Jihova O Wuhrẹ Omẹ No Emaha Mẹ Ze

Me gbiku na no obọ emuhọ ze. A yẹ omẹ evaọ ẹwho nọ a re se Calgary, nọ ọ rrọ Canada. Oke yena a je fi Ẹmo Akpọ Avivẹ. Taure ukpe 1950 u te ti te, ọmoha jọ nọ ọ jọ ọkobaro nọ a re se Donald Fraser ọ tẹ ta usi uwoma kẹ omai. Oni mẹ o te mu Ebaibol họ ewuhrẹ. Ukoko na o were riẹ gaga. Rekọ fiki ẹyao, ọ jẹ sai kpohọ ewuhrẹ hayo ru eware efa evaọ ukoko na tere he. Ghele na, ọ nyaharo te epanọ ọ rọ họ-ame evaọ 1950. Rekọ o da omẹ inọ o whu evaọ enwenọ ikpe ivẹ nọ i lele i rie. Oke yena, ọsẹ mẹ o ri kurẹriẹ ziọ ukoko na ha. Rekọ ọ rọwo nọ Isẹri Jihova a kẹ ovuẹ uwhori oni mẹ.

Emedẹ jọ nọ i lele i rie, oniọvo-ọmọtẹ jọ nọ a re se Alice nọ a rọ ẹzi wholo ọ tẹ vuẹ omẹ nọ mẹ ziọ ewuhrẹ. Ọ riẹ omẹ no vẹre keme mẹ jẹ hai lele oni mẹ kpohọ ewuhrẹ ẹsenọ oma na o tẹ kẹe uvẹ. Mẹ tẹ nọ ọsẹ mẹ sọ mẹ sae nya. Ọ tẹ rọwo, ọ tubẹ ta nọ o ti lele omẹ nya ẹsiẹvo re o yere oniọvo nọ ọ kẹ ovuẹ uwhori oni mẹ na. Nọ ma kpohọ ewuhrẹ na, a ru Isukulu Odibọgba Esuo-Ọghẹnẹ gbe Ewuhrẹ Odibọgba. Ewuhrẹ ọsosuọ nọ ọsẹ mẹ ọ nya ọye, yọ o were riẹ gaga. Keme ọsẹ mẹ o je wuhrẹ kpahe epanọ a rẹ rọ ta ẹme kẹ ogbotu. Fikiere nọ ọ ruẹ oghẹrẹ nọ inievo na a bi ro ru ẹme, o were riẹ gaga. Ọsẹ mẹ o te mu ewuhrẹ Isukulu Odibọgba Esuo-Ọghẹnẹ gbe Ewuhrẹ Odibọgba họ ẹnya koka koka. Uwhremu na, o te mu iwuhrẹ nọ i kiọkọ họ ẹnya.

Oke yena, oniọvo nọ ọ rẹ rẹrote Isukulu Odibọgba Esuo-Ọghẹnẹ na ọ jẹ hai se edẹ inievo nọ i fi odẹ hotọ rọkẹ isukulu na nọ a te bi mu ewuhrẹ họ. Ohwo kpobi nọ o se odẹ riẹ o ve yo nọ, “Mẹ ọna.” Ẹdẹ jọ, mẹ tẹ ta kẹ oniọvo na nọ o se odẹ mẹ re evaọ ewuhrẹ notha. Oniọvo na o te yere omẹ ziezi. Rekọ ọ nọ omẹ hẹ sọ mẹ riẹ eware efa nọ i ti lele iei.

Mẹ riẹ hẹ inọ kpakọ odẹ me bi fihotọ re mẹ hai ru ẹme na. Me je roro nọ ese ọvo a ti se odẹ mẹ. Oka nọ u lele i rie, a te se odẹ mẹ evaọ obọ ewuhrẹ, mẹ tẹ nabi yo nọ, “Mẹ ọna.” Nọ a ku ewuhrẹ họ no, inievo na a yere omẹ gaga. Eka buobu nọ i lele i rie, a tẹ kẹ omẹ obe ẹme nọ mẹ ta kpahe evaọ obọ emuhọ uzoẹme na.

