Xyaum Kom “Txawj Qhia” Thaum Mus Tshaj Tawm

1. Vim li cas peb yuav tau xyaum kom peb txawj qhia lwm tus? (2 Timautes 4:2) (Saib daim duab.)

YEXUS hais rau nws cov thwj tim tias: “Cia li mus coj txhua haiv neeg los ua kuv cov thwj tim. . . . Qhia kom lawv coj raws li tej uas kuv twb sam hwm rau nej lawd.” (Mathais 28:19, 20) Yexus cov lus sam hwm no, yog hais kom txhua tus Khixatias yuav tsum mus qhia lwm tus. Yeej muaj tseeb tias Yehauvas rub “tus uas muaj lub siab xib” los cuag nws, thiab cov tub txib saum ntuj yeej yog cov uas coj peb mus nrhiav tib neeg. (Tes Hauj Lwm 13:48; Yauhas 6:44; Tshwmsim 14:6) Txawm li los, peb yuav tau ua peb feem kom txawj mus qhia lwm leej lwm tus. Cia peb muab xav txog tus tub txib Povlauj thiab Npananpas. Phau Vajlugkub qhia tias, thaum nkawd mus qhia txoj xov zoo hauv lub tsev pe hawm uas nyob hauv lub nroog Ikhaunias, “Nkawd qhia tau zoo heev mas cov Yudais thiab cov Kilis coob leej los ntseeg.” (Tes Hauj Lwm 14:1) Povlauj thiab Npananpas yeej xyaum kom nkawd txawj qhia lwm tus. (Nyeem 2 Timautes 4:2.) Yog li, txhua tus Khixatias yuav tsum xyaum kom txawj qhia.

2. Ua li cas ib txhia Khixatias xav tias lawv tsis txawj qhia lwm leej lwm tus?

² Muaj tej txhia xav tias, lawv tsis tau kawm ntawv ces lawv tsis paub qhia lwm tus los sis lawv ib txwm yeej tsis txawj qhia. Muaj ib co neeg nyob hauv phau Vajlugkub kuj xav tias lawv tsis txawj txaus thiab. (Khiav Dim 4:10; Yelemis 1:6) Muaj tej tug qaug zog vim lawv xav tias, ntshe lawv tsis txawj qhia thiaj tsis muaj neeg kawm Vajlugkub nrog lawv li lwm tus. Nco ntsoov tias tsis yog txhua tus uas peb ntsib thiab nrog tham yuav nyiam thiab xav mloog txoj xov zoo. Qhov uas tib neeg nyiam thiab los kawm Vajlugkub, tsis yog tias peb txawj txawj qhia. Li peb nyuam qhuav hais tas los no, Yehauvas thiab cov tub txib saum ntuj yog cov uas coj peb mus nrhiav tus uas muaj lub siab xib rau Vajtswv. Txawm li ntawd los, peb yuav tau xyaum npaum li peb xyaum tau kom txawj qhia txoj xov zoo. Hauv zaj no peb yuav mus kawm txog peb yam, kom pab peb txawj qhia lwm leej lwm tus thaum peb mus tshaj tawm.

UA QHIA TIAS KOJ MOB SIAB TXOG LAWV

3. Vim li cas tej uas Yexus qhia ho raug coob tus lub siab?

³ Phau Vajlugkub hais tias Yexus “paub tej uas nyob hauv neeg lub siab.” (Yauhas 2:25) Qhov uas hais no qhia tias, tej uas tib neeg xav nraim nkoos hauv nruab siab Yexus yeej paub, thiab nws paub tias yog vim li cas lawv thiaj xav li lawv xav. Qhov uas Yexus paub li no, nws thiaj txawj hais tej lus kom raug lawv siab. Yexus pom tias cov tib neeg cheem tsum kom muaj tus cob qhia thiab nplig lawv, vim cov thawj coj tsim muaj ntau txoj kev cai thiab ua nyuab rau lawv lub neej kawg li. (Mathais 9:36; 23:4) Yog li thaum Yexus cev nws cov lus nyob saum roob, nws thiaj qhia txoj kev ua neej rau lawv, kom thiaj pab tau lawv. Muaj coob leej ntau tus nyiam mloog tej uas Yexus qhia, vim nws qhia txog tej yam uas lawv txhawj txog thiab tej uas tseem ceeb rau lawv lub neej.

