Fievahọ Osu Odhiwu gbe Otọakpọ Na

1. Ikpehre eware vẹ e via kẹ Job?

EWARE Job kpobi e raha no. Ọzae yena nọ ọ jọ ọdafe vẹre na o zihe ruọ oyogbe no. Emọ riẹ i whu no. Ọ tẹ be jẹ mọ gaga. Ahwo a te je rri rie vo. Egbẹnyusu riẹ a tẹ be jẹ ta eme edada kẹe. Aye riẹ dede, akpọ ọ vẹso ẹe no, ọ tẹ ta kẹe nọ: “La Ọghẹnẹ eka re who whu!” (Job 2:9; 15:4, 5; 19:1-3) Eware nana nọ e via kẹ Job na e hae lẹliẹe roro nọ ọ sai gbe fievahọ Jihova ha. Ọ hai ti roro nọ o wọhọ nọ Jihova ọ rẹ thọ ahwo nọ i you rie jẹ be gọe he.

2-3. Eme ma rẹ sai roro ẹsejọ, kọ eme ma te jọ obe Job wuhrẹ?

² Ẹsejọ ebẹbẹ i re zere omai. Ma gbẹ riẹ ru hu, ma ve roro nọ ma sai fievahọ Jihova ha. Ma be rria “oke obẹbẹ nọ o rẹ bẹ ẹria.” (2 Tim. 3:1) Nọ ebẹbẹ i te bi kie ruru omai unọjọ utọjọ, o sai ru akpọ fu omai enu no. O vẹ lẹliẹ omai roro nọ ma te sai thihakọ họ. Ebẹbẹ itieye na e soriẹ ze nọ inievo jọ a bi ro roro nọ Jihova ọ be daezọ rai hi.

³ Otẹrọnọ who re roro ere ẹsejọ, jọ udu u bru owhẹ hẹ. Nọ Job ọ ruẹ uye te oria jọ no, ọ tẹ te ruẹ nọ Jihova ọ rẹ nyasiọ idibo riẹ nọ i kru ẹrọwọ rai ba ha. Mai omamai re, ma rẹ sai fievahọ Jihova Ọsẹ obọ odhiwu mai na, inọ u wo oghẹrẹ ọvo nọ ọ sae rọ siọ omai ba ha. Re ma sai fievahọ Jihova ere, ma ti rri iku nọ e rrọ obe Job na, yọ ma te jariẹ wuhrẹ eware ivẹ jọ nọ i wuzou gaga. Orọ ọsosuọ, Jihova ọvo họ Osu odhiwu gbe akpọ na. Orọ avọ ivẹ, oghẹrẹ kpobi nọ eware e nya kẹhẹ, Jihova Ọghẹnẹ Erumeru na o wo ogaga nọ o re ro ru oware nọ ọ gwọlọ. Ọ rẹ thọ ahwo riẹ, yọ ọ rẹ kuvẹ re oware ovo o raha usu rai avọ iẹe no tẹtẹtẹ hẹ.

SETAN Ọ RUỌ UDEVIE RAI

4. Okenọ emọ Ọghẹnẹ a kokohọ evaọ obọ odhiwu, ono ọ ruọ udevie rai?

⁴ U wo ẹdẹ jọ nọ “emọ Ọghẹnẹ uzẹme na” a rọ nyaziọ aro Jihova evaọ obọ odhiwu. Ebaibol ọ ta nọ: “Setan ọ ruọ udevie rai re.” (Job 1:6) Ohwo nọ o kere oria Ebaibol nana họ ohwo ọsosuọ nọ ọ kaki se Ẹdhọ “Setan” koyehọ “Ohwo Ọwọsuọ.” Oke nana nọ a ro sei Setan na, yọ ọ siọ Jihova ba ẹgọ no. O zihe ruọ ọwegrẹ Jihova gbe uviuwou riẹ no, te abọ uviuwou riẹ nọ o rrọ obọ odhiwu, te onọ o rrọ obọ otọakpọ obonẹ. Ẹme nọ Jihova ọ ta evaọ obe Emuhọ 3:15 na u dhesẹ nọ Setan ọ gbẹ rrọ uviuwou riẹ hẹ. “Aye” nọ Jihova ọ fodẹ evaọ oria ikere yena họ abọ uviuwou riẹ nọ o rrọ obọ odhiwu, yọ ikọ-odhiwu e rrọ obei. Etẹe “ọmọ” nọ a ta ẹme riẹ na o ti no ze. Yọ Setan ọ rrọ uviuwou na ha.