Ozọ u je mu omẹ. Keme oke yena, ẹme isase Ebaibol ọ jariẹ hẹ. Ẹme nọ a re ru ovavo evaọ iminiti ezeza lafi iminiti eree ọye ọ jariẹ. Ọsẹ mẹ o fiobọhọ kẹ omẹ ruẹrẹ oma kpahe kẹ ẹme na. Yọ o ru nọ mẹ rọ jọ obọ uwou ru ẹme na te isia udhe soso. Nọ me ru ẹme na no evaọ obọ ewuhrẹ, oniọvo nọ ọ rẹ rẹrote isukulu na ọ tẹ kẹ omẹ ohrẹ nọ u fiobọhọ kẹ omẹ. Anwọ ikpe buobu ze na, Jihova ọ rọ ọsẹ mẹ, inievo-emezae gbe erọ emetẹ, gbe ukoko riẹ ro wuhrẹ omẹ eware buobu no.

ME WUHRẸ EWARE EFA

Alice nọ mẹ fodẹ ẹsiẹ na o fiobọhọ kẹ omẹ riẹ epanọ a rẹ ta usi uwoma. Oke yena a jẹ hae vuẹ omai nọ ma se eria Ebaibol esa kẹ ohwo nọ ma dihọ uwou, ma vẹ kẹe obe. Nọ u te te oke nọ mẹ rẹ rọ ta no, Sista Alice o ve mu ẹme na họ, ọ vẹ ta kẹ omẹ nọ me se oria Ebaibol jọ kẹ ohwo na. Mẹ ọvo mẹ vẹ ta obonọ u kiọkọ je se eria Ebaibol ivẹ efa. Mẹ vẹ kẹ ohwo na obe. Nọ oke o be nya na, mẹ tẹ te riẹ epanọ me re ro mu ẹme họ. Nọ ọsẹ mẹ ọ họ-ame no evaọ 1954, ọ tẹ jẹ hai wuhrẹ omẹ epanọ mẹ sae gbẹ rọ ta usi uwoma ziezi. Ọsẹ mẹ ọ jẹ daoma fiobọhọ kẹ omẹ re me kruga evaọ ukoko na. O lọhọ kẹe he keme ọye ọvo. Ọsẹ mẹ ọ rọ ewuhrẹ gbe usi uwoma zaro ho. Fikiere mẹ riẹ nọ evaọ ẹdẹ ewuhrẹ kpobi, ma rẹ siọ ewuhrẹ ba ẹnya ha. Yọ evaọ Ẹdẹ-Ọmaha gbe ohiohiẹ Ẹdoka ma re kpohọ usi uwoma.

Orọnikọ mẹ nwane riẹ obe gaga ha nọ mẹ jọ isukulu, rekọ mẹ riẹ omojọ. Ikpe ikpegbivẹ (12) nọ me ro kpohọ isukulu na, me wuhrẹ eware jọ nọ i fiobọhọ kẹ omẹ uwhremu na. Eware jọ họ, me wuhrẹ epanọ a re ru esọmo. Me te je wuhrẹ epanọ a rẹ ta Oyibo ziezi. Yọ me wuhrẹ epanọ a re kere iku. Yọ oyena u bi fiobọhọ kẹ omẹ enẹna nọ me bi ru iruo evaọ Ẹko-Iruo Ebe-Ikere na.

Ẹsibuobu ahwo a rẹ nọ omẹ kpahe oware nọ ile e rọ were omẹ. Ile e jẹ hae were ọsẹgboni mẹ. Nọ mẹ jọ ikpe ihrẹ, me je wuhrẹ epanọ a re kporo epiano. Rekọ ohwo nọ o je wuhrẹ omẹ o rri omẹ nọ mẹ be daoma ha. Ọ tẹ ta kẹ ọsẹ mẹ nọ mẹ seba ewuhrẹ. Uzẹme riẹ họ, o jẹ ginẹ ruọ omẹ oma tere oke yena ha.