4. Peb ua qhia tias peb mob siab txog tib neeg li cas? (Saib cov duab.)

⁴ Thaum peb mus tshaj mus qhia, peb yuav tsum to taub tias tib neeg txhawj txog dab tsi, thiab yam twg tseem ceeb rau lawv. Txhua tus neeg uas peb mus tshaj tawm rau, nyias yeej ntsib lawm nyias ib txoj kev txom nyem nyuaj siab vim peb txhua tus tseem nyob hauv Xatas lub ntiaj teb. Yog peb to taub li no ces yuav pab tau peb muaj kev hlub rau cov neeg uas peb mus tshaj tawm nyob hauv peb thaj tsam. Peb yuav tau coj los xav li no, ib ntus no muaj tej xov xwm twg tshwm sim nyob rau hauv lub zej lub zos? Cov niam thiab cov txiv txhawj npaum li cas tsam muaj teeb meem tom lub tsev kawm ntawv uas lawv cov me nyuam kawm? Neeg puas nquag poob hauj lwm? Peb yuav tau xam pom tias “muaj kev kub ntxhov” npaum li cas rau tib neeg lub neej, vim lawv tsis paub txog tej lus cog tseg nyob hauv phau Vajlugkub.​—2 Timautes 3:1; Yaxayas 65:13, 14.

5. Yexus qhia txawv ntawm cov Falixais li cas? (Mathais 11:28-30)

⁵ Yexus hlub tib neeg kawg li, thiab tej tib neeg yeej pom tias Yexus mob siab txog lawv los ntawm qhov uas Yexus coj rau lawv. Yexus tsis coj li cov thawj coj Falixais, lawv xav tias lawv zoo dua lwm tus, lawv thiaj ua saib tsis taus cov tib neeg! (Mathais 23:13; Yauhas 7:49) Tiam sis Yexus ua siab dawb siab zoo thiab saib taus tib neeg. Nws “txo hwj chim thiab muaj siab mos siab muag,” yog li no thiaj pab tau nws txawj qhia lwm tus. (Nyeem Mathais 11:28-30.) Peb los yuav tau ua siab dawb siab zoo thiab saib taus cov uas peb mus tshaj tawm rau.

6. Thaum tib neeg tawm tsam txoj xov uas peb qhia peb yuav coj li cas?

⁶ Yeej muaj tej co tib neeg tsis nyiam thiab tsis txaus siab rau txoj xov uas peb qhia. Thaum muaj li no peb yuav ua li cas? Yexus qhia kom peb txhob ua tsis zoo rau lawv. Tiam sis nws qhia kom peb yuav tsum “ua zoo rau cov uas ntxub [peb],” “foom koob hmoov rau cov uas tsawm foom [peb],” thiab “thov Vajtswv rau cov uas ua saib tsis taus [peb].” (Lukas 6:27, 28) Peb yuav tau nco ntsoov tias, tej zaud muaj tej yam dab tsi ua rau tib neeg xav yuam kev, lawv thiaj tsis xav mloog txoj xov uas peb qhia. Yog peb nco ntsoov li no ces peb yuav ua tau lub siab dawb siab zoo rau lawv. Muaj tej txhia yeej txhob txwm tawm tsam peb tes hauj lwm xwb. Hos lwm cov, tej zaum lawv nyuaj siab txog lawv lub cuab lub yig, los sis txhawj txog ib yam dab tsi, tsis yog lawv txhob txwm tawm tsam peb. Los sis tej zaud peb mus tom thawj lub sij hawm tsis zoo. Txawm yog li cas los xij, peb yuav tau coj raws li cov lus hais no “ua tib zoo hais lus luag thiaj xav mloog, ib yam li tej zaub mov uas qab ntsev luag thiaj xav noj. Yog nej ua li no ces nej yuav paub teb txhua tus.” (Kaulauxis 4:6) Yog peb mob siab txog tib neeg thiab paub tias lawv ntsib ntau yam kev nyuaj siab ces peb thiaj paub tias lawv cheem tsum dab tsi thiab peb thiaj txawj qhia lawv.