5. Ma te rri oware nọ o via evaọ ẹdẹ nọ emọ Ọghẹnẹ a ro kokohọ na, eme ma rẹ sai wuhrẹ?

⁵ Jihova ọ gwọlọ nọ ma riẹ oware nọ o via evaọ obọ odhiwu evaọ ẹdẹ nọ emọ riẹ a ro kokohọ na. Kọ oye a ro kere iku na fihọ Ebaibol na. Eme nọ Setan ọ ta ẹdẹ yena i dhesẹ nọ ọ rrọ eva gaga, yọ o bi gu erue fihọ idibo Jihova uzou. (Job 1:9; je rri Eviavia 12:10.) Oware nana nọ o via nọ a gbiku riẹ fihọ Ebaibol na o lẹliẹ omai riẹ nọ, dede nọ Jihova o wo ogaga kpobi, o re ru oware nọ o gba oke kpobi. U te je ru omai riẹ nọ Jihova ọ tẹ ta kẹ ohwo inọ etenẹ who re ru ba, ohwo na ọ sai ru vrẹ etẹe hẹ.

JIHOVA Ọ SAE VUẸ OHWO UMUO NỌ O RE RU BA

6. Eme Jihova o ru nọ u dhesẹ nọ ọye o wuzou ẹgwae na? (Job 1:7, 8)

⁶ Se Job 1:7, 8. Jihova o dhesẹ nọ ọye o wuzou ẹgwae na. Ọ nọ Setan nọ: “Kọ who muẹrohọ Job odibo mẹ no?” Onọ yena nọ Jihova ọ nọ riẹ na u dhesẹ nọ ọ riẹ nọ Setan ọ be gwọlọ epanọ ọ rẹ rọ dawo Job. Yọ ma te ta kpahe epanọ Jihova ọ rọ rehọ ogaga ulogbo riẹ thọ Job.

7. Ma te rri Job 1:10, 11, eme Setan ọ rọ ẹme nọ ọ ta dhesẹ kpahe ahwo-akpọ?

⁷ Se Job 1:10, 11. Jihova họ Osu nọ o wuzou odhiwu gbe akpọ. Yọ ọ rẹ rọ ogaga riẹ ru oware nọ u kiehọ ẹsikpobi. (Jeri. 32:17; Dan. 4:35) Rekọ Ẹdhọ ọ ta ẹme nọ o dhesẹ nọ Jihova ọ rọ ogaga riẹ ru iruo thọ. Eme nọ ọ ta i dhesẹ nọ Ọghẹnẹ ọ be rehọ eware iwoma nọ o bi ru kẹ Job gbe amọfa rọ dẹ ae rehọ re a sae gọe. Yọ ọ rọ eme riẹ dhesẹ nọ fiki eware iwoma nọ Jihova o bi ru kẹ ahwo-akpọ ọvo a be rọ gọe. Kọ eme Jihova o ru kpahe ẹme na?

8-9. Eme Jihova ọ ta kẹ Setan inọ o ru hu, kọ eme Jihova ọ rọ ogaga riẹ ru? (Job 1:12) (Rri uwoho na re.)

⁸ Se Job 1:12. Nọ Ẹdhọ ọ ta kpobi no, Jihova ọ tẹ kẹe uvẹ re ọ dawo Job, re u vẹ kẹ ohwo kpobi sọ ẹme nọ ọ ta na ginọ uzẹme. Rekọ Jihova ọ kẹ riẹ umuo nọ o re ru ba. Ọghẹnẹ ọ vuẹ riẹ vevẹ nọ: “Whọ rọ obọ ra te ọzae na omariẹ hẹ!” Yọ ikọ-odhiwu nọ e jọ ẹgwae na a yo ẹme nọ Ọghẹnẹ ọ vuẹ Setan na. O gba Setan họ nọ o re ru vrẹ oria nọ Ọghẹnẹ ọ ta kẹe nọ o re ru ba na ha. Makọ enẹna dede, oware nọ Jihova ọ kuvẹ riẹ ọvo Setan ọ rẹ sai ru. Jihova ọ rọ ogaga ulogbo riẹ thọ Job. Jihova ọ tẹ jẹ rọ ere dhesẹ nọ ọ rrọ epanọ Ẹdhọ o dhesẹ i rie na ha.

⁹ Nọ Setan ọ make raha eware Job kpobi ku ei no, Job ọ gbẹ jẹ gọ Jihova Ọsẹ obọ odhiwu riẹ ghele. (Job 1:22) Rekọ Ẹdhọ o ri ru Job oware nọ o riẹe eva re no ho.