Nọ emerae jọ e vrẹ no, ọsẹ mẹ ọ tẹ gwọlọ ohwo ọfa kẹ omẹ nọ o re wuhrẹ omẹ ile. O je wuhrẹ omẹ epanọ a re kporo epiano jẹ so ile. Yọ mẹ jẹ daoma gaga. Me wo uvou ole yọ ẹsejọ nọ me te lele ahwo so ile, a rẹ salọ omẹ inọ mẹ ọ mae riẹ so. Mẹ jẹ gwọlọ nọ me re te ohwo nọ o re wuhrẹ ahwo ile, mẹ vẹ rọ ere wo ugho nọ mẹ rẹ rọ rẹrote omamẹ nọ me te mu ọkobaro họ no. Nọ me wuhrẹ thabọ no, mẹ tẹ ruẹ nọ oke nọ mẹ te raha rọ ruẹrẹ oma kpahe kẹ edawọ nọ a re ru kẹ ahwo nọ a re wuhrẹ ile, ọziọ oware he. Nọ me rri oware na, mẹ tẹ siọ ile ba ewuhrẹ. Me te mu ọkobaro oke-kpobi họ evaọ ukpe 1963.

IRUO ỌKOBARO O RẸ WHA EGHALE BUOBU ZE

Nọ mẹ jọ ọkobaro te ukpe ọvo no, a tẹ rọ omẹ mu ọkobaro obọdẹ. A te vi omẹ kpobọ Kapuskasing, evaọ Ontario. Mẹ avọ Brọda Daniel Skinner ma gbẹ jọ ekobaro evaọ ukoko na, yọ o vi omẹ labọ linwe. O wuhrẹ omẹ epanọ a re ru eware evaọ ukoko na. A tẹ rehọ omẹ mu omọvo Ogbẹgwae Iruo Ukoko. Oke yena ikpe udhe (20) mẹ jọ, yọ mẹ riẹ eware buobu hu. Eva e were omẹ gaga inọ ukoko Jihova o be ta ẹtẹta inọ a wuhrẹ inievo-emezae nọ e gbẹ maha. Yọ a tẹ ginẹ rọwo nọ Jihova o wuhrẹ ae, Jihova ọ te rehọ ae ru iruo dede nọ a gbẹ maha.

Ma wo ebẹbẹ jọ okenọ ma jọ Kapuskasing. Wọhọ oriruo, evaọ ezi iso, ekpahe e rẹ jọ gaga. Mẹ avọ Brọda Daniel ma jẹ hae nya ẹwho na soso re. Rekọ eghale buobu i te omai. Ojọ nọ u ru eva were omẹ gaga họ, mẹ ruẹ oniọvo-ọmọtẹ jọ nọ a re se Linda Cole evaọ obei nọ mẹ rehọ uwhremu na.

Linda o wo ajọwha usi uwoma ota gaga. O wo ahwo buobu nọ o je wuhrẹ Ebaibol. O re ru ọghọ, ọ rrọ wowou, yọ ọ rẹ whomahọ ahwo gaga. Odẹ oni riẹ Goldie. Oni riẹ o kruga evaọ ukoko na. Odẹ ọsẹ riẹ Allen. Ukoko na o jẹ kake were ọsẹ riẹ hẹ, yọ ọ jẹ wọso oni riẹ. Ghele na, oni na ọ jẹ hae wha Linda, gbe inievo riẹ nọ a re se John avọ Gordon kpohọ ewuhrẹ. O te je wuhrẹ ae epanọ a rẹ ta usi uwoma. Uwhremu na, aikpobi na a ru ọkobaro dede nọ ọvuọ oke riẹ a ro ru. Nọ ikpe jọ e vrẹ no, ọsẹ na o te kurẹriẹ. O te dikihẹ gidigba evaọ ukoko na.