MUAB VAJTSWV TXOJ LUS LOS QHIA

7. Thaum Yexus qhia lwm tus nws siv dab tsi los qhia? (Yauhas 7:14-16)

⁷ Thaum Yexus qhia lwm tus, nws tsis siv nws lub tswv yim. Nws muab Vajtswv Txoj Lus coj los qhia rau tib neeg kom thiaj pab tau lawv lub neej. Thiab nws qhia tej uas yooj yim to taub kom lawv thiaj nco tau thiab khaws tau coj los siv hauv lawv lub neej. Phau Vajlugkub hais tias, Yexus txawj qhia heev “rau qhov nws muaj hwj chim qhia, tsis thooj li lawv cov xib hwb,” thiab ua rau tib neeg “xav tsis thoob li.” (Malakaus 1:22) Cov Falixais uas nyob rau Yexus tiam, tsuas muab tej xib hwb uas nto npe cov lus coj los qhia rau tib neeg xwb. Tiam sis Yexus txawv lawv, nws muab Vajtswv Txoj Lus coj los qhia rau tib neeg. Nws yog Vajtswv tus Tub, nws twb nyob saum ntuj ceeb tsheej los lawm, thiab nws muaj tswv yim heev. Yog nws xav hais tej lus kom ua rau tib neeg qhuas nws, los sis ua kom tib neeg tsis pom qab xav li los yeej tau, tiam sis nws tsis ua li ntawd. Nws muab Vajtswv Txoj Lus los qhia rau tib neeg thiab qhia rau lawv tias, Vajtswv xav kom lawv ua lub neej zoo li cas. (Nyeem Yauhas 7:14-16.) Yexus tso tau tus qauv zoo kawg li rau cov Khixatias xyaum kom thiaj txawj qhia lwm tus.

8. Tus tub txib Petus coj li Yexus li cas?

⁸ Yexus cov thwj tim yeej muab Vajtswv Txoj Lus los qhia lwm tus tib yam nkaus. Xws li nyob rau hnub Pheetekos xyoo 33 tom qab Yexus, thaum tus tub txib Petus hais lus rau ib pab neeg coob coob, nws yeej muab Vajtswv Txoj Lus los qhia rau lawv. Petus ib txwm tsis tau nrog cov xib hwb kawm ntawv ua ke dua li. Txawm li los, Petus txawj siv Vajtswv Txoj Lus los qhia thiab los piav tias, Yexus tau los ua kom Vajtswv tej lus faj lem muaj tiav li cas rau li cas, mas raug lawv siab kawg li. (Tes Hauj Lwm 2:14-37) Muaj li cas tom qab Petus qhia tas? “Yog li ntawd, txhua tus uas zoo siab hlo khaws Petus tej lus thiaj ua kev cai raus dej. Hnub ntawd muaj txog li 3,000 leej los ntseeg ntxiv.”​—Tes Hauj Lwm 2:41.

9. Vim li cas peb yuav tau muab Vajtswv Txoj Lus coj los qhia lwm tus?

⁹ Tsis muaj ib phau ntawv twg uas yuav pab tau tib neeg lub neej li Vajtswv Txoj Lus. (Henplais 4:12) Yog li thaum peb qhia tib neeg, peb yuav tau muab phau Vajlugkub los qhia. Peb yuav tsum “tshaj tawm Vajtswv txoj lus,” tsis yog siv peb lub tswv yim los qhia. (2 Timautes 4:2) Pajlug 2:6 hais tias: “[Yehauvas] yog tus uas pub tswvyim rau neeg; tej kev txawj kev ntse thiab kev totaub puavleej yog nws pub xwb.” Yog li thaum peb muab cov nqe Vajlugkub los qhia rau tib neeg, ces twb yog Yehauvas hais lus rau lawv ntag. (Malakis 2:7) Peb xav kom tib neeg paub tias tej uas nyob hauv phau Vajlugkub zoo tshaj tib neeg tej tswv yim. Phau Vajlugkub muaj Vajtswv tej lus thoob tsib to nrog uas pab tau peb ua lub neej kom haum nws siab, thiab kom peb thiaj ua tau lub neej nyob kaj siab lug.​—2 Timautes 3:16, 17.

