42 MERI
Ọle Da Ha Mhọn Ọne Izebhudu Rẹ Lu Iwẹnna Nan Mun Nanlẹn
ẸDỌKPA, ọriọbhe da rẹnẹ ji obhokhan Ju ọkpa natiọle Meri. Otọ Nazarẹt bhi Galili Meri da nyẹnlẹn. Elin ọsi ọne ọriọbhe hi Gebriẹl. Ẹhi ọle khin. Emhin kpataki zẹle nin ọle da rẹnẹ ji Meri. Jehova hi ọnọn je ọle nin ọle dọ taman Meri ẹsọn kpataki nin ọle ha miẹn, nin ọria soso bha sẹ ka miẹn khẹ!
Ẹghe nin ọne ẹhi rẹ sẹbhi eji Meri ye, ọle da yọle: “Doo, uwẹ nin ẹmhọn ọlẹn manman ti Osẹnobulua bhọ.” Bhi ọsi ọhẹnhẹn, ọne ọta nin ọne ẹhi taman Meri “da wo han ọle ilo.” Ọle da ha riale ghe, ọle bha sẹ ọria nan ha ri iriọ gẹn. Ọkpakinọn, ọne ẹhi da ko ọle udu re, yẹ taman ọlẹn yọle, “ẹmhọn ẹn ti Osẹnobulua bhọ.” Ọle da taman Meri iwẹnna kpataki nin Jehova guanọ nin ọle lu. Ọle da yọle: “Uwẹ dẹ ha hanmhan. Uwẹ ki biẹ ọmokpea.” Ọne ẹhi da yẹ yọle: “Ọle dẹ ha yi okpọria, sẹyẹ, a ki ha tiọle Ọmọn ọsi Ọnọn Ke Okhun Nẹ. Osẹnobulua nin Jehova ki mun ojukhuo ọsi Devid nin aba ọle nanlẹn, Ọle ki gbẹloghe uwa ọsi Jekọp rẹ sẹbhi ighegheghe.”
Arẹmiẹn Meri mhọn ọria nin ọle zẹ bhi ọshọ, ọle bha sẹ bọ ọle, sẹyẹ, ọle bha sẹ ne ọkpia nowẹ. Bhiriọ, ọle da re izebhudu nọọn ọne ẹhi yọle: “Be ọnan ha rẹ sabọ sunu yẹ?” Gebriẹl da ji ọle lẹn ghe, ahu ẹlinmhin nọnsi Jehova dẹ “degue” ọle, yẹ re ọle ha hanmhan, bhiriọ, ọle ki biẹ ọmokpia nin olukhọ i ri ọle bhi egbe. Sẹyẹ, a dẹ ha tie ọmọn nin ọle ha biẹ “ọnọn khiale, Ọmọn nọnsi Osẹnobulua.” Ọle da yẹ taman Meri ebi Jehova lu nin obhio ọle nin Ẹlizabẹt. Ọnan da wo manman ziẹn urẹọbhọ ọsi Meri. Meri da ki yọle: “Ghe imẹn! Igbọn nọnsi Jehova imẹn khin! Ji ọ sunu ji imẹn beji uwẹ rẹ tale.” Ọne ọta nan nin Meri ta wo rẹman ghe, Meri wo ha ghe Jehova bii ebeanlẹn nọn hoẹmhọn ọlẹn, yẹ ha ghe egbọle bii ọguọmhandia nọnsọle. Meri wo rẹọbhọ ghe ọle ha lu ebi Jehova guanọ, Jehova dẹ wo ha gbega ọle. Ọnan hi ebe re izebhudu nanlẹn rẹ miẹn ọne ẹsọn nọn kaka nan mun nanlẹn.
