43 JOSẸF
Ọle Wo Gbẹloghe Azagba-uwa Nọnsọle Nọnsẹn
ỌKHẸKE nin aba ha wẹnna kaka nin ọle da sabọ ha gbẹloghe azagba-uwa nọnsọle. Ọ yẹ khẹke nin ọle ha mhọn izebhudu beji ọle ha da sabọ gbega ele. Josẹf da ha guanọ nin ọle ha yi aba nọn sẹnian. Iwẹnna kabita Josẹf lu. Agbaẹbho ọsi Nazarẹt ọle da nyẹnlẹn. Ọkuẹsẹ ọle re Meri bhi amhẹn, ọle da ke egbọle re bhi idia nọn da khẹke nin ọle re izebhudu man. Ọle da kere ghe Meri nin ọle ho nin ọle re bhi amhẹn hanmhan. Ọkpakinọn, ọne ọmọn i yi ọsọle. Meri da taman ọlẹn ebi ọle rẹ ha hanmhan yẹ. Ọrẹyiriọ, ọ da ha nọghọ Josẹf rẹ rẹọbhi ebi Meri tale. Be Josẹf ki lu yẹ?
Baibo da yọle ghe ọria nọn khiale, nọn yẹ re obọ rẹkhan uhi nesi Jehova Josẹf khin. Ọle yẹ wo ha mhọn ifuẹkẹ bi itohan. Ẹghe nin Josẹf rẹ lẹn ghe Meri hanmhan, ọle da ria eria nyan emhin nọn gbale nọn khẹke nin ọle lu. Bhiriọ, ọle da mhanmhanlẹn nin ọle rẹ sọebe a bhi ẹkhokho, ranmhude, ọle bha ho nin ọle re Meri bhi unun bhi ughe. (Bhi ẹghe ẹdẹlẹ, a ghe okpia bi okhuo ne zẹ egbe ọshọ bii eria ne bọ egbe.) Sokpan, Jehova bha ji ọle da lu iriọ. Ọle da je ẹhi ọkpa nin ọle dọ ne Josẹf talọ bhi ebhohiẹ. Ọne ẹhi da taman Josẹf yọle: “Hẹi ji ofẹn mun uwẹ rẹ re Meri nin okhuo ẹ nabhi uwa.” Ọne ẹhi da ji Josẹf lẹn ghe ẹmhọanta Meri tale. Ọmọn nọnsi Osẹnobulua ọne ọmọn gene khin. Ọle dẹ ha yi ọne Mezaya!
Ọ da khẹke nin Josẹf wẹnna kaka beji ọle ha da sabọ gbẹloghe Ọmọn nọnsi Osẹnobulua
Josẹf da “lu beji ẹhi nọnsi Jehova taman ọlẹn.” Ọ da khẹke nin Josẹf ha mhọn izebhudu beji ọle ha da sabọ miẹnsọn nin Jehova mun nanlẹn. Ọne ẹsọn hi, nin ọle rẹ gbẹloghe okhuo ọle nọn ha biẹ ọmọn nọnsi Osẹnobulua. Ọ wo gene khẹke nin Josẹf ha mhọn izebhudu beji ọle ha da sabọ miẹn ọne ẹsọn nan.
Ọ bha bue gbe, Ọgọstọs nin Siza da yọle nin ọrebhe ha khian agbaẹbho nọnsele dọ gbẹn elin ọbhi otọ. Ọnan da re Josẹf ha khian Bẹtlẹhẹm dọ gbẹn elin ọbhi otọ. Mhan bha lẹn si ọne uhi yẹ yọle nin Meri dọ gbẹn elin ọbhi otọ. Ọkpakinọn, Josẹf lẹnmhin ghe, ọle ha re okhuo ọle rẹkhan egbe ọle ha da sabọ gbega ọle. Bhiriọ, ele veva da ha khian Bẹtlẹhẹm arẹmiẹn ghe Meri dẹ kẹ biẹ. Ọne okhian nan manman ree. Ele ki sẹbhi Bẹtlẹhẹm, eji a da bẹẹ elanmhẹn ọkpa ele miẹn dia. Enin Meri ki da biẹ ọmọn nọnsọle natiọle Jesu.
Beji a miẹn obhioguele Josẹf khin, ọle wo ha wẹnna kaka nin ọle da sabọ gbẹloghe azagba-uwa nọnsọle. Josẹf bi Meri da mun Jesu ha khian uwa oga bhi Jerusalẹm, beji uhi nọnsi Jehova tale. Ele ki sẹbhi enin, ele da re afianmhẹn eva rẹ zọese, ranmhude, ele i manman mhọn igho. Akizẹbue, beji ele ha ribhi uwa nọnsele bhi Bẹtlẹhẹm, ene tie ahiẹnhẹn da rẹnẹ ji ele. Asabọmiẹn Babilọn ele na vae. Ahiẹnhiẹn nin ele daghe bhi okhun ele rẹkhan vae bhi Bẹtlẹhẹm. Ele ki sẹbhi enin, ele da ne emhin ne ghanlẹn rẹ lu ẹsele nin ọne ọmọn. Ọnan ki sunu fo, ẹhi nọnsi Jehova da taman Josẹf ghe, Hẹrọd nin Ojie nọn yi ọria ebe, guanọ nin ọle gbe Jesu nin ọmobọ a! Ọne ẹhi da yẹ taman Josẹf ghe, nin ọle re azagba-uwa nọnsọle nẹgbe ha khian otọ Ijipt.