Evaọ 1965, a te zizie omẹ kpohọ Isukulu Odibọgba Uvie nọ a ru evaọ uwou ogha Canada. Amara ọvo a ru isukulu na. Nọ mẹ jọ isukulu na, a tẹ vuẹ omẹ nọ me fili efọmo Isukulu Giliad. U gbe omẹ unu keme me roro nọ me ti kpohọ iruo imishọnare ẹdẹ jọ họ. Me je roro nọ me te he. Rekọ me fili efọmo na ghele. A te zizie omẹ kpohọ eklase avọ udhuvẹ-gbivẹ (42). Ahwo nọ a je wuhrẹ omai evaọ isukulu na a jẹ hae vuẹ omai epanọ ma ru te. Ọrọ ọsosuọ nọ a vuẹ omẹ họ, anọ mẹ gbẹ daoma wuhrẹ kpahe ukoko na ziezi evaọ isukulu na. Ẹme yena u fiobọhọ kẹ omẹ. Ikpe udhegbọvo (21) mẹ jọ oke yena.

Oware jọ nọ a wuhrẹ omai evaọ Isukulu Giliad họ, epanọ ma rẹ rọ ta ẹme kugbe ahwo iredio, enọ e rẹ ta ẹme evaọ etẹlẹvishọno, gbe enọ i re kere ebe-usi. Eware nọ a je wuhrẹ omai na e jẹ were omẹ oma. Rekọ oke yena mẹ riẹ nọ i ti fiobọhọ kẹ omẹ ẹdẹfa ha. Mẹ te ta epanọ i ro fiobọhọ kẹ omẹ.

ME KPOBỌ SENEGAL

Nọ me nwrotọ no Isukulu Giliad no, emedẹ jọ nọ i lele i rie, mẹ avọ Brọda Michael Höhle ma te kpobọ Senegal evaọ Africa, keme obei a dhe omai nya. Oke yena, oware wọhọ iwhowho-uvie udhusoi (100) ọvo e jọ orẹwho na soso.

Nọ mẹ jọ obei te emerae jọ no, a tẹ vuẹ omẹ nọ mẹ hai ru iruo evaọ uwou ogha nọ ọ rrọ orẹwho na ẹsiẹvo oka. Uwou ogha nọ ma be ta ẹme riẹ na, ubruwou ọvo jọ ọ jọ evaọ uwou nọ imishọnare a rẹ rria. Brọda Emmanuel Paterakis ọye ọ jọ odibo uwou ogha na. Ọ jẹ hae vuẹ omẹ nọ mẹ kareghẹhọ nọ dede nọ uwou ogha na u tulo ho na, oye họ oria nọ u wuzou iruo nọ ukoko Jihova u bi ru evaọ orẹwho na. Ẹdẹ jọ, Brọda Paterakis ọ tẹ ta nọ ma kere ileta jọ se imishọnare nọ e rrọ orẹwho na re ma rọ tuduhọ ae awọ. Oke yena, o lọhọ họ re ma rọ ẹjini ru ileta na bu, yọ whọ tẹ gwọlọ ru ei dede, ọziọ ugho ho. Fikiere ma tẹ rọ etapraeta kere ileta na kpobi ọvuọvo. Yọ who te kere thọ, whọ sai voro iei hi. Iruo na e lọhọ họ.

Nọ ma kuhọ no, re me te ti kpo evaọ owọwọ ẹdẹ yena, Brọda Paterakis ọ tẹ kẹ omẹ ẹnvẹlopu. Ọ tẹ ta nọ, “David, ukoko u kere ileta se owhẹ.” Nọ me rovie ẹnvẹlopu na, kpakọ ileta nọ me je kere ẹsiẹ na, ọjọ a kẹ omẹ na! Oware yena u wuhrẹ omẹ nọ o tẹ make rọnọ uwou ogha nọ o rrọ orẹwho na u tulo ho, me re rri rie vo ho keme oye họ oria nọ ukoko Jihova u bi ro ru iruo evaọ etẹe.

