Paub Tias Yam Twg Tseem Ceeb Dua

1-2. Muaj dab tsi yuav tab kaum kom peb tsis nco muab yam uas tseem ceeb tshaj tso ua ntej?

MUAB xav li no, koj tseem tab tom tsav tsheb koj lub xov tooj cia li nrov, xyov puas yog muaj ib tug hu kom koj pab nws, los sis puas yog muaj ib yam dab tsi tseem ceeb. Xyov koj yuav teb los tsis teb, rau qhov koj paub tias koj yuav tau saib ntsoov txoj hau kev. Tib yam li ntawd, peb lub neej yeej muaj ub muaj no los tab kaum peb, tiam sis peb yuav tau paub txiav txim siab tias yam twg yog yam tseem ceeb dua.

² Hauv peb lub neej peb yeej muaj ntau yam tseem ceeb uas peb yuav tau ua. Thiab peb paub tias yam uas tseem ceeb tshaj, yog peb yuav tsum tau hau ntsoov ua peb tes hauj lwma rau Yehauvas. (Mathais 6:33) Yog li, peb yuav tau ua tib zoo txiav txim siab seb yam twg yuav noj peb lub sij hawm thiab yuav ua rau peb sab dhau, kom peb muab tsis tau Yehauvas tso ua ntej hauv peb lub neej.​—Pajlug 4:25; Mathais 6:22.

3. Zaj kawm no yuav pab tau peb li cas?

³ Peb yeej tsis xav kom muaj yam ub yam no los tab kaum peb, es ua rau peb tsis muab Yehauvas tes hauj lwm tso ua ntej hauv peb lub neej. Tiam sis kuj yuav muaj tej yam uas los tab kaum tau peb. (Lukas 21:34-36) Yog li, yuav kom pab peb muab tau Yehauvas tes hauj lwm tso ua ntej, cia peb mus kawm tias (1) yuav muaj dab tsi los tab kaum peb, (2) Yexus muab Yehauvas tes hauj lwm tso ua ntej li cas, thiab (3) niaj hnub nim no peb xyaum tau Yexus tus qauv li cas.

YUAV MUAJ DAB TSI LOS TAB KAUM PEB?

4-6. Muaj tej yam twg yuav los tab kaum tau peb?

⁴ Peb lub neej yeej muaj ntau yam tseem ceeb uas peb yuav tau ua. Xws li, tej zaum peb txhawj txog kev mob kev nkeeg, yuav tau saib xyuas peb tsev neeg los sis lwm yam. Tej no yeej tseem ceeb rau peb thiab peb yuav tau saib xyuas. Tiam sis tej no puas yuav los tab kaum tau peb kom peb muab tsis tau Yehauvas tes hauj lwm tso ua ntej? Yeej yuav tab kaum tau, yog tias peb tsuas xav ntsoov txog tej ntawd thiab siv peb lub sij hawm ntau dhau mus ua, ces yuav ua rau peb tsis muaj sij hawm los sis lub dag zog ua Vajtswv tes hauj lwm lawm.

⁵ Ntxiv ntawd, peb ib txhia nyob rau tej thaj chaw uas muaj kev ua nruj ua tsiv, khwv tsis txaus noj tsis txaus haus, muaj kab mob sib kis, thiab muaj lwm yam teeb meem tsis tseg tsis tu. (2 Timautes 3:1) Thaum peb ntsib tej yam no, yuav ua rau peb muaj kev txhawj xeeb thiab xav ntsoov txog tej teeb meem ntawd.

⁶ Tej zaum peb kuj paub tej tug uas ntsib tej qho teeb meem uas ua rau lawv lub neej tsis zoo li qub lawm. Thaum muaj li no rau lawv, yeej ua rau lawv nyuaj siab ntxhov plawv. Yehauvas tsis tau tsim kom tib neeg raug kev txom nyem nyuaj siab. Twb vim yog li no, thiaj ua rau tej tug xav tias lawv ua tsis tau lub neej raws li lub siab xav! Lawv ib txhia thiaj mus ua ub ua no kom lom zem, kom ua rau lawv tsis txhob xav txog lawv tej teeb meem. Peb yuav ua li cas yog muaj li no rau peb? Cia peb mus kawm seb peb khaws tau dab tsi los ntawm Yexus, thiaj yuav pab tau peb muab peb txoj kev pe hawm Yehauvas tso ua ntej hauv peb lub neej.

