Tso Siab Rau Tus Uas Kav Ib Puas Tsav Yam

1. Yauj raug tej teeb meem twg?

YAUJ yog ib tug neeg uas nyob yav puag txheej thaum ub, nws tau plam txhua yam uas nws muaj. Xws li nws tej me nyuam, nws txoj kev nplua nuj thiab nws tseem tau ib tug mob phem heev. Tsis tas li ntawd, tej neeg uas ib txwm hwm nws los cia li saib tsis taus nws lawm. Txawm nws cov “phooj ywg” los tseem hais tej lus uas txo nws lub zog thiab. Ntxiv ntawd, nws tus poj niam ntxhov siab heev tseem hais rau Yauj kom cia li “cem koj tus Vajtswv thiab tuag mus.” (Yauj 2:9; 15:4, 5; 19:1-3) Thaum ib tug neeg raug ntau yam kev nyuaj siab, yuav ua tau rau nws xav tias xyov Yehauvas puas mob siab thiab puas yuav pab nws. Yauj los tej zaud, kuj tau xav tias xyov Yehauvas puas pab cov uas hlub thiab teev tiam Nws.

2-3. Tej zaum peb yuav pib xav li cas, thiab peb yuav mus kawm txog dab tsi hauv phau ntawv Yauj?

² Nim no peb nyob rau “tiam kawg yuav haj yam muaj kev kub ntxhov.” (2 Timautes 3:1) Tej thaud peb raug ib qho teeb meem tag ib qho teeb meem tuaj, yuav ua rau peb ntxhov siab thiab thev tsis taus. Thaum muaj li no, yuav sim peb txoj kev tso siab rau Yehauvas, thiab tej zaum yuav ua rau tej tug xav tias ntshe Yehauvas tsis mob siab txog lawv.

³ Yog koj xav li no, txhob tag kev cia siab. Yauj twb kawm tau tias Yehauvas yeej tsis tso tus uas npuab siab rau nws tseg. Peb yuav tau txhawb kom peb tso siab plhuav rau peb Leej Txiv tus uas nyob saum ntuj. Yuav kom pab tau peb ua li no, cia peb mus kawm txog phau ntawv Yauj, thiab seb muaj ob yam twg yuav pab tau peb: Thawj yam, peb yuav tsum paub tias Yehauvas tib leeg xwb thiaj yog tus kav ib puas tsav yam hauv lub qab ntuj khwb. Yam ob, peb tus Vajtswv uas loj dua ntais muaj hwj chim tswj hwm tau txhua yam hauv ntiaj teb kom muaj tiav raws li nws cog lus tseg. Thiab nws yuav tiv thaiv cov uas npuab siab rau nws, kom lawv tuav rawv lawv txoj kev sib raug zoo nrog nws.

XATAS KUJ TUAJ RAU NTAWD NROG LAWV

4. Leej twg tuaj koom nrog txoj kev sib sau ua ke nyob saum ntuj ceeb tsheej uas hais nyob hauv phau ntawv Yauj?

⁴ Muaj ib zaug, “cov tubtxib saum ntuj” tuaj sib sau ua ke ntawm Yehauvas xub ntiag saum ntuj ceeb tsheej. Kuj hais ntxiv tias: “[Xatas] los kuj tuaj nrog lawv nyob ntawd thiab.” (Yauj 1:6) Thaum ntawd yog thawj zaug uas phau Vajlugkub hais txog lub npe “Xatas” uas txhais tias “tus sawv tawm tsam.” Lub sij hawm ntawd, Xatas tsis yog ib tug tub txib uas npuab siab rau Yehauvas lawm. Xatas yog ib tug yeeb ncuab rau Yehauvas, rau cov tub txib saum ntuj, thiab rau cov neeg uas npuab siab rau Vajtswv uas nyob hauv ntiaj teb. Nyob ntawm Chivkeeb 3:15, Yehauvas twb yeej qhia lawm tias, Xatas tsis yog Yehauvas tsev neeg nyob saum ntuj ceeb tsheej lawm. Yog li, Xatas tsis muaj feem nrog “tus pojniam” los sis nrog Yehauvas tsev neeg uas yog cov tub txib nyob saum ntuj, uas yuav yug “tus xeebntxwv.”