Ẹghe nin ọne ẹhi ki rẹ kpanọ fo, Meri da rẹnẹ ji obhio ọle nin Ẹlizabẹt. Ene ikhuo veva da wo ha re izebhudu nin egbe, beji ele ha da sabọ miẹnsọn nan mun nin ele. Meri da taman Ẹlizabẹt ebi ẹmhọn Jehova dia ọle yẹ bhi egbe. Ọta nin Meri tale wo rẹman ebe ri izebhudu nanlẹn. Ẹghe nin ọle rẹ ha ne Ẹlizabẹt talọ, ọle da noo ọta kẹkẹ bhi obọ Baibo nan re urolo Hibru gbẹn. Ọ gbera igba 20 nin ọle noo ene ọta. Ranmhude Meri manman wo ria eria nyan Ọta nọnsi Osẹnobulua dinmhin, ọle zẹle nin ọle da sabọ lu iriọ. Ọle lẹn Jehova nọnsẹn, ọle yẹ rẹọbhọ ghe ọle dẹ sabọ mun udu nyan ive rebhe nesi Osẹnobulua. Ebe sẹbhi uki ea Meri gbe bhi isi Ẹlizabẹt ọkuẹsẹ ọle fikie ha khian uwa. Ọ da khẹke nin Meri re izebhudu man beji ọle ha da sabọ taman Josẹf ghe ọle hanmhan, yẹ ji ọle lẹn ghe ahu ẹlinmhin nọn khiale rẹkpa ọle rẹ ha hanmhan. Bhi ọsi ọhẹnhẹn, ọ da wo ha nọghọ Josẹf rẹ rẹọbhi ebi Meri tale. Ọkpakinọn, ẹhi nọnsi Jehova da gbotọle fanọn an man ọlẹn.
Beji Meri bi Josẹf bọ egbe fo, ele da fẹkẹ ha muegbe ọbhi otọ khẹ ẹghe nin Meri ha rẹ biẹ. Bhi ọne ẹghe nan, Siza da yọle nin ọrebhe ha khian agbaẹbho nọnsele dọ gbẹn elin ọbhi otọ. Ranmhude ọnan, Josẹf bi Meri da re kẹtẹkẹtẹ ha khian Bẹtlẹhẹm. Rẹ na bhi eji ele ye rẹ sẹbhi Bẹtlẹhẹm dẹ ree sẹbhi imaili 93. Beji a miẹn Meri hanmhan bhi ọne ẹghe nan, ọne okhian nan i da zẹwẹ lẹkhẹ nanlẹn. Ele ki sẹbhi enin, Meri da biẹ. Eji a muno elanmhẹn ọ i ọle da biẹ ọne ọmọn. Ọle da mun ọne ọmọn ọbhi uke emhin nin elanmhẹn da le ebale. Meri wo ha mhọn izebhudu yẹ mun udu nyan Jehova. Ọle da wo muegbe nin ọle rẹ lu eka nin ọle ha sabọ lu rẹ gbẹloghe ọne ọmọn.
Ẹhi ọkpa da dọ taman Meri ẹsọn kpataki nin ọle ha miẹn. Ọria soso bha sẹ ka miẹn ọne ẹsọn nan khẹ
Meri wo re izebhudu man bhi ẹghe kẹkẹ. Bhi ọsi ijiẹmhin, ọle re izebhudu man bhi ẹghe nin ọle bi Josẹf rẹ re Jesu nin ọmobọ nẹgbe ha khian otọ Ijipt, ranmhude, Hẹrọd nin Ojie guanọ nin ọle gbe ọle a. Arẹmiẹn ibhioguele ele ha khin, Izebhudu nin ọle ha mhọnlẹn rẹkpa ele rẹ sabọ gbẹloghe imọn nesele ne gbera ihinlọn. Izebhudu hi ebe yẹ rẹkpa ọle bhi ẹghe nin ọdọ ọle rẹ yu. Asabọmiẹn ọdọ ọle yu fo ọkuẹsẹ Jesu kiẹn ọne Mezaya. Ọle yẹ re izebhudu man ẹghe nin Jesu rẹ zẹ ọle obọ dọ ha lu iwẹnna itẹmhọn Osẹnobulua nọnsọle. Ẹghe nin ọle rẹ re izebhudu man nẹ hi, ẹghe nin ẹbho rẹ bha Jesu ohoghe, bhuohiẹn gbe ọle, yẹ gbe ọle a. Bhi ọkike ọle, izebhudu nin ọle ha mhọnlẹn hi ebe rẹkpa ọle rẹ sabọ kiẹn ọkpa bhi edibo nesi Jesu, arẹmiẹn ibhokhan Ju wo manman he ene rẹkhan Jesu.