YEXUS MUAB YEHAUVAS TES HAUJ LWM TSO UA NTEJ LI CAS?

7. Muaj tej yam twg tab kaum tau Yexus?

⁷ Yeej muaj ntau yam los tab kaum tau Yexus xws li, tej teeb meem uas tej tib neeg muaj thiab qhov uas nom tswv coj tsis zoo. Nyob rau Yexus tiam, muaj neeg coob coob txom nyem thiab muaj mob muaj nkeeg. (Mathais 14:14; Malakaus 14:7) Tsis tas li ntawd, cov tib neeg raug kev tsis ncaj ncees los ntawm cov neeg Loos thiab cov neeg Yudais. Thaum cov tib neeg pom Yexus ua tej txuj ci, lawv xav muab nws tsa los ua lawv tus vaj ntxwv. (Yauhas 6:14, 15) Ntxiv ntawd, Xatas ntxias kom Yexus los kav lub ntiaj teb. Tej zaum qhov no kuj yuav ua tau rau Yexus xav tias, yog ib qho zoo uas nws kav lub qab ntuj no. (Mathais 4:8, 9) Tsis tas li ntawd, muaj ib zaug tus tub txib Petus txhawb kom Yexus txhob xav ntau ntau nws thiaj tsis nyuaj siab. Petus hais rau Yexus tias: “Tus Tswv, txhob hais li ko.”​—Mathais 16:21, 22.

8. Dab tsi pab tau Yexus muab Vajtswv tso ua ntej?

⁸ Dab tsi pab tau Yexus muab Yehauvas tes hauj lwm tso ua ntej hauv nws lub neej? Muaj peb yam. Yam ib, nws xav li Yehauvas xav. (Yauhas 8:28; 14:9) Yam ob, nws rau siab ntso mus tshaj mus qhia. (Mathais 9:35) Yam peb, nws to taub tias yam twg tseem ceeb dua. (Yauhas 4:34) Nws ua siab tawv qhawv tawm tsam Xatas tej lus haub ntxias. Thiab Yexus paub tias Petus xav rau qhov zoo xwb tiam sis tsis mus raws li Yehauvas lub siab nyiam lawm. (Mathais 4:10; 16:23) Yexus tsis cia tej uas neeg xav los sis tej uas neeg ua, los tab kaum nws tes hauj lwm uas nws ua rau Vajtswv. Yeej muaj tseeb tias tej yam uas los tab kaum peb, yuav txawv ntawm tej uas los tab kaum Yexus. Tiam sis yog peb ua raws li peb yam hais no, yuav pab tau peb xyaum Yexus tus qauv kom muab Yehauvas tso ua ntej hauv peb lub neej.

PEB MUAB YEHAUVAS TSO UA NTEJ HAUV PEB LUB NEEJ LI CAS?

9. Qhov uas “ua tib zoo nrhiav kom nkag siab tias yam twg raws li Vajtswv Yehauvas lub siab nyiam” yog li cas? (Efexaus 5:17)

⁹ Muaj Yehauvas txoj kev xav. Yog peb ua li no yuav pab tau peb “ua tib zoo nrhiav kom nkag siab tias yam twg raws li Vajtswv Yehauvas lub siab nyiam.” (Nyeem Efexaus 5:17.) Yog li, peb yuav tau nyeem nws Txoj Lus thiab muab coj los ua tib zoo xav, peb thiaj ua tau haum Yehauvas siab. Txawm tias phau Vajlugkub tsis qhia tsi ntsees txog yam uas peb raug los, yog peb muab coj los ua tib zoo xav yuav pab kom peb muab Yehauvas tso ua ntej hauv peb lub neej. Peb yuav ua li no li cas? Peb yuav tau kawm Vajtswv Txoj Lus, peb thiaj paub tias Yehauvas xav li cas. Thaum peb to taub lawd, peb yuav tau coj raws li tej uas peb kawm.

