Gebriẹl Da Rẹnẹ Ji Meri

Ẹlizabẹt mhọn obhio natiọle Meri. Eji a tiọle Nazarẹt bhi otọ Galili Meri da nyẹnlẹn. Josẹf nin kapẹnta ọle Meri muegbe nin ọle rẹ bọ. Ọ ki ribhi uki ehan nin Ẹlizabẹt rẹ ha hanmhan, Gebriẹl da rẹnẹ ji Meri. Ọle da taman Meri yọle: ‘Doo Meri. Ẹmhọn uwẹ manman wo ti Jehova bhọ.’ Ọkpakinọn, Meri bha lẹn ebi ọne ẹhi re ọnan ta. Bhiriọ, ọne ẹhi ki da taman ọlẹn yọle: ‘Uwẹ dẹ ha hanmhan yẹ biẹ ọmokpea. Jesu uwẹ ha hẹ ọle le. Ọle dẹ ha yi Ojie, sẹyẹ, Ejele nọnsọle dẹ ha ribhọ rẹ sẹbhi ighegheghe.’

Meri ki da yọle: ‘Imẹn bha sẹ ne okpea nowẹ khẹ. Bhiriọ, be mẹn ha ki rẹ sabọ biẹ yẹ?’ Gebriẹl da taman ọlẹn yọle: ‘Emhin soso i ribhọ nin Jehova i sabọ lu. Ọle dẹ re ẹlinmhin nọn khiale nọnsọle nin uwẹ, bhiriọ, uwẹ ki biẹ ọmokpea. Obhio ẹ nin Ẹlizabẹt bhọ yẹ hanmhan.’ Meri ki da yọle: ‘Igbọn nọnsi Jehova mẹn khin. Ji ọ sunu ji mẹn beji uwẹ rẹ tale.’

Meri ki da rẹnẹ ji obhio ọle nin Ẹlizabẹt, nọn nyẹnlẹn bhi agbaẹbho ọkpa bhi uke oke. Ẹghe nin Meri rẹ tuẹ Ẹlizabẹt, ọmọn nọn ri Ẹlizabẹt bhi ẹkẹ da wo san okhun. Ẹlinmhin nọn khiale da vuọn Elizabẹt bhi egbe. Ọle da yọle: ‘Meri, Jehova wo nan erọnmhọn nin uwẹ. Ekpẹn nọn khua nọn rẹji mẹn, nin inẹn Ebeanlẹn mẹn rẹ dọ fẹ mẹn ghe.’ Meri ki da yọle: ‘Imẹn re ọkhọle rebhe rẹ gẹn Jehova.’ Meri da gbe uki ea bhi isi Ẹlizabẹt ọkuẹsẹ ọle fikie ha khian Nazarẹt.

Ẹghe nin Josẹf ki rẹ lẹn ghe Meri hanmhan, ọle bha yẹ rẹ guanọ nin ọle re Meri bhi amhẹn. Ọkpakinọn, ẹhi ọkpa da dọ nanlẹn talọ bhi ebhohiẹ. Ọne ẹhi da yọle: ‘Hẹi ji ofẹn mun uwẹ rẹ re Meri bhi amhẹn. Ọle bha lu emhin ebe soso.’ Bhiriọ, Josẹf ki da re Meri bhi amhẹn, yẹ re ọle ha khian uwa.