10. Peb yuav qhia li cas tus kawm thiaj paub tias tej uas nws kawm yog los ntawm phau Vajlugkub los?

¹⁰ Thaum koj npaj yuav mus qhia Vajlugkub rau tus uas kawm, koj yuav tau ua zoo xav seb koj yuav siv cov nqe Vajlugkub twg los qhia rau nws, kom nws thiaj paub tias phau Vajlugkub qhia li cas. Pab kom tus kawm Vajlugkub to taub tias, txawm peb siv duab thiab yeeb yaj kiab los qhia, los tej ntawd twb yog rho hauv phau Vajlugkub los qhia xwb. Yog li thaum koj qhia Vajlugkub rau nws, nyeem tej nqe Vajlugkub uas pab kom nws to taub txog lub ntsiab uas nws kawm. Ntxiv ntawd, thaum siv tej duab los sis yeeb yaj kiab los qhia, koj yuav tau pab kom nws to taub lub hauv paus ntsiab lus nyob hauv phau Vajlugkub. Koj tsis tas yuav hais ua phab ua pheev, los sis nyeem tag nrho cov nqe Vajlugkub nyob hauv zaj ntawd es nws thiaj to taub. Tiam sis thaum nyeem ib nqe Vajlugkub, muab sij hawm rau nws xav seb nws to taub li cas tso. Tej zaum muaj tej nqe Vajlugkub neb yuav tau rov mus nyeem dua. Yog koj ua li no, thiaj tsis yog koj muab ib phau ntawv, ib daim duab, los yog ib zaj yeeb yaj kiab los qhia rau nws xwb, tiam sis yog koj muab phau Vajlugkub los qhia rau nws.​—1 Kauleethaus 2:13.

11-12. (1) Peb ua siab ntev rau cov uas peb qhia li cas? (Tes Hauj Lwm 17:1-4) (Saib daim duab.) (2) Peb yuav pab cov uas tsis paub txog phau Vajlugkub li cas?

¹¹ Tej thaud muaj tej yam tus kawm yuav tsis tau ntseeg kiag, tiam sis nco ntsoov thaum koj “tshaj tawm Vajtswv txoj lus . . . rub lub siab ntev.” Tsis yog txhua tus uas kawm Vajlugkub yuav loj hlob zoo tib yam. Muaj tej tug yuav siv sij hawm ntev zog lawv thiaj li mam to taub. Cov Yudais nyob hauv Thexalaunikas twb tsis to taub thawj zaug uas Povlauj mus qhia lawv. Yog li Povlauj thiaj rov qab mus qhia ntxiv kom lawv to taub txog Vajtswv Txoj Lus.​—Nyeem Tes Hauj Lwm 17:1-4.

¹² Ib txoj ke uas qhia tias peb ua tau siab ntev, yog peb txhob tham ntau ntau, peb yuav tau txawj ua lus nug rau tus kawm thiab cia nws teb. Thaum nws hais lus ua tib zoo mloog, peb thiaj to taub qhov uas nws xav. Ces nyeem cov nqe Vajlugkub uas qhia tsi ntsees txog yam uas nws xav paub ntawd thiab muab coj los tham kom nws thiaj to taub tias Vajtswv xav li cas. Peb yuav tau nco ntsoov li no: Muaj ib co neeg tsis paub tias phau Vajlugkub qhia txog ntau yam uas pab tau tib neeg lub neej. Tej zaum yuav pab tau lawv dua, yog peb muab kiag phau Vajlugkub rau lawv saib. Peb kuj muab tau phau me nyuam ntawv “Pib Kawm Vajtswv Txojlus” coj los qhia rau lawv, kom lawv pom tias phau Vajlugkub qhia txog tej yam uas tseem ceeb. Xws li peb kuj mus tham txog lo lus nug 15, thiab muab ob peb nqe Vajlugkub uas nyob ntawm lo lus nug ntawd, los nyeem thiab qhia rau nws tias phau Vajlugkub pab tau peb li cas, peb thiaj muaj taus kev kaj siab. Yog peb pab tus uas peb qhia pom tias, phau Vajlugkub muaj nuj nqis npaum li cas, ces nws thiaj li yuav ua nws lub neej raws li tej uas nws tau kawm.