5. Peb kawm tau li cas los ntawm qhov uas Xatas thiab Yehauvas sib txuas lus?

⁵ Yehauvas xav kom peb paub tias, thaum lawv tuaj sib sau ntawd tau muaj dab tsi tshwm sim, Nws thiaj kom muab sau cia rau hauv phau Vajlugkub. Tej lus uas Xatas hais, yeej qhia meej meej tias nws yog ib tug uas siab phem thiab iab liam txog lwm leej lwm tus. (Yauj 1:9; muab piv rau Tshwmsim 12:10.) Qhov uas Yehauvas muab sau tseg li no, qhia kom peb tso siab tias Yehauvas yog tus muaj hwj chim thiab nws yeej coj ncaj. Ntxiv ntawd Vajtswv tus uas loj dua ntais yog tus uas tswj tias, ib tug tsuas yuav ua txog txij twg xwb.

YEHAUVAS YOG TUS TSWJ TIAS UA TAU NPAUM LI CAS XWB

6. Yehauvas ua qhia tias nws yog tus uas tswj qhov uas lawv tuaj sib sau ua ke li cas? (Yauj 1:7, 8)

⁶ Nyeem Yauj 1:7, 8. Yehauvas yog tus uas tswj qhov uas lawv tuaj sib sau ua ke ntawd. Nws nug Xatas tias: “Koj puas pom Yauj uas yog kuv tus tubtxib?” Tos Yehauvas nug Xatas li no los, vim nws paub tias Xatas twb tau hau ntsoov xav tawm tsam Yauj. Cia peb mus kawm seb Yehauvas siv nws lub hwj chim los pab Yauj li cas.

7. Nyob ntawm Yauj 1:10, 11, Xatas iab liam hais tias yog vim li cas tib neeg thiaj teev tiam Yehauvas?

⁷ Nyeem Yauj 1:10, 11. Yehauvas yog tus uas kav ib puas tsav yam thiab nws paub tias thaum twg, thiaj yog lub sij hawm zoo rau nws siv nws lub hwj chim los ua raws li nws pom zoo. (Yelemis 32:17; Daniyees 4:35) Txawm li ntawd los, Xatas tseem liam qees tias Yehauvas siv nws lub hwj chim tsis raws kev raws cai lawm. Xatas tus nru lus yog hais tias, Vajtswv ntxias tib neeg xws li Yauj, kom los teev tiam Nws xwb. Xatas kuj iab liam ntxiv tias, tos tib neeg teev tiam Yehauvas los, vim lawv xav tau tej yam los ntawm Yehauvas xwb. Yehauvas teb li cas?

8-9. Yehauvas hais meej meej tias nws tsuas pub Xatas sim Yauj txog twg xwb, thiab yog vim li cas? (Yauj 1:12) (Saib daim duab.)

⁸ Nyeem Yauj 1:12. Yehauvas thiaj cia Dab Ntxwg Nyoog sim Yauj, tiam sis Yehauvas muab ciaj ciam kom nws tsuas sim txog twg xwb. Yehauvas thiaj hais tab meeg cov tus txib saum ntuj thiab hais meej meej rau Xatas tias: “koj tsis txhob kov nws li.” Xatas yeej tsis muaj hwj chim yuav hla dhau Yehauvas txoj cai, yog li nws tsuas ua tau npaum li Yehauvas tso cai rau nws ua xwb. Niaj hnub nim no los, Xatas tsuas ua tau li qhov uas Yehauvas tso nws ua xwb. Yog li, Yehauvas yeej siv Nws lub hwj chim los tiv thaiv Yauj thiab ua qhia tias, Nws yog ib tug Vajtswv uas muaj kev hlub thiab coj ncaj.

⁹ Xatas sim Yauj tiam sis nws txo tsis tau Yauj txoj kev ntseeg. Yauj yeej tseem npuab siab rawv rau nws Leej Txiv Yehauvas. (Yauj 1:22) Txawm li los, Xatas tus uas tawm tsam Vajtswv tseem yuav sim Yauj ntxiv.

