Zaj uas Xalaumoos qhia, pab peb pom tias tej yam uas muaj tshwm sim no yeej muaj tau rau cov uas teev tiam Yehauvas tib yam nkaus. Tej zaud ib tug twg kuj mus ua kev txhaum loj thiab hais tias ib sij huam xwb nws twb ua tau li ntawd lawm. Tiam sis yog nws ua tib zoo xav ntxaws ntxaws txog tej yam nws ua mas nws yuav pom tias nws txiav txim tsis zoo ntau zaus ua ntej nws thiaj mus ua txhaum. Nws tej kev txiav txim siab tsis zoo tej zaum yog nws pheej mus nrog cov neeg tsis hlub Yehauvas ua ke, nws saib tej yam qias vuab tsuab, mus saib tej vej xaij tsis zoo, los sis mus tej qho chaw uas tsis tsim nyog rau ib tug Khixatias mus. Tej zaud nws twb tseg tsis thov Yehauvas, tsis nyeem phau Vajlugkub, tsis mus kev sib txoos los sis mus qhia Vajlugkub lawm. Zoo ib yam li tus tub hluas uas hais nyob rau hauv Paj Lug, nws ua txhaum loj li no tsis yog ib sij huam xwb cia li ua tau. Peb khaws tau zaj no li cas? Tsis yog peb zam kom tsis txhob ua txhaum xwb tiam sis peb yuav tau zam tej yam uas coj tau peb mus ua kev txhaum. Xalaumoos hais li no tom qab nws piav txog zaj no.​—Mathais 5:29, 30. w24.07 16 ¶10-11

Tej yam muaj nqes ntawd yog dab tsi? Tej yam ntawd yog mus tshaj tawm txog lub Nceeg Vaj kom cawm tau neeg txoj sia. (2 Kauleethaus 4:1) Ua li lub hub av yog dab tsi? Lub hub av yog Vajtswv cov tib neeg uas mus tshaj tawm txoj xov zoo rau lwm tus. Nyob rau Povlauj tiam, cov neeg lag luam siv tej hub av coj los ntim tej uas muaj nqes xws li zaub mov, cawv, thiab nyiaj xwv lawv thiaj nqa tau ib qho chaw mus rau ib qho chaw. Zoo ib yam li ntawd, Yehauvas kuj siv peb nqa txoj xov zoo mus qhia rau tib neeg. Yog muaj Yehauvas ua tus pab peb ces peb yuav muaj dag muaj zog mus tshaj tawm txoj xov zoo tsis tseg tsis tu. Muaj qee lub sij hawm peb yeej ntshai tib neeg los sis ntshai tsam lawv tsis nyiam. Yuav ua li cas peb thiaj tsis ntshai? Nco ntsoov cov tub txib tej lus thov thaum lwm tus txwv kom lawv tsis txhob qhia txoj xov zoo ntxiv lawm. Lawv tsis ntshai thiab haj tseem qhia txoj xov zoo tsis tseg tsis tu. Lawv thov kom Yehauvas pab lawv yim huab muaj lub siab tawv qhia. Yehauvas yeej teb kiag lawv tej lus thov. (Tes Hauj Lwm 4:18, 29, 31) Yog hais tias koj ho ntshai mus qhia txoj xov zoo rau tib neeg, thov kom Yehauvas pab koj hlub tshua tib neeg xwv koj thiaj tsis ntshai mus qhia txoj xov zoo rau lawv. w24.04 16 ¶8-9

Qhov uas peb hlub Yehauvas yuav ua rau peb hwm nws lub npe kom dawb huv. Yog li ntawd, peb thiaj xav qhia rau txhua leej txhua tus paub tias tej uas Xatas iab liam txog Yehauvas tsis muaj tseeb. (Chiv Keeb 3:1-5; Yauj 2:4; Yauhas 8:44) Thaum peb qhia txoj xov zoo, peb muaj lub siab xav qhia kom txhua tus uas hnov ntawd paub tias Yehauvas zoo li cas rau li cas tiag. Peb xav kom txhua tus paub tias Yehauvas qhov yeeb yam qhuas lug uas loj tshaj yog kev hlub, nws txoj kev kav yeej ncaj ncees, thiab tsis ntev tom ntej no nws lub Nceeg Vaj yuav los muab tej kev txom nyem rhuav tshem thiab yuav muaj kev thaj yeeb thiab kev zoo siab rau txhua tus tib neeg. (Ntawv Nkauj 37:10, 11, 29; 1 Yauhas 4:8) Thaum peb qhia tej no txog Yehauvas rau tib neeg, twb yog peb hwm nws lub npe. Tsis tas li ntawd, peb kuj zoo siab heev rau qhov peb ua tej yam uas tsim nyog peb ua vim peb yog Yehauvas Cov Tim Khawv. w24.05 18 ¶12