Mẹ avọ inievo buobu evaọ ukoko na ma kẹle ohwohwo gaga. Ẹsibuobu evaọ owọwọ Ẹdẹ-Ọmaha, mẹ rẹ jọ kugbe inievo jọ nọ ma gbẹ rrọ ukoko avọ emọ rai. Oma o jẹ hae were omẹ nọ mẹ tẹ rrọ kugbe ai. Rite inẹnẹ na, me re lele ae ta ẹme ẹsejọ. Yọ ẹvẹrẹ French nọ mẹ jọ obei wuhrẹ o fiobọhọ kẹ omẹ evaọ iwou ogha buobu nọ me kpohọ no.

Evaọ 1968, mẹ avọ Linda ma tẹ ta mu inọ ma rẹ rehọ ohwohwo. Mẹ jẹ gwọlọ iruo nọ mẹ rẹ hae rọ emedẹ jọ ru re nọ mẹ avọ Linda ma tẹ ruọ orọo no, ma vẹ sai wo uvẹ ru ọkobaro evaọ Senegal. Mẹ gwọlọ iruo evaọ emerae buobu, rekọ mẹ jẹ ruẹ hẹ keme a jẹ gwọlọ nọ ahwo nọ a rrọ ahwo orẹwho na a rẹ rehọ iruo, orọnọ mai erara ha. Nọ u te oria jọ, me te zihe kpobọ Canada. Ma tẹ te rọo. Nọ ma rọo no, a tẹ rọ omai mu ekobaro obọdẹ. Ẹwho nọ a re se Edmundston ma jọ evaọ New Brunswick. Ẹwho na ọ kẹle ubrotọ Quebec.

MA RU IRUO ỌKOBARO EVAỌ NEW BRUNSWICK GBE QUEBEC

Osẹri Jihova ọvuọvo ọ jọ ẹwho nọ ma jọ na ha. Yọ ahwo nọ ma je wuhrẹ Ebaibol a tulo ho. Enwenọ ahwo ẹwho na kpobi ichọche Katọlik a jọ, yọ a wọ riẹ họ uzou. Enwenọ uwou kpobi, a kere fihọ iẹe nọ, ‘Isẹri Jihova a du te etenẹ hẹ.’ Oke yena, ma jẹ hae daezọ eme itieye na ha. Ma re kpohọ iwou itieye na nyae ta usi uwoma ghele. O wọhọ enẹna ha. Koka koka, ahwo egagọ Katọlik a jẹ hai kere fihọ obe-usi nọ: “Isẹri Jihova họ ijihẹ nọ e rrọ ẹwho na. Wha joma nyae gwọlọ ae tobọ.” Mai Isẹri Jihova ene ọvo ma jọ ẹwho na. Brọda Victor Norberg avọ aye riẹ Velda gbe omẹ avọ aye mẹ. Fikiere ma riẹ nọ mai a bi se ijihẹ na.

Ẹme nọ ọsẹro okogho ọ ta kẹ omai evaọ orọ ọsosuọ nọ ọ rọ nyaze ti rri omai o rẹ thọrọ omẹ ẹro ho. Nọ o kuhọ kugbe omai no, anọ, “Wha daoma fiobọhọ kẹ ahwo ẹwho na re a gbe mukpahe Isẹri Jihova ha. Ẹsejọhọ oware nọ wha te sai ru kpobi oye.” Umuo oke yena vrẹ, ma tẹ jẹ daoma ru ere. Ẹmẹrera na, ahwo na a tẹ te ruẹ nọ mai Isẹri Jihova ma rẹ wọ oma ha wọhọ epanọ isu egagọ Katọlik a re ru. Ma be ta ẹme na, ukoko osese jọ o rrọ ẹwho na no.

