45 PITA
“Mẹ Yọ Ọrahauzi”
PITA ọ jọ okuori nọ ọ jẹ hai lele ahwo uviuwou riẹ kpe iyei. Ọ tẹ jẹ jọ ohwo nọ ọ gudu jẹ gẹro. Ọ rẹ kaki fibo ho nọ oware jọ o tẹ riẹe iroro. Yọ oma o rẹ kpakpa iẹe nọ ọ tẹ ruẹ oware nọ u fo nọ a re ru. Evaọ ẹdẹ jọ, oniọvo riẹ nọ a re se Andru ọ tẹ ta kẹe avọ evawere nọ: “Ma ruẹ Mesaya na no.” Pita ọ raha oke he, ọ tẹ nyabru Jesu. O te mu ei họ elele.
Nọ emerae jọ e vrẹ no, Jesu ọ tẹ nyaziọ Kapaniọm nọ Pita ọ jẹ rria. Okenọ Jesu ọ ruẹ Pita, yọ oma o rrọ Pita no keme evaọ aso yena soso ọ jẹ gwọlọ iyei kpe rekọ ọ ruẹ kpe he. Jesu ọ tẹ ta kẹe nọ o bi okọ na kpohọ abọ nọ o mai kodo re ọ wariẹ fi iriri riẹ họ ame. Rekọ o jẹ ruọ Pita oma ha. Fikieme? Keme aso a rẹ mae ruẹ iyei kpe orọnọ oke uvo ho. Pita ọ tẹ ta nọ: “Ma daoma bẹ evaọ aso na soso, rekọ ma kpe oware ovo ho.” Rekọ o ru oware nọ Jesu ọ ta na. O raha oke he, a te kpe iyei nọ e vọ ekọ ivẹ te epanọ ekọ na i ro muhọ ezue no! Ozọ u te mu Pita. O te kigwẹ fihọ aro Jesu bi bo nọ: “Nyasiọ omẹ ba, Olori, keme mẹ yọ ọrahauzi.” Pita o rri oma riẹ nọ o te ohwo nọ ọ rẹ jọ kugbe Ọmọ Ọghẹnẹ nọ o ru oware igbunu otiọye na ha. Rekọ Jesu ọ tẹ ta kẹe nọ: “Whọ gbẹ dhozọ họ. No enẹna vrẹ whọ te hai mu ahwo ọkpokpọ.”
Jesu ọ ruẹ emamọ iruemu nọ Pita o wo, ọ tẹ salọ iẹe re ọ jọ usu ikọ ikpegbivẹ (12) riẹ. Pita ọ gudu yọ o dhesẹ onana evaọ eware buobu. Wọhọ oriruo, evaọ okenọ Jesu ọ tẹ ta ẹme jọ nọ a riẹ otọ riẹ hẹ, yọ ilele nọ i kiọkọ a nọ onọ họ, Pita họ ohwo nọ ọ jẹ hae mae nọe re o ru ẹme na vẹ. Yọ evaọ okenọ Jesu ọ jẹ nya evaọ ehru ame, Pita họ ohwo nọ ọ gbaudu ta kẹ Jesu nọ ọ gwọlọ nya ehru ame na bru ei re.
Evaọ ẹsibuobu, Pita ọ ta eme nọ u fo nọ ọ hae ta ha. O tẹ whae ze nọ a rọ kpọe họ unuẹse buobu re. Rekọ fikinọ ọ gudu je wo omaurokpotọ, ọ jẹ hae jẹ ọwhọkuo na rehọ o ve nwene
Pita o dhesẹ nọ ọ gudu evaọ oware ofa jọ re. Oye họ oghẹrẹ nọ ọ jẹ hai ru nọ a tẹ kpọe họ. Nọ a tẹ kpọ ohwo họ, o gwọlọ nọ ọ rẹ gudu re ọ sae rọwo nọ o ru thọ. Ọ vẹ jẹ romakpotọ nwene re o ru oware nọ u fo. Yọ ere Pita ọ jẹ hai ru. Wọhọ oriruo, u wo oke jọ nọ Jesu ọ rọ ta kẹ ilele riẹ nọ a ti kpei no. Pita ọ tẹ whọku ei inọ: “Whọ rọ uye bẹ omara ha Olori.” Rekọ Jesu ọ tẹ kpọ Pita họ inọ ọ be ta ẹme wọhọ Setan, keme ọ ta ẹme nọ ọ wọso oreva Ọghẹnẹ. Fikinọ Pita o wo omaurokpotọ, ọ jẹ ọwhọkuo na rehọ.
Evaọ aso urere taure Jesu o te ti whu, Jesu ọ jẹ gwọlọ wuhrẹ ikọ riẹ kpahe omaurokpotọ. Fikiere o te mu awọ rai họ ẹwozẹ wọhọ epanọ odibo gheghe o re ru. Rekọ Pita ọ tẹ vuẹe nọ: “Whọ rẹ wozẹ awọ mẹ vievie he.” Jesu ọ tẹ kpọe họ. U te ru nọ Pita ọ rọ ta nọ Jesu ọ dhugbẹ wozẹ te abọ te uzou riẹ orọnọ awọ riẹ ọvo ho. Jesu ọ tẹ wariẹ kpọe họ. Nọ oyena o vrẹ no, Jesu ọ tẹ ta kẹ ikọ riẹ na kpobi nọ a te dhẹ siọ iẹe ba uviemenẹ. Pita ọ tẹ ta nọ ikọ nọ i kiọkọ na kpobi e tẹ make dhẹ, ọyomariẹ ọ te dhẹ vievie he. Jesu ọ tẹ vuẹe nọ ọ te vro riẹ isiasa soso evaọ aso yena.
