Ọ Jọ Wọhọ Utho Uwhremu Na

NỌ JESU ọ ruẹ Saemọn, ọ ta kẹe nọ: “Whẹ họ Saemọn, ọmọzae Jọn; a ti se owhẹ Sifas.” O rrọ vevẹ nọ odẹ na “Sifas” avọ “Pita” i wo otofa ọvona. Otofa rai họ “utho.” Fikieme Jesu o ro mu odẹ yena kẹ Saemọn? Utho yọ oware nọ o rrọ gaga, jẹ rrọ kothi. A rẹ sae rehọ iẹe bọ uwou dede. Fikiere, o wọhọ nọ Jesu ọ jẹ ta nọ ogbẹnyusu riẹ yena ọ te jọ kothi wọhọ utho.

Kọ Pita ọ ginẹ jọ wọhọ utho? Wọhọ epanọ ma jọ uzou avọ 45 ruẹ na, orọnọ ẹsikpobi Pita ọ nwane jọ ere he. U wo oke jọ nọ ẹrọwọ riẹ ọ ga tere he. Yọ ozọ u tube mu ei ẹsejọ dede. Ghele na Jesu o gbe fievahọ ogbẹnyusu riẹ na. Jesu ọ riẹ nọ oke o be nya na, Pita ọ te rọ ẹmẹrera gudu. Kọ Jesu ọ riẹ ru nọ o ro fievahọ iẹe?

Nọ Kristi ọ kparoma no uwhu ze no, ọ tẹ kẹ ikọ riẹ iruo jọ nọ i wuzou gaga. Pita ọ romakẹ iruo na. Yọ o dhesẹ unuẹse buobu nọ ọ ginẹ gudu no. Wọhọ oriruo, evaọ ehaa ilogbo jọ nọ a jọ Jerusalẹm ru, Pita ọ kpama dikihẹ evaọ udevie ahwo Ju nọ i te idu buobu, nọ e wọ egagọ rai họ uzou. Ọ tẹ vuẹ ae vevẹ inọ ae a kpe Mesaya na. Nọ ahwo na a yo ẹme riẹ na, “o tẹ kẹ ae uye gaga.” Ahwo buobu a te kurẹriẹ fiki epanọ Pita ọ rọ ta usi uwoma na kẹ ae ududu. U te ru nọ ahwo nọ a te oware wọhọ idu esa (3,000) a rọ họ-ame zihe ruọ ilele Jesu.

Iruo usi uwoma ota na Pita ọ rọ karo evaọ uzuazọ riẹ. Taure Jesu o te ti whu, ọ kẹ riẹ “isiavẹ Uvie odhiwu.” Onana u dhesẹ nọ Pita o ti fiobọhọ kẹ itu ahwo esa jọ re a wo uvẹ nọ a rẹ rọ ruọ Uvie odhiwu. Fikiere Pita ọ ta usi uwoma na ududu, ababọ ọriẹwẹ. Ọ kake ta usi uwoma na kẹ ahwo Ju. Kẹsena ọ tẹ ta kẹ ahwo Sameria. Ukuhọ riẹ ọ tẹ ta kẹ ahwo erẹwho efa. Pita o kpohọ eria nọ i thabọ nyae ta usi uwoma na. Yọ ọ jẹ hae tuduhọ ibe Ileleikristi riẹ awọ. Evaọ ẹsejọ, aye riẹ ọ jẹ hai lele iei. Pita ọ tubẹ kwa kpohọ ugbobọ Babilọn dede fiki usi uwoma ota na.

Nọ oke o be nyaharo na, Pita ọ rẹriẹ ovao dhe ebẹbẹ buobu evaọ iruo na. Yọ o thihakọ rai kpobi. U wo oke jọ nọ a ro fi ọyomariẹ avọ ikọ efa jọ họ uwou-odi, yọ onana o via vrẹ ẹsiẹvo. Isu egagọ ahwo Ju a jẹ gwọlọ whaha ae re a siọ usi uwoma ba ẹta. Rekọ Pita ọ tẹ ta nọ: “Ọghẹnẹ họ osu nọ ma re yoẹme kẹ orọnikọ ahwo ho.” Nọ ahwo Ju na a yo ẹme yena, eva e tẹ dha ae, onọ u ru nọ a ro kpe ikọ na gaga. Rekọ ikọ na a gbẹ jẹ vuẹ ahwo kpahe Uvie Ọghẹnẹ gbe Ovie nọ Jihova o ro mu, Jesu Kristi.

Nọ oke jọ o vrẹ no, ahwo Ju nọ a mukpahe Ileleikristi a te je kpokpo ae gaga. Oke nana a ro kpe Stivin no fiki ẹrọwọ riẹ. Oware wọhọ ikpe ikpe nọ i lele i rie, a te kpe Jemis no re. Ọnọ ọ jọ ukọ gbe ogbẹnyusu Pita. Osu ọgeva nọ ọ ta nọ a kpe Jemis no na ọ ruẹ nọ uwhu Jemis na o were ahwo Ju nọ a bi kpokpo Ileleikristi na gaga. Fikiere ọ tẹ ta nọ a mu Pita. A tẹ rọ egbregba kare Pita fihọ uwou-odi, yọ isoja i bi rou rie. Whaọ taure Jesu o te ti zihe kpobọ odhiwu, ọ vuẹ Pita no vẹre inọ a te rọ egbregba kare Pita, a ve ti su ei nyai kpe no. Nọ oware nana o be via na, ẹsejọhọ Pita ọ kareghẹhọ ẹme nọ Jesu ọ ta kpahe uwhu riẹ na. Yọ o sae jọ nọ o je roro sọ oke yena u te no na.