Nọ ma jọ ẹwho yena te oware wọhọ ukpe ọvo no, a te dhe omai kpohọ ukoko jọ nọ inievo buobu a rrọ evaọ Quebec City. Eva e jẹ were omai gaga evaọ emerae ezeza nọ ma rọ jọ obei na. Inievo na a riẹ epanọ a re dede ohwo rehọ. Ukoko o tẹ te rehọ omẹ mu odibo ọnyawariẹ.

Ikpe ikpegbene (14) me ru iruo odibo ọnyawariẹ. Ikogho nọ e jọ ubrotọ Quebec me je rri. Iruo na e jẹ were omai oma. Ahwo buobu a je kurẹriẹ evaọ Quebec. Who te te ukoko jọ, whọ rẹ ruẹ ahwo buobu nọ e be daoma te epanọ a rẹ rọ họ-ame, te esẹgbini, gbe emọ.

INIEVO NA A JẸ DAOMA GAGA

Inievo nọ e jọ ahwo Canada nọ e rẹ ta French a wo emamọ uruemu gaga. A rrọ sasasa, a wo ajọwha gaga, yọ a re si orai no ho. Nọ ejọ rai a je kurẹriẹ ziọ ukoko na, o lọhọ kẹ ai hi. Ahwo uviuwou rai a jẹ wọso ae gaga. Emọ jọ nọ i je kurẹriẹ ze, esẹgbini rai a ta kẹ ae nọ a te gbe kuomagbe Isẹri Jihova, a ti le ai no uwou rai no. Rekọ ibuobu rai a ta nọ a rẹ gọ Jihova ghele. Mẹ riẹ nọ eva rai e be were Jihova gaga.

Oria nọ me gbiku na te na, mẹ rẹ ta ẹme te inievo jọ nọ e jọ ekobaro oke-kpobi gbe erọ obọdẹ nọ e jọ Quebec. Inievo na a daoma gaga. Ofẹ ọfa Canada ibuobu rai a no ze ziọ Quebec. Fikiere a jẹ daoma wuhrẹ French. Ere ọvo ho, a jẹ daoma riẹ oghẹrẹ nọ a re ru eware evaọ obei gbe epanọ ahwo ẹwho na a re rri eware. Ichọche Katọlik ahwo na buobu a jọ fikiere eware egagọ yena a je ru lele evaọ enwenọ oware kpobi.

Eria buobu nọ a je dhe ekobaro obọdẹ kpohọ yọ eria nọ i siomano nọ Isẹri Jihova e jọ họ. Fikinọ ahwo a mukpahe Isẹri Jihova evaọ eria itieye na, inievo na a jẹ hae kake ruẹ uwou ho. Yọ re a ruẹ iruo nọ a rẹ rọ omoke jọ ru, oye o mae bẹ. Inievo buobu avọ eyae rai, makọ enọ e rọo no obọ, a jẹ keke oma họ uwou ọvona re a ghale osa uwou na hwa keme ugho o riẹ hẹ. Ẹsejọ a re te imane, imazeza, hayo imaree evaọ uwou ọvo. Inievo na a rọ iruo ọkobaro rai na zaro ho. A te mu ohwo Ebaibol họ ewuhrẹ no, a rẹ daoma fiobọhọ kẹe ziezi re ọ nyaharo. Enẹna nọ iwhowho-uvie buobu e rrọ obọ Quebec no na, ekobaro buobu nọ e jọ obei a kpohọ eria efa nọ a mae jọ gwọlọ iwhowho-uvie no.

Nọ mẹ tẹ nyai rri ukoko, evaọ ohiohiẹ Ẹdẹ-Ọmaha, izoge na mẹ avọ aye mẹ ma jẹ hae mai lele kpohọ usi uwoma. U ru nọ ma jẹ rọ riẹ ebẹbẹ nọ i bi te ai. Enẹna, izoge yena jọ a rrọ imishọnare evaọ erẹwho efa, yọ ejọ i bi ru iruo efa evaọ ukoko na.