10. Fikieme Jihova ọ rọ kẹ Setan uvẹ re ọ gbẹ dawo Job? (Job 2:2-6)

¹⁰ Se Job 2:2-6. Nọ Ẹdhọ ọ ruẹ nọ Job o kie he, ọ tẹ gwọlọ oghẹrẹ ofa kpobi re ọ ruẹ nọ Job ọ siọ Jihova ba ẹgọ. Ẹdhọ ọ ta nọ fikinọ o ri dhobọte ugboma Job hu na oye o gbe ri kie he na. Anọ o te dhobọte Job, ọ te la Jihova eka. Ọ vẹ te dhogbo epanọ o re ro siwi uzuazọ riẹ. Re a sae ruẹ uzẹme ẹme na, Jihova ọ tẹ wariẹ kẹ Ẹdhọ uvẹ re o dhobọte ugboma Job. Nọ ọ make kẹe uvẹ na, ọ vuẹ riẹ nọ: “Who kpei no ho!” O wọhọ ẹsenọ Jihova o si usi kẹ Setan inọ etenẹ whọ rẹ nya ba, yọ ọ sae nya vrẹ usi na ha. Jihova ọ wariẹ rọ ẹme yena nọ ọ ta na dhesẹ kẹ Ẹdhọ nọ o wo ogaga vi ei kpekufiẹ. Setan ọ sai gine ru vrẹ umuo nọ Jihova ọ kẹ riẹ hẹ.

JIHOVA O KU EBẸBẸ JOB HỌ

11. Nọ Jihova o ku ebẹbẹ Job họ no, eghale vẹ ọ kẹ riẹ? (Job 42:10-13)

¹¹ Se Job 42:10-13. Ghelọ epanọ Setan ọ rọ ebẹbẹ fa Job ovao te na, ọ nyasiọ Jihova ba ha. Fikiere Jihova o te ku ebẹbẹ Job họ. Evaọ okenọ Jihova o ro si ebẹbẹ Job no na, Ẹdhọ ọ sae whaha Jihova ha. Nọ Jihova ọ ta nọ onọ Ẹdhọ ọ dawo Job u te, Ẹdhọ ọ tẹ rehọ oma họ emu.

12. Gbiku jọ nọ i dhesẹ nọ Jihova ọ rẹ thọ ahwo nọ i fievahọ iẹe.

¹² Evaọ oke mai nana, Jihova o ru eware nọ i dhesẹ nọ ọ rẹ thọ idibo riẹ no. Evaọ ukpe 1945, isoja egọmeti Nazi a si Isẹri Jihova nọ i bu te egba ivẹ gbe ọgba (230) no ega ze. Dede nọ oma o lọhọ e rai no, a gba rai họ inọ a nya ugbo uthethabọ. A ru rai ere re a sai whu no evaọ edhere. Yọ otẹrọnọ ejọ i zoro te obei, a ve kpe ai no. Nọ inievo na a thihakọ uye yena kpobi no, a te kere oware nọ a gwọlọ ru fihotọ. Anọ: “Oke odawọ ukrẹkri o vrẹ no yọ enọ e zọ, nọ a si no erae ze, wọhọ odẹme, a rẹ tubẹ jọ oma rai yo ore iwiri hi. . . . Jihova ọ kẹ rai ẹgba.” A tẹ jẹ ta nọ: “Oware nọ o rrọ omai oja kpobi họ . . . nọ orọnọ ma no ọgọdọ ikpohrokpo yena ze no na, ma rẹ gọ Jihova . . . bẹdẹ bẹdẹ. Oghale nọ o mae rro nọ ma rẹ sai wo oye.”—Je rri Daniẹl 3:27; 6:22.

13. Eme ma riẹ nọ Jihova o ti ru kpahe ebẹbẹ mai? (Rri iwoho na re.)

¹³ Nẹnẹ na akpọ o bi gbe izuwo họ omai aro. Ẹsejọ o rẹ wọhọ ẹsenọ a gbolo omai họ ọgọdọ ikpohrokpo nọ ma be sai no ze he. (1 Pita 5:8-10) Ẹsejọ ebẹbẹ na e rẹ lẹliẹ akpọ vẹso omai no. Ma ve bi roro nọ, ‘Kọ ẹbẹbẹ na ọ sai ti no omẹ oma ẹdẹ jọ?’ Otẹrọnọ ma bi roro ere, joma kareghẹhọ iku Job. Oghẹrẹ nọ iku Job i ro kuhọ o lẹliẹ omai riẹ nọ Jihova o wo ẹgba nọ ọ sae rọ ta nọ, ‘Jọ ebẹbẹ ohwo nana i kuhọ,’ i ve gine kuhọ. Ọ gbẹ maki ru ei obọnana ha, ma riẹ nọ o ti ru ei evaọ akpọ ọkpokpọ na. Jihova ọ te kuvẹ re akpọ omuomu nana o kri vrẹ oke nọ o fihọ họ.

