“Eria Ne Khiale Ele Veva Ha Khin Bhi Ẹlo Nọnsi Osẹnobulua”

ỌKPA bhi ene ohẹn ne na bhi ulin-uwa ọsi Erọn vae, ọle Zẹkaraya ha khin. Ẹdọkpa, Zẹkaraya da ha mhọn emhin kpataki nin ọle ha lu. Ọ da sẹ ọle bhi egbe nin ọle rẹ tuẹ emhin nọn viohin an bhi okhun-izọese nan re igolu lu bhi ẹkẹ uwa oga. Emhin kpataki wo khọnan, ranmhude, asabọmiẹn osukpa ọkpa ohẹn ha sabọ tuẹ emhin nọn viohin an bhi ẹkẹ uwa oga ọkuẹsẹ ọle yu. Edandan i ribhọ ghe Zẹkaraya bi okhuo ọle natiọle Ẹlizabẹt wo ha ghọnghọn bhi ọne ukpẹdẹ nin.

Ikpe ne bunbun ọ ki ye nian nin Zẹkaraya bi Ẹlizabẹt bọ egbe. Jehova da wo ha nan erọnmhọn nin ele. Baibo bhọ da yọle ghe, “eria ne khiale ele veva ha khin bhi ẹlo nọnsi Osẹnobulua.” Ọrẹyiriọ, emhin ọkpa da sẹyẹ ha ribhọ nin ele manman ha guanọ, nọn manman lu uhọnmhọn-emhin rẹji ẹbho nesi Osẹnobulua ẹghenin. Ele da ha guanọ nin ele ha mhọn imọn. Ọkpakinọn, Zẹkaraya bi Ẹlizabẹt “ki manman wanre.” Ọrẹyiriọ, ele da sẹyẹ ha nan erọnmhọn ji Osẹnobulua. Ele da wo rẹọbhọ ghe, Osẹnobulua dẹ họn erọnmhọn nọnsele, aharẹmiẹn ọ diabe ghe ele i yẹ da sabọ biẹ.

Zẹkaraya da nabhi ẹkẹ ọne uwa oga, beji ẹbho ne bunbun rẹ ha nan erọnmhọn bhi ole. Beji Zẹkaraya ọkpa rẹ ha ribhi ẹkẹ ọne uwa oga, ẹhi nọnsi Jehova da wo re osukpa zegbere man ọlẹn. Ọne ehi da mundia sikẹ ukhuo-izọese nan da tuẹ emhin nọn viohin an. Ọle da taman Zẹkaraya ghe, Osẹnobulua họn erọnmhọn nọnsọle, sẹyẹ, Osẹnobulua dẹ rẹkpa Ẹlizabẹt rẹ biẹ ọmokpia. Ọle da yẹ taman Zẹkaraya ghe, Jọni hi elin nan da ha tie ọne ọmọn. Ọne ọmọn ha ki wanre, ọle ki ha mhọn “ahu bi ẹlinmhin ọsi Ẹlaija.” Ọle dẹ lu iwẹnna kpataki nin Jehova ha mun nanlẹn. Ọle dẹ ha taman ẹbho nin ele fidenọ, beji ele ha da sabọ ha lu ebe ti Jehova bhọ.

Ranmhude edandan nin Zẹkaraya ha mhọnlẹn, ọle da taman ọne ẹhi nin ọle re iyaman man ọlẹn, nin ọle ha rẹ lẹn ghe, ene emhin nan dẹ gene sunu. Ọkpakinọn, ọne ẹhi da re adia nanlẹn. Ọle da taman Zẹkaraya yọle: “Elin imẹn hi Gebriẹl. Imẹn mundia sikẹ Osẹnobulua.” Beji a miẹn ghe ọne ẹhi nan hi ọnọn mundia sikẹ Osẹnobulua bhi okhun, ọ bha rẹ khẹke nin Zẹkaraya ha mhọn edandan si ebi ọne ẹhi tale dẹ gene munsẹ. Ranmhude Zẹkaraya bha rẹọbhi ebi ọne ẹhi tale, ọne ẹhi da taman ọlẹn ghe, ọle i yẹ da sabọ talọ, rẹ dọ sẹbhi ukpẹdẹ nin ene ọta ha rẹ munsẹ. Ẹghe nin Zẹkaraya ki rẹ dagbare bhi ẹkẹ ọne uwa oga, ọle bha yẹ sabọ re unun ne ene ẹbho talọ. Ọbọ ọle ki rẹ taman ele ebi ẹlo ọle miẹn.