Evaọ aso, ukọ-odhiwu ọ tẹ romavia idudhe. Ọ tẹ rọwo Pita, o te si egbregba noi abọ. Kẹsena o te su ei no uwou-odi na, nya aro isoja na vrẹ. Ọ tẹ rehọ Pita nya lahwe no igeti ilogbo na ze ruọ iyẹrẹ. Kọ eme Pita o ru? Kọ ọ tọlọ oma riẹ ọ tẹ dhẹ no Jerusalẹm, re a siẹe ba ẹwariẹ emu? Ijo. Ukpoye, ọ nya ovavo kpohọ oria nọ ọ riẹ nọ inievo-emezae gbe emetẹ riẹ a kokohọ be jọ gọ Jihova, yọ a be lẹ. Dai roro epanọ eva e were inievo na te evaọ okenọ a ruẹ Pita! Udu u te te ai otọ.

Pita ọ jẹ hae kareghẹhọ ẹme nọ Jesu Olori riẹ ọ ta kẹe ẹsikpobi. Jesu ọ ta kẹe nọ: “Bọ inievo ra ga,” “kuọ igodẹ esese mẹ.” (Luk 22:32; Jọn 21:17) Pita ọ ginẹ ta usi uwoma na ududu. Yọ ọ jẹ tuduhọ inievo ukoko na awọ evaọ oria kpobi nọ ọ nya. Rekọ ẹsejọ eware e jẹ hae thọe obọ, keme ọ jọ ohwo-akpọ nọ ọ gba ha. Wọhọ oriruo, u wo oke jọ nọ o ro ru oware nọ u fo ho fiki ozọ ahwo. U te ru nọ ukọ Jesu ọfa ọ rọ kpọe họ. Pita ọ romakpotọ jẹ ọwhọkuo na rehọ, o te wuhrẹ noi ze. Ọ gbẹ jẹ tuduhọ inievo-emezae gbe inievo-emetẹ riẹ awọ. Uwhremu na, ẹzi Ọghẹnẹ ọ wọ riẹ kere ileta ivẹ nọ e rrọ abọjọ Ebaibol na nẹnẹ. Pita ọ gọ Jihova ziezi evaọ ikpe buobu, bẹsenọ a rọ wariẹ mu ei fihọ uwou-odi orọ urere re a kpei no. Rekọ bọo okenọ Pita o ro whu, o dhesẹ nọ o wo ẹrọwo ziezi yọ ọ gudu. O rrọ vevẹ nọ Pita ọ ginẹ jọ wọhọ “utho”!

Se iku Ebaibol na:

• Matiu 16:18, 19

• Jọn 1:40-42; 21:14-19

• Iruẹru Ikọ 2:14-43; 5:17-42; 8:14-17, 25; 10:44-48; 12:1-17

• Ahwo Galesha 2:11-14

• 1 Pita 5:13

• 2 Pita 1:12-15

Onọ nọ a rẹ ta ẹme kpahe:

Eme gbe eme Pita o ru ro dhesẹ nọ ọ gudu evaọ uzuazọ riẹ evaọ oke nana?

Gbẹ Kiẹ Kodo

1. 1. Jesu ọ kẹ Pita “isiavẹ Uvie” na. Eme Pita ọ rọ isiavẹ yena ru? (Mat. 16:18, 19; ijwbq uzoẹme avọ 124 ¶1-5) Uwoho 1

   Uyo ra

   

2. 2. Taure Pita ọ tẹ te nyabru Kọniliọs nọ ọ jọ ohwo orẹwho ọfa, eme u dhesẹ nọ Pita ọ jẹ hae gbẹroma tere he wọhọ epanọ ahwo a je ru oke yena? (Iruẹru Ikọ 10:5-7, 23; bt 69 ¶1, ẹme-obotọ) Uwoho avọ 2

   Uyo ra

   

3. 3. Eme u dhesẹ nọ Pita ọ jẹ ọwhọkuo nọ Pọl ọ kẹ riẹ na rehọ? (w17.04 26-27 ¶15-17)

   Uyo ra

4. 4. Fikieme Pita ọ rọ kwa kpobọ Babilọn? (it “Igbo” ¶24)

   Uyo ra

Roro Kpahe Eware nọ Who Wuhrẹ Noi Ze

• Pita ọ ta ẹme ududu kẹ ogbotu ahwo nọ a jọ Jerusalẹm, rekọ ọ ta ẹme na avọ adhẹẹ. Oke vẹ o mae rọ gwọlọ nọ ma ta ẹme ududu, rekọ ma rẹ ta ẹme na avọ adhẹẹ?

  Uyo ra

• O make rọnọ Pita ọ jọ omọvo ikọ na, ọ jẹ ọwhọkuo nọ Pọl ọ kẹ riẹ rehọ. Ẹvẹ ma sae rọ rehọ aro kele Pita? Uwoho avọ 3

  Uyo ra

  

• Oghẹrẹ ọfa vẹ whọ sae rọ rehọ aro kele Pita gudu wọhọ epanọ ma ruẹ evaọ iku nana?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• Eme whọ jọ iku nana wuhrẹ kpahe Pita nọ u ru eva were owhẹ inọ a salọ Pita re o lele Kristi su evaọ obọ odhiwu?

  Uyo ra

Gbe Wuhrẹ Eware Efa

Ẹvẹ oriruo Pita ọ sai ro fiobọhọ kẹ omai fievahọ Jihova nọ ozọ u te bi mu omai?

Oware nọ Ma rẹ Sai Wuhrẹ Mi Ai—Pita (6:48)

Jọ uzoẹme nana wuhrẹ eware efa no iku nọ e rrọ Iruẹru Ikọ uzou avọ 10 na ze.

“Ọghẹnẹ O Wo Ọriẹwẹ Hẹ” (Izoẹme sa-sa evaọ itanẹte “Ikuigbe Ebaibol”)