Ọ Rọwo Obọdẹ Iruo Jọ Fikinọ Ọ Gudu

U WO ẹdẹ jọ nọ ọrara jọ ọ rọ nyabru ọmọtẹ Ju jọ nọ a re se Meri. Meri ọ jẹ rria Nazarẹt nọ ọ rrọ Galili. Ọrara na yọ ọrara gheghe he, rekọ ukọ-odhiwu. Odẹ ukọ-odhiwu na Gebriẹl. Fikieme ọ rọ nyabru ei? Ọ nya re ọ vuẹe nọ Jihova ọ te kẹe obọdẹ iruo jọ nọ ohwo-akpọ ọvuọvo o ri ru hu.

Ukọ-odhiwu na ọ ta kẹe nọ: “Do, ọnọ a rri aro gaga na, Jihova ọ rrọ kugbe owhẹ.” Eme nọ ọ ta kẹe na e lẹliẹ udu bru ei gaga. O rri oma riẹ nọ o te kẹ ujiro na ha. Rekọ Gebriẹl ọ tẹ ta eme nọ i re kru rie udu ga. Ọ ta kẹe nọ: “Who wo aruoriwo evaọ aro Ọghẹnẹ.” Kẹsena ọ tẹ vuẹe obọdẹ iruo nọ Jihova ọ gwọlọ kẹe na. Ọ vuẹ riẹ nọ: “Who ti dihọ who ve ti yẹ ọmọzae.” Rekọ etẹe o jo kuhọ họ. O fibae nọ: “Ọ te jọ ruaro, yọ a ti sei Ọmọ Ọnọ Ọ Mai Kpehru na.” Ọmọzae nọ o ti yẹ na ọ te jọ ovie nọ ọ mae rro evaọ usu ahwo nọ a reuku agbara-uvie Devidi.

Whaọ oke yena yọ a sa Meri hotọ, rekọ a re ruọ orọo no ho. Fikiere ọ re riẹ ọzae he. O tẹ whae ze nọ ọ rọ nọ ukọ-odhiwu na ududu nọ: “Ẹvẹ onana o te rọ via?” Gebriẹl ọ tẹ vuẹe vevẹ nọ ogaga Jihova, kọyehọ ẹzi ọfuafo na, “ọ te ruọ owhẹ oma.” Who ve ti dihọ. Ere who ti ro yẹ ọmọ ọgbagba. Yọ “a ti se ọmọ nọ who bi ti yẹ na ọrẹri, Ọmọ Ọghẹnẹ.” Ọ tẹ jẹ vuẹe kpahe oware nọ Jihova o ru kẹ Ẹlizabẹt omoni riẹ no. Meri ọ gbẹ nọ onọ ọfa vrẹ ere he. Ọ tẹ ta kẹ ukọ-odhiwu na nọ: “Rri! Mẹ yọ ọrigbo ọmọtẹ Jihova! Jọ o via kẹ omẹ wọhọ epanọ whọ ta na.” Meri o rri Jihova nọ yọ Olori nọ ọ rrọ yoyou. Ọyomariẹ kọ odibo ọmọtẹ nọ o re yoẹme. U mu rie ẹro nọ o te ru oreva Jihova, Jihova o ti fiobọhọ kẹe jẹ thọe. Ere nọ ọ riẹ na o kẹ riẹ udu nọ ọ rọ rọwo obọdẹ iruo nana.

Nọ ukọ-odhiwu na ọ nyase Meri ba no, Meri ọ tẹ nyabru Ẹlizabẹt. Eyae ivẹ na e tẹ tuduhọ ohwohwo awọ fiki iruo nọ a kẹ rai na. Meri ọ vuẹ Ẹlizabẹt epanọ o rri Jihova fihọ. Eme nọ ọ ta i dhesẹ oware nọ o lẹliẹ riẹ gudu tere. Evaọ ẹme ọvo jọ nọ ọ ta, ọ wariẹ eme no Ikereakere Hibru na ze vrẹ isia udhe (20). Ẹvẹ o sae rọ jọ ere? Ọ jọ ohwo nọ ọ jẹ hai roro kpahe Ẹme Ọghẹnẹ gaga. Fikiere ọ riẹ Jihova ziezi. Ọ tẹ jẹ riẹ nọ ọ sai fievahọ eyaa riẹ. Meri ọ rria kugbe Ẹlizabẹt te oware wọhọ emerae esa taure o te ti zihe kpo. Nọ o zihe kpo no, o gwọlọ nọ ọ rẹ gudu re ọ sae vuẹ Josẹf nọ o dihọ, gbe oghẹrẹ nọ o ro dihọ. Josẹf ọ jẹ kake rọwo iku Meri na ha. Rekọ ukọ-odhiwu Jihova ọ tẹ vuẹe nọ ẹme nọ Meri ọ be ta kẹe na uzẹme.

Josẹf avọ Meri a tẹ ruọ orọo. A tẹ jẹ hẹrẹ okenọ o ti ro yẹ. Nọ okenọ o re ro yẹ o bi te no, Siza o te jie uzi nọ ohwo kpobi o kpobọ okpẹwho nọ a jọ yẹi re o kere odẹ fihotọ. Fikiere Josẹf avọ Meri a te kpobọ Bẹtlẹhẹm nọ ọ rrọ okpẹwho nọ a jo yẹ Josẹf. Ere Meri ọ rọ ruọ eketekete nya ugbo nọ u te emaele udhone gbe ikpegbesa (93) (koyehọ oware wọhọ ikilomita 150) dede nọ o te eyẹ no na. Kẹsena o te yẹ evaọ uwou erao. Ọ tẹ wọ ọmọ na fihọ oria nọ a re fi emu họ kẹ erao. Meri ọ ginẹ gudu, o fievahọ Jihova. Ọ gba riẹ mu nọ ọ rẹ dawo ẹgba riẹ kpobi re ọ rẹrote ọmọ ọghaghae riẹ nana.