10. Yuav ua li cas peb thiaj kawm tau Yehauvas txoj kev xav?

¹⁰ Yuav kom peb paub tias Yehauvas xav li cas, peb yuav tau kawm nws Txoj Lus thiab ua tib zoo xav txog qhov uas Nws pab tib neeg. (Yelemis 45:5) Thaum peb nyeem txog tej zaj uas Yehauvas pab tib neeg, peb kuj nug tau peb tus kheej li no: ‘Zaj no qhia li cas txog Yehauvas? Kuv yuav coj li cas kuv thiaj xav li Yehauvas xav?’ Yeej muaj tseeb tias, Yehauvas txoj kev xav yeej siab dua peb txoj kev xav. (Yaxayas 55:9) Yog li, yeej tsim nyog peb thov kom nws pab peb ua tau raws li nws lub siab nyiam. (Phau Ntawv Nkauj 143:10) Thiab peb thov kom Yehauvas pab peb to taub txog nws txoj kev xav thiab coj los siv hauv peb lub neej.​—1 Yauhas 5:14.

11. Yehauvas tsis xav kom peb txhawj dhau txog dab tsi?

¹¹ Yog peb kawm kom peb muaj Yehauvas txoj kev xav, ces peb yuav to taub tias yog vim li cas Yehauvas tsis xav kom peb cia yam ub yam no los tab kaum peb, es thaum lub sim ceeb no kawg los peb thiaj yuav npaj txhij. (Mathais 24:44) Thiab nws tsis xav kom peb txhawj xeeb heev dhau lawm. (Mathais 6:31, 32) Yog li thaum peb txhawj txog peb tej kev mob kev nkeeg, peb txoj hauj lwm, peb lub vaj lub tsev, peb tsev neeg los sis lwm yam, Yehauvas muaj tej tswv yim uas yuav pab txhawb tau peb lub dag lub zog kom peb thev taus.​—Phau Ntawv Nkauj 55:22; Pajlug 3:5-7.

12. Yuav kom peb thev taus tej teeb meem hauv ntiaj teb no peb yuav tau ua dab tsi? (Mathais 5:3)

¹² Rau siab ntso ua Vajtswv tes hauj lwm. Peb txhua tus yeej txhawj txog tej teeb meem uas muaj nyob hauv ntiaj teb no uas peb twb ua tsis tau dab tsi los cheem. Yuav kom peb tsis txhob cia tej teeb meem no los tab kaum peb, peb yuav tau rau siab ntso teev tiam Yehauvas. Yog peb ua npaum li peb ua tau kom tuav rawv peb txoj kev sib raug zoo nrog Yehauvas, ces peb yuav muaj kev zoo siab. Rau qhov Yehauvas yeej tsim kom peb vam khom nws. (Nyeem Mathais 5:3.) Yuav kom peb muaj kev txaus siab rau peb lub neej, peb yuav tau kawm nws Txoj Lus thiab ua nws tej hauj lwm npaum li peb ua tau. Yog peb ua li no, ces peb ua tau haum Yehauvas siab rau qhov peb siv peb lub sij hawm muaj nqis.​—Pajlug 23:15.

13. Yuav ua li cas peb thiaj “siv [peb] lub sij hawm kom muaj nuj nqis”?

¹³ Peb yuav tau “siv [peb] lub sij hawm kom muaj nuj nqis.” (Efexaus 5:15, 16) Phau Vajlugkub tsis yog lam qhia kom peb paub ntsuas peb lub sij hawm txhua txhua hnub xwb. Tiam sis, yog txhawb kom peb ua tib zoo xav thiab txawj siv peb lub sij hawm kom zoo ua ntej Yehauvas yuav los rhuav tshem lub sim ceeb no. Peb yuav ua li cas peb thiaj siv peb lub sij hawm kom muaj nuj nqis? Yog peb pheej saib tej xov xwm phem tas zog, yeej yuav tab kaum tau peb, yuav ua rau peb qaug zog, thiab tsis kub siab ua Vajtswv tes hauj lwm. Zoo dua yog peb tsis txhob saib los sis nyeem txog tej xov xwm heev dhau! Yog peb ua li no peb thiaj tsis nyuaj siab, peb thiaj muab tau Yehauvas tes hauj lwm tso ua ntej hauv peb lub neej. Peb kuj xav seb peb ua tau Vajtswv tes hauj lwm kom ntau ntxiv li cas. Xws li, peb kuj rau siab ntso rov mus xyuas cov uas peb mus tshaj tawm rau. Peb paub tias tseem ceeb heev, peb yuav tau ua npaum li peb ua tau, kom thiaj li pab tau tib neeg “tau kev cawm dim thiab kom lawv los paub qhov tseeb tiag tiag.”​—1 Timautes 2:4.

