Oware nọ o via kẹ Solomọn o lẹliẹ omai riẹ oware nọ o rẹ sae via kẹ odibo Jihova. Ẹsejọ nọ odibo Jihova ọ tẹ raha uzi ulogbo, ọ rẹ sai roro nọ idudhe oware na o nwane rọ via. Ọ sae tubẹ ta nọ, “Me je ti rri hi na, me kie ruọ ẹe no.” Rekọ ọ tẹ romatotọ roro kpahe oware na, ẹsejọhọ ọ te ruẹ nọ o ru eware buobu thọ no re ọ tẹ te raha uzi na. O sae jọ nọ ọ be hai lele oghẹrẹ ahwo jọ nyusu, gaviezọ kẹ ile nọ i woma ha, hayo rri ikpehre ifimu. O sae jẹ jọ nọ ọ be hae kọ họ eria jọ nọ i fo ho, hayo kpohọ eria itanẹte jọ nọ i woma ha. Ẹsejọhọ ọ gbẹ be lẹ hayo se Ebaibol ho. Yọ o gbe bi kpohọ ewuhrẹ hayo usi uwoma dede he. Fikiere oware nọ o via kẹe na, idudhe o rọ via ha. U wo eware jọ nọ o bi ruthọ no vẹre, wọhọ epanọ ọmoha nọ a ta ẹme te evaọ obe Itẹ na o ru na. Eme ma jọ iku nana wuhrẹ? Orọnikọ eware nọ Jihova o mukpahe ọvo ma rẹ kẹnoma kẹ hẹ. Rekọ te eware nọ e rẹ lẹliẹ omai kie ruọ uzioraha. Nọ Solomọn o gbiku ọmoha ogheghẹ na no, o te si omai ozọ.—Mat. 5:29, 30. w24.07 16 ¶10-11

Eme họ efe na? Efe na họ usi uwoma Uvie na nọ ma be ta na. Usi uwoma na o rẹ sai siwi uzuazọ ahwo nọ a gaviezọ. (2 Kọr. 4:1) Kọ eme họ ekwakwa nọ a rọ ẹkpẹ ma na? Ae họ idibo Ọghẹnẹ nọ e be ta usi uwoma na. Evaọ oke Pọl, ehreki a jẹ hae rọ ithẹ nọ a rọ ẹkpẹ ma wọ ekwakwa eghaghae wọhọ enwaene, igho, gbe emu. Ere ọvona re, Jihova ọ kẹ omai oware oghaghae jọ. Oye họ usi uwoma nọ ọ ta nọ ma ta na. Jihova ọ te kẹ omai ẹgba nọ ma te rọ ta usi uwoma na te urere. Ẹsejọ ozọ ahwo o re mu omai. Yọ ẹsejọ ma re roro nọ a ti le omai. Kọ eme u fo nọ ma re ru? Okenọ a ta kẹ ikọ na inọ a gbẹ ta usi uwoma na ha, eme a ru? Ukpenọ a siọ usi uwoma ba fiki ozọ, a lẹ se Ọghẹnẹ inọ o fiobọhọ kẹ ae ta ẹme riẹ ududu. Yọ Jihova o gine yo olẹ rai. (Iruẹru 4:18, 29, 31) Ozọ u te bi mu owhẹ, whọ sae lẹ nọ jọ Jihova o fiobọhọ kẹ owhẹ you ahwo na te epanọ ozọ rai u gbe ro mu owhẹ hẹ. w24.04 16 ¶8-9

Ma gwọlọ nọ ma re ru odẹ Jihova fo fikinọ ma you rie. Ọmọziọ erue Setan o gu fihọ Ọghẹnẹ uzou no ho. Fikiere ma gwọlọ fiobọhọ kẹ ahwo riẹ nọ erue gheghe Setan o bi gu fihọ Ọghẹnẹ uzou na. (Emu. 3:1-5; Job 2:4; Jọn 8:44) Joma wuhrẹ ohwo kpobi nọ ọ rọwo nọ ọ rẹ gaviezọ re ọ riẹ oghẹrẹ ohwo nọ Ọghẹnẹ ọ ginẹ rrọ. Ma gwọlọ nọ ahwo a riẹ nọ Jihova o wo uyoyou wo umuo ho. Isuẹsu riẹ e mai woma, o re kienyẹ ohwo ho. Ma gwọlọ jẹ ae riẹ nọ, Uvie Ọghẹnẹ ọvo u ti si uye nọ o rrọ akpọ na no. Kọ udhedhẹ ọvo o te da oria kpobi fia. (Ol. 37:10, 11, 29; 1 Jọn 4:8) Nọ ma te bi dhesẹ oghẹrẹ nọ Ọghẹnẹ ọ rrọ dẹẹ kẹ ahwo gbe epanọ o woma te, yọ ma bi ru odẹ riẹ fo. Yọ eva e rẹ were omai wo umuo ho keme Isẹri Jihova nọ a se omai na ma bi rugba na. w24.05 18 ¶12