10. Vim li cas Yehauvas cia Xatas sim Yauj ntxiv? (Yauj 2:2-6)

¹⁰ Nyeem Yauj 2:2-6. Zaum no Xatas haj yam sim Yauj loj tshaj kom nws tso Yehauvas tseg. Xatas liam tias yog thaum ua kom Yauj txoj sia tshuav tu, ces nws yeej tso Yehauvas tseg xwb xwb li. Yehauvas cia seb Yauj yuav ua li cas, Nws thiaj cia Dab Ntxwg Nyoog ua rau Yauj tau ib tug mob phem heev. Dua ib zaug ntxiv, Yehauvas muaj ciaj ciam rau Xatas sim Yauj. Yehauvas hais li no tias: “Tsis txhob txov nws txojsia.” Xatas ua tsis tau li cas, tsuas yog ua raws li qhov uas Yehauvas tso nws ua xwb. Yog li, peb pom tias Yehauvas yeej yog tus uas muaj hwj chim loj tshaj plaws, Xatas yeej hla tsis dhau nws li.

YEHAUVAS FOOM KOOB HMOOV RAU YAUJ

11. Yehauvas foom koob hmoov li cas rau Yauj tom qab uas nws raug sim loj heev? (Yauj 42:10-13)

¹¹ Nyeem Yauj 42:10-13. Yauj ua qhia tias nws yeej npuab siab rau Yehauvas. Yog li Yehauvas thiaj tsis pub Xatas ua rau Yauj raug kev txom nyem ntxiv lawm. Dua ib zaug ntxiv, Xatas tus uas tawm tsam Vajtswv yeej tsis muaj hwj chim dab tsi yuav los tav tau Yehauvas txoj kev pab thiab tej koob hmoov uas Yehauvas foom pub rau Yauj.

12. Piav qhia seb muaj li cas rau cov uas tso siab rau Yehauvas.

¹² Nyob rau tiam kawg no, muaj coob tus uas npuab siab rau Yehauvas pom tias, Yehauvas tau siv nws lub hwj chim los pab lawv. Xws li, nyob rau xyoo 1945, cov tub rog Ntsaws Mes Nis yuam Yehauvas Cov Tim Khawv 230 leej kom taug ko taw ntawm lub yeej kaw neeg Natxi mus rau tom ntug dej hiav txwv. Lawv yuav muab cov Tim Khawv mus rau hauv nkoj kom lub nkoj tog kom lawv tuag kom tag, tiam sis lawv txhua tus kuj tsis tuag. Lawv yeej raug ntau yam uas txaus ntshai heev thiab lawv puav leej hais li no: “Tej kev txom nyem uas peb raug yog yav tas los lawm xwb, tiam sis peb cov uas dim, mas zoo cuag li muaj ib tug muab peb rub hlo tawm hauv lub cub tawg los, yeej tsis muaj peb ib tug tsw kub hnyiab li. . . . Peb haj yam tuaj dag tuaj zog vim Yehauvas yog tus pub rau peb.” Lawv hais ntxiv tias: “Peb txhua tus muaj tib txoj kev xav . . . [tom qab] peb dim tsov ntxhuav lub qhov ncauj, peb xav kom tau cai ywj siab teev tiam Yehauvas . . . mus ib txhiab ib txhis. Qhov ntawd yuav yog txoj koob hmoov zoo tshaj plaws.”​—Muab piv rau Daniyees 3:27; 6:22.

13. Peb tso siab tau li cas thaum peb raug kev txom nyem nyuaj siab? (Saib cov duab.)

¹³ Muaj tej lub caij peb kuj raug tej kev nyuaj siab uas loj heev. (1 Petus 5:8-10) Tej kev nyuaj siab ntawd yuav ua rau peb qaug zog zis thiab zoo li yuav tsis paub kawg li. Thaum zoo li no, yog peb nco ntsoov Yauj tus qauv yuav pab tau peb. Peb tso siab tau tias Yehauvas muaj hwj chim yuav pab tau peb kom dim tej kev txom nyem nyuaj siab, tsis hais tam sim no los sis thaum nyob hauv lub ntiaj teb tshiab. Yehauvas yuav tsis cia lub sim ceeb phem no nyob kom ntev tshaj li qhov uas nws teem tseg lawm.