14. Yog peb rau siab ntso teev tiam Yehauvas yuav pab tau peb li cas? (Saib daim duab.)

¹⁴ Yog peb rau siab ntso teev tiam Yehauvas, yuav pab tau peb nco ntsoov tias, yog vim li cas thiaj muaj tej kev phem nyob hauv ntiaj teb no. Txawm yuav muaj kev ua nruj ua tsiv, khwv tsis txaus noj tsis txaus haus, thiab muaj kab mob kis qhov txhia chaw los peb yuav tsis poob siab, vim phau Vajlugkub twb faj lem txog tej no lawm. Peb tsis txhob cia txoj kev ntshai los tab kaum peb. Peb tso siab tias Yehauvas yuav los kho tej teeb meem thiab peb yuav tau mus nyob hauv lub ntiaj teb tshiab. Tiam sis ua ntej ntawd, peb paub tias Yehauvas yuav pab kom peb nyiaj taus tej teeb meem thiab ua tau lub siab tus.​—Phau Ntawv Nkauj 16:8; 112:1, 6-8.

15. Kev “thoob tsib to nrog” pab kom peb paub ua li cas? (1 Petus 4:7)

¹⁵ Nco ntsoov tias yam twg tseem ceeb dua. Tib neeg feem coob tsuas xav ntsoov txog txoj kev ua si lom zem xwb, lawv twb tsis quav ntsej tias lub sim ceeb no twb yuav kawg. Kev ua si lom zem yeej tsis txhaum, tiam sis peb yuav tau “thoob tsib to nrog” kom peb thiaj li tsis xav li lub qab ntuj neeg no xav. (Nyeem 1 Petus 4:7.) Qhov no qhia rau peb li cas? Qhia tias peb yuav tau paub txiav txim siab kom zoo, tsis txhob muab peb lub sij hawm mus ua si lom zem ntau dhau. Thaum peb txawj siv peb lub sij hawm kom muaj nuj nqis, ces qhia tias peb muaj Yehauvas txoj kev xav, thiab peb paub tias yam twg tseem ceeb thiab yam twg tsis tseem ceeb.​—2 Timautes 1:7.

16. Yexus xav ntsoov li cas xwb tab txawm nws txoj sia twb yuav tu?

¹⁶ Yexus yeej nco ntsoov tias yam twg tseem ceeb dua. Thaum nws txoj sia twb yuav tu los, nws tsuas xav ntsoov txog qhov uas npuab siab rawv rau Yehauvas, thiab ua kom tau raws li Yehauvas lub siab nyiam. Twb vim yog li ntawd, nws thiaj siv zog thov Vajtswv. Tiam sis nws cov thwj tim tsaug zog zis, tsis siv zog thov Vajtswv li nws, vim lawv “nyuaj siab kawg li.”​—Lukas 22:39-46; Yauhas 19:30.

17. Vim li cas coob tus siv tej vej xaij zeem phooj ywg, thiab yog peb tsis ceev faj yuav tab kaum tau peb li cas? (Saib daim duab.)

¹⁷ Peb nyob rau lub caij uas muaj kev nyuaj siab ntxhov plawv kawg li, zoo tib yam li thaum Yexus cov thwj tim thiab. Tej xwm txheej uas muaj niaj hnub nim no ua rau peb muaj kev txhawj xeeb. Vim li no thiaj muaj coob leej ntau tus nrhiav kev tso pa los ntawm tej vej xaij zeem phooj ywg. Lawv siv tej vej xaij los txuas lus nrog lawv tsev neeg, lawv cov phooj ywg thiab lwm tus nyob thoob plaws ntiaj teb, thiab tso lawv tej duab qhia txog seb lawv noj nyob li cas lawm. Lawv kuj siv mus saib yeeb yaj kiab, mus tua nkees (games) thiab saib lwm yam. Thaum lawv ua li ntawd, lawv nkim lawv lub sij hawm thiab lawv lub dag lub zog ntau kawg li mus saib thiab nyeem txog ub txog no. Yuav kom peb paub luj peb lub sij hawm siv tej vej xaij zeem phooj ywg, peb yuav tau nug peb tus kheej li no, ‘Qhov uas kuv saib tej vej xaij zeem phooj ywg puas ua rau kuv kaj siab? Puas ua rau kuv tsis nco qab tias yam twg tseem ceeb dua lawm?’

