Ọ Sẹro Uviuwou Riẹ Ziezi

RE OHWO ọ jọ ọsẹ yọ okolo iruo ho keme o gwọlọ nọ ọ rẹ gudu re ọ sae rẹrote uviuwou riẹ, ọ vẹ jẹ thọ ae. Whaọ Josẹf nọ ọ jọ ekapenta evaọ Nazarẹt ọ gwọlọ nọ ọ rẹ jọ oghẹrẹ ọsẹ otiọye. Rekọ taure ọ tẹ te rọo re ọ jọ ọsẹ dede, ọ rẹriẹ ovao dhe ẹbẹbẹ jọ nọ o jọ gwọlọ nọ ọ rẹ gudu. Ẹbẹbẹ vẹ ọye? Ọ ruẹ nọ Meri ọmọtẹ nọ ọ gwọlọ rehọ o dihọ no. Rekọ orọnọ ọyomariẹ o wo eva na ha. Meri o gbiku epanọ o ro dihọ kpobi kẹe. Ghele na, iku nọ Josẹf o je yo na i je vẹe ẹro ho. Yọ o jọ bẹbẹ kẹe gaga re ọ rọwo ae. Kọ eme o bi ti ru na?

Ebaibol na ọ ta nọ Josẹf “ọ jọ ohwo okiẹrẹe.” Ọ jọ uvi ọzae nọ o je koko izi Jihova. Ọ tẹ jẹ jọ wowou, yọ ọ rẹ re ohrọ ahwo. Whaọ evaọ oke yena, nọ ọzae ọ tẹ sa ọmọtẹ hotọ no, a re rri aimava na wọhọ ahwo nọ a ruọ orọo no. Fikiere, nọ Josẹf “o roro kpahe eware nana no,” ọ tẹ jiroro nọ ọ rẹ lẹlẹ siọ Meri. Ọ gwọlọ ru ere re ọ sae thọe, o gbe ru oma vuọ ẹe he. Rekọ Jihova ọ whaha Josẹf. Oghẹrẹ nọ o ro ru ei họ, o vi ukọ-odhiwu bru ei evaọ ewezẹ re ọ ta ẹme kẹe. Ukọ-odhiwu na ọ ta kẹ Josẹf nọ: “Ozọ u mu owhẹ hẹ re whọ rehọ Meri aye ra kpo.” Ukọ-odhiwu na ọ vuẹ Josẹf vevẹ nọ uzẹme na Meri ọ be ta kẹe na. Ọmọ na ginọ Ọmọ Ọghẹnẹ, yọ ọye ọ be te jọ Mesaya na!

Josẹf o “ru epanọ ukọ-odhiwu Jihova ọ ta kẹe na.” O ru iruo nọ Jihova ọ kẹ riẹ na ududu. Koyehọ re ọ rẹrote aye oyoyou riẹ, gbe Ọmọ Ọghẹnẹ nọ o bi ti yẹ na. O ginẹ gwọlọ nọ Josẹf ọ rẹ gudu ziezi re ọ sai ru iruo nana.

Nọ emerae jọ e vrẹ no, Siza Ọgọstọs o te jie uzi nọ ohwo kpobi o kpobọ ẹwho nọ a jọ yẹe nyai kere odẹ fihotọ. Fikiere o tẹ gwọlọ nọ Josẹf o re kpobọ Bẹtlẹhẹm. O sae jọ nọ uzi o gba Meri họ họ inọ o re lele iei nya, rekọ o lele Josẹf nya. Ẹsejọhọ Josẹf o rri rie nọ, aimava a tẹ gbẹ nya, ẹsiẹe ọ sae rọ thọ Meri, o ve je fiobọhọ kẹe. Ere a rọ ruọ edhere dede nọ Meri o “te eyẹ no.” Nọ a te obọ Bẹtlẹhẹm, eva eyẹ i te mu Meri họ ẹda. O te yẹ Jesu evaọ uwou erao.

Josẹf ọ jọ ọdafe he, rekọ o je ru iruo gaga re ọ sae rẹrote uviuwou riẹ. Evaọ okenọ tei te Meri a rọ wọ ọmọ rai na kpobọ etẹmpol evaọ Jerusalẹm, eware nọ iyogbe a re ro dhe idhe, eye a ro dhe idhe. Nọ oke jọ o vrẹ no, nọ a jẹ rria Bẹtlẹhẹm, ahwo nọ a re rri isi obọ ehru rọ gbẹva a tẹ nyabru ai ze. Ẹsejọhọ obọ Babilọn a no ze. Ahwo na a ruẹ oware jọ nọ o wọhọ “esi,” a te lele iei kpohọ uwou nọ amọ Josẹf a jọ evaọ Bẹtlẹhẹm. A tẹ kẹ uviuwou na ekẹ eghaghae fiki ọmọ na. U gbe kri hi, ukọ-odhiwu Jihova ọ tẹ ta kẹ Josẹf nọ Herọd ovie ọgeva na ọ gwọlọ kpe Jesu no! Ọ tẹ ta kẹ Josẹf nọ ọ rehọ uviuwou riẹ re a dhẹ kpobọ Ijipti.