O gwọlọ mi Meri nọ ọ rẹ gudu evaọ ikpe buobu. Yọ ere o gine ru evaọ eware buobu nọ e via kẹe. Ọ gudu evaọ okenọ tei te Josẹf a rọ wọ Jesu nọ ọ jọ ọmọboba dhẹ kpobọ Ijipti fikinọ Herọd nọ ọ jọ ovie ọ gwọlọ kpe Jesu no. Ọ gudu evaọ okenọ a jẹ rọ yọrọ emọ ezeza hayo bu vrẹ ere dede nọ a jọ iyogbe. Ọ gudu evaọ okenọ Josẹf ọzae oyoyou riẹ na o ro whu se iẹe ba. Yọ o sae jọ nọ o whu no taure Jesu o te ti zihe ruọ Mesaya na. Ọ gudu evaọ okenọ Jesu o ro no uwou re o mu iruo usi uwoma ota riẹ họ. Okenọ o mae rọ gwọlọ nọ ọ rẹ gudu họ okenọ a ro mu Jesu jẹ rehọ iẹe guẹdhọ ekueku, a te kpei no. Orọ urere, ọ gudu evaọ okenọ o zihe ruọ olele Jesu yọ ahwo Ju a mukpahe ilele na.

Okpiruo dẹẹ Meri o gine wo na! Kọ eme ọ kẹ riẹ udu sai ru iruo na? Ebaibol na o dhesẹ nọ, nọ Meri o te wuhrẹ oware jọ nọ o ru ẹrọwọ riẹ ga, o re fi ei họ udu. Ere o ro wo emamọ eme eghaghae buobu nọ ọ jẹ hai roro kpahe. O wuhrẹ eware nana jọ evaọ Ẹme Ọghẹnẹ. O yo ejọ mi ikọ-odhiwu. O yo mi idibo Ọghẹnẹ nọ e jọ ahwo-akpọ. O te je yo mi ọmọ riẹ. Eware nana kpobi nọ Meri ọ jẹ hai roro kpahe didi e kẹ riẹ udu nọ ọ sai ro thihakọ ebẹbẹ kpobi nọ i te rie.

Se iku Ebaibol na:

• Luk 1:26-56; 2:1-7, 19, 48-51

Onọ nọ a rẹ ta ẹme kpahe:

Eme gbe eme Meri o ru ro dhesẹ nọ ọ gudu?

Gbẹ Kiẹ Kodo

1. 1. Eware jọ vẹ e kẹ imuẹro nọ ahwo nọ a fodẹ evaọ Luk 2:1-3 a ginẹ jọ uzuazọ? (g 4/11 11 ¶4-5) Uwoho 1

   Uyo ra

   

   British Library, London, UK, from the British Library archive/Bridgeman Images

2. 2. Meri ọ nya kpobọ Bẹtlẹhẹm. Kọ eme o sae jọ nọ u ru erẹ na jọ bẹbẹ kẹe? (ia 153-155 ¶4-7)

   Uyo ra

3. 3. Okenọ Jesu ọ gbẹ jọ ọmọboba, a vuẹ Meri nọ: “A ti duwu ọgbọdọ othethei họ owhẹ lafi.” Oghẹrẹ vẹ ẹme yena o ro rugba? (Luk 2:35; w08 3/15 30 ¶8)

   Uyo ra

4. 4. Fikieme ma sae rọ ta nọ Meri ọ rrọ obọ odhiwu enẹna? (w18.07 10 ¶14) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Okenọ Meri ọ gwọlọ nọ ohwo jọ ọ rẹ tuduhọ iẹe awọ re o wo ẹgba nọ o re ro ru iruo nọ a kẹ riẹ, ọ nyabru Ẹlizabẹt. (Luk 1:39, 40) Fikieme u ro fo re ma nyabru oniọvo nọ ọ sai fiobọhọ kẹ omai nọ odawọ jọ o te te omai hayo nọ iruo jọ nọ a kẹ omai e tẹ be bẹ omai? Uwoho avọ 3

  Uyo ra

  

• Dede nọ Josẹf họ ọzae nọ ọ sa Meri hotọ, Meri Jihova ọ kaki vi ukọ-odhiwu riẹ bru. Eme onana u wuhrẹ omai kpahe epanọ Jihova o bi rri eyae nọ e be gọe?

  Uyo ra

• Ẹvẹ whọ sae rọ rehọ aro kele Meri gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• O sae jọ nọ a salọ Meri re o lele Kristi su evaọ obọ odhiwu. Kọ emamọ iruemu vẹ o wo nọ o sai ru owhẹ ta nọ u woma nọ a salọ e riẹ?

  Uyo ra

Gbe Wuhrẹ Eware Efa

Roro kpahe epanọ Meri ọ daoma te re ọ yọrọ emọ riẹ.

“Oware nọ Ma rẹ Sai Wuhrẹ no Oriruo Meri Ze” (w09 1/1 4-5 ¶4)

Ẹvẹ who roro nọ o jọ kẹ Meri okenọ Gebriẹl ọ ta kẹe nọ Jihova ọ be te kẹe obọdẹ iruo jọ?

“Rri! Mẹ Yọ Ọrigbo Ọmọtẹ Jihova!” (3:40)