18. Vim li cas peb yuav tau txawj xaiv tej yam uas peb saib?

¹⁸ Peb yuav tau paub txiav txim siab thaum saib tej yeeb yaj kiab nyob hauv Is Taws Nej, hauv TV, los sis tua nkees. Tej no yeej lom zem. Tiam sis peb yuav tau txawj xaiv tej uas peb saib los sis tej nkees uas peb tua, thiab peb yuav tau tswj lub sij hawm thaum saib tej no. Hais txog tej yeeb yaj kiab, thaum peb saib ib zaj tag, yuav tawm dua lwm zaj tuaj kom peb saib ntxiv. Ces tej zaud peb yuav mus saib tau tej zaj ua nruj ua tsiv thiab ua tej yam tsis dawb huv. Tau muaj li no rau ib tug kwv tij nyob sab Axias. Thaum xub thawj nws tsuas mus saib tej yeeb yaj kiab luv luv seb yuav muaj zaj twg tawm hauv Is Taws Nej xwb. Tiam sis nws pheej saib ntxiv cov uas tawm tuaj, tos nco xwb nws cia li mus saib tej yam tsis dawb huv. Ces nws cia li pib saib tej duab liab qab. Zoo kawg uas muaj cov txwj laus thiab muaj tej tug phooj ywg zoo pab nws, nws thiaj li tsum tau thiab muab tej lub vej xaij hauv nws lub xov tooj tshem tawm mus. Ces nws thiaj li caws sij hawm tias nws tsuas saib ntev li cas lawm xwb. Tej tug qauv no, qhia tau rau peb tias peb yuav tau txawj txiav txim siab thiab txawj xaiv tej yam uas peb saib.

19. Yuav muaj li cas xwb yog peb siv peb lub sij hawm mus ua si ntau dhau?

¹⁹ Tsis tas li ntawd, peb kuj yuav tau txawj txiav txim siab thaum hais txog mus ua si lom zem thiab mus so kom los siav. Yeej paub tias tej lub caij peb yuav tau mus so kom los siav, peb thiaj noj qab nyob zoo. Tiam sis yog peb xav ntsoov txog qhov uas mus ua si lom zem xwb, ces yuav ua rau peb tsis nco qab xav tias yam twg tseem ceeb dua lawm. (Filipis 1:10) Peb txhua tus yuav tau txiav txim siab seb, peb yuav ua dab tsi rau dab tsi thiab peb yuav siv sij hawm ntau npaum li cas. Thaum peb txiav txim siab yuav ua ib yam dab tsi, peb yuav tau nug peb tus kheej li no: ‘Thaum kuv mus ua si lom zem los sis mus so kom los siav, yuav siv sij hawm ntau npaum li cas? Kuv puas nco ntsoov tias yam twg tseem ceeb dua, thiab kuv puas npaj tau kuv tus kheej tias “ib puas tsav yam hauv ntiajteb no [twb yuav] puastsuaj”?’

20. Vim li cas peb tsis txhob cia ib yam dab tsi los tab kaum peb?

²⁰ Peb yuav tau tsis txhob cia yam ub yam no los tab kaum peb txoj kev teev tiam Yehauvas. (Yaxayas 48:17) Yog muaj Yehauvas pab peb lawd, peb yuav thev taus tej kev nyuaj siab hauv peb lub neej. Txawm lub ntiaj teb yuav ua voj ua viag los peb yuav tsis poob siab. Thiab peb yuav zam tsis tau hau ntsoov rau kev ua si lom zem xwb. Cia peb siv zog muaj Yehauvas txoj kev xav, rau siab ntso ua Vajtswv tes hauj lwm, thiab nco ntsoov tias yam twg tseem ceeb dua. Yog peb ua li no, peb yuav tsis cia ib yam dab tsi los tab kaum peb thiab “thiaj yog [peb] tuav rawv txoj sia tiag tiag.”​—1 Timautes 6:19.