Ẹsejọ nọ ma tẹ nyai rri ikoko jọ, ugho obọmai ma rẹ rọ jẹ ofa keme inievo na a wo ugho nọ a be kẹ omai hi. Fikiere ẹsejọ, nọ amara o te re no, ukọpa o rẹ gbẹ tamu omai obọ họ. Rekọ ma rẹroso Jihova keme ma riẹ nọ ọ riẹ epanọ eware e rrọ kẹ omai. Yọ ọ ginẹ nyasiọ omai ba ha. Ọ jẹ hai fiobọhọ kẹ omai evaọ edhere nọ ma rẹro riẹ hẹ, ma vẹ sai no ukoko jọ kpohọ ọfa.

ME WUHRẸ EWARE BUOBU MI INIEVO NỌ I KRUGA

Mẹ ta ẹsejọ nọ eware nọ a jọ Isukulu Giliad wuhrẹ omai kpahe epanọ ma re ro lele ahwo nọ a rẹ wha usi ta ẹme, u fiobọhọ kẹ omẹ uwhremu na. Nọ ma jọ Quebec, me wo uvẹ nọ mẹ rọ ta usi uwoma evaọ iredio, etẹlẹvishọno gbe ebe-usi. Mẹ avọ Brọda Léonce Crépeault ma jẹ hae mai lele ahwo na ta ẹme. Oniọvo na ọ jọ odibo ọnyawariẹ re, yọ ọ riẹ epanọ a re lele ahwo yena ta ẹme gaga. Ọ tẹ gwọlọ lele ohwo ologbo jọ ta ẹme evaọ usu ahwo na, ọ rẹ ta ẹme na wọhọ ẹsenọ ọ riẹ gaga ha. Ọ rẹ ta nọ: “Ọga, mẹ avọ oniọvo mẹ na yọ etausiuwoma. Ma nwane riẹ epanọ a rẹ ta ẹme evaọ iredio hayo etẹlẹvishọno ho. Rekọ a vi omai ze inọ ma jẹ ahwo riẹ kpahe okokohọ ologbo nọ Isẹri Jihova a bi ti ru. Eva e te were omai nọ wha te fiobọhọ kẹ omai.” Fiki oghẹrẹ nọ ọ jẹ hae romakpotọ ta ẹme na, ahwo na a jẹ hai fiobọhọ kẹ omai gaga.

Uwhremu na, uwou ogha o tẹ ta nọ me lele Brọda Glen How ru iruo. Oniọvo na ọ jọ elọya ukoko. Mẹ jẹ hai lele iei ru iruo nọ ukoko u te wo oghẹrẹ edhọ ekọto jọ nọ ahwo nọ a rẹ wha usi a te gwọlọ riẹ kpahe. Eware nọ me wuhrẹ evaọ Isukulu Giliad gbe enọ me wuhrẹ mi Brọda Crépeault i fiobọhọ kẹ omẹ oke yena. Eva e were omẹ gaga inọ me lele Brọda How ru iruo. Ọ rẹ dhozọ họ nọ ọ tẹ rrọ obọ ekọto. O te je you Jihova gaga, yọ oware nọ o mai wuzou oye.

Evaọ ukpe 1985, a te dhe omai kpohọ okogho jọ evaọ Canada nọ ọ kẹle obonọ ọsẹ mẹ ọ jẹ rria. U ru nọ ma jẹ sae rọ rẹrotei ziezi. Emerae esa nọ i lele i rie, o te whu. Rekọ me gbe je rri ikogho nọ e rrọ ofẹ yena. Nọ u je te ukpe 1989, ukoko u te zizie omai kpohọ Ebẹtẹle United States. Ma rẹro riẹ hẹ. Oke yena mẹ jọ odibo ọnyawariẹ te enwenọ ikpe ikpegbizii (19) no. Evaọ ikpe yena kpobi, ma wohọ iwou buobu, yọ inievo buobu a dede omai rehọ jẹ kẹ omai emu. Oware nọ a ru kẹ omai na o da omai ẹro fia.