Zẹkaraya da taman okhuo ọle nin Ẹlizabẹt ghe ọle dẹ ha hanmhan. “Ikpẹdẹ eso ki gbera,” ọle da gene ha hanmhan. Bhi uki isẹn, Ẹlizabẹt da khue egbe ọbhi ẹkẹ uwa nin ẹbho hẹi daghe ọle. Ọkpakinọn, bhi uki nọnzi ehan, Meri nin obhio ọle da dọ tuẹ ọle bhi uwa. Ọmọn nọnsi Hilai Meri khin, sẹyẹ, Nazarẹt ọle na vae. Ẹghe nin Meri rẹ nabhi ẹkẹ ọne uwa, ọmọn nọn ri Ẹlizabẹt bhi ẹkẹ da re eghọnghọn san okhun. Ranmhude ẹlinmhin nọn khiale nọn ha noo Ẹlizabẹt, ọle da tie Meri, “inẹn Ebeanlẹn imẹn.” Ọle lẹnmhin ghe Meri hanmhan. Sẹyẹ, ọmọn nin Meri hanmhan dẹ ha yi ọne Mezaya. Ọle bha ha mhọn ikhu da Meri. Ọle bhọ da ziẹn ọle udu, yẹ ji ọle lẹn ghe Jehova dẹ rẹkpa ọle.

Ẹghe nin Ẹlizabẹt ki rẹ biẹ, ibhio ọle bi idiake nesọle da vae dọ tuẹ ọle. Ele da ha guanọ nin Ẹlizabẹt hẹ ọne ọmọn elin nan yẹ tie ọdọ ọle. Ọkpakinọn, Ẹlizabẹt lẹn ebi Gebriẹl taman ọdọ ọle, ghe, Jọni a da ha tie ọne ọmọn le. Bhiriọ, ọle da yọle, “Heye! Jọni a da ha tie ọle.” Ebi Ẹlizabẹt tale bha yẹẹ ele. Bhiriọ, ele da nọọn Zẹkaraya ebi ele ha tie ọne ọmọn. Ọle bha sabọ re unun ne ele talọ. Ọle da gbẹn ọbhi ebe yọle, “Jọni hi elin ọlẹn.” Bhi ọne ẹghe nin tee, unun nọnsọle da tanlan an, ọle da kie munhẹn ha talọ.

Ẹlinmhin nọn khiale da munhẹn ha noo Zẹkaraya. Bhiriọ, ọle da ha kha akhasẹ. Zẹkaraya da re ikhuaẹloghe nin ẹbho nesi Osẹnobulua, ghe, Osẹnobulua dẹ mhọn itohan da ele yẹ hinmhin ele. Ọle da yẹ yọle ghe, ọmọn nọnsọle nin Jọni “dẹ kalo nin Jehova dọ hẹnhẹn uwedẹ khẹ ọle.” Ọnan hi ebi Jọni wo lu tee. Ọkuẹsẹ Jesu munhẹn ha tẹmhọn Agbejele nọnsi Osẹnobulua, Jọni nọn re amẹn nin ẹbho da mun ene ẹbho egbe ọbhi otọ khẹ uhọnmhunje nin Jesu ha wewe man ele.

