O Kie Kẹ Odawọ Họ

OKENỌ Josẹf ọ gbẹ jọ uzoge, Jekọp ọsẹ riẹ o you rie gaga, yọ Jihova Ọghẹnẹ riẹ o you rie gaga re. Ọsẹ riẹ ọ jẹ rẹrotei ziezi. Orọnikọ oyena u dhesẹ nọ eware kpobi i woma kẹ Josẹf re no ho. Emesẹ riẹ a mukpahe iẹe gaga. Nọ a ruẹ nọ Jekọp ọsẹ rai ọ rẹ rọ Josẹf zaharo ho, a tẹ jẹ re iẹe ihri. Yọ a je gbe izuwo họ iẹe aro. Nọ Jihova o ru ei wezẹ ewezẹ nọ ọ jọ ruẹaro nọ ahwo uviuwou riẹ a ti guzou kpotọ kẹe ẹdẹ jọ, inievo riẹ a te mukpahe iẹe vi epaọ anwẹdẹ.

Nọ Josẹf ọ jọ oware wọhọ ikpe ikpegbihrẹ (17), Jekọp o te vi ei nyae ruẹ inievo riẹ evaọ obonọ a be jọ rẹrote ithuru erao rai. Onya na o te rehọ iẹe te edẹ jọ. Nọ o te ai oma no, a te kru ei, a te gbolo iei fihọ ọgọdọ nọ ame ọ jọ họ. Ọ maki je bo nọ a fiobọhọ kẹe na, a tehe ezọ di. A jẹ ta nọ a re kpei no vẹre, rekọ a tẹ jiroro nọ a tubẹ zẹe kẹ ihreki nọ e jẹ nyavrẹ. Nọ a te uwou, a te gbiku ọrue kẹ Jekọp ọsẹ rai, inọ arao ojihẹ jọ o kpe Josẹf ọmọ oyoyou riẹ na no. Rekọ uzẹme na họ, a zẹ Josẹf kpohọ igbo no evaọ ugbobọ Ijipti. A tẹ jẹ wariẹ jọ obei zẹ Josẹf re ọ jọ ọrigbo Pọtifa, nọ ọ jọ ohwo ologbo evaọ esuo Fẹro.

O hae jọ lọlọhọ kẹ Josẹf re o bruenu ọvo fiki eware nọ e via kẹe na. Ukpoye, ọ gudu je kru obọ iruo ga. Ma se kpahe iẹe nọ: ‘Jihova ọ jọ kugbei.’ Jihova o ru nọ oware kpobi nọ Josẹf o je ru u je ro woma kẹe. Pọtifa ọ tẹ rọ Josẹf mu ọnọ o wuzou iruẹru uwou riẹ gbe eware riẹ kpobi.

Rekọ uye Josẹf o ri kuhọ họ, keme ese ọfa jọ o je si ototọ bru ei ze. Aye Pọtifa o je fi ẹro họ iẹe. Keme evaọ oke yena, “Josẹf o . . . te ọzae fihọ ziezi avọ erru” no. Nọ ẹdẹ jọ o te, aye Pọtifa ọ gbẹ sae gba omariẹ hẹ. Ọ tubẹ ta kẹe nọ: “Lele omẹ wezẹ.” Kọ ẹvẹ Josẹf o ti ru na? Ahwo uviuwou riẹ a jọ ugbothabọ. Ọrigbo gheghe ọ jọ. Yọ ahwo nọ ọ jọ uwou rai na a sai ru ei oghẹrẹ kpobi nọ u je rai. Aye nana o wo ogaga nọ ọ sai ro ru akpọ bẹ Josẹf. Kọ Josẹf o kie kẹe, manikọ ọ gudu siẹe thahe thahe?

Ebaibol ọ kuyo nọ: “Ọ se.” Josẹf ọ vuẹ aye na nọ ọ sai ru ọzae riẹ oware utioye vievie he keme ọzae na o fievahọ iẹe riẹriẹriẹ. Ẹme nọ ọ mai tube wuzou nọ Josẹf ọ ta họ: “Kọ ẹvẹ me re ro ru oware uyoma ulogbo nana re mẹ ginẹ raha uzi Ọghẹnẹ?” Fikinọ Josẹf o you Jihova Ọsẹ riẹ, ọ sae gbaudu se kẹ aye na ovavo. Rekọ aye Pọtifa ọ jọ etẹe serihọ họ. O je kpokpo iei “kẹdẹ kẹdẹ.” Kẹsena evaọ ẹdẹ jọ nọ idibo efa e jọ eva uwou na ha, ọ tẹ jobọ kru ewu Josẹf, ọ tẹ ta kẹe nọ: “Lele omẹ wezẹ!” Josẹf ọ tẹ dhẹ vabọ. Rekọ aye na o te gbe kru ewu Josẹf nọ ọ dhẹ se ba. Nọ Potifa o kpozi, aye riẹ o te dhesẹ ewu na kẹe inọ Josẹf ọ jẹ gwọlọ gbae du. Eva e tẹ dha Pọtifa gaga, ọ tẹ ta nọ a gbolo Josẹf fihọ uwou-odi.