Bhi ọne asọn nin, Josẹf da re okhuo ọle bi Jesu nin ọmobọ nẹgbe sibhi Bẹtlẹhẹm re ha khian agbaẹbho nọn i yi ọsọle. Be ọle ha rẹ gbẹloghe ele yẹ bhi enin? Ene emhin nin ene tie ahiẹnhiẹn rẹ lu ẹsele nin ele, ọle Josẹf noo rẹ gbẹloghe azagba-uwa nọnsọle bhi otọ Ijipt. Akizẹbue, Jehova da taman Josẹf nin ọle ne azagba-uwa nọnsọle fikie ha khian agbaẹbho nọnsọle. Bhi ọne ẹghe nan, ọria ọbhebhe ki ha gbẹloghe Bẹtlẹhẹm. Sokpan, ọria ebe ọne ọria khin. Ranmhude ọnan, Jehova da taman Josẹf bhi ebhohiẹ nin ọle hẹi diọbhi Bẹtlẹhẹm, nin ọle ha khian Nazarẹt. Ọle da wo gene lu ebi Jehova taman ọlẹn!
Ẹghe nin Josẹf bi Meri rẹ ha ribhi Nazarẹt, ele da biẹ imọn ebhebhe ba Jesu. Ene imọn rebhe dẹ bun gbera itue ihinlọn. Josẹf da wo situa bhi iwẹnna kabita nin ọle ha lu, beji ọle ha da sabọ gbẹloghe azagba-uwa nọnsọle. Ọnọn ke okhun nẹ bhi emhin nin ọle lu hi, ọle da wo dọnmhegbe rẹ ha rẹkpa azagba-uwa nọnsọle bhi uwedẹ oriọn. Bhi ọsi ijiẹmhin, ẹghe-ẹghe ọle rẹ ha ne azagba-uwa nọnsọle diọbhi sinagọg dọ ha luẹ ẹmhọn Jehova. Ọle yẹ ha ne ele yo Jerusalẹm bhi ẹghe iluemhin dọ ha ga Jehova. Ẹghe nọn kike nan rẹ sounun Josẹf bhi Baibo, ọle hi ẹghe nin ele rẹ yo iluemhin ọkpa bhi Jerusalẹm, nin Josẹf da ha riale ghe Jesu nọn ha ribhi ikpe 12 yulua. Edandan i ribhọ ghe Josẹf wo ha kpokpo egbe bhi ọne ẹghe nan! Ọkpakinọn, udu nọnsọle da wo lọre bhi ẹghe nin ele rẹ miẹn Jesu. Ọnan ki sunu fo, ele da fikie ha khian uwa. Baibo da ji mhan lẹn ghe, Jesu “da yẹ wo ha degbere” nin ene biẹ ọle.
Baibo bha taman mhan eka ikpe nin Jesu ha ye bhi ẹghe nin Josẹf rẹ yu. Ọkpakinọn, ọkuẹsẹ ọle yu, ọle wo man Jesu iwẹnna kabita nin ọle ha lu. Ọnan zẹle nin ẹbho da ha tie Jesu “kabita.” Ele bha ha tie ọle ọmọn nọnsi kabita ọkpa. Ijiẹmhin nọn gbale Josẹf wo re ọbhi otọ nin ene aba. Jehova guanọ nin ene aba re egbe khọkhọ Josẹf. Ọle wo ha mhọn izebhudu, asun-rẹkhan, bi ifuẹkẹ. Ọle wo gbẹloghe azagba-uwa nọnsọle, yẹ gbega ele. Rẹ deba ọnin, ọle man azagba-uwa nọnsọle ẹmhọn Jehova.
Tie ọne okha bhi Baibo:
Inọnta:
Uwedẹ nela Josẹf rẹ re izebhudu man?
Manman Guanọ Otọle
1. Beji a miẹn ghe ọmọn nọnsi Hilai Meri khin, bezẹle nin Luk 3:23 da yẹ tie Josẹf “ọmọn nọnsi Hilai”? (w17.08 32 ¶4)
2. Be ha sabọ zẹ nin Josẹf bha da ne Meri nowẹ ọkuẹsẹ ọle biẹ Jesu? (w03 12/15 5 ¶5)
3. Be rẹman ghe ọria nọn wẹnna kaka Josẹf khin? (ia 166-167 ¶15-18) 1
Ifoto 1
4. Bezẹle nin mhan ha da sabọ yọle ghe Jesu bha sẹ manman wanre bhi ẹghe nin Josẹf rẹ yu? (w17.07 13 ¶8, ftn.)
Ria Eria Nyan Emhin Nin Uwẹ Luẹle
Josẹf wo re obọ rẹkhan adia rebhe nin Jehova re nanlẹn arẹmiẹn ọ bha lẹkhẹ. Be ene ọdafẹn-uwa ha sabọ miẹn luẹ bhi obọ ọle? (Mat. 1:20, 24; 2:13-15, 19-21)
Be okha ọsi Josẹf man mhan le rẹji nan rẹ ha mun ẹmhọn Jehova kalo bhi azagba-uwa nọnsẹmhan? (Luk 2:41) 2
Ifoto 2
Uwedẹ ebhebhe nela uwẹ ha rẹ sabọ re egbe khọkhọ Josẹf bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Josẹf le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Bhi ọne ividio nan, fẹ ebi Josẹf rẹ re obọ rẹkhan ebi Jehova taman ọlẹn yẹ.
Be mhan ha rẹ sabọ re egbe khọkhọ Josẹf bi Meri yẹ sade ekhẹn gọvamẹt mun uhi gbọ nọn bha lẹkhẹ nan rẹ re obọ rẹkhan?