Josẹf ọ gudu. Ọ tẹ rehọ aye riẹ avọ ọmọ ọsese rai na no Bẹtlẹhẹm evaọ aso. A te kpobọ Ijipti nọ ọ rrọ orẹwho ọfa. Kọ ẹvẹ ọ te sae rọ rẹrote uviuwou riẹ evaọ obọ Ijipti? Ma riẹ nọ ekẹ nọ ahwo nọ a re rri isi obọ ehru rọ gbẹva a kẹ rai na, i fiobọhọ kẹe nọ ọ sae rọ rẹrote uviuwou riẹ. Nọ oke jọ o vrẹ no, Jihova ọ tẹ wariẹ ta kẹ Josẹf nọ ọ rehọ uviuwou riẹ zihe kpobọ ẹkwotọ Izrẹl. Rekọ fikinọ osu ọgeva jọ o je su Bẹtlẹhẹm evaọ oke yena, Josẹf o zihe kpohọ obei hi. Ọ tẹ rẹhọ uviuwou riẹ kpobọ Nazarẹt wọhọ epanọ Jihova ọ ta kẹe evaọ ewezẹ.

Nọ a jọ obọ Nazarẹt na, Josẹf avọ Meri a yẹ emọ ezeza efa tu Jesu, o tẹ kawo. Josẹf o gbe je ru iruo ekapenta riẹ na re ọ sae rẹrote uviuwou riẹ. Rekọ oware nọ o mae jariẹ oja họ, epanọ o re ro wuhrẹ uviuwou riẹ kpahe Jihova. O tẹ whae ze nọ ọ jẹ hae rọ wha uviuwou na soso kpobọ isinagọgo koke koke re a wuhrẹ kpahe Jihova. Yọ a jẹ hai kpohọ ehaa evaọ obọ Jerusalẹm re. Orọ urere nọ a rọ fodẹ Josẹf evaọ Ebaibol na họ okenọ aikpobi a ro kpohọ ehaa jọ evaọ obọ Jerusalẹm. Oke yena yọ Jesu ọ jọ ikpe ikpegbivẹ (12). Rekọ nọ a je zihe kpo nọ a gbẹ ruẹ Jesu hu, a te je roro nọ o vru no. Yọ ma riẹ nọ onana o te kẹ Josẹf uye gaga, keme emamọ ọsẹ ọ jọ. Rekọ a ruẹ Jesu evaọ obọ etẹmpol na, yọ eva e were rai gaga. Aikpobi a te gbe zihe kpo. Ebaibol na ọ ta nọ Jesu ọ tẹ gbẹ “jẹ romakpotọ kẹ” ọsẹgboni riẹ.

Ebaibol na ọ fodẹ okenọ Josẹf o ro whu hu. Rekọ ma riẹ nọ taure o te ti whu, o wuhrẹ Jesu ziezi re ọ jọ emamọ ekapenta. Oyejabọ nọ ahwo a je ro sei “ekapenta na,” orọnikọ “ọmọzae ekapenta na” ọvo ho. Fikiere, ma sae ta nọ ọsẹ riẹ o wuhrẹ i rie iruo na ziezi. Josẹf o fi emamọ oriruo hotọ kẹ esẹ. Ọ thọ uviuwou riẹ ududu. Ọ rẹrote ai. Yọ o wuhrẹ i rai kpahe Jihova. Oware nọ Jihova ọ gwọlọ nọ esẹ kpobi a re ru oye.

Se iku Ebaibol na:

• Matiu 1:18-25; 2:1-23; 13:55

• Mak 6:3

• Luk 2:1-7, 22-24, 41-51

Onọ nọ a rẹ ta ẹme kpahe:

Eme gbe eme Josẹf o ru ro dhesẹ nọ ọ gudu?

Gbẹ Kiẹ Kodo

1. 1. Meri yọ ọmọtẹ Hilai. Kọ fikieme a rọ jọ Luk 3:23 se Josẹf “ọmọzae Hilai”? (w17.08 32 ¶4)

   Uyo ra

2. 2. Josẹf o lele Meri wezẹ taure o te ti yẹ Jesu hu. Kọ eme o sae jọ nọ o lẹliẹ e riẹ ru ere? (w03 12/15 5 ¶5)

   Uyo ra

3. 3. Eme o dhesẹ nọ Josẹf ọ jọ ọgba-iruo? (ia 166-167 ¶15-18) Uwoho 1

   Uyo ra

   

4. 4. Fikieme ma sae rọ ta nọ o wọhọ nọ Josẹf o whu evaọ okenọ Jesu ọ gbẹ jọ uzoge? (w17.07 13 ¶8, ẹme-obotọ)

   Uyo ra

Roro Kpahe Eware nọ Who Wuhrẹ Noi Ze

• Josẹf o ru oware nọ Jihova ọ ta kẹe o make jọ nọ o jọ bẹbẹ. Eme esẹ a rẹ sai wuhrẹ no onana ze? (Mat. 1:20, 24; 2:13-15, 19-21)

  Uyo ra

• Josẹf ọ rọ egagọ Jihova karo evaọ uviuwou riẹ. Eme onana u wuhrẹ omai? (Luk 2:41) Uwoho avọ 2

  Uyo ra

  

• Oghẹrẹ ọfa vẹ whọ sae rọ rehọ aro kele Josẹf gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• Nọ a tẹ kpare Josẹf ze no, enọ vẹ mẹ te nọe?

  Uyo ra

Gbe Wuhrẹ Eware Efa

Jọ ividio nana rri epanọ Josẹf ọ rọ nabi ru oware nọ Jihova ọ ta kẹe.

O “Ru Epanọ Ukọ-Odhiwu Jihova Ọ Ta Kẹe” (4:39)

Nọ egọmeti o te fi uzi jọ họ nọ ma rri nọ u kiehọ họ hayo u ti ru eware bẹ kẹ omai, ẹvẹ ma sae rọ rehọ aro kele Josẹf avọ Meri?

“Kọ Whọ be Hae ‘rọ Unevaze Yoẹme’?” (w23.10 8-10 ¶9-14)