ Jihova? (Olezi 31:2-5)

AHWO a bi gu ọrue gaga evaọ akpọ nana nọ Setan o bi su na, yọ a rẹ viẹ ahwo họ, je vivie ohwohwo. Enọ e be thueki a re fi iwhayo re eki rai ọ nya vi ọrọ amọfa. Ahwo jọ nọ a re ghoro eware nọ a be zẹ, a re bru okpa họ epanọ eware rai i woma te re ahwo a sae dẹ ae. Yọ ahwo jọ a gbẹ be sai tube fievahọ egbẹnyusu ekpekpe rai hi nọ a tẹ ta nọ a ti ru oware jọ kẹ ae. Enana kpobi i ru nọ o be rọ bẹ re a fievahọ ohwo. Rekọ eva e were omai inọ ma sai fievahọ Jihova ẹsikpobi keme ọye họ “Ọghẹnẹ nọ ọ rẹ ta uzẹme” na. (Se Olezi 31:2-5.) Uzẹme ọvo ọ rẹ ta evaọ oware kpobi nọ o bi ru gbe ẹme kpobi nọ ọ be ta. Fikiere ma sai fievahọ iẹe.

2. Eme ma te ta kpahe evaọ uzoẹme nana?

² Ma te kake jọ uzoẹme nana ta ẹme te eware jọ nọ ma rẹ rọ fiki rai fi eva mai kpobi họ Jihova. Ma vẹ te ta kpahe oghẹrẹ nọ Jihova Ọghẹnẹ uzẹme na ọ te rọ raha akpọ Ẹdhọ nana no. Ma te jẹ ruẹ oware nọ Ọghẹnẹ o bi ru enẹna re ọ sai ru oware nọ ọ gwọlọ gba. Eware nọ ma ti wuhrẹ na i ti ru nọ ma te gbẹ rọ gwọlọ vuẹ ahwo uzẹme na kpahe Jihova ududu.

EWARE NỌ MA RẸ RỌ FIKI RAI FIEVAHỌ JIHOVA

3. Fiki ẹjiroro jọ vẹ ma sai ro fi eva mai kpobi họ Jihova?

³ Ma rẹ sai fievahọ Jihova keme ọye ọ ma eware kpobi. Ọye ọ ma odhiwu gbe akpọ na gbe eware kpobi nọ e rrọ uzuazọ. (Emu. 1:1; Ol. 36:9; Evia. 4:11) Ere ọvo ho, ọye ọ be sẹro eware nọ e rrọ uzuazọ. Ọ ma akpọ na evaọ oghẹrẹ nọ eware nọ i re fiobọhọ kẹ omai jọ uzuazọ i gbe re no akpọ na no ho. O wo ogaga nọ ọ rẹ rọ kpọ eware nọ e rrọ odhiwu gbe akpọ na, yọ ọ be rọ ogaga yena ru iruo. Eware nana kpobi i dhesẹ nọ ma sai fievahọ Jihova inọ o ti su omai thọ họ, yọ o ti ru akpọ mai woma evaọ obaro keme o wo areghẹ gbe ogaga thesiwa.

4. Ẹvẹ ma rọ riẹ nọ Jihova o you omai?

⁴ Ma rẹ sai fievahọ Jihova keme o you omai. Fikinọ Jihova ọ gwọlọ nọ ma jọ uzuazọ re eva e were omai, oyejabọ ọ rọ ma omai. Okenọ ọ jẹ ma ohwo-akpọ, ọ ta nọ: “Joma ma ohwo evaọ uwoho mai, nọ o re tho omai.” (Emu. 1:26) Jihova ọ rọ ẹme yena dhesẹ oghẹrẹ nọ ọ gwọlọ nọ ohwo-akpọ ọ rẹ jọ. Ọ kẹ omai uvẹ nọ ma rẹ rọ jiroro oware nọ ma gwọlọ ru. Ọ ma otọakpọ uwowoma nana kẹ omai. (Ol. 115:16) Yọ ọ ta kẹ imava ọsosuọ na nọ a ru otọakpọ na soso fihọ aparadase. Who rri emamọ iruo nọ ọ kẹ rai! (Emu. 1:28; 2:15) Ọ kẹ rai eware iwoma kpobi nọ e rrọ akpọ na re a rọ reakpọ kuoma. Eware nana kpobi i dhesẹ nọ “uyoyou Jihova nọ o rẹ hiẹ hẹ o rẹ jọ bẹdẹ bẹdẹ.”—Ol. 103:17.