QHIA KOM LAWV LOS PAUB YEHAUVAS

13. Piav seb thaum peb qhia Vajlugkub peb xav kom tib neeg paub txog leej twg?

¹³ Peb lub hom phiaj yog pab kom tib neeg los paub Yehauvas thiab nrog nws sib raug zoo. (Yakaunpaus 4:8) Yog li peb tes hauj lwm muab piv tau rau tus neeg uas, tsom lub teeb thaum tib neeg ua yeeb yam saum sam thiaj. Nws tsis yog tsom lub teeb kom pom nws. Tiam sis nws tsom kom pom cov neeg uas ua yeeb yam, kom thiaj li pom tau lawv zoo. Tib yam li ntawd, thaum peb qhia Vajlugkub peb yuav tau qhia txog Yehauvas thiab qhia tias qhov uas ua haum nws siab, yog qhov uas tseem ceeb tshaj.

14. Peb yuav pab kom tus kawm ua tau haum Yehauvas siab li cas?

¹⁴ Thaum koj qhia Vajlugkub, pab kom tus kawm muaj lub siab xav ua haum Yehauvas siab. (Pajlug 27:11) Koj tsis yog qhia Vajtswv tej kev cai kom nws paub tias qhov twg yog thiab tsis yog xwb. Tiam sis koj xav pab kom nws paub tias, qhov uas nws hloov nws lub neej los coj raws li Yehauvas lub siab nyiam, los twb vim yog nws hlub Yehauvas. Yog hais tias, nyuaj rau tus kawm Vajlugkub tso tau ib yam tsis zoo tseg, koj kuj nug tau li no: Vim li cas Yehauvas thiaj ntxub tej yam tsis zoo uas neeg ua? Ua li cas Yehauvas thiaj xav kom koj tso tej uas koj nyiam ua tseg? Qhov uas Yehauvas hais kom koj ua li no, qhia tias nws hlub koj li cas? Yog koj txhawb tus kawm kom xav txog Yehauvas thiab nws tej xeeb ceem, ces yim huab pab nws pom tias nws muaj ib Leej Txiv uas hlub nws npaum li cas. Yog koj pab tus kawm Vajlugkub li no, yuav pab tau nws hlub Yehauvas thiab xav ua haum nws siab.

RAU SIAB KAWM KOM TXAWJ QHIA

15. Koj yuav ua li cas koj thiaj txawj qhia?

¹⁵ Koj thov tau Yehauvas pab kom koj paub tias, koj yuav tau ua li cas ntxiv kom koj thiaj txawj qhia. (1 Yauhas 5:14) Yuav kom koj ua tau raws li tej uas koj thov, thaum koj mus tej kev sib txoos, koj yuav tau ua tib zoo mloog koj thiaj kawm tau thiab txawj qhia. Koj kuj coj cov uas txawj qhia Vajlugkub nrog koj mus qhia rau tus uas kawm Vajlugkub nrog koj. Ces tom qab ntawd, nug lawv seb tshuav qhov twg koj yuav tau xyaum ntxiv, kom koj thiaj txawj qhia. Nco ntsoov tias txawm koj paub tej uas koj qhia, los tus kawm tseem tsis tau paub. Thiab koj yuav tau ua tib zoo xav tias, nws ho yuav xav li cas txog qhov uas neb tab tom yuav kawm. Koj yuav tau pab kom nws pom tias txoj xov zoo uas peb qhia, yeej yuav pab tau nws. Yog koj ua li no, yuav pab tau nws muaj kev sib raug zoo nrog Yehauvas thiab muaj kev kaj siab.​—Phau Ntawv Nkauj 1:1-3.

16. Ua cas zoo rau peb xyaum kom peb txawj qhia?

¹⁶ Tsis muaj ib yam dab tsi ua rau peb zoo siab npaum li qhov uas peb pab tau ib tug los nrog Yehauvas sib raug zoo. Thaum nyob hauv lub ntiaj teb tshiab, haj tseem yuav muaj neeg coob heev rau peb qhia. Yog li thaum peb mus tshaj tawm txoj xov zoo, peb yuav tau mob siab txog cov uas peb qhia Vajlugkub rau, muab Vajtswv Txoj Lus los qhia rau lawv, thiab qhia kom lawv los paub txog Yehauvas. Yog peb ua li hais no, thaum peb mus tshaj tawm peb thiaj yuav txawj qhia lwm leej lwm tus.