Ọ i yi obhi ẹsọn khere Meri gene miẹn! Be re izebhudu nanlẹn rẹ sabọ miẹn ene ẹsọn nan? Baibo ji mhan lẹn ghe, ẹghe nọn hi ki rẹ khin nin Meri rẹ luẹ emhin nọn ziẹn ọlẹn urẹọbhọ, ọle ki ne ele ọbhi ọkhọle. Ọnan zẹle nin ọle da ha mhọn emhin ne ghanlẹn nin ọle ria eria nyan ẹghe-ẹghe. Ebenọnkhiale ọle da luẹ eso bhi ene emhin nin ọle ha ria eria nyan. Ọle luẹ eso bhi obọ ene ẹhi bi eguọmhandia nesi Jehova. Ọle yẹ luẹ eso bhi obọ Jesu. Ene emhin nan nin Meri ha ria eria nyan, ele rẹkpa ọle rẹ sabọ ziẹngbe ọkakale rebhe nin ọle miẹn bhi iẹnlẹn.
Tie ọne okha bhi Baibo
Inọnta:
Uwedẹ nela Meri rẹ re izebhudu man?
Manman Guanọ Otọle
1. Emhin nela rẹman ghe ebi a gbẹn ọbhi Luk 2:1-3 gene sunu? (g 4/11 11 ¶4-5) 1
British Library, London, UK, from the British Library archive/Bridgeman Images
Ifoto1: Ebe nin gọvanọ ọsi Rom nọn ha gbẹloghe Ijipt rẹ gbuhi ghe, nin ẹbho dọ gbẹn elin ọbhi otọ, bhi ukpe 104 C.E.
2. Josẹf da re Meri ha khian Bẹtlẹhẹm. Bezẹle nin ọne okhian bha da lẹkhẹ nin Meri? (ia 153-155 ¶4-7)
3. Ẹghe nin Jesu rẹ ha yi ọmobọ, a da taman Meri ghe, “A dẹ ji agbada nọn tantan [ọle] bhi egbe.” Be ene ọta nin rẹ munsẹ yẹ? (Luk 2:35; w08 3/15 30 ¶8)
4. Bezẹle nin mhan ha da sabọ yọle ghe ẹgua-okhun Meri diọ i? (w18.07 10 ¶14) 2
Ifoto 2: Meri bi imikpia nesọle ribhi Jerusalẹm ọkuẹsẹ ẹghe Iluemhin Ọsi Pẹntikọst 33 C.E.
Ria Eria Nyan Emhin Nin Uwẹ Luẹle
Ẹghe nin Meri rẹ ha guanọ ikoudure bi izebhudu, ọle da rẹnẹ ji Ẹlizabẹt. (Luk 1:39, 40) Bezẹle nọn da khẹke nin mhan guanọ urẹkpa bhi obọ ibhio mhan ahamiẹn mhan kuẹlo da ọkakale bhi iẹnlẹn, la ẹsọn ribhọ nọn nọghọ mhan rẹ miẹn bhi ẹkẹ agbotu? 3
Ifoto 3
Beji a miẹn Josẹf bi Meri dẹ kẹ bọ egbe, ẹbho da ha ghe Josẹf bii ọdafẹn-uwa. Ọrẹyiriọ, Meri Jehova ka je ẹhi nọnsọle bu. Be ọnan man mhan le rẹji ẹlo nin Jehova rẹ ghe ikhuo ne sun rẹkhan ọlẹn?
Be uwẹ ha rẹ sabọ re egbe khọkhọ Meri yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Asabọmiẹn a zẹ Meri nin ọle deba Jesu gbẹloghe bhi okhun. Bezẹle nin ọnan da ti uwẹ bhọ?
Sẹyẹ Fẹ Ene Emhin Nan Ghe
Ria eria nyan uwedẹ kẹkẹ nin Meri rẹ wẹnna kaka beji ọle ha da sabọ gbẹloghe imọn nesọle.
“Be Mhan Ha Sabọ Miẹn Luẹ Bhi Obọ Meri?” (w09 1/1 5 ¶5–6 ¶2)
Be ọ dia Meri bhi egbe yẹ bhi ẹghe nin ẹhi nọnsi Jehova rẹ taman ọlẹn ghe Jehova zẹ ọle nin ọle lu iwẹnna kpataki?