5. (a) Dede nọ Ẹdhọ ọ jẹ gwọlọ ru re oware nọ Jihova ọ gwọlọ u gbe rugba ha, eme Jihova o ru ghele? (b) Eware jọ vẹ Jihova ọ ya eyaa rai nọ i gine rugba? (Rri ẹkpẹti na “Jihova Ọ rẹ Ta Uzẹme Ẹsikpobi.”)

⁵ Ma rẹ sai fievahọ Jihova keme oware kpobi nọ ọ ta, o re ru ei gba. Nọ Jihova ọ ma otọakpọ na, “orọnikọ ọ mae gheghe ababọ ẹjiroro ho, rekọ ọ ruẹrẹ iẹe họ re a rriae.” (Aiz. 45:18, 19) Nọ Adamu avọ Ivi a wọso Jihova no, koyehọ ewhu a bi ti whu na. O tẹ wọhọ nọ oware nọ Jihova ọ gwọlọ na o te gbẹ sae via ha. Rekọ Jihova ọ rẹ siọ oware nọ ọ gwọlọ ba eru hu. (Aiz. 46:10, 11) Ọ gwọlọ nọ ahwo nọ a kiẹrẹe a rẹ jọ otọakpọ na. Dede nọ Adamu avọ Ivi a raha uzi na, oyena o lẹliẹ Jihova kpairoro vrẹ oware nọ ọ gwọlọ na ha. Oyejabọ ọ rọ kẹ ae uvẹ re a yẹ emọ. O te vi Ọmọ ọvo riẹ ze te ta emọ Adamu no igbo, re a wo ẹruore uzuazọ ebẹdẹ bẹdẹ.—Jọn 3:16.

ỌGHẸNẸ NỌ Ọ RẸ TA UZẸME NA O RE RU OWARE NỌ Ọ GWỌLỌ GBA

6. Nọ Adamu avọ Ivi a raha uzi no, eme Jihova ọ ta nọ o te via?

⁶ Ohwo nọ ọ lẹliẹ Adamu avọ Ivi họ nọ a rọ wọso Ọghẹnẹ na họ “araomuomu anwae na, ọnọ a re se Ẹdhọ gbe Setan.”a (Evia. 12:9; Emu. 3:4, 5; Jọn 8:44) Jihova o bruoziẹ kpei inọ a te raha iẹe no. (Emu. 3:15) Taure a tẹ te raha iẹe, ahwo buobu a te jọ abọ riẹ jẹ rọ aro kele iei. Rekọ ahwo jọ a te jọ abọ Jihova.

7. Amono a rrọ abọ Ẹdhọ, kọ eme o te via kẹ ae?

⁷ Ahwo-akpọ buobu a rrọ abọ Setan, yọ ikọ-odhiwu nọ i yoẹme kẹ Jihova ha a rrọ abọ riẹ re. A bi ru re oware nọ Jihova ọ gwọlọ u gbe rugba ha. A zihe ruọ emọ Ẹdhọ no. Nọ oke nọ Jihova o fihọ u te te, Ẹdhọ avọ ahwo nọ a rrọ abọ riẹ, a ti kpe ae kufiẹ.—Dan. 2:44; Rom 16:20.

8. Eme Jesu o ru evaọ ukpe 1914? (Rri iwoho na re.)

⁸ Fikieme u ro mu omai ẹro nọ Jihova ọ te ginẹ raha Setan avọ ahwo nọ a rrọ abọ riẹ kpobi no wọhọ epanọ ọ ta na? Evaọ ukpe 1914, Jesu avọ Setan gbe ikọ-imuomu riẹ a te mu ẹmo họ efi. A te gbolo Ẹdhọ avọ ikọ-imuomu riẹ ziọ otọakpọ na. (Evia. 12:7-9) Dede nọ obọ odhiwu a jo fi ẹmo na, oware nọ u no rie ze o wha uye se ahwo-akpọ. Keme Ebaibol ọ ta nọ: “Uye u te otọakpọ gbe abade no, keme Ẹdhọ ọ ziọ otọ bru owhai ze no, o wo ofu ọgaga keme ọ riẹ nọ omoke kakao o wo.” (Evia. 12:12) Anwọ 1914 ze, otọakpọ na ọvo Setan ọ be jọ họre uthu riẹ na. O tẹ so ẹe ze nọ eware i bi ro yoma vrẹ ọvo evaọ akpọ na. Uye u gine te otọakpọ na no wọhọ epanọ Ebaibol ọ ta. Rekọ kẹle na, Jesu o ti “fi kparobọ riẹriẹriẹ,” o ti kpe Ẹdhọ avọ ahwo nọ a rrọ abọ riẹ kpobi no. (Evia. 6:2) Jesu o ve ti ru odẹ Jihova fo, a gbe ti gu erue fihọ Jihova uzou ho. (Ol. 45:4-6) Oke yena ohwo kpobi ọ vẹ te ginẹ riẹ nọ Jihova họ Ọghẹnẹ nọ ọ rẹ ta uzẹme na.—Izik. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