Ere Josẹf ọ rọ jọ uwou-odi nọ o muebi. A fi egbregba họ iẹe awọ, a te je fi uriohọ riẹ họ eyọno evaọ etoke jọ. (Ol. 105:17, 18) O hae jọ lọlọhọ kẹ Josẹf re o bruenu ọvo inọ akpọ o ku rie no. Kọ Jihova ọ nyasiọ Josẹf ba no? Vievie! Yọ Josẹf omariẹ ọ siọ eva ba efihọ Jihova ha. O kru oma ga je ru iruo evaọ uwou-odi na, yọ Jihova ọ ghale riẹ. Nọ u te oke jọ, a tẹ kẹe ọkwa evaọ uwou-odi na. Ere Josẹf o je ro thihakọ ududu, no ukpe ruọ ukpe.

Fikinọ Josẹf o wo ẹrọwọ ọ tẹ jẹ gudu, Jihova ọ gbẹ jẹ rehọ iẹe ru iruo. Nọ u te oke jọ, Ọghẹnẹ o te ru Fẹro wezẹ ewezẹ ivẹ nọ e jọ eruẹaruẹ. Jihova o te fiobọhọ kẹ Josẹf fa otọ rai kẹe. Josẹf ọ vuẹ ovie na nọ otofa ewezẹ na họ, emu ọ te jọ buobu evaọ ikpe ihrẹ, ohọo u ve ti mu evaọ ikpe ihrẹ nọ i ti lele iei. Fikiere, Fẹro ọ tẹ rọ Josẹf mu re o ru epanọ emu ọ sae rọ jariẹ evaọ ikpe ihrẹ nọ ohọo u ti mu na. Ọ tẹ rọ Josẹf mu ọkwa ologbo evaọ Ijipti. U te no Fẹro no, u ve te ọyomariẹ. Josẹf o te ru nọ ohọo u gbe ro kpe ahwo Ijipti soso ho, te ahwo uviuwou riẹ re. Nọ inievo riẹ a nyaze Ijipti te dẹ emu, a te guzou kpotọ kẹ Josẹf nọ ọ rrọ oniọvo ọmaha rai, rekọ a riẹ nọ ọye he. Enẹ ewezẹ nọ Jihova o ru Josẹf wezẹ evaọ oke uzoge na i ro rugba. Inievo riẹ a te je dhesẹ nọ a nwene zihe ruọ emamọ ahwo no. Oniọvo rai nọ a mukpahe ẹdẹ na o siwi rai no. O te je siwi ọsẹ rai, gbe emọ nọ orẹwho Izrẹl soso u ti no omarai ze. Eware e via enẹ fikinọ Josẹf ọ gudu je kru ẹrọwọ nọ o fihọ Jihova te urere.

Se iku Ebaibol na:

• Emuhọ 37:1-36; 39:1-23; 41:1–45:28

Onọ nọ a rẹ ta ẹme kpahe:

Eme gbe eme Josẹf o ru ro dhesẹ nọ ọ gudu?

Gbẹ Kiẹ Kodo

1. 1. Eme o dhesẹ nọ iku uzuazọ Josẹf evaọ obọ Ijipti na uzẹme? (g 11/10 15 ¶2)

   Uyo ra

2. 2. Ẹvẹ Josẹf ọ rọ riẹ nọ re a bruẹnwae yọ “oware uyoma ulogbo” evaọ aro Jihova? (Emu. 39:9; w22.08 26 ¶2)

   Uyo ra

3. 3. Fikieme Jihova ọ rọ kuvẹ re Josẹf ọ jọ ethabọ osu evaọ Ijipti? (w96 5/1 18 ¶4) Uwoho 1

   Uyo ra

   

4. 4. Eme o dhesẹ nọ ẹrọwọ Josẹf o whrehe vievie he nọ ọ make kpako te ikpe udhusoi-gbikpe (110) no? (Emu. 50:25, 26; w07 6/1 28 ¶10-11) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Eme oghẹrẹ nọ Josẹf o ru inievo riẹ o wuhrẹ owhẹ otẹrọnọ ohwo nọ wha gbẹ be gọ Jihova o ru owhẹ yoyoma? (Emu. 45:4, 5; 50:19-21)

  Uyo ra

• Josẹf o yoẹme kẹ Jihova makọ evaọ okenọ ọ jọ kugbe ahwo riẹ hẹ. Ẹvẹ oriruo Josẹf ọ sai ro fiobọhọ kẹ omai . . .

  • nọ ma tẹ rrọ obọ isukulu? Uwoho avọ 3

    Uyo ra

    

  • nọ ma te kpohọ erẹ? Uwoho avọ 4

    Uyo ra

    

  • nọ ma te bi rri ifonu nọ a re ro kpohọ itanẹte hayo oware utioye ofa? Uwoho avọ 5

    Uyo ra

    

• Ẹvẹ whọ sae rọ rehọ aro kele Josẹf gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Josẹf nọ a tẹ kpare iẹe ze no?

  Uyo ra

Gbe Wuhrẹ Eware Efa

O make rọnọ Jihova ọ kuvẹ re edawọ i te Josẹf na, Jihova o fiobọhọ kẹe re o thihakọ rai. Wuhrẹ epanọ Jihova ọ sai ro fiobọhọ kẹ owhẹ re.

“Jihova O bi Ru nọ Eware E be rọ Riẹ Nya kẹ Owhẹ” (w23.01 14-19)

Ẹvẹ emaha na a sae rọ rehọ aro kele Josẹf nọ amọfa a te bi ru ai oware uyoma?

Thihakọ nọ A tẹ Maki Ru Owhẹ Oware Odada (1:31)