Jesu dẹ man ẹbho nesi Osẹnobulua uwedẹ ọgbọn nọn khẹke nin ele rẹ ha nin ẹbho ne i ga Osẹnobulua bi ẹbho ne denyẹnyẹn ele lu emhin. Bhi ikpe ne bunbun ne gbera, eguọmhandia nesi Osẹnobulua da wo ha re izebhudu man, beji ele rẹ ha yo okhọnlẹn dọ ha ne eghian nesi Osẹnobulua khọnlẹn. Bhi ejayenan nian, Jehova bha yẹ guanọ nin eguọmhandia nesọle ha yo okhọnlẹn. Ọrẹyiriọ, ọ yẹ khẹke nin ele ha mhọn izebhudu, ranmhude, ene ha miẹn ọne Mezaya ọbhi egbe dẹ ha wewe ẹmhọn Osẹnobulua, bi ọta nọn mhẹn rẹji Jesu Kristi man ẹbho, beji Zẹkaraya bi Ẹlizabẹt lu.

Tie ọne okha bhi Baibo:

• Luk 1:​5-25, 36-45, 57-80

Inọnta:

Uwedẹ nela Zẹkaraya bi Ẹlizabẹt rẹ re izebhudu man?

Manman Guanọ Otọle

1. 1. Arẹmiẹn ọ bha gba nin Zẹkaraya bi Ẹlizabẹt fo, bezẹle nin Baibo da yọle ghe “eria ne khiale ele veva ha khin”? (Luk 1:6; it “Eria Ne Khiale” ¶2)

   Ewanniẹn nọnsẹ

1. 3. Gebriẹl da taman Zẹkaraya nin ọle hẹ ọmọn nọnsọle Jọni. Be ọne elin nan mundia nan? (it “Jọni” ¶1)

   Ewanniẹn nọnsẹ

2. 4. Zẹkaraya be gene kiẹn odin bi ọyehọ? (w08 3/15 30 ¶6)

   Ewanniẹn nọnsẹ

Ria Eria Nyan Emhin Nin Uwẹ Luẹle

• Ene mun ọkalo bhi oga ọsi ibhokhan Ju bhi ẹghe ọsi Zẹkaraya wo ha re otọ nin ikpia rẹ ha sọebe a sade ikhuo ele bha biẹ nin ele. Ọkpakinọn, Zẹkaraya bha lu iriọ, ọle da sẹyẹ sun rẹkhan okhuo ọle. Be ene ọdọ ha sabọ miẹn luẹ bhi obọ Zẹkaraya? 2

  Ewanniẹn nọnsẹ

  

• Ẹlizabẹt da sun rẹkhan ọdọ ọle yẹ ha hẹnmhọn nanlẹn. Ọle bha ka lu emhin nin ibhio ọle bi idiake nesọle yọle nin ọle lu. (Luk 1:​58-61) Be ene amhẹn ha sabọ miẹn luẹ bhi obọ ọle?

  Ewanniẹn nọnsẹ

• Be uwẹ ha rẹ sabọ re egbe khọkhọ Zẹkaraya bi Ẹlizabẹt yẹ bhi uwedẹ nin ele rẹ re izebhudu man?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Ahamiẹn ọne otọ nan Zẹkaraya bi Ẹlizabẹt ha da nyẹnlẹn, be mẹn ha nọọn ele le sade a riọ ele kpanọ bhi uu?a

  Ewanniẹn nọnsẹ

Sẹyẹ Fẹ Ene Emhin Nan Ghe

Ghe ọne ividio nan nin uwẹ daghe ebe sunu bhi ẹghe nin Zẹkaraya ki rẹ munhẹn ha talọ, yẹ khuẹnmhẹn Osẹnobulua.

“Jọni hi elin ọlẹn” (6:59)

Be Meri rẹ miẹn ahu yẹ bhi obọ Jehova ẹghe nin ọle rẹ rẹnẹ ji Ẹlizabẹt? Be imhan ha sabọ miẹn luẹ bhi ọnan?

“Be Jehova Ha Rẹ ‘Mun [Uwẹ] Toto’ Yẹ?” (w23.10 14-15 ¶10-14)