MA KPOBỌ UNITED STATES

Nọ ma te obọ Brooklyn, a te fi omẹ họ Ẹko-Iruo Ẹruorote Iruẹru Ikoko. Eware nọ a jọ etẹe wuhrẹ omẹ e were omẹ gaga. Mẹ jọ etẹe wuhrẹ nọ u fo re mẹ kiẹ kpahe oware ziezi, orọnikọ ‘me roro nọ’ me re ro ru oware he. Evaọ ukpe 1998, a te fi omẹ họ Ẹko-Iruo Ebe-Ikere, yọ ofẹ yena mẹ gbẹ rrọ rite inẹnẹ na. Mẹ gbẹ be jọ etẹe wuhrẹ epanọ a re kere oware ziezi. Me lele Brọda John Barr ru iruo ikpe buobu. Ọye ọ jọ ọsẹro Ogbẹgwae Ebe-Ikere. Eva e were omẹ gaga nọ me ro lele iei ru iruo, yọ o wuhrẹ omẹ eware buobu. O te je wo emamọ uruemu nọ Oleleikristi o re wo.

Eva e were omẹ gaga nọ me ro lele inievo nọ e rrọ Ẹko-Iruo Ebe-Ikere ru iruo keme a wo omaurokpotọ gaga. A rẹ lẹ gaga kpahe iruo nọ a bi ru na. A riẹ nọ ẹzi Jihova o bi fiobọhọ kẹ ae ru eware kpobi nọ a bi ru na, orọnikọ fikinọ a riẹ gaga ha.

Mẹ avọ aye mẹ ma kpohọ erẹwho nọ i bu te udhusoi-gbikpe (110) no. Inievo nọ ma ruẹ evaọ erẹwho yena u ru eva were omai gaga. Te enọ e rrọ imishọnare, Ogbẹgwae Uwou Ogha, gbe efa nọ e rrọ iruo odibọgba oke-kpobi, a dhesẹ nọ a gine you Jihova. Ere ọvo ho, inievo efa nọ e rrọ eria yena a wo ajọwha kẹ egagọ Ọghẹnẹ. A gbẹ rọ iruo Uvie na karo ghelọ ẹmo, ẹbẹbẹ ugho, gbe ukpokpoma. Mẹ riẹ nọ eva rai e be were Jihova gaga.

Anwọ ikpe buobu ze na, aye mẹ o fiobọhọ kẹ omẹ gaga no nọ mẹ be sai ro ru iruo nọ a kẹ omẹ evaọ ukoko na. Aye mẹ ọ riẹ epanọ a re se ahwo gboma, yọ o re fiobọhọ kẹ ahwo gaga. Ọ riẹ epanọ a rẹ rọ ruọ ẹme nọ ọ tẹ gwọlọ ta usi uwoma kẹ ohwo. O fiobọhọ kẹ ahwo buobu mu Jihova họ ẹgọ no, makọ ejọ nọ e siọ ewuhrẹ gbe usi uwoma ba no vẹre. Aye mẹ na yọ aye nọ Jihova ọ rọ ghale omẹ. Nọ ma be kpako no na, inievo nọ e gbẹ maha a bi fiobọhọ kẹ omai gaga nọ ma tẹ gwọlọ kpohọ erẹ hayo ru oware ofa jọ. Ajọ Jihova o fihọ kẹ ae!—Mak 10:29, 30.

Nọ me te roro kpahe ikpe udhone (80) nọ e vrẹ na, eva e rẹ were omẹ. Mẹ rọwo fihọ ẹme nọ ọso-ilezi na o kere inọ: “O Ọghẹnẹ, who wuhrẹ omẹ no oke emaha mẹ ze, yọ rite inẹnẹ na, me gbe bi whowho iruo igbunu ra.” (Ol. 71:17) Oware nọ mẹ gwọlọ gbe ru oye evaọ edẹ uzuazọ mẹ kpobi.