Nọ euwa jọ ọvo e vrẹ no, isoja e tẹ nyaze ti mu Jesu vrẹ. Rekọ Pita ọ tẹ gbaudu jọ umugbo jọ je lele ai ukuke. Ere a rọ rehọ Jesu kpobọ uwou ozerẹ okpehru na. A te bi gboja kẹ Jesu je bi kpomovuọ họ iẹe oma. A te bruoziẹ kpei evaọ oware nọ o ru hu. Evaọ oke yena yọ Pita ọ rrọ evaọ ighẹ na. Rekọ ahwo jọ nọ a jọ etẹe a te vuhu Pita inọ yọ omọvo ilele Jesu jọ. Pita ọ tẹ vro isiasa soso nọ ọ riẹ ọzae na ha, nwane wọhọ epanọ Jesu ọ ta vẹre.
Oke yena Jesu o ro no eva uwou na ze, o te rri Pita. Oware nọ Pita o ru na o tẹ kẹe uye gaga. Pita “ọ tẹ ruọ otafe, ọ tẹ viẹ gaga.” Nọ euwa jọ e vrẹ no, a te kpe Olori oyoyou riẹ na no. Ma riẹ nọ oware na o te da Pita te onwa. Rekọ dede nọ Pita o ru oware othọthọ nana, ọ gbẹ gudu ghele. Ọ siọ Jihova ba ẹgọ họ. Ọ gba riẹ mu nọ o re thihakọ. Ọ nyai kuomagbe ikọ edekọ. Uwhremu na nọ a kpare Jesu ze no, ọ romavia kẹ Pita evaọ okenọ Pita ọvo ọ jọ oria. Dede nọ Ebaibol ọ fodẹ eme nọ Jesu ọ ta kẹe he, ma riẹ nọ eme na e sasa e riẹ oma jẹ tuduhọ iẹe awọ gaga.
Nọ eka jọ e vrẹ no, Jesu ọ tẹ nyabru ikọ riẹ evaọ obọ abade Galili. Ọ tẹ kẹ Pita emamọ okẹ jọ. Taure Jesu o te ti ru ere, ọ nọ Pita enọ esa wọhọ epanọ Pita ọ vro riẹ isiasa na. Pita ọ tẹ kẹ Jesu uyo isiasa inọ o you rie gaga. Kẹsena Jesu ọ tẹ kẹe iruo jọ nọ i wuzou gaga inọ: “Kuọ igodẹ esese mẹ.” Evaọ Uzou avọ 49, ma ti wuhrẹ kpahe epanọ Pita o ro ru iruo nọ Jesu ọ kẹ riẹ na gbe epanọ o ro dhesẹ nọ ọ gudu evaọ edẹ uzuazọ riẹ nọ i kiọkọ.
Se iku Ebaibol na:
Onọ nọ a rẹ ta ẹme kpahe:
Eme gbe eme Pita o ru ro dhesẹ nọ ọ gudu?
Gbẹ Kiẹ Kodo
1. Oghẹrẹ vẹ a jẹ hai ro kpe iyei evaọ oke Ebaibol? (it “Erao-Ikpe avọ Iyei-Ikpe” ¶6-7) Uwoho 1
Uwoho 1
2. Fikieme Jesu o ro mu Sifas (koyehọ Pita) kẹ Saemọn? (“Whẹ họ Saemọn” eme Ebaibol uwuhrẹ Jọn 1:42, nwtsty)
3. Eme họ otọ ẹme nọ Jesu ọ ta inọ Pita avọ Andru a te jọ “ikuori ahwo”? (Mat. 4:18-20; w16.05 9 ¶3-4) Uwoho avọ 2
Uwoho 2
4. Taure Jesu o te ti zihe kpobọ odhiwu, ọ nọ Pita nọ: “Kọ who you omẹ vi eware nana?” Eme o sae jọ nọ o lẹliẹ Jesu nọ onọ na? (“kọ who you omẹ vi eware nana?” eme Ebaibol uwuhrẹ Jọn 21:15, nwtsty)
Roro Kpahe Eware nọ Who Wuhrẹ Noi Ze
Otẹrọnọ u wo oware jọ nọ o be hae thọ owhẹ obọ nọ whọ be gọ Jihova na, ẹvẹ oriruo Pita ọ sai ro fiobọhọ kẹ owhẹ re whọ gbẹ siọ Jihova ba ẹgọ họ? Uwoho avọ 3
Uwoho 3
Who te roro kpahe oghẹrẹ nọ Jihova avọ Jesu a rọ rọvrẹ Pita riẹriẹriẹ, ẹvẹ o sai ro fiobọhọ kẹ owhẹ?
Oghẹrẹ vẹ whọ sae rọ rehọ aro kele Pita gudu wọhọ epanọ ma ruẹ evaọ iku nana?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku na i ro dhesẹ oware nọ Jihova ọ gwọlọ ru via?
Eme whọ jọ iku nana wuhrẹ kpahe Pita nọ u ru eva were owhẹ inọ a salọ Pita re o lele Kristi su evaọ obọ odhiwu?
Gbe Wuhrẹ Eware Efa
Oghẹrẹ vẹ esẹgbini a sae rọ rehọ oriruo Pita wuhrẹ emọ rai epanọ Jihova o wo ohrọ-oriọ te?
Se kpahe epanọ Pita ọ rọ talamu Jesu evaọ okenọ ahwo buobu a dhẹ siọ iẹe ba.