ỌGHẸNẸ UZẸME NA O BI KOKO AHWO NỌ UZẸME O RẸ WERE HỌ

9. Amono Jihova o bi koko họ nẹnẹ?

⁹ Nẹnẹ na, Jihova o bi “koko eware kpobi họ kugbe evaọ Kristi, te eware nọ e rrọ obọ idhiwu na gbe eware nọ e rrọ otọakpọ na.” (Ẹf. 1:10) “Eware nọ e rrọ obọ idhiwu na” họ ahwo nọ Jihova ọ rọ ẹzi wholo inọ a ti lele Jesu su evaọ obọ odhiwu. “Eware nọ e rrọ otọakpọ na” họ ahwo nọ a te rria bẹdẹ bẹdẹ evaọ aparadase evaọ otọakpọ na. Ahwo nana kpobi nọ a be gọ Jihova na a be daoma fiobọhọ kẹ ahwo re a ruẹ vuhumu nọ erue Setan o bi gu kẹ ae. A bi wuhrẹ ahwo nọ a gwọlọ gọ Ọghẹnẹ re a riẹ uzẹme na.

10. Ẹvẹ Jihova o bi ro fiobọhọ kẹ ahwo vuhu erue nọ egagọ erue i bi wuhrẹ ahwo mu? (Eviavia 14:6, 7)

¹⁰ Re Jihova ọ sai koko ahwo nọ uzẹme o rẹ were họ, o vi idibo riẹ re a nyae ta usi uwoma evaọ akpọ na soso. (Se Eviavia 14:6, 7.) Ginọ uzẹme inọ ahwo-akpọ Jihova o vi nyae ta usi uwoma kẹ ahwo. Rekọ ọ be jẹ rọ ikọ-odhiwu fiobọhọ kẹ omai nyabru ahwo nọ i wo emamọ eva re a kurẹriẹ ziọ ukoko na. Usi uwoma nọ ma be ta na u ru nọ ahwo a be rọ ruẹ nọ kpakọ iwuhrẹ erue Babilọn Ologbo na o bi wuhrẹ ahwo. Babilọn Ologbo na họ egagọ erue kpobi nọ e rrọ akpọ na. U kri akpọ no nọ Setan ọ be rọ rehọ iẹe gu erue fihọ Jihova uzou. (Evia. 18:2, 4) Kẹle na, a te raha egagọ erue kpobi no. Ahwo kpobi nọ a you Jihova Ọghẹnẹ nọ ọ rẹ ta uzẹme na a vẹ te kẹe oruaro nọ u fo nọ a rẹ kẹe.—Evia. 17:16.

11. Ẹvẹ ma sai ro vuhu ahwo nọ a be ginẹ gọ Jihova?

¹¹ Ahwo nọ uzẹme o rẹ were a no erẹwho na kpobi ze. Ejọ i fe, ejọ i yogbe. (Evia. 7:9, 10) Nọ ahwo otiọnana a te yo “usi uwoma na,” a rẹ riẹ nọ uzẹme na a ruẹ no na. A ve kurẹriẹ ziọ ukoko Jihova. (Mak 13:10) Nọ oke o be nya na, ohẹriẹ nọ o rrọ ahwo nọ a be gọ Jihova gbe ahwo nọ a be gọe he u bi dhe evevẹ. Malakae ọruẹaro na ọ ruẹaro nọ: “Wha vẹ te wariẹ ruẹ ohẹriẹ nọ o rrọ udevie ohwo okiẹrẹe avọ ohwo omuomu, gbe ohẹriẹ nọ o rrọ udevie ohwo nọ ọ be gọ Ọghẹnẹ avọ ọnọ ọ be gọe he.” (Mal. 3:18) Idibo Jihova a be ta usi uwoma na yọ a wo emamọ uruemu. A be rọ ere dhesẹ nọ Ọghẹnẹ nọ ọ rẹ ta uzẹme na a be gọ.

12. Ẹvẹ Jihova ọ be rọ rehọ usi uwoma nọ ma be ta na ru oware nọ ọ gwọlọ gba?

¹² “Usi uwoma Uvie na” nọ ma be ta na u dhesẹ nọ ma bi yoẹme kẹ Jesu. Ere ọvo ho, eruẹaruẹ Ebaibol ma bi rugba na. (Mat. 24:14; 28:18-20) Usi uwoma na o wha riẹ ze nọ ahwo buobu evaọ akpọ na a ro zihe ruọ ilele Jesu no. A te je wo ẹruore inọ a te gọ Ọghẹnẹ uzẹme na bẹdẹ bẹdẹ. Oware riẹ o rro kẹhẹ nọ Jihova ọ be rọ rehọ omai ru oware nọ ọ gwọlọ gba.