YEHAUVAS HLUB COV UAS NPUAB SIAB RAU NWS

14-15. Yehauvas yuav ua li cas rau cov uas npuab siab rau nws? (Yauj 14:15) (Saib daim duab.)

¹⁴ Nyeem Yauj 14:15. Peb Leej Txiv tus uas nyob saum ntuj nyob ze rau cov uas npuab siab rau nws. Nws saib lawv rau nqi heev, tab txawm lawv txoj sia yuav tu lawm los, nws yeej yuav tsa kom lawv sawv rov qab los tau txoj sia. Thaum lawv sawv rov los tau txoj sia, lawv yuav zoo siab heev.​—Yaxayas 65:17.

¹⁵ Tom qab Yauj dim txoj kev sim siab loj kawg nkaus, los nws tseem nyob hauv Xatas lub qab ntuj. Phau Vajlugkub qhia rau peb tias, Yehauvas tau foom koob hmoov rau Yauj lub neej ntau tshaj yav tag los. Tej koob hmoov ntawd tsuas yog ib vuag uas Yehauvas ua qhia tias, yav tom ntej nws haj tseem yuav foom koob hmoov ntau tshaj ntawd rau Yauj. Yehauvas yeej xav kom cov uas npuab siab rau nws muaj kev zoo siab thiab qab siab ua neej. Peb tso siab tau tias, Yehauvas yuav muab nqi zog rau txhua tus uas npuab siab rau nws, kom lawv tau lub neej zoo tiav log nyob hauv lub vaj kaj siab. (Tshwmsim 21:3, 4) Yehauvas yog tus kav ib puas tsav yam, nws tos tsis hnyoo yuav foom koob hmoov rau cov uas npuab siab rau nws, yeej yuav tsis muaj leej twg tav tau nws txoj hau kev li. Yog peb muab coj los xav li no, yuav pab peb thev taus peb tej kev nyuaj siab!

16. Peb tso siab tau tias Yehauvas tus uas kav ib puas tsav yam yuav ua tau dab tsi?

¹⁶ Tom qab Yehauvas foom koob hmoov rau Yauj thiab Yauj ua lub neej nyob ntev heev, nws kuj nruam sim mus lawm. Txawm li los, Yehauvas yog tus kav ib puas tsav yam thiab nws muaj hwj chim loj kawg nkaus, txoj kev tuag yeej yuav kov tsis yeej Nws li. (2 Kevcai 32:39) Yeej tsis muaj leej twg yuav tav tau qhov uas Yehauvas yuav tsa cov tuag sawv rov los tau txoj sia. Thiab Yehauvas twb teem ib lub caij yuav ua li no lawm.​—Loos 8:38, 39.

TSO SIAB PLHUAV RAU YEHAUVAS

17. Ua cas peb paub tias Xatas rhuav tshem tsis tau Yehauvas cov neeg?

¹⁷ Phau ntawv Yauj pab tau peb tso siab plhuav rau Yehauvas. Peb ua Yehauvas tsaug tsis txawj tag, vim nws tsis pub kom Xatas rhuav tshem tau nws cov neeg! Yeej muaj pov thawj li no, rau qhov niaj hnub nim no, muaj kwv lam li cuaj phlom leej uas npuab siab rawv teev tiam Yehauvas. Ib zaug tag ib zaug tuaj, tej nom tswv thiab tej thawj coj ntawm lwm txoj kev ntseeg, tawm tsam thiab txwv kom Yehauvas cov tib neeg tsis txhob teev tiam Yehauvas, thiab tsis txhob mus tshaj tawm txoj xov zoo. Txawm li los lawv yeej txwv tsis tau peb, vim muaj Yehauvas pab peb. (Yaxayas 54:17) Yeej tsis muaj leej twg los sis ib yam dab tsi, yuav tav tau peb txoj hau kev mus tshaj mus qhia tias Yehauvas yog tus tseem Vajtswv, hos Xatas yog niag dag thiab tua neeg. Tab txawm txoj kev tuag los yeej txwv tsis tau peb, vim Yehauvas yuav tsa cov uas npuab siab rau nws kom sawv rov los tau txoj sia.​—Hauxeyas 13:14.

