ERESENI 46
Naseki Ogwenerete Kwerua Aye Omonyene na Kobatiswa?
Nigo okwerua aye omonyene ase Yehova goetera komoriera eira ase ogosaba ng’a nomosasime ere bweka na gotang’ania ogwancha kwaye ase obogima bwao. (Zaburi 40:8) Nyuma ya ayio, kwabatiswa. Ase ogokora bo, nigo okworokia abande ng’a kwerure aye omonyene. Ogochora gw’okwerua abanyene gochia ase Yehova nakwo ogochora kw’engencho mono omonto arakore. Oko n’ogochora kw’engencho okwo koraonchorerie obogima bwao. Ninki keragosegete gokora ogochora oko?
1. Ninki gekomosegeta omonto kwerua ere omonyene?
Okwerua gwaito ase Yehova nigo kogosegetwa n’obwanchani. (1 Yohana 4:10, 19) Ebibilia nigo egototebia: “Mwanche Omonene [“Yehova,” NWT] Nyasae oo nenkoro yao yonsi, na omoyo oo bwonsi, na obong’aini bwao bwonsi, nechinguru chiao chionsi.” (Mariko 12:30) Nigo tokworokia ng’a ntomwanchete Nyasae tari ase aria togokwana oka korende boigo nase aria togokora. Buna abanyuomaine banchaine, igo obwanchani bwaito ase Yehova nigo bogotosegeta twerue intwe abanyene asare na kobatiswa.
2. Masesenio ki Yehova akobaa Birori baye babatisire?
Ekero okobatiswa, nigo okoba oyomo bw’enka ya Yehova ere nomogoko. Mbwerorere obwanchani bwaye ase chinchera chinyinge mono, na nogenderere komoika ang’e mono. (Soma Malaki 3:16-18.) Komenta na ayio Yehova nabe Iso oo, boigo nobe n’enka ya kemoika ya bamura na basubati baminto ase ense engima abwo bamwanchete Yehova na bagwanchete boigo. (Soma Mariko 10:29, 30.) Korende, goika oire ebitambokero gete otarabatiswa. Nigo obwenerete kwegera igoro ya Yehova, komwancha na koba n’okwegena ase Omwana oye. Omoerio oye goika bwerue aye omonyene gochia ase Yehova. Oise gokora ebinto ebio na kobatiswa nenyarekane ogokere obogima goika kare na kare. Ring’ana ria Nyasae nigo rigoteba: “Nebatiso, eyekobatooria inwe bono.”—1 Petero 3:21.
EGERA AMANGE
Egera naseki kere egento ki’engencho kwerua aye omonyene ase Yehova na kobatiswa.
3. Twensi goika tochore ning’o torakorere
Ase Israeli ya kare, abanto bande bakarengereria ng’a nabo bakomosasima Yehova na enyasae y’oborimo Baali. Korende Yehova akamotoma omobani oye Elija erio korongeyia ebirengererio ebio. Soma 1 Abaruoti 18:21, na mokwanere riborio eri:
Ngochora ki Abaisraeli baganeirie gokora?
Buna Abaisraeli, naintwe boigo goika tochore ning’o torakorere. Soma Luka 16:13, na mokwanere amaborio aya:
Naseki totabwenereti komosasima Yehova nechingaki echio echio gosasima omonto gose egento kende?
Inaki toramworokie Yehova ng’a twachorire komosasima ere?
4. Genderera korengereria botambe obwanchani bwa Yehova gocha asore
Yehova otoire ebiegwa ebinge ebiya. Intwe ninki toranyare komoa? Orokia EVIDIO.
Nase nchera ki chinde Yehova akworokirie obwanchani? Soma Zaburi 104:14, 15 na 1 Yohana 4:9, 10, na mokwanere amaborio akobwatia:
Mbiegwa ki bikorwa ase Yehova bikogosegeta komoiraneria ng’a mbuya mono?
Inaki ebiegwa ebio bikogera oigwe igoro ya Nyasae?
Ekero tokonyora ekeegwa ekio twanchete mono, nigo togosegetwa komoiraneria mbuya mono oria otoire ekeegwa ekio. Soma Okoiranerera kw’Amachiko 16:17, na mokwanere riborio eri:
Ekero okorengereria ebinto bionsi Yehova agokoreire, ninki ogosegetwa komoa?
5. Ekero okwerua aye omonyene ase Yehova, nagosesenie ase chinchera chinyinge
Abanto abange nigo begenete ng’a komanyekana mono, koba n’emeremo emiya, gose chibesa mbibarentere omogoko. Inee, n’ekeene? Orokia EVIDIO, na mokwanere amaborio akobwatia.
Nonya omogosoria oyo ase evidio bwanchete gochiesa omobira, naseki atigete gochiesa omobira bw’ogoakanwa?
Agachora kwerua ere omonyene gochia ase Yehova korende tari ase omobira. Inee, okorengereria nakorete ogochora okuya? Naseki?
Omotomwa Paulo ataraba Omokristo, nigo arenge gokora emeremo emenene. Konyora bweorokereirie richiko ria Abayahudi inse y’omworokia oyio omanyekanete mono. Korende agatiga ayio onsi erinde koba Omokristo. Inee, Paulo neitetie ase nchera ende yonsi? Soma Abafilipi 3:8, na mokwanere amaborio aya:
Naseki Paulo atabete ng’a aria onsi akorete ataraba Omokristo nigo ayabarete “buna eubi?”
Ribaga riaye ninki anyorete?
Inee, okorengereria obogima bwao mbobe obuya mono oise gochora komokorera Yehova? Naseki?
Ekero Paulo abete Omokristo, akanyora ebinge mono kobua biria atigete
ABANTO BANDE NIGO BAGOTEBA: “Nimanyete eke n’ekeene korende tindearigania kobatiswa.”
Okorengereria naseki kere egento ki’engencho kwerua aye omonyene gochia ase Yehova?
ASE OBWENG’E
Obwanchani nigo bogotosegeta twerue intwe abanyene gochia ase Yehova na kobatiswa.
Einyorie
Inee, naseki Yehova aganetie tomwanche nenkoro yaito yonsi na komosasima?
Nase nchera ki Yehova akobasesenia Birori baye babatisire?
Inee, mbwanche kwerua aye omonyene gochia ase Yehova?
TUKA MONO
Rora naseki omobugia chingero na omogosoria enkoyo bachorete kwerua abanyene gochia ase Yehova.
Abasae Nigo Bakoboria—Ninki Ndakorere Obogima Bwane?—Koinyora Ayaetire (6:54)
Rora chisababu chinde chi’okwerua aye omonyene gochia ase Yehova.
“Naseki Ng’erue Nche Omonyene Gochia ase Yehova?” (Mnara wa Mlinzi, Januari 15, 2010)
Ase ogotera oko gw’evidio, rora omogoko oyio baria bakwerua abanyene gochia ase Yehova bakonyora.
Ase omogano “Emiaka Emenge Nigo Neboretie, ‘Naseki Tore Moyo?’” rora ring’ana riamokoonyete omokungu oyomo gotuka amang’ana aratang’anie ase obogima.
“Ebibilia Nigo Egoonchoreria Obogima” (mnara wa Mlinzi, Novemba 1, 2012)