FIEVAHỌ JIHOVA INỌ O TI RU EYAA RIẸ GBA

13. Amono Setan ọ be mae rọ ofu riẹ rri, kọ fikieme?

¹³ Eva e be dha Setan krekrekre keme ọ riẹ nọ “omoke kakao o wo.” (Evia. 12:12, 13) Uviemenẹ a te raha akpọ nọ o bi su na no. Ahwo nọ Setan ọ be mae rọ ofu riẹ rri họ ahwo nọ a rrọ abọ Uvie Ọghẹnẹ, nọ “i bi koko ijaje Ọghẹnẹ je wo iruo isẹri-ise kpahe Jesu.” (Evia. 12:17; 14:12) Setan ọ be jẹ họre ohwo kpobi nọ o bi fiobọhọ kẹ idibo Jihova.

14. Okenọ Setan o ti vi ahwo riẹ ze te họre idibo Jihova, eme ọ te via? (Rri uwoho nọ o rrọ uke Uwou-Eroro na re.)

¹⁴ Nọ a tẹ raha Babilọn Ologbo na no, ahwo nọ a rrọ abọ Setan a te wọ ohọre bru idibo Jihova. Kọ etẹe ẹmo Amagidọn o ti ro du lahwe. (Evia. 16:13, 14, 16) Jesu avọ ikọ-odhiwu na a te thọ idibo Jihova. A vẹ te raha ahwo nọ i kiọkọ akpọ na nọ a rrọ abọ Ẹdhọ no. (Evia. 19:19-21) Ahwo nọ i re gu erue, enọ e rẹ viẹ ahwo họ, gbe ahwo oyoma efa kpobi a gbẹ te jọ akpọ na ha. (Evia. 21:8) Ohwo kpobi ọ vẹ te riẹ nọ Jihova họ Ọghẹnẹ nọ ọ rẹ ta uzẹme na, yọ o re ru oware nọ u kiehọ ẹsikpobi.

15. Ẹvẹ ma rọ riẹ nọ Jihova o ti ru eyaa riẹ kpobi gba evaọ obaro? (Aizaya 65:16, 17) (Rri uwoho na re.)

¹⁵ Okugbe o gbẹ rrọ akpọ na ha, rekọ mai idibo Jihova ma wo okugbe fikinọ Jihova ọ rrọ kugbe omai. Jihova o gbe bi koko ahwo họ re a gọe. Ọ be ghale ahwo riẹ yọ o bi ru nọ iruo nọ a bi ru e be rọ nyaharo. Oware ovo o sae whaha iẹe he. (Se Aizaya 65:16, 17.) Ma riẹ nọ Jihova o ti ru eyaa riẹ kpobi gba evaọ obaro. Ma riẹ ere keme Pọl ukọ na o kere ẹme jọ evaọ obe Ahwo Rom 8:38, 39. Ọ ta nọ: “Makọ uwhu hayo uzuazọ hayo ikọ-odhiwu hayo egọmeti, hayo eware nọ e rrọ enẹna hayo eware nọ e te tha hayo ogaga hayo ekpehru hayo edidi hayo omama ofa jọ kpobi o rẹ sae hẹriẹ omai no uyoyou Ọghẹnẹ hẹ onọ o rrọ eva Kristi Jesu Olori mai.”

16. Fikieme who ro fi eva ra kpobi họ Jihova?

¹⁶ Ma ta ẹme te eware buobu no nọ i dhesẹ nọ ma rẹ sai fievahọ Jihova Ọghẹnẹ nọ ọ rẹ ta uzẹme na. Ọye ọ ma omai. O you omai gaga. U te no ere no, ogbotu obuobu na a bi dhe ebuebu keme ahwo a bi no erẹwho kpobi ze te gọ Jihova. (Aiz. 60:22; Zẹk. 8:23) Ma riẹ nọ Jihova ọ te siọ oware nọ ọ gwọlọ ba eru hu. Yọ kẹle na, ọ te raha Setan no, ọ te gbẹ sai gu erue jẹ viẹ ahwo họ họ. Ma be lẹ ọkpọ olẹ nọ Devidi ọ lẹ inọ: “Jọ a jiri Jihova Ọghẹnẹ, . . . ọnọ ọye ọvo o re ru eware igbunu na. Jọ a jiri odẹ oruaro riẹ bẹdẹ bẹdẹ, jọ oruaro riẹ o vọ otọakpọ na soso.”—Ol. 72:18, 19.