18. Vim li cas peb tsis tas ntshai txawm yuav muaj dab tsi tshwm sim yav tom hauv ntej?

¹⁸ Yog peb ua zoo xav txog tej uas Yauj raug, yuav txhawb tau peb txoj kev ntseeg, kom tom ntej txawm peb yuav raug dab tsi los, peb tso siab plhuav rau Yehauvas. Thaum txog txoj kev txom nyem loj kawg nkaus, Xatas thiab cov uas ua raws li Xatas lub siab nyiam, yuav xav tias Vajtswv cov neeg tsis muaj zog lawv yuav tawm tsam yeej. Tiam sis Yehauvas yuav siv nws lub hwj chim los pab nws cov neeg tib yam li nws tau pab Yauj. Yehauvas yeej yuav tsis cia Xatas rhuav tshem tau nws cov neeg kom puas tsuaj li. Tshuav tsis ntev lawm xwb, Yehauvas yuav rhuav tshem tej kev txom nyem uas Dab Ntxwg Nyoog tau tsim. Yexus yuav muab Dab Ntxwg Nyoog thiab nws cov dab cuam rau hauv lub qhov tob tob thiab muab lawv kaw ib txhiab xyoo. (Lukas 8:31; Tshwmsim 20:1-3) Ces tom qab ntawd, Xatas thiab cov uas tuaj nws tog yuav raug puas tsuaj mus ib txhis. (Tshwmsim 20:10) Thaum ntawd yuav muaj raws li Yehauvas tej lus cog tseg uas hais tias, Xatas lub taub hau yuav raug tsoo ntsoog tag thiab yuav tsis muaj Xatas ib zaug li lawm.​—Chivkeeb 3:15; Loos 16:20.

19. Cov uas tso siab plhuav rau Yehauvas yuav tau txais tej koob hmoov twg? (Saib daim duab.)

¹⁹ Cov uas teev tiam Yehauvas yeej tos tsis taus, kom lawv zoo tiav log nyob hauv lub ntiaj teb tshiab thiab muaj kev kaj siab lug. Thaum ntawd lub neej yuav zoo tshaj li qhov uas peb xav niaj hnub nim no. Yehauvas twb cog lus tias: “Nimno kuv yuav tsim dua ib puas tsav yam tshiab!” (Tshwmsim 21:5) Yog li yuav muaj li cas? Yuav yog thawj thawj zaug uas tib neeg ua neej nyob tsis muaj kev haub ntxias, kev ntxub ntxaug, thiab yuav tsis muaj Xatas, thiab nws cov dab los ua phem ua lim hiam ntxiv li lawm. Yuav zoo kawg li! Peb yuav tsis muaj tej kev txhawj xeeb uas niaj hnub nim no, ua rau peb pw tsis tsaug zog dua ib zaug li lawm. Cov uas dim ntsuj rog Amankedoos, yuav pom Vajtswv ua txuj ci kho txhua leej txhua tus kom noj qab nyob zoo, nyob thoob plaws qab ntuj. Ces Vajtswv yuav pib tsa cov uas tuag lawd sawv rov qab los tau txoj sia. Peb yuav ua lub neej nyob kaj siab lug muaj kev zoo siab, raws nkaus li peb Leej Txiv tus uas nyob saum ntuj twb npaj tseg lawm!

20. Koj yuav tau ua li cas?

²⁰ Peb nyob rau tiam kawg lawm, peb yuav tau ua lub siab tawv qhawv tiv tej kev nyuaj siab ntxhov plawv. Cia peb tso siab plhuav rau Yehauvas thiab txhawb nws txoj kev kav. Peb yuav tau ua qhia tias peb yeej hlub peb Leej Txiv tus uas nyob saum ntuj thiab ua qhia tias, tej uas Xatas iab liam txog Yehauvas yeej tsis muaj tseeb. Yog peb npuab siab rawv rau Yehauvas tus uas kav ib puas tsav yam, ces yav tom ntej peb yuav tau lub neej uas zoo tshaj plaws. Vim peb paub tias Yehauvas yeej tos tsis hnyoo yuav foom koob hmoov nplua mias rau peb!