JIHOVA Ọ RẸ RỌ IDIBO RIẸ NỌ E GỌ RIẸ TE URERE ZAHARO HO

14-15. Eme Jihova o re ru kẹ idibo riẹ nọ e talamu ei? (Job 14:15) (Rri uwoho nọ o rrọ uke Uwou-Eroro na re.)

¹⁴ Se Job 14:15. Jihova Ọsẹ obọ odhiwu mai na ọ rẹ nyasiọ ahwo nọ a talamu ei ba vievie he. O you rai gaga. Fikiere nọ a tẹ maki whu no dede, ọ te kpare ae ze. Ahwo nọ a jẹ viẹ vẹre fiki ohwo rai nọ o whu a ve ti muhọ ẹghọghọ.—Aiz. 65:17.

¹⁵ Dede nọ Job ọ jọ akpọ Ẹdhọ, Jihova ọ nyasiọ iẹe ba ha. Ebaibol ọ vuẹ omai nọ Jihova o ru nọ ẹyao riẹ o ro kpo. Ọ tẹ jẹ ghale Job gaga. Eware nọ o wo uwhremu na i bu vi enọ o wo vẹre. Ma riẹ nọ o ginẹ via ere wọhọ epanọ Ebaibol ọ ta na. Eware yena nọ Jihova o ru kẹ Job na i te oware ovo ho nọ ma te roro kpahe enọ Jihova o ti ru kẹe evaọ obaro. Oware yena nọ Jihova o ru na u dhesẹ nọ ọ gwọlọ nọ akpọ ọ bẹ idibo riẹ hẹ. Evaọ obọ aparadase, Jihova o ti ru nọ idibo riẹ nọ e gọ riẹ te urere a te rọ rria akpọ na bẹdẹ bẹdẹ yọ oma o te were ae. (Evia. 21:3, 4) Jihova Osu odhiwu gbe akpọ na ọ ginẹ gwọlọ ru ei. Ma tẹ kareghẹhọ oware yena, u re fiobọhọ kẹ omai thihakọ ebẹbẹ mai.

16. Eme ọfa ma riẹ kpahe Jihova Osu odhiwu gbe akpọ na nọ o lẹliẹ omai fievahọ iẹe?

¹⁶ Job ọ tọ gaga taure o te ti whu. Rekọ dede nọ o whu, Jihova Osu ehrugbakpọ na ọ rẹ sae kpare iẹe ze keme o wo ogaga kpobi. (Izie. 32:39) Ohwo ọvo ọ riẹ hẹ nọ ọ sae whaha iẹe nọ ọ gbẹ rọ kpare ahwo nọ o you ze he. Ọ te kpare ae ze nọ oke nọ o fihọ u te te.—Rom 8:38, 39.

FI EVA RA KPOBI HỌ JIHOVA

17. Eme o dhesẹ nọ Setan ọ maki ru kẹhẹ, ọ sai si idibo Jihova no akpọ na ha?

¹⁷ Eware nọ ma wuhrẹ evaọ iku Job na e rẹ lẹliẹ omai fi eva mai kpobi họ Jihova. Ma riẹ nọ Setan ọ maki ru kẹhẹ, ọ sai si idibo Ọghẹnẹ kpobi no akpọ na ha, yọ oware yena nọ ma riẹ na u bi ru udu te omai otọ. Isẹri Jihova nọ e rrọ akpọ na a bu te oware wọhọ ima izii. Onana u dhesẹ nọ Jihova Osu odhiwu gbe akpọ na ọ ga vi Ẹdhọ. Okwakwa ovo nọ a bi ro fi omai ẹmo nọ u bi ruiruo o riẹ hẹ. (Aiz. 54:17) Who te rri idibo Jihova, who re roro nọ a re te ru họ no ho. Rekọ makọ egọmeti gbe isu egagọ nọ e rrọ gaga a be sai si idibo Jihova no akpọ na ha. Mai idibo Jihova ma bi wuhrẹ ahwo uzẹme na kpahe Jihova je wuhrẹ ahwo re a riẹ nọ Setan yọ ohwo eviẹhọ, ọ tẹ jẹ rrọ ojihẹ. Ohwo ọvo hayo oware ovo nọ o sae fare idibo Jihova enu ọ riẹ hẹ. Uwhu o tẹ maki kpe omai dede, yọ oware ovo ho keme Jihova ọ te kpare ahwo nọ a gọ riẹ te urere ze.—Hos. 13:14.

18. Fikieme ma re ro kru udu ga nọ uye ulogbo na o be kẹle na?

¹⁸ Obonọ ma bi yeri kpohọ na o te lọhọ ha, rekọ iku Job e te lẹliẹ omai kru udu ga. Evaọ oke uye ulogbo na, o te wọhọ ẹsenọ idibo Jihova a wo ohwo ho. O vẹ te wọhọ nọ Ẹdhọ avọ ahwo riẹ a ti ru idibo Jihova họ no. Rekọ wọhọ epanọ Jihova ọ rọ ogaga ulogbo riẹ thọ Job na, ọ te thọ omai re, ọ te kuvẹ re Setan o voro omai no ho. Oke nọ Jihova o ti ro si okpẹtu nọ Setan ọ so fihotọ na no o kẹle gaga no. A ti fi Ẹdhọ avọ ikọ-imuomu riẹ họ ọgọdọ odidi, a vẹ jọ etẹe ikpe odu (1,000). (Luk 8:31; Evia. 20:1-3) Ukuhọ riẹ, te Setan avọ ahwo nọ a rrọ abọ riẹ kpobi, a ve ti kpe ai mu ẹkpẹ gbae. (Evia. 20:10) Oke yena yọ a whọlọ uzou Ẹdhọ no wọhọ epanọ Jihova ọ ta. Yọ a ku ẹme riẹ họ no tẹtẹtẹ.—Emu. 3:15; Rom 16:20.

19. Ẹvẹ eware e te jọ kẹ ahwo nọ a fi eva rai kpobi họ Jihova? (Rri uwoho na re.)

¹⁹ Oke o be tha nọ ahwo-akpọ a te rọ jọ gbagba, yọ eva e te were ae nọ akpọ ọkpokpọ na ọ tẹ ze no. Idibo Jihova a bi rẹro oke yena gaga. Oghẹrẹ nọ akpọ ọ te were te oke yena, ma sae ruẹ unu gbiku riẹ dede he. Jihova ọ ya eyaa nọ: “Rri! Me bi ru eware kpobi họ ekpokpọ.” (Evia. 21:5) Kọ ẹvẹ eware e te jọ oke yena? Oma o te nwae dhẹ ohwo-akpọ keme oke yena umuomu, egrẹ, gbe ẹmo nọ Setan avọ idhivẹri riẹ a be wha ze nẹnẹ na e te gbẹ jariẹ hẹ. Nẹnẹ na, fiki ebẹbẹ akpọ, ẹsejọ ma be sae wezẹ emamọ owezẹ hẹ. Rekọ oke yena, ma te wezẹ wezẹ-ezọ. Nọ ẹmo Amagidọn o te fi vrẹ no, ahwo nọ a jẹ mọ oghẹrẹ eyao jọ kpobi vẹre, oma rai u ti kpo ruẹrẹhọ. Onana yọ oware igbunu jọ nọ o te via evaọ akpọ na soso. Ere ọvo ho, a ve ti mu ahwo mai họ ẹkpare ze. Oke yena ma ti ro gine yeri oghẹrẹ uzuazọ nọ Ọsẹ obọ odhiwu mai na ọ gwọlọ nọ ma yeri.

20. Eme whọ te hai gbe ru?

²⁰ Ma riẹ nọ ebẹbẹ i ti gbe te omai evaọ edẹ urere nana. Rekọ joma kru udu ga, je fi eva mai kpobi họ Jihova re ma je dhesẹ nọ ọye họ Osu mai. Joma hai dhesẹ nọ ma you Jihova Ọsẹ obọ odhiwu mai na re ma je dhesẹ Ẹdhọ fihọ ọtọrue. Ma riẹ nọ ma te yoẹme kẹ Jihova Osu odhiwu gbe akpọ na, ọ te ghale omai gaga evaọ obaro, keme o riẹe oja inọ o re ku eghale riẹ ku ahwo